MATTHEW 15
15
Phagararao ni slingrithai
(Mk. 7.1-13)
1Bo bubli ha Jerusalem ni phrang Pharisairao ode Dara khe slingriyarao Jisu niha phai hi thi ba, 2Snadi jabani nini yaohon rikphayarao gada ni khraorao ni grao khe baigalai ba? Bonsi yao suya hi hon ji du, ode bonsi thi ba.
3Jisu thiphin ba, Nisi bo snadi jabani nisi ni gada ni grao ni khlai hi Madai grao riyaba khe maniya ba? 4Madai thi du, Nini buma-bupha khe man khlai lah, ode, sere jar ni buma khe ja thing, bupha khe ja thing, siji re, bo sthai jaoma se. 5Thikhabo, nisi de jar ni buma-bupha niha, Ning angkhe yaowai mane Madai niha yaopha kha, 6Jar ni buma-bupha khe man khlai ma nangya, thihi nisi thi re. Odebani, nisi ni gada ni grao ni khlai hi Madai ni grao khe nisi khma du. 7O giriklaiyarao, Isai nisi ni balam ni grao ha thi dayaba gibi se;
8Ebo subung buthu de bonsi ni khuh jang angkhe man khlai du,
Thikhabo, bonsi ni khah de ang jang gajain se.
9Bonsi ang khe hubabo haglai se,
Bede thikhala, bonsi subung ni dara khe ani dara lai sling riba se.
Subung khe gusu khlaiyaba
(Mk. 7.14-23)
10Odehe, Jisu subung buthu khe jar niha long hi bonsi khe thi ba, Khna hi buji lah! 11Khuh ha hapsingyaba de subung khe gusu khlaiya, khuh ni phrang baigoyaba se subung khe gusu khlai ba.
12Boha jar ni yaohon rikphayarao phai hi boniha thi ba, Pharisairao ebo grao khe khna hi bonsi jajaoya jaba khe ning tharmai du?
13Jisu thiphin ba, Khrip buphangbo ani bupha sorgo ha dongyaba gaiyayaba de phikhur jao ma se. 14Bonsi khe musi da bao; bonsi ni hoja de muthai gana se. Muthai gana jang muthai gana lama dismai lai khade, bonsi gini bo hakhor ha galaising ma se.
15Ebo grao khe khna hi Peter boni ha thi ba, Ebo grao khe jinthane thiphla ri.
16Jisu thi ba, Duha sosi ning bo bujiya kho? 17Bukhuh ha hapyaba side bohoh ha galaising du, ode khiba ha baigo du thihi nisi tharmaiya kho? 18Khuh ni phrang baigoyaba de khah bising ni phrang se baigo phai ba, bo ning subung khe gusu khlai ba se. 19Nisi ni khah ni phrang hamya bisar, sthaiyaba, gaori jayaba, khah nangyaba, makhao jayaba, mosol sakhi, sijima, ebo buthu khrip khah ni phrang baigoyaba se. 20Ebo buthu ning ja kha subung khe gusu khlaiyaba de; thikhabo, yao suya hi makham jiba de gusu khlaiya.
Kanaan ni masainjik ni lonma
(Mk. 7.24-30)
21Jisu oraha ni phrang baigo hi Tura jang Sidon haphai ha thang la kha. 22Bo raji ni Kanaan jadi ni saosi haingajik boni ha phai hi, Gabra, David ni basa, angkhe khasao lah. Ani bisik sgain bese hamya jang gajao hi dong, thi hi bo jirikkhao ba.
23Thikhabo, Jisu grao thaisi bo thiphinya. Boni yaohon rikphayarao thi ba, Jini yaohon ha bo jirikkhao bai du, bokhe haiha lah, thi hi bokhe khainsu ba.
24Odehe, Jisu thiphin ba, Israel jadi ni bising ha melma gmayaba niha garhi de angkhe haihaya.
25Odese, bo haingajik phai hi, Gabra, angkhe juru lah, thi hi bokhe khlim ba.
26Jisu thiphin ba, ansarao ni hon khe laha hi sisa buthu ne riba de majangya mu.
27Bo thiphin ba, Gabra, bo grao de gibi se. Thikhabo, sisa buthu bo bonsi ni bubra ni basang ni phrang honduri hah ha galaiyaba khe bonsi jidu thi.
28Boha, Jisu boniha thiphin ba, Masainjik, nini lonma gabang rao bi, ning nangjaoba lai ning nini basao ha ja thing. Boha ning boni bisik de ham lang la kha.
Gabang jathai khe ham riba
29Jisu oraha ni phrang thang la hi, Galili dih kharnai rogong ha bo sohi kha, ode hading ha gakhu hi oraha ning bo kham la kha. 30Odehe, subung gabang ning, igah khorarao, muthai ganarao, grao jophuyayarao, hajaiba ni phrang soyayarao khe labu hi boni ha phai hi, boni rogong ha bonsi deng ba, odehe, bonsi khe bo ham ri thar ba. 31Odehe, subung buthu grao jophuyayarao grao jophu kha, muthai ganarao muthai nuba khe nu kha, gabang gmang lai kha. Odebani, Israelrao ni Madai khe bonsi bakhan khlai kha.
Subung rjing bri khe ji riba
(Mk. 8.1-10)
32Odehe, Jisu jar ni yaohon rikphayarao khe longha hi thi ba, Subung buthu ang jang baosi ja ba khe nokha saintham ja kha, duha bonsi ji mane bonsi niha musibo giri kha bani ang hamsi ning khasao sisi jajao du, makham ji riyahi haihama nangjaoya; ode niyakha de lama gejer ha mangsin nang hi raoya ja ma se.
33Boni yaohon rikphayarao bokhe sing ba, Subung buthu hoh gablai si olei ji ri mane hon pher olei banghi hajengling hathan ha jing braha mai ma?
34Jisu bonsi khe sing ba, Hon pher bislei dong?
Hon pher sni, nahsa gijisa dong, thi hi bonsi thiphin ba.
35Subung buthu khe hah ha kham ma sani ba. 36Odehe, hon pher sni ode nahsa khe laha hi, hamthai rihi, bo hon pher khe jekhao dada, jar ni yaohon rikphayarao niha bo yaopha kha, ode yaohon rikphayarao subung buthu ne bonsi ron ba. 37Odehe, bonsi khrip jihi hoh gablai thar kha, ode bonsi jiblaiyayaba khe khamphlu sni bojom khlai ba. 38Boha jiyarao, masainjikrao jang ansarao khe sainphaya hi miyahrao rjing bri ja du.
39Odehe, subung buthu khe dra ribani yaohon ha Jisu rung ha gakhu hi Magadan raji ha sohi kha.
Jelenleg kiválasztva:
MATTHEW 15: DIMASBSI
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
