Yoane 9
9
1Lomba ili ŵalukupita, ŵalibwene umuntu uwafyelwe ŵumpofu. 2Peŋka aŵasambile ŵaŵo ŵaliŵepwisye ati: MweŵaLabi, mbaninani uwaŵifisye, pakuti uyu-muntu alifyelwe ŵumpofu? Kani niwuyu umwine kani ŵamufyele? 3Naŵo ŵaYesu nekwasuka ati: Taali umwine uwaŵifisye, neli ŵamufyele taŵaŵifisye; sombi alifyalilwe'fyo ati imilimo yaŵaLesa ikabwenekesye muli ye. 4Tucite imilimo yaŵaŵo aŵantumine ili paciswetele, pakuti uŵusiku ŵulukwila, apo tapali umuntu uwisi ukucita-po imilimo. 5Ili nciikele mucalo capansi, nineKutuŵa ukwamucalo.
6Pakweŵa ati ŵalaŵile'fyo ŵalisipile amate pansi peloŵa nekucita' matipa, amatipa ayo nekwisiŋga mumenso iyompofu, 7nekulaŵila kuli yo ati: Koya, usambe pesiŵa lyaSiloami, (isiwi ilyo pakwaluka ati Lilituminwe). Lomba aliile, nekusamba, nekubwela ili alaŵa bwino. 8Peŋka aŵenesi ŵakwe naŵaŵo aŵalukumuŵona akale ati alukulomba-lomba lukoso, ŵalilaŵile ati: Kansi uyu tewoyo uwalukwikala ukulukulomba-lomba lukoso? 9Ŵambi ati: Ewopele. Ŵambi naŵo ati: Koku, sombi ŵalipalene lukoso. Sombi umwine ati: Eneŵo wopele, 10Pakuti pali fyefyo aŵo ŵalilaŵile kuli ye ati: Nikundo lomba asiŵulwa amenso oŵe? 11Naye nekwasuka ati: Uyo-muntu uwilicilwe ati niYesu ewacita'matipa, nekunsiŋga kumenso, nekulaŵila kuli neŵo ati—Koya kuSiloami, usambe. Eli niŋgaya, niŋgasamba, niŋgalawa. 12Naŵo nekumwipusya ati: Mboyo ali kulipi? Naye ati: Nsiisi-po.
13Lombo'yo uwali nimpofu akale ŵalimutwite kuŵaFalisi. 14Ako-kasuŵa ŵacitile-po ŵaYesu amatipa ukumusiŵula amenso, kasuŵa kasabata. 15Pakuti pali fyefyo aŵaFalisi ŵalimwipwisye liŵili ati: Mbaweŵo walaŵa syani? Naye nekuŵaŵula ati: Matipa ansinjile mumenso, eli niŋgasamba, niŋgalawa. 16Lomba aŵo-ŵaFalisi ŵambi ŵalilaŵile ati: Uyu-muntu taatulile kuli ŵaLesa, pakuti taalukutonda sabata. Sombi ŵambi naŵo ati: Mbomuntu uwakuŵifya aliisi syani ukucito'twisiŵilo utwakuŵe'fi? Peŋka paliŵele nemupaka uwakupicisya pakati pali ŵo. 17Lomba ŵalimwipwisye liŵili uyo uwali nimpofu ati: Mbaweŵo ulukumweŵa syani uyo, pakuti akusiŵula amenso oŵe? Naye ati: Wakusimika.
18Sombi aŵaJuda taŵalukucetekele' fyakwe ati ali nimpofu, kaŵili alaŵa, ili tawaŋgaweta aŵamufyele uyo uwasibwilwe, 19nekuŵepusya ati: Kani cine uyu mwana wenu, umulukweŵa ati alifyelwe nimpofu? Mbefyo alaŵa syani ŵukumo? 20Peŋka aŵamufyele nekwasuka ati: Tuliisi ati uyu mwana wesu, kaŵili ati alifyelwe niŵumpofu: 21sombi tatwisi ifi alaŵa ŵukumo, neli muntu uwamusibwile tatumwisi: ŋgamumwipusye, umwine mukulu, ŋgaalilawilile. 22Aŵamufyele ŵalilaŵilile'fyo pakuti pakutina' ŵaJuda, pakuti lomba aŵaJuda kale ŵasuminansyenye ati: Kani umbi akasuminisye ati uyo niKlistu, akaposiwa mwisunagoge. 23Pakuti pali fyefyo efi ŵalaŵilile aŵamufyele ati—Mwipusyeni umwine, naye mukulu.
24Peŋka ŵalimwitile liŵili uyo uwali nimpofu, nekumuŵula ati: Koŵapela ŵaLesa uŵuleme; pakuti tuliisi ati uyomuntu nimbifi. 25Naye lomba nekwasuka ati: Kani nimbifi nsiisi-po; icintu cimo eco njisi, ati nali nimpofu, ŵukumo ndukulaŵa. 26Naŵo peŋka ŵalimwipwisye ati: Alikucitile syani lomba? Mbaalikusibwile syani amenso oŵe? 27Naye nekuŵaasuka ati: Namuŵuleni ŵukumo, tamumfwile! Mbanindo mulukufwailo'kufyumfwa liŵili? Kani namweŵo mulukufwayo'kuŵa ŵasambile ŵakwe? 28Peŋka walimutoŋgawile nekulaŵila ati: Weŵo ewemusambile wakwe, sombi fweŵo tuli ŵasambile ŵakwe Mose. 29Tuliisi ati ŵaLesa ŵalukulaŵila kuli Mose; sombi uyo-muntu tatumwisi ukwafumine.
30Naye umuntu uyo nekuŵaasuka ati: Ala! lei cakukaŋkamana ati mweŵo tamwisi ukwafumine uyo; kaŵili alinsibwile neŵo amenso! 31Tuliisi ati ŵaLesa taŵomfwa aŵakuŵifya; sombi aŵantu ŵonse, ulukuŵacindika ŵaLesa, nekulukulondo'kufwaya kwaŵo, uyo ŵaLesa ŵalamumfwa. 32Ukufuma kukuleŋgwa kwacalo takwaumfwanicile ati pali uwasibwile uwafyelwe nimpofu! 33Uyo-muntu, ŋga taatulile kuli ŵaLesa, ŋga taalukucita-po neli kantu. 34Naŵo nekumwasuka ati: Weŵo walifyalilwe lukoso mufyakuŵifya; lomba ulukutusambisya fweŵo? Peŋka'po ŵalimuposesye.
35ŴaYesu ŵaliumfwile ati ŵamuposya, lomba ŵo nekumusaŋgana, nekumwipusya ati: Kani weŵo ulukucetekela muMwana waMuntunsi? 36Naye nekwasuka ati: Mboyo ninani Sikulu, ati njisiŵe ukucetekela muli ye? 37ŴaYesu nekumwasuka ati: Ulimubwene, kaŵili eye ulukwambala nakwe. 38Naye ati: MweŵaSikulu, ndukucetekela. Lomba ye nekuŵalambila. 39Naŵo ŵaYesu ŵalilaŵile ati: Ndiisile muno mucalo capansi mukusololola, ati aŵo aŵataŵalukulaŵa, ŵakalaŵe; naŵaŵo aŵalukulaŵa, ati ŵakaŵe nimpofu. 40Peŋka aŵaFalisi aŵo ali naŵo ŵaliumfwile' fyo, nekulawila kuli ŵo ati: Kani nafweŵo tuli nimpofu? 41ŴaYesu ŵaliŵaasucile ati: Ŋga muli nimpofu, ŋga tamukwete ukuŵifya; sombi mulukulieŵa ati tulukulawa, peŋka ukuŵifya kwenu lomba kuciikele.
Chwazi Kounye ya:
Yoane 9: AAL59
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Lamba Bible Version © United Bible Societies, 1959.