Dyénésis 8
8
1Kabay là fbayà Dwata Nowa, na i kdee dad lmanaf i faginan fusuk di aweng. Taman fbalan i nus di tah tanà, na tambù mten i yéél. 2Tanlag Dwata kasfut i yéél mdà di gusamfutan di dungan i tanà. Na snafangan gumukaan i langit, na fafanakan i ulen. 3Di lam i mlatu lime falò duh, fganag mten i yéél. 4Na di gasfaloan fitu duh di gfitun bulen di fali ani gine, gduung i aweng di bulul Ararat. 5Na fadlug mten i yéél, na di tnanin duh di gasfaloan bulen, tateen nan i ltut i dad bulul.
6Na kakubu i fat falò duh na fat falò butang, nukà Nowa i bintanà tanimoan di aweng, 7na fayengan i wak. Na là samfulê di aweng, bay fadlug kenen mayeng flibut kel too mten i dunuk. 8Na là mlo, fayeng Nowa lêman i abun, fye gadean ku mten i dunuk di tah tanà. 9Kabay, abun ani laan teen i gumleenan, du maglimun fa yéél di tanà. Taman samfulê kenen di aweng, na nwè Nowa na fasfuléan di lam aweng. 10Na fatan Nowa kel fa di fitu duh, na lêmanan fayeng i abun. 11Di kakimalan samfulê i abun na nun doon i kayu olib falami maglifò tnukean na neben samfulê. Na én i gugmadè Nowa mten i yéél di tah tanà. 12Kafnge én, fatan Nowa fitu duh fa, na lêmanan fayeng i abun, bay ani talà samfulê i abun.
13Na di kgafat Nowa di nam latu satu fali i ktuan, di tnanin duh di tnanin bulen di fali én, tamten i yéél di tah tanà. Taman lanket Nowa i dademe ataf, na teenan talandè yéél, na tafan kafag i tanà. 14Na di kakelan di galwen falò fitu duh di galwen bulen, tatoo kafag i tanà.
15Kafnge én, man Dwata di ku Nowa, 16“Ani fakay ge lamwà di aweng, na faginam i yaanam, i dad ngaam, na i dad yaanla. 17Na falwaam i dad anuk di bnas, na kdee bung dad lmanaf, mnalam na mlayal, du fye mbel ale na mbaling dee di tah tanà ani.” 18Taman lamwà Nowa di aweng, gagin kenen i dad malayan. 19Kat bung i dad lmanaf, na i kdee bung dad anuk di bnas, slumbuk ale di dale bung, na satfulé ale lamwà.
20Di kagalwà Nowa di aweng, santifunan i dad batu, du mimò kenen i gudamsuan di Dwata i Amu. Kafnge én, nwean kat satu bung lmanaf na kat satu bung anuk di bnas i fakay dsù di Dwata, na sduléan snakuf, du dsuan di Dwata. 21I bun i dsuan too gaflehew Dwata i Amu, na gman i nawan, manan, “Làgu lêman falmo i klamang tanà, du mdà di sasè nimò i dad to, balù gadègu mdà di ksutla nun sasè knayèla. Na làgu lêman falmo i kdee mto di tah tanà gambet i tamgimògu ani.
22Hae, du di klo fa nun banwe,
nun bang kafla na kaktu,
na bang tno na minit,
na bang landè ulen na nun ulen,
na bang mduh na butang.”
Jelenleg kiválasztva:
Dyénésis 8: ITD
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2014, Wycliffe Bible Translators, Inc. All rights reserved.
