San Marcos 4
4
Jesús‑ni rigixxi'abie ge ttu benne dia gwedelha xuxtila
(Mt. 13:1-23; Lc. 8:4-15)
1Jesús‑ni bededuloe attu libe rodole'enie ka benne ka tisa ge Tata Do Yebáha ro'o indatooha nna ixe juisiru ka benne bedetupake abi'iba kwe'ebie. Laxkala teeki ugwapie lo ttu barcu daa lo indaha nna udoe lhe'e nuha. Ka benne tupaha nna ro'o indaha‑liba se'eke rudo nagake gebie. 2Ixeba nu rigixxi'anie ke. Aníha benie ki utte dáke bí diani nu raka lebie kixxi'anie keha, nianna tti ree ke:
3―¡Gwaludoruga nagale! Ttu nubiyú ruin sina biriana diana gwedelha xuxtila. 4Tti dana gwedelha xuaha nna adí benneha utse ro'o nedaha, nianna tti biginni ka binniha, nna bediga ttebakana benneha. 5Attu chupe nna utse lo íyya atta'a ata labí gwadilo yu do. Benneha nna gwa be'eyu ttebe kumu de labí rea xua yuha niha. 6Ttaka tti biria tatubisaha nna bettebe benneha kumu de labí lhi'u dia lhue, de nuha nna ubisi tteba benneha. 7Attu chupe nna utse lhe'e yietsiha, ttaka yietsiha biyelhabana nna belhiubinna benneha. Laxkala labí xua bete benneha. 8Ttaka adí benneha nna gwa ubinnibe ata do yu tse. Benneha nna yalhá lhe'e be'eyue lhe biyelhe lhe. Laxkala tseba betebie lena. De rerua (30) lhe de gayuna (60) lhe de gayua (100) tteba xua bekudhi iki ttu ttu ka xuxtilaha.
9Nianna tti ra Jesús‑ni ke:
―¡Ata sia nagale, gwaludo nagale ganna gwankale nu dika iyienini!
10Atti chi beya'an Jesús‑ni sun ttúbe lenie ka benne tsi'inu rudhetinieha (12) lhe attu chupa ka benne se'e gaxxaba ata dueha lhe, nianna tti unnaba tisake bie, ráke bie:
―¿Bí diani nu ralu tti utixxi'alu ge benne dia gwedelha xuxtilaha?
11Labie nna ree ke:
―Lebi'iligaba nna gwagixxi'abin Tata Do Yebáha le nu labí chi yu adí ka benne, delába gwa ruinba Tata Do Yebáha kini tte denle gasina innabie ka benne. Ttaka ka benne abittu chi rinnabie, neti bixxi kwe'eba rinnea tti rigixxi'ania ke nuní,
12kini meskiba gwa rulannike nna labí ilákanie,
lhe meskiba gwa rudo nagake nna labí tte dákanie;
aníha kini ka eyekike nna odaxxuke neda ge Tata Do Yebáha,
lee nna dhie elha xen lasi geke.
13Nianna tti ree ka benneha:
―¿Si lagwa gwa rite denle bí diani nu utixxi'aya ge benne dia gwedelha xuxtilaha? ¿Galasina tte denle adíru ka nu kixxi'ania le ganna? 14Benne rudelha xuxtilaha anke benne rigixxi'e ka tisa ge Tata Do Yebáha. 15Ka xua utsa kwe'e nedaha nna ankake ka benne biyienkanie ka tisaha. Ttaka daa tteba nu xxegwiha nna rebea ttebana ka tisaha lhe'e lastoke; delába ruinna kini rexulhakanie ka tisa chi biyienkanieha. 16Adíke nna ankake ttiba ka xua utsa lo íyya atta'aha. Tti biyienkanie ka tisaha nna ittaba bedúna leke nna bedaxxu ttebake ka tisaha. 17Ttaka kumu de labí chi begwe lhu ka tisaha lhe'e lastoke, de nuha nna sattiruba ria leke ge Tata Do Yebáha, nna atti chi rateke ttu bixa elha disa o lhe atti chi ridú nookana ke de ria leke ka tisaha, la'ania nna reyadi gaa ttebake. 18Alhe ka benneha nna ankake attiba ka xua utsa lhe'e yietsiha. Gwa riyienbakanie ka tisaha, 19ttaka ka elhaxchacha iki geke tee yiesi lo yu‑ni lhe de rudo xxattana leke gatta geke, lhe anágaba lhe de ru'u xxatta leke ge adíru nu tee yiesi lo yu‑ni, nuha‑la rudoruna leke ruinke, de nuha nna richúbana lo ka tisaha. La'ania nna labí ruin ka tisaha sina lhe'e lastoke kini uin tseke. 20Adíke nna ankake attiba ka xua ubinni lo yu tseha. Ka benneha nuha riyienkanie ka tisaha nna bedaxxuke ka tisaha. Laxkala gwa ruinba ka tisaha sina lhe'e lastoke. Ka benneha nuha ankake attiba ka xuxtila bete de rerua (30) lhe de gayuna (60) lhe de gayua (100) lhe.
Jesús‑ni rabie: “Labí ttu bixa raka sigá abittu una benne geni”
(Lc. 8:16-18)
21Rágaba Jesús‑ni kana:
―Ttu gi rudenna ki ilenri'i, laa taxxígari'i nuha kini uttudhiri'i ttu almoti ikini o ukatsiri'i na xan ata rattari'iha. ¿Laaba ganna teeki udori'i nuha gwetsá ki udenna geri'i? 22Anágaba labí ttu bixa tee gatsi nu abittu ilenri'i lhe labí ttu bixa raka sigá abittu iriana la loo. 23¡Ata sia nagale, gwaludo nagale ganna gwankale nu dika iyienini!
24Lhe rágabe kana:
―Gwaludo tsitsi nagale gasina rutte dale nu rinnea‑ni, kumu ttu luesi nu rurixxibiale rugwele ka benne, ttu luesi nuha‑gaba orixxibia Tata Do Yebáha otebie gele. Benneha nna adírula xxeni otebie gele. 25Kumu nu gwa tee geniha, gwadí chiettirula nuha nna nu abittu tee geniha nna axtala nu ttu latti chi tee geniha etua.
Jesús‑ni rigixxi'abie gasina riyelha ka xuxtila
26Jesús‑ni rágabe:
―Tata Do Yebáha atti rinnabie ka benne, elha rinnabia geeha raxxína na len nu ruin ttu benne dia gwedelha xuxtila. 27Benneha rattabe ra'adhie rela nna rani nna radhabe. Xua bedelheha nna rela resába dia benneha re'eyue lhe riyelhe lhe. Benne bedelha xuaha nna labí yue gasina raka, 28kumu titúba yuha re'eyu lena loni. Lade'axa riria lhaga to ge xuaha, nianna tti ribea ikie. Iki deliba nuha nna tti chi ru'u lhe'ebie. 29Ganna chi bigatsi xuxtilaha, la'ania nna udaxxu tteba iyyarsela ge benne bedelha xuxtilaha kini egitse benneha kumu chiba bisia sá exú benneha. Aníha‑ba raka atti rinnabia Tata Do Yebáha ka benne.
Jesús‑ni rigixxi'abie ge ttu besi ge kuana muxtasa
(Mt. 13:31-35; Lc. 13:18-19)
30Jesús‑ni rágabe:
―¿Gasina rule'e tti rinnabia Tata Do Yebáha ka benne? ¿Bí nuha rula'a tti rula'a elha rinnabia geeha? 31Tata Do Yebáha atti rinnabie ka benne, elha rinnabia geeha ankana ttiba ttu besi ge kuana muxtasa riyada lo yu. Besiha‑la nuha ankana nuxka'a toru delo iyá ka besi re'eyu yiesi lo yu‑ni. 32Ttaka iki de chi riyada besiha nna gwa re'eyubana. Nianna rixenba kuanaha nna xxenirula rakana attichula adí ka kuana ya'a. Xxeniba raka ka náni, laxkala axtaba ka binni‑na ratsiakana xula geni.
33Ixeba luesi ka tisa‑ni bixúni Jesús‑ni ki unnebie. Aníha benie kini tte dani ka benne nu raka lebie kixxi'anie ke. Utixxi'abanie ke nu dika dhaake tte dákanie. 34Labí lhixxa rá utixxi'anie ke sinuki utixxi'abe nu raxxíbana len nu raka lebie ule'enie ke. Ttaka ka benne rudhetinieha, tti due sun len ka benneha‑ba nna gwa rigixxi'abanie ke bí diani iyá tte nu reeha.
Jesús‑ni benie kini bebe sii lo indatooha
(Mt. 8:23-27; Lc. 8:22-25)
35La sáha‑gaba nuha, atti chi dia ralhaha, nianna ra Jesús‑ni ka benne rudhetinieha:
―Eteri'i lo indatoo‑ni kini eriari'i ro'oni daka nu reha.
36Niha‑ba boka'anke ka benne ixe danalhaha nna aníha‑ba dedo Jesús‑ni lo barcuha, dechekane. Danalhagaba adíru ka barcu. 37Ttaka ttiruba ttu nnelaba bisia ttu be idí nna bedhú liina lo indatooha nna uta'ana lhe'e barcuha. Laxkala chi tteba ruin nuha xxudina lhi'u lhe'e indaha. 38Ttaka Jesús‑ni nna tebe te'adhie daka xan barcuha kuni ikie ttu lari. Ka benne rudhetinieha nna bodibenke bie, ráke bie:
―¡Maestru! ¿Si bi gwa retabinlu ka tsapiri'i inda‑ni nna gattiri'i?
39Nianna tti ugwadhe bedhaka dise beha nna ree indatooha:
―¡Siiba beyaka!
La'ania nna udú sii tteba beha nna tsaba bebe sii lo indaha. 40Nianna tti ra Jesús‑ni ke:
―¿Beaka rasinle? ¿Beaka a ruxxen lele kia?
41Ttaka lake yalhá usikanie, nianna tti ra luesike:
―¿Nú anka benne‑ni nna axtaba be‑na lhe indatoo‑na lhe rudokana tisa gebie?
Jelenleg kiválasztva:
San Marcos 4: zae
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2014, Wycliffe Bible Translators, Inc. All rights reserved.
