Viv pa Lespri a: Devosyon ak John PiperEgzanp

Lespri a ranpli nou ak lajwa

Se sa ki fè, konnen ki jan pou n mennen tèt nou! Pa mennen tèt nou tankou moun ki sòt, men tankou moun ki gen konprann. Pa kite okenn okazyon pase pou sa ki byen. Paske, jou sa yo n'ap viv la pa bon menm. Se poutèt sa, pran tèt nou byen, chache konnen sa Senyè a vle nou fè. Pa soule tèt ou ak bweson. Sa ka mennen ou nan lavi pèvèti. Okontrè se pou nou ranpli ak Sentespri. — Efezyen 5:15-18

Poukisa moun yo pran alkòl? Pou yon èdtan lajwa. Nou tout vle gen kè kontan, men gen yon pwoblèm: "Jou yo pa bon menm" (v. 16).

Ki kote ou vire lè jou yo move, lè ou pè oswa dekouraje oswa deprime oswa kè sere? Pòl sipliye nou: “Pa vire nan alkòl; tounen vin jwenn Lespri a. Nenpòt bagay ki gen valè ke alkòl ka bay ou, Lesentespri ka bay ou plis toujou.”

Genyen moun ki pa ka kòmanse sifle yon melodi kè kontan oswa chante yon chante nan travay paske yo tèlman strese ak enkyete sou lavi. Men, pita nan aswè nan klèb apre yo bwè kèk bwason yo ka mete nan kou youn lòt epi chante ak ri.

Nou tout anvi viv san kè sote, san anpècheman, ak kè kontan. Ak trajedi k'ap monte nan epòk nou an, tankou nan epòk Pòl la, sè ke gen yon kantite moun (menm kretyen) ki kwè ke sèl fason yo ka jwenn libète sa a tankou timoun se lè yo dwòge tèt yo ak alkòl. Konpòtman sa a dezonore Bondye, e se konsa Pòl di: Gen yon pi bon fason pou fè fas ak move jou yo—se pou w ranpli ak Lespri a, epi w'ap konnen lajwa san parèy k'ap chante e ki fè melodi pou Senyè a.

Alò, kisa sa vle di pou w ranpli ak Lespri a?

Lespri ki ranpli nou an se Lespri lajwa ki toujou ap koule ant Bondye Papa a ak Bondye Pitit la paske yo kontan youn nan lòt. Kidonk, pou w ranpli ak Lespri a vle di pou w pran nan lajwa k ap koule nan mitan Trinite Sen an e pou w renmen Bondye Papa a ak Bondye Pitit la ak lanmou yo youn renmen lòt la.

Chemen Lespri a travèse nan forè enkyetid nou yo pou ale nan lajwa a se chemen lafwa. Dapre Pòl, fason pou w ranpli ak Lespri a se lè w kwè Bondye ki bay espwa a vrèman ap gouvènen—ke pa gen yon ti zwazo ki tonbe atè san volonte l (Matye 10:29)—e ke li dirije mond lan pou ou ak pou tout moun ki mete konfyans yo nan pawòl li. Lè w kwè sa, w ap ranpli ak Lespri Sen an ak lajwa.

Aprann plis: http:// www.desiringgod.org/messages/be-filled-with-the-spirit