San Mateo 26

Ka nu loni ge ka benne Israel‑ni regila lekani gasina uttikana Jesús‑ni

(Mr. 14:1-2; Lc. 22:1-2; Jn. 11:45-53)

1Atti chi uluxani Jesús‑ni unnebie iyá nu reeha, nianna tti ree ka benne rudhetinieha:

2―Lebi'i gwa yúbale, a chupa ubisaba nuní riyasa kini isia laní Pascua. La'ania neti benne daya yebáha, utekana neti lasi ná ka nu utákana neti lo ya kurusiha.

3Ka nu loni ge ka bixxudiha lhe [ka nu rule'ekinna ka benne nu ra lo bia bennabi bodha'an Moisés‑ni] lhe anágaba ka benneola ge ka nu Israel‑ni bitupakana lali'a ge yo'o ata do Caifás nu anka bixxudi xeniha, 4bitupakana nna botsi'inu lekani gasina udaxxukana Jesús‑ni nna uttikane. 5Ttaka ra luesikani:

―Bittu uinri'i nuha tti raka laníha kini ka utsatsari'i ka benne.

Ttu nuila bedona seti nu rure ixixxi iki Jesús‑ni

(Mr. 14:3-9; Jn. 12:1-8)

6Jesús‑ni doe lhe'esi Betania lhe'e lisi Simón nu uka latini yiesu nu tee láni lepra. 7Nianna tti bisin ttu nuila denna ttu re'e to ankana ge íyya ragalha. Íyya ragalhaha tee láni alabastro. Lhe'e re'e toha ta'a seti nu rure ixixxi. Setiha daka xxattana. Nianna bedo ttatta nuilaha setiha iki Jesús‑ni tti doe go yettaha. 8Tti bilani ka benne rudhetini Jesús‑ni nu ben nuilaha, nianna bisa'akanie nna ráke:

―¿Beaka kwentaba bedelha lattina seti‑na? 9A betto'ochilana nuná yaxi; belhuha nna betena nuha len ka benne dii abittu geke tee.

10Ttaka Jesús‑ni yube nu ra ka benneha, nianna tti ree ke:

―¿Beaka rinnele ge nuila‑ni? Nuní chi benna ttu nu tse len neti. 11Kumu ka benne dii abittu geke tee satíaba tse'e ka benne‑na len lebi'i, neti nna labí satía dhoa len lebi'i. 12Nuila‑ni begadina seti‑ni ikia. Benna kini odú tsena neti ki igatsia ganna chi uttiaha. 13Netiru ria: Itúba yiesi lo yu‑ni gaxaba lhe'e ka yiesi ata kixxi'a ka benne ka tisa kia‑ni, kixxi'agabake ge nuila‑ni. Aníha ki sadú le ka benne ge nu benna‑ni.

Judas‑ni betena Jesús‑ni lasi ná ka nu uttikane

(Mr. 14:10-11; Lc. 22:3-6)

14Ttu ka benne tsi'inu (12) rudhetini Jesús‑ni nu tee láni Judas Iscariote, ugíana ata se'e ka nu loni ge ka bixxudiha 15nna rana ka nuha:

―¿Tti kixale neti ki utea Jesús‑ni lasi nále?

Ka nuha nna rákana na:

―Utetu rerua (30) belhiu plata lenlu.

16Debá la'ania nna udulo Judas‑ni regila leni gasina utene lasi ná ka nu uttikaneha.

Jesús‑ni roe len ka benne rudhetinieha irse ge laní Pascua

(Mr. 14:12-25; Lc. 22:7-23; Jn. 13:21-30; 1 Co. 11:23-26)

17Sá neru ge laní Pascua tti ro ka benne Israel‑ni yettaxtila nu abittu kua dii dia ikiniha, la'ania ubiga ka benne rudhetini Jesús‑ni ata dueha nna ráke bie:

―¿Gá raka lelu sentu irse kini gori'i laní Pascua‑ni?

18Lee nna ree ka benneha:

―Gwaltsia lhe'e yiesi‑na nna gwaligá ttu benne biyú do naa: “Aní ra maestruha: Chiba dabiga isia ura kia. Lhe'e lisilu‑ni raka lasia goa irse ge laní Pascua len ka benne rudhetinia‑ni.”

19Aníha uka nna ka benne rudhetinieha benbake atti tteba raba Jesús‑ni, ugíabake gwenke irse ge laní Pascuaha.

20Tti chi ulha sáha nna bebiga Jesús‑ni ro'o mexaha len ka benne tsi'inu (12) rudhetinieha. 21Laka yu'uke go irseha nna ree ka benneha:

―Netiru ria, nuxa ttúle nuní utele neti lasi ná ka nu uttikana neti.

22Ka benneha nna yalhá bedú si'i xxattana leke tti biyienkanie nu reeha, nianna tti uduloke ttu ttubake unnaba tisake bie, ráke:

―¿Si bittuba neti nuná xa tata?

23Lee nna bekabie, ree ke:

―Nu ugutuna len neti lhe'e ttúba ye'ena‑ni, lana nuha utena neti lasi ná ka nuha. 24Neti benne daya yebáha eya'abaa attiba chi ga'anna lo ka yetsi ge Tata Do Yebáha. Ttaka nna, ¡gwalíchiru le nu utena neti lasi ná ka nu uttikana neti! Tserula saríana na ganna abittu ulina, a laa kila ulina.

25Nianna ra Judas nu utene lasi ná ka nuha:

―¿Si bittuba netiba nuná xa maestru?

Lee nna bekabie ree na:

―Luba chi raxa.

26Laka yu'uke goha nna tti bedaxxu Jesús‑ni yettaxtilaha nna begwebie Tata Do Yebáha ixkixaru. Nianna tti ulha'abie lhe'e benneha nna begwebie ka benne rudhetinieha nna ree ke:

―Gwaludaxxu nna gwaligo. Benne‑ni anke bela latia.

27Iki de nuha nna tti bedaxxue xiga ta'a vinuha nna begwebie ixkixaru Tata Do Yebáha, nianna tti begwebie ka benneha nna ree ke:

―Gwali'iya iyále nuní, 28kumu nuní ankana reni kia. Reni kia‑ni rugwena lidhaka tisa chi bodha'an Tata Do Yebáha len ka benne. Reni‑ni ilalina kini ixe ka benne ixú elha xen lasi ge ka tulha ruinke. 29Neti ria le: debá nnanna labíru i'iyaa vinu‑ni, gannaliba chi bisia sá i'iyaa vinu kubi len lebi'i ata rinnabia Tata kiaha.

30Iki de chi bilhake ttu le'a to, nianna tti biriake diake iki i'iya ata daa ka ya olivuha.

Jesús‑ni rigixxi'abie deki Pedruha labí dhi ro'oni deki ankabienne

(Mr. 14:26-31; Lc. 22:31-34; Jn. 13:36-38)

31Tti chi se'eke iki i'iyaha, nianna ra Jesús‑ni ka benne rudhetinieha:

―Nnolha iyábale isatsale udhá ikile neti. Akaba attiba chi unne Tata Do Yebáha lo ka yetsi geeha, tti ree: “Neti uttibaa nu reki lo ka neruha nna ka neruha nna isatsa ttebakana.”

32Rágaba Jesús‑ni:

―Ttaka iki de chi beyaka bania lo elhuttiha, la'ania nna eya'a gaaya enerua lole esinaa daka Galilea‑ni, delola nna esiale.

33Pedro‑ni nna rane:

―Meskiba adí ka nuní udhá ikikani lu, neti labí udhá ikia lu.

34Lee nna ree Pedro‑ni:

―Netiru ria: nnolha atti lanila kwesi chinkaha, lu tsunna libela chi bedhea lelu a ridí ro'olu deki ankabienlu neti.

35Pedro‑ni nna rana Jesús‑ni:

―Neti meskila gattia lenlu, labí innía deki labí ankabiati lu.

Aníha‑gaba ra adí ka benne rudhetinieha.

Jesús‑ni rilhapie tisa len Tata Do Yebáha Getsemaní‑ni

(Mr. 14:32-42; Lc. 22:39-46)

36Nianna tti dia Jesús‑ni len ka benne rudhetinieha ttu latti ata tee láni Getsemaní, nianna ree ke:

―Nii gwaltse'e, laka neti tsiaya innea len Tata Do Yebáha.

37Nianna chebie Pedro‑ni lhe a chupa ka xi'in biyú Zebedeo‑ni nna tti uduloe bedú si'ina lebie lhe bedú xxattane lhe. 38Nianna tti ree kana:

―Neti yalhá si'i du lasia. Gwanalu chiba gattia rakati. Nii gwaltse'e nna gwaltse'e tenná len neti, bittu ga'adhile.

39Nianna tti biru'une a latti daka aná nna tti bettudhi loe lo yu nna unnebie len Tata Do Yebáha, ree:

―Tata to kia, nu diru innálu benchi kini abittu uyúa elha disa satea‑ni. Ttaka labí nu innía aka, sinuki nu innába kwinalu aka.

40Nianna tti beyekie ata se'e ka benne tsunna rudhetinieha nna gwaxxake ka benneha te'adhilake. Nianna tti ree Pedro‑ni:

―¿Si niba ttu ura laa udaale tse'e tennále len neti? 41Gwaltse'e tenná lhe gwalinnaba len Tata Do Yebáha, kini abittu dhi yie nu xxegwiha le nna eyadi gaale. Gwalí galá lebi'i gwa rakabinle tse'e tennále, ttaka bela latile‑na labí ridaana uchíana.

42Nianna tti dedheyye attu libe nna bedennee len Tata Do Yebáha nna ree:

―Tata to kia, ganna abíba aka kualu nu satea‑ni, la'ania nna nu innába kwinalu aka.

43Tti bedeyekie attu libe dedheyye ata se'e ka benneha, nianna gwadixxakagabe ke dedete'adhigabake kumu de ta'a xxattake bisiela. 44Niha‑ba bodose'ebie ke nna dedheyye gwenne len Tata Do Yebáha beyonna libe. Bodeki adakabe ka tisa ka nu chi ree benneha. 45Tti bedeyekie attu libe ata se'e ka benne rudhetinieha nna ree ke:

―¿Si sa te'adhibale? Neti benne daya yebáha, chiba bisia ura nuní utekana neti lasi ná ka nu ruin tulha. 46¡Chinka gwaleyadha nna gwaletía! ¡Ne nu utena neti lasi ná ka nu uttikana netiha chi daa naa!

Bedaxxukana Jesús‑ni kini uttikane

(Mr. 14:43-50; Lc. 22:47-53; Jn. 18:2-11)

47Sa dula Jesús‑ni rinnebie tti bisin Judas nu selana lhe'e ka benne tsi'inu (12) rudhetinieha. Bisin lenna ixeru ka nu denkana espada lhe yaga lhe. Ka nu loni ge ka bixxudiha lhe ka nu anka benneola ge ka nu Israel‑ni lhe, lakana udhelhakana ka nuha. 48Judas nu utena Jesús‑ni lasi ná ka nuha nna chila rana ka nuha:

―Nu ibigaa goa xxaganiha, lana nuha udaxxule.

49Nianna ubiga tteba Judas‑ni ata du Jesús‑ni nna rane:

―¡Padiuxi, maestru!

Nianna tti utona xxage. 50Labie nna ree na:

―Betsi to, tsa ttela ben nu dalu uinlu.

Nianna tti ubiga ka nu daa lennaha nna bedaxxu ttebakana Jesús‑ni. 51Ttaka ttu ka benne du len Jesús‑ni nna ulea ttebe espada geeha nna uchúe naga nu riben lo sina ge bixxudi xeniha. 52Jesús‑ni nna ree benneha:

―¡Tasiekilu! Boga'a espada gelu‑na lhe'e xoni, kumu ka nu ruttikana len espada, len nunágaba gattikana. 53¿Si rakinlu labí aka kia innabaa len Tata kiaha kini idhelhe ixe juisiru ka anjeli ki odiláke neti loora tte nnanna? 54Ttaka ganna gaxia ka benneha, la'ania nna, ¿galasina ki aka nu ra lo ka yetsi ge Tata Do Yebáha ata rigixxi'a ra deki teeki satea aní?

55Looraha tteba nna ra Jesús‑ni ka nu chi bedaxxukaneha:

―¿Beaka ttiba ttu nu daa gwedaxxu ubana dale gwedaxxu neti, denle espada lhe yaga lhe? Ki ttu ttu sába ridúa ro'o yotu‑na rule'enia le nna abí chiga bedaxxule neti. 56Ttaka iyá nuní raka kini rado tisa ge nu unne ka profetaha lo ka yetsi ge Tata Do Yebáha.

Nianna iyába ka benne rudhetini Jesús‑ni bexunnike nna a ttúbe bedúke.

Jesús‑ni biso due arlo ka uxtisi ge ka nu Israel‑ni

(Mr. 14:53-65; Lc. 22:54-55, 63-71; Jn. 18:12-14, 19-24)

57Ka nu bedaxxukana Jesús‑ni nna deche ttebakane arlo Caifás nu anka bixxudi xeniha. Niha chi tupa ka nu rule'ekinna ka benne nu ra lo bia bennabi bodha'an Moisés‑ni lhe chi tupa ka benneola ge ka nu Israel‑ni lhe. 58Ttaka Pedro‑ni nna idittuliba danalhane axtaliba bisinna lali'a ge yo'o ata do bixxudi xeniha. Uta'abana nna urena len ka nu se'e gweyú ro'o yo'oha kini ilenna bixa aka.

59Ka nu loni ge ka bixxudiha lhe ka benneolaha lhe adíru ka nu runi elhuxtisi ge ka nu Israel‑ni rigilakana ka nu uin lekani ki usiakana iki Jesús‑ni ttu bixa. Aníha ki tee ro'okani ukinnikane nna uttikane. 60Ttaka labí udaakana, meskiba bika betso dúkana ixe ka nu ben lekani. Delola nna bisia a chupakana nna 61rákana:

―Nubiyú du nii rana: “Neti gwakaba kia uttampaa yotu ge Tata Do Yebáha nna delo tsunna ubisaba nna chi elhidhaa na.”

62Bixxudi xeniha nna udú liina nna rana Jesús‑ni:

―¿Bíunni rusia ka nuní ikilu? ¿Si lagwa gwekabilu ge nu rákana‑ni?

63Ttaka Jesús‑ni siiba uke, labí bekabie. Bixxudi xeniha nna rane:

―Tata Do Yebaa benne anka baniha rudettia rinnabaa lenlu, utixxi'a, ¿si lu ankalu Cristu Xi'in benneha?

64Jesús‑ni nna bekabie, ree:

―Luba chi raxa. Anágaba neti upegabaa le deki neti benne daya yebáha, debá nnanna chi ilenle neti dhoa daka ná ben ge Tata Do Yebaa benne ra tsitsi leeha lhe ilágabinle neti dedáya yebáha lhe'e beaha.

65Nianna tti ulhi triba xo bixxudi xeniha uchedana nuha. Nianna tti rana ka nu se'e niha:

―¡Tata Do Yebáha nuná rorexxa gaana tti rana aná! Nnanna labíru riyasinri'i nuxa kixxi'enna ri'i deki bixa ben nuní, ki kwinaba lebi'i chi biyienin nagale deki rorexxa gaana Tata Do Yebáha. 66Lebi'i nna, ¿bí rakinle?

Ka nuha nna bekabikana, rákana:

―Ralhaba nuná gattina.

67Nianna tti udulokana bettuttu xxenkani loe, attu chupakana nna bedhenkane nna attu chupakana nna uleakana gi ro'e. 68Nianna tti rákane:

―Cristu, unne ya'achu, ¿núnna bedhenna lu ganna?

Pedruha labí ridí ro'oni deki ankabienna Jesús‑ni

(Lc. 22:55-62; Jn. 18:15-18, 25-27)

69Laka raka nuha, Pedro‑ni nna lali'a ge yo'oha‑ba dona. Nianna tti ubiga ttu ka nuila riben sina niha, rana na:

―Lu lhe danalhagabalu Jesús ge Galilea‑ni.

70Ttaka lana labí uxí ro'oni arlo iyá ka nuha deki ankabienne. Rálana:

―Bi yu neti bí ge nuná rinnelu.

71Tti chi deyyana eriana ro'o yo'oha, nianna tti bedeláni attu nuila riben sinaha Pedro‑ni. Nianna ra nuha ka nu se'e niha:

―Anágaba nuní danalhagabana Jesús ge Nazaret‑ni.

72Ttaka lana nna labí bededí ro'oni, axtala rana:

―¡Yuru Tata Do Yebáha, labí ankabiati nubiyú‑na!

73Attu sattiruba nna chi bedebiga ka nu se'e niha ata du Pedro‑ni nna redeakana na:

―Gwalí galá, gaxa lu selagabalu len ka nu danalhakana Jesús‑ni, kumu reyakabia tteba elha rinne gelu.

74Lana nna rana:

―Gwalígati xa; labí ankabiati nubiyú‑na. Tata Do Yebáha ugwebie neti elha disa ganna abíba liiti.

Looraha tteba nna uresi chinkaha. 75Nianna gwadú tteba le Pedro‑ni ge nu ra Jesús‑ni tti rabie na: “Lanila kwesi chinkaha, lu tsunna libela chi bedhea lelu labí ridí ro'olu deki ankabienlu neti.” Nianna beria ttebana ata du naa, nna uresibana ttibaxkaba leni de releninna.

Jelenleg kiválasztva:

San Mateo 26: zae

Kiemelés

Megosztás

Másolás