San Mateo 16

Rinnabakana len Jesús‑ni unie ttu milagru

(Mr. 8:11-13; Lc. 12:54-56)

1Ka fariseo‑ni lhe ka saduceo‑ni lhe ubigakana ata du Jesús‑ni kini ku'ukane prueba. Nianna unnabakane unie ttu milagru kini ula'a deki gwalí Tata Do Yebáha udhelhe bie. 2Ttaka lee nna bekabie gekani, ree:

―Ki lebi'i, ganna chi dia ralhana rale: “Tseba aka uxxeha kumu xinába anka gwetsáha.” 3Ka dila‑na nna rale “Nasá iyya lhaba aka kumu xinába anka gwetsáha lhe beaba yu'u lhe.” Kaxa gwa rite dábinle bixa aka tti rilenle gwetsáha, delo nna a rite denle nu raka lagwi gele nnanna. 4Lebi'i ka nu runi satsa se'e nnanna lhe chi rudhá ikile Tata Do Yebáha nna ria lele attu nu subi, lebi'i rinnabale unia ttu milagru, ttaka neti labí ula'ania le attu bixa milagru, sunruba luesi nu gwate Jonás benne uke profeta ge Tata Do Yebáha, a sunruba luesi nuha gula'ania le.

Nuha‑ba ree kana nna bese'e bixxibe kana nna deyye.

Jesús‑ni rabie: “Gwaluyú gele len ka fariseo‑na lhe ka saduceo‑na lhe”

(Mr. 8:14-21)

5Tti chi uteke lo indatooha nna ka benne rudhetini Jesús‑ni gwadú leke deki bixulhabakanie icheke yettaxtila ki goke. 6Nianna tti ra Jesús‑ni ke:

―Gwaluyú gele ka iyietile kua dii ge ka fariseo‑na lhe ka saduceo‑na lhe.

7Ka benne rudhetinieha nna ra luesike:

―Aná rabie kumu de abittu yettaxtila cheri'i.

8Ttaka Jesús‑ni nna ute dábanie nu rákeha, nianna tti rabie ke:

―¡Aalexa nu abittu ria tsitsi leni! ¿Beaka ra luesile deki labí yettaxtila tee? 9¿Si itua ttu a rite denle nu ria‑ni? ¿Si abittugaba rexxa lele ge gayu ka yettaxtila uto gayu mili ka benneha lhe si abígaba rexxa lele a balha ka sumi yettaxtilaha bottupale ge nu bexxaha? 10¿Si nigaba a rexxa lele ge gasi ka yettaxtila uto ttapa mili ka benneha? Lhe, ¿si abígaba rexxa lele a balha ka sumi yettaxtilaha bottupale ge nu bexxaha? 11¿Si lagwa ute denle? Laa ge yettaxtilaga nuha unnea tti ria: “Gwaluyú gele len kua dii ge ka fariseo‑na lhe ka saduceo‑na lhe.”

12La'anialiba nna tti ute dákanie deki labí ge kua dii ria iki yiedi raka yettaxtilaha nuha rinnebie, sinuki ge nu rule'e ka fariseo‑ni lhe ka saduceo‑niba nuha rinnebie. De nuha nna ree ke:

―¡Gwaluyú gele len ka nuná!

Pedruha ree Jesús‑ni: “Lu ankalu Cristu”

(Mr. 8:27-30; Lc. 9:18-21)

13Tti bisin Jesús‑ni daka Cesarea ge Filipo, nianna tti unnaba tise ka benne rudhetinieha, ree ke:

―Neti benne daya yebáha, ¿nú ra ka benne deki ankaa?

14Ka benneha nna bekabike, ráke:

―Ttu chupa ka benne ráke deki lu ankalu Juan benne begadi indaha. Attu chupake nna ráke deki lu ankalu Elías, nna adíke nna redenáke deki lu ankalu Jeremías o nuxaba ttu ka benne ukake profeta ge Tata Do Yebáha.

15Jesús‑ni nna ree ke:

―Lebi'i nna, ¿nú rale deki ankaa?

16Simón Pedruha nna bekabina, rane:

―Lu ankalu Cristu Xi'in Tata Do Yebaa benne anka baniha.

17Jesús‑ni nna ree na:

―Karubárulu xa Simón xi'in Jonás, kumu laa bennega utixxi'anie lu nu ralu‑na; Tata kia do yebáha, benneha‑ba utixxi'anie lu nuná. 18Lhe anágaba neti ria lu, lu ankalu Pedro. (Pedro dienna innána íyya.) Iki íyya‑ni dhuloa use'a ka benne tsia leke neti. Ni elhuttiha labí dhaana utse'e loona ke. 19Len lu utea lo neda kini ulhenlu ka benne innabia Tata Do Yebáha ke. Laxkala iyába nu innálu abittu dika uin ka benne yiesi lo yu‑ni, yebáha chigaba bodha'an Tata Do Yebáha deki abittu aka nuha, nna iyába nu innálu gwa dikaba uin ka benne yiesi lo yu‑ni, yebáha chigaba bodha'an Tata Do Yebáha deki gwakaba nuha.

20Nianna tti bodha'an tsitsi Jesús‑ni len ka benne rudhetinieha, ree ke:

―Anuttu nu gale deki neti ankaa Cristu.

Jesús‑ni rigixxi'abie deki teeki uttikane

(Mr. 8:31–9:1; Lc. 9:22-27)

21Debá la'ania nna udulo Jesús‑ni rigixxi'anie ka benne rudhetinieha deki teeki tsiabie lhe'esi Jerusalén‑ni. Niha teeki sate xxatte uyúe elha disa lo ná ka benneola ge ka nu Israel‑ni lhe lo ná ka nu loni ge ka bixxudiha lhe lo ná ka nu rule'ekinna ka benne nu ra lo bia bennabi bodha'an Moisés‑ni lhe. Nianna rágabe deki teeki uttikane nna eyonna ubisaha nna eyaka benbe attu libe. 22Pedro‑ni nna ttúbe uxina attu ta subi, nianna tti utisane, rane:

―¡Tata Do Yebáha labí ugwelhe satelu nu ralu‑na xa tata!

23Jesús‑ni nna beyekie, ree na:

―¡Ubi'etta kwe'a xa nu xxegwi! Sunruba rattalu lo neda kia. Kumu lu suna nu anka ge ka benne se'e yiesi lo yu‑niba do ikilu, labí do ikilu nu anka ge Tata Do Yebáha.

24Nianna ra Jesús‑ni ka benne rudhetinieha:

―Ganna nuxa ttúle raka lele etenalhale neti, teeki eria iki eria lele, meskila bixa satele nna gwaludaxxu kurusi gele nna gwaltá gwetenalha neti. 25Kumu ttu benne ganna abittuba raka lebie bixa satebie de etenalhe neti, benneha nnittilee, delába labí aka ben benneha arlo Tata Do Yebáha. Ttaka benne eria iki eria lebie, meskila bixa satebie de etenalhe neti, benneha nna gwaka benlee arlo Tata Do Yebáha. 26Kumu, ¿bí ixú nuha ganna ttixka ttu benne dhaabie uin gebie iyá nu se'e yiesi lo yu‑ni, ttaka arlo Tata Do Yebáha nna tsia nnittilee? Nigaba labí aka geri'i go'ori'i elha nabani geri'i kini anáchu aka benri'i ttu dia lii arloe. 27Kumu neti benne daya yebáha esiaya lhe'e xiani ge Tata kia do yebáha lenia ka anjeli geeha. La'ania nna kua ttu ttu ka benne ugwea ke nu ralhake dhike ge nu benke. 28Netiru ria, ttu chupale ka nu se'ele nii nnanna labí chi uttile atti esiaya innabiayaha. Sa se'e benbale axtaliba ki ilenle neti benne daya yebáha esiaya.

Jelenleg kiválasztva:

San Mateo 16: zae

Kiemelés

Megosztás

Másolás