Egzanp Lidèchip NeyemiEgzanp

Kè Sensib pou Nasyon an

Neyemi t ap viv nan yon pozisyon konfòtab nan kay wa a, lwen destriksyon Jerizalèm nan ak mizè pèp li a. Men, lè l te tande nouvèl sou miray Jerizalèm ki te kraze ak kondisyon difisil frè li yo t ap viv, kè li te chaje ak gwo tristès. Li te kriye, li te lapriyè, e li te jene pou nasyon l. Menmsi li te fizikman lwen sitiyasyon an, emosyonèlman ak espirityèlman, li te mete men nan pat la. Sa montre nou kijan, menm lè nou pa dirèkteman afekte nan mizè ak sitiyasyon yon moun, nou ka toujou gen yon kè sansib ki montre nou santi doulè lòt moun nan. Kè sansib se premye pa pou vin yon zouti nan men Bondye pou pote renesans ak rekonstriksyon.

Lè nou ap gade mizè nasyon nou an oswa lòt moun ki nan bezwen yo, Bondye ap rele nou pou nou gen menm kè sansib Neyemi an pou yo. Li pa t rete sou kote, ap plenyen oswa ap jije. Olye de sa, li te chwazi aji nan lapriyè, mande Bondye direksyon ak solisyon. Neyemi te konprann ke, menm lè nou lwen, tankou moun ki ap viv nan diaspora yo, nou ka toujou fè yon diferans atravè mwayen Bondye ban nou. Sa ki enpòtan, se pa sèlman pou nou rekonèt doulè lòt moun, men tou pou nou mande Bondye kijan nou ka fè pati de solisyon an. Bondye ap chèche moun ki gen kè sansib, ki pare pou pote chay nasyon yo epi travay pou rekonstriksyon yo. Neyemi pa t chèche pwòp pwoteksyon li oswa pwòp benefis li, men li te mete tèt li nan pozisyon pou sèvi kòm zouti Bondye nan rekonstriksyon Jerizalèm.

Kijan ou ka gen yon kè sansib pou lòt moun jodi a? Èske n ka santi doulè nasyon nou an oswa kominote nou nan, menm si nou pa dirèkteman afekte? Bondye ap envite nou, pou nou pa sèlman chita gade mizè kominote nou yo, men pou nou antre nan lapriyè pou yo epi poze yon aksyon, menm jan Neyemi te fè a. Bondye ka itilize nou pou pote chanjman nan lavi moun ki nan bezwen yo, pou rekonstwi kote ki detui oubyen brize yo. Se nan kè sansib ak aksyon, nou ka patisipe nan travay Bondye pou pote lavi nouvèl nan nasyon ak nan kominote nou yo. Pa rete lwen, men pote doulè pèp ou a devan Bondye, epi dispoze tèt ou pou sèvi kòm yon zouti nan rekonstriksyon an.