Ñwaè' Matïìyoè 11

1Jisòs à ka' fa ncep nè ŋgǎa yɛ'ni yì buu ce ncòp-ba-à-rʉ̀ʉ mìsi, a lo embo, a du a ce yɛ'ni a ce fè'shi blǎa Nyʉ̀ à mlǎ' à ŋgòŋ anà. 2Jǒn à m ba mbe shaŋ. A ka' yu' mfà' ce Krǎis à m ce gèe, a tuu ŋgǎa yɛ'ni yì buu enɛ, 3a du bipshi nè ye enɛ̂, “A wɛ̀ ŋwɛ̀ ce yi m ba enɛ e be vʉ̀ nà kɛ̀ wèr cu ce ke' ba ŋwɛ̌ jɛɛ?” 4Jisòs à beesì a laa nè wowèe enɛ̂, “Kʉti nè du suŋ Jǒn buu ce wèe à yu' a ker yɛ. 5Bèe ce a fèp a ce yɛ buu, mntɛ̀ŋ a ce jɛ̀shi yɛɛnì, ŋgǎa msàasì a ce kè'se, ce ba brara, mnfuŋtù' a ce yu' buu, bèe ce a kweŋger a ce kʉti btèe, ŋgǎa fùp a ce suŋ Nsuŋ Mbòŋmboŋ. 6Rbǒŋtu li yu nè ŋwɛ̀ ce e ce tarni mɛ̀ tarni ka'.”

7Ŋgǎa yɛ'ni buu Jǒn a ka' nàti ce dù, Jisòs à kɛ' a ce suŋ ku' kʉr bèe ca buu kuu Jǒn. E m làa enɛ̂, “Wèe à m fʉʉ a du à ntee rìŋ ba à ryɛ kɛ? Wèe à m dù à ryɛ àmbò fu' yi ce cì' ŋke' a? 8Yi ka' tɛ ba wa' ka' banɛ wèe à m dù à ryɛ kɛ? Wèe à m dù à ryɛ ŋwɛ̀ ce e sùsi nyor nè bcɛ̀' yòo, a? Yi yu wa' ka'. Bèe ce a ke sùsi nyor nè bcɛ̌' yòo, a ke cu ba à mnto'. 9Banɛ wèe à m fʉʉ a du ba à ryɛ kɛ sê? Wèe à m dù ba à ryɛ ŋwɛ̀ ncep ntuu Nyʉ̀ a? Ɛ̀no, m ce suŋ wèe mɛnɛ ŋwɛ̀ ce wèe à m yɛ anà càa ŋwɛ̀ ncep ntuu Nyʉ̀. 10E yu ŋwɛ̀ ce a saŋ àmbò ye mbe Ŋwǎ' Nyʉ̀ enɛ̂, ‘Yɛ̂, m be tuu yà ŋwɛ̀ ntuu tɛ e du entombì nè wɛ̀, dù kupshi nduunjì nè wɛ̀.’

11“M ce suŋ wèe nè mini-ŋwɛ̀ mɛnɛ efa mʉ̀ bèe wɛɛwɛ ce bbyèŋge a bi, mò' a be caa Jǒn ŋwɛ̀ bàptir bèe ka'. Geewa'a, ŋwɛ̀ ce e yu yi mʉcàr se mbe dǐ' kʉʉ Nyʉ̀ à càa ye. 12Kɛ' embe nfè' Jǒn ŋwɛ̀ bàptir bèe vʉ ba' sè'ni na, bèe a ce fa ŋgɛ' nè kʉʉ Nyʉ̀, ŋgǎa ŋger a ce fàp kʉʉ anà. 13Mŋwà' ŋgǎa ncep ntuu Nyʉ̀ wɛɛwɛ ba ŋwà' mncir vi m suŋ àmbò buu ce vi be ka' ba caar a ba' à nfè' yì Jǒn. 14Wèe à ka' ce kòŋ à rbyemì, wèe riŋ weenɛ e yu Àlajà ce a m làa enɛ e be kèe vʉ̀ nà. 15Ŋwɛ̀ ce e ka' tʉr btù', ŋgàŋ yu'.

16“Banɛ àde' m be'nì bèe elùuni na ba à kɛ? Wowèe a yu àmbò bghàrbèe ce a cute à ntaa a ce kɛ' bghàrbèe mo', a ce làa enɛ̂, 17‘Wèr à fyɛp mndoŋ nè wèe, wèe à bii bii ka', wèr à fa ncě rkwe, wèe à war ka'.’ 18M ce làa wa'a njobè' Jǒn à m vʉ̀ a ce ye yuu ka', a ce no yuu ka', bèe a laa enɛ̂, ‘Nyʉ̀rkà' yu njep ye.’ 19Muu Ŋwɛ̀ à vʉ̀ yi, a ka' ce ye buu ce no buu, bèe a laa enɛ̂, ‘Ŋwɛ̀ ca yu ŋkuŋri, a koo ŋkar a ŋgǎa ŋkùu mbǎa bàrà' ba ŋgǎa ŋgèe buu bbebep.’ Yi yu enɛ bfee vi ce dùŋshi nyor à njɛ̀ɛ njì ce boo ŋgǎa bfee a ce gèe yàp buu.”

20E ka' làa wa'a, a kɛ' a ce lapni mla' fàdì' ce e m gèe ku' buu bghagha' nà, njobè' běe àfo a m kupse a ma' yàp buu bbebep ka'. 21“Ndòo à co' wèe ce wèe yu běe à rla' Kòrasìn! Ndòo à co' wèe ce wèe yu běe à rla' Bɛ̀tsaidà, njobè' a m ba gee buu bghagha' ce a m gèe fa wěe mʉ nà ba à rla' Tayà ba à rla' Sidòn, běe àfo a m ba nè kupse e sese', a ma' bcɛ̌' njì rkwe, a yo' bʉ à nyòr a cute àgho. 22M ce suŋ wèe mɛnɛ be kèe ba à mnòŋ mnsa' tɛ ŋgɛ' běe à rla' Tayà ba Sidòn ba yi àndèe nè yè. 23À ka' ba yi àmbò wèe ce à rla' Kàpanùm, wà' a be ko'si wèe mbe bùu a? Yi yu wa' ka'. A be dù nè wèe ba mbà yir, njobè' a m ba gee buu bghagha' ce a m gèe nè wèe na ba à rla' Sodòm, rla' anà li ba bii àgho ghɛɛ ntìni. 24M ce suŋ wèe mɛnɛ be kèe ba à nòŋ mnsa' tɛ ŋgɛ' běe a rla' Sodòm ba àndèe nè yè.”

25À m ba à nfè' anà Jisòs à laa enɛ̂, “Tàr, Tata ce à tʉr rbuu ba nshe, m ce yòŋshi wɛ̀ njobè' wɛ̀ sʉ̀ti buu ca ese ŋgǎa bfee ba bèe ce a rìŋ buu, a duŋshi ba nè boo bkɛ'. 26Ɛ̀no, Tàr, ca yu ba yuu ce wɛ̀ m ce yu' rbòŋ à rgèe.

27“Yà Ta à fa buu wɛɛwɛ mba mɛ̌ mmbò. Ŋwɛ̀ mò' rìŋ muu caa efa Tàr ka', ŋwɛ̀ mò' à rìŋ Tàr caa efa muu ker ba bèe ce muu à kòŋ à rdùŋshi ye nè wowèe ka'. 28Vʉ̀ nè yɛ mɛ̀, wèe wɛɛwɛ ce wèe ce fà' a byɛ' mntɛ̀r vi ce rìr wèe, tɛ m gee tɛ wèe lʉshî. 29Lòr nè ya bù', taa ku wěe ndoŋ, yɛ'ni nè buu ese mɛ̀ njobè' m yu ŋwɛ̌ mʉnyaŋ, a ba nè rbornì-ŋwɛ̀, tɛ wèe bo koni nduunjì à rlʉ̀shì. 30Ya bù' yi yu àtɛ̀r, ya ntɛ̀r yi ba fɛfɛp.”

Jelenleg kiválasztva:

Ñwaè' Matïìyoè 11: LNT

Kiemelés

Megosztás

Másolás