SHURAI 11
11
Babel Kipeitaoh
1Arai hi deiphao mai hrülai hai khola ali baie. 2Maihrü hai teinghi palova hrüsho poa veyu phaki, puletao nou Shinar (Babilon) hinou deikho ali ngaoloua sühinou füsho loure. 3Puletao hai alinou alihi haibüa paoe, “Khe Etao konai taoloua mei deithou naichuh soulou laikhe.” Sübüa puletao nou naichuh souloure alia süna mea loure chuhnai-a souloure. 4Süthaisü puletao nou paoe, “Etao nuhdu ali soushu loua sühinou ratei khe nghiyu kipeitaoh ali soulou laikhe, alia sükua Etao kathe souloua deiphao holo hailo ratalai mokhe.”
5Süthaisü Mapao nou takou deiphao mainou soukhai touyu nuhdu ae kipeitaoh nasü zhuloua, 6haibüa paoe, “Zhukhaio, puletao hai maitya ali baie ae la-a ali baie, alia haisü puletao nou soupfüa koulaiyu taohi soushu araina bai hie; puletao nou soulai tea lichoyu nasü soulou hoyu hashu laire. 7Etao takouh loua puletaoye panou alinou ali la sülou hore donou puletao la hai soubüsa peilai khe.” 8Sübüa nou Mapao nou puletaoye deiphao holo hailo pora tare alia puletao nou nuhdu soushuyu nasü thaokhaire. 9Süvanou haina zhih hai Babel#11.9 babel: Zhih haina hai Hebrew maila hinou “souhrü sasayu” moa “soukuku peiyu” touyu lakho raiwe. tea sapeie, daiolouzü sühinou Mapao nou deiphao mai la soukuku peie ae sühinou Mapao nou puletaoye deiphao holo hailo pora tapeie.
Shem vei Tyaonah Maitao
10Haitao hai Shem vei tyaonah maitaoe. Shem nou po 100 payuki, dzüdu thai po ahai nahi nahpoutu ali, Arpakshad tea kuyu nahai naloue. 11Süthai nou puh hai po 500 hrüloue, alia nah naotu poutu kukhea bue.
12Arpakshad nou po shiangou payuki nahpoutu ali Shelah tea naloue. 13Shelah nalouyu thai Arpakshad hai po 403 hrüloue alia puh hai nah naotu poutu kukhea bue.
14Shelah po shiangou payu phaki nahpoutu Eber naloue. 15Eber nalouyu thai Shelah nou po 403 hrüloue, alia puh hai nah naotu poutu kukhea bue.
16Eber nou po shiadai payuki, puh nou nahpoutu Peleg naloue. 17Peleg nalouyu thainou puhnou po 430 hrüloue, ae puh hai nahmai kukhea bue.
18Peleg nou po shirou payu kisü, puhnou nahpoutu Reu naloue. 19Reu nalouyu thai puhnou po 209 hrüloue, alia puh hai nahmai kukhea bue.
20Reu nou po shiahai payu phaki nahpoutu Serug naloue. 21Serug nalouyu thai puhnou po 207 hrüloue alia puh hai nahmai kukhea bue.
22Serug nou po shirou payu phaki nahpoutu Nahor naloue. 23Nahor nalouyu thai puhnou po 200 hrüloue alia nahmai kukhea bue.
24Nahor nou po kaikü payu phaki nahpoutu Terah naloue. 25Terah nalouyu thai Nahor hai po 119 hrüloue, alia puh hai nahmai kukhea bue.
26Terah nou po rainai payuki, puh nou nahpoutu haitao vei puo soure: Abram, Nahor ae Haran.
Terah vei Tyaonah Maitao
27Mai haitao hai Terah vei tyaonah maitaoe. Terah hai Abram, Nahor ae Haran puoe, ae Haran hai Lot vei puoe. 28Haran hai puh puo jünou rai-a puhye napeiyu buh Khaldean teidei hi Ur tea kuyu nuh hinou thaitare. 29Abram ae Nahor hai kilo souloure. Abram chapfü zhih nou Sarai ae Nahor chapfü zhih hai Milkah toue. Milkah hai Haran nahnaotu paie alia Iskah hai puh puoe. 30Sarai hai nahapfü ali soua nahzütou ngaolou moe.
31Terah nou puh nahpoutu Abram, Haran nahpoutu puh tyao Lot alia puhtyao Abram chapfü Sarai koa Khaldean teidei hinou buyu Ur nuhdu nasü thaokhaia Kanaan teidei hi holai tea tare, ana puletao nou Haran hi kouloukhaie, puletao nou sühinou füsholoua hrüe. 32Terah nou po 205 hrüloua Haran hinou thaide.
Jelenleg kiválasztva:
SHURAI 11: POUMBSI
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
