Jon 6
6
Jesus danab 5,000 ee mattom
1-5Imu dimppa Juda dilag Pasowanu Hobul haen miag do, Jesus Nug le ameg Galili, laa ag le amunu, “Le ameg Taiberias,” aon atteb, le amu heqo laih gokkunu mataɗom. Jesus Nug laih ugekke, danab huanak ag le ihi aiɗna, dim lamidna goppig. Aɗinu? Ag Nug Kayak dabmettaknu kobol danab haknu elele iitta oɗe danab beɗulagppa heehe, ag ena daaegeg anidppig. Jesus Nug appa ukka, qauko laappa nakok te, nuhikkud ippunittak awak danab ele ag heɗep nena daappig. Daanna amu, Jesus Nug neekke ukke, danab ah huanak ag gumidna uɗiegeg antta, Nug Pilip oɗ mettom. “Ig ee elele adeppanu imu oh mattagnignu daden mekkunig?” awa oɗ mettom. 6Nug nai amuppa Pilip ma anttak medakkunu oɗ mettom; Nug nukka Nug attem hekkunu matu doyom. 7Nug anam od mette amu Pilip oɗeppa awa aum. “Danab oh ag bret huppu nakok nakok lakkulagnu amu, ig bret silwa men doɗo 1,000 eɗittak daden mekkunig daatte,” awa aum. 8Nug anam a amu, Jesusnu ippunittak awak danab laa Andru, nug Saimon Pita ele aa am eamag amu, nug aum. 9“Nid danab laa iikku daatte, nug am bali bret kunum tanig ele, amu kakai aɗit ele. Amge amuam keeke nagnag, danab am huanak,” awa aum. 10A amu Jesus amelagppa aum. “Danab imu oh heppeg, ag heɗep nena dayeg!” awa aum. Appa amu gikkiɗah teppu ele dayom amunu, danab oh ag heɗep nena daappig. Danab ⌊aakkuib⌋ ag 5,000 keeke anam. 11Ag daaegeg, Jesus bret diia aɗa, Kayak amegppa, “Ena hen mekkame,” awowa he, ⌊nuhikkud ippunittak awak danab ag⌋ panin, danab daappig amu oh anen anen madappig. Nug kakai amu ele anamib heum, amu danab oh ag ee elele aoppig. 12Haen danab ag oh oolag dittia male, Jesus Nug nuhikkud ippunittak awak danab amelagppa aum. “Ee big niitte amu oh qagmeig! Ig huppu nakok laa ii kakidmata,” awa aum. 13Nug a, ag ee big qagmena, kaleg 12 inaeg ambeum. Amuam bali bret tanig ele, danab laeg, oolag dittie uuppig, amu inappig. 14Danab ag Jesus Kayak dabmettaknu kobol danab haknu elele iitta he anidppig ele amu ag appig. “Genab ig propet laa nug wan imuppa uɗikkunu nai doomut ele am iikku!” aon appig.
15Aria Jesus doyom, ag Nug aɗan heppeg, ahilag king daakkunu heppig amunu Nug aha, qauko laappa nukka ukkom.
16-17Aam no uudoowo, Jesusnu ippunittak awak danab ag le ameg ihippa nona, Nug ameg mena daappig, amge gatatu neene, Jesus Nug gumatta ii uɗiom amunu, ag uubppa tena, le ameg mataɗna Kaperneam gokkulagnu goppig. 18Ukkaegeg, ulah huanak digmeum amunu, duban digma ahom. 19Duban ahe, haen ag uub el qena, nakok 5 o 6 kilomita anam ukkaegeg, Jesus Nug le qaɗeppa tappa, ag gukkuatta do anidna, ag eheɗ nau baɗappig. 20Ag baɗappig amge Nug ag amelagppa aum. “Ag aib baɗappig, imu daib,” awa aum. 21Nug anam a amu, ag Nug aon uubppa mekkulagnu heppig. Heeg te, uub nug pahanab aben ag gokkulagnu goppig ele guguittom.
Danab ah Jesus mattin goppig
22Deɗ Jesus danab kuɗum ee mattom ukke, wagɗe deɗ amuppa danab ah kuɗum amu ag Galili le ameg laih appa daappig amu, ag appig. “Tumai amu uub laa iitta, laippu ippunittak awak danab tena goppig ele aakkuib dayom, amu Jesus Nug nuhikkud ippunittak awak danab ele oh ii goppig, ag akka goppig.” Ag amu mattinna daanna dooppig. 23Aria ag anam doonna daappig, amu uub laala Taiberiasnu ag uɗin, Naɗi Nug unuqittowa, bret matte lappig abenppa eeɗppig 24amunu, danab ah ag Jesus, nuhikkud ippunittak awak danab ele appa ii daappig doona, ag akka uubppa tena, Jesus mattin Kaperneam goppig.
25Ag gona, Jesus laih dayeye anidna, oɗ mettan appig. “Ippunittak danab, na haen aɗippa ippa uɗime?” aon appig. 26Anam aeg amu Jesus oɗelagppa awa aum. “Da genabnab genab ag amelagppa attem. Ag Kayak dabmettaknu kobol danab haknu elele iitta da hemi amu, ag amu anidppig, amge ag diig amunu da ii mattiɗna uɗippig. Iitta. Ag bret laeg, oolag dittiom amunuib uɗippig. 27Ag ee aon lappeg, beɗulag ɠagattag qeeb, wan imuppaib ena daaglagnu aib anuqak dooppig. Iitta. Ag Kayak nai aon dabmenan, bauklel hanhannu aoglagnu anuqak doyeg! Mama Kayak Nug da ag amu madakkulnu ɠagattag meɗom amunu amu, Danab Bekkalag da, da ag madakkulnu elele,” awa aum. 28Nug anam a amu ag appig. “Ig attem heta, Kayaknu uɗat hekkunig?” aon appig. 29Aeg am Jesus oɗelagppa awa aum. “Kayaknu uɗat am iikku. Ag Kayak Nug laa me uɗiom ele, ag nuhignu oolagppa genab dooglagnu daatte,” awa aum. 30Jesus Nug anam aum amunu ag appig. “Na Kayak dabmettaknu kobol danab haknu elele iitta aɗi laa heppe, ig anidta, nahipnu oonigppa genab doognigte? Na amu laa attem hekkut? 31Ig mamenkad aɗi ag atu taɗakppa ee onig maana lappig amu, Kayak naippa nai amunu laa daatte. Nai amuam inam. ‘Ag lakkulagnu Nug hab aabppanu bret ag mattom.’ Nai anam daatte amu na amubia hekkutte?” aon appig. 32Aeg amu Jesus Nug amelagppa aum. “Da genabnab genab ag amelagppa attem. Moses nug hab aabppanu bret ii mattom, amge da Mamel, Nug amu hab aabppanu bret genab ag madatte. 33Bret Kayak madatte ele, amuam laa hab aabppanu neum. Bret amu Nug wanppan danab ah bauklel madatte,” awa aum 34Jesus anam a amu, ag appig. “Naɗi, bret amuam na haen oh mekke,” aon appig. 35Aon aeg amu Jesus Nug aum. “Bauklelnu bret am da. Danab nug dahilppa dotte amu, nug enug qak baula ii dooma. Am danab nug dahilnu ooppa genab dootte amu, nug le baag diiak baula ii dooma. 36Amge da tatam ag amelagppa ami amubia. ‘Ag da aniɗppig, amge ag oolagppa genab ii dootteb.’ 37Amu danab ah aun Mame Nug da meɗatte ele, ag oh dahilppa dokkulag, am aun nug dahilppa dotte amu, da nug ii geɗidpa. 38Aɗinu? Da hab attannu wanppa uɗimi amu, da dahil dabmaknab awak dim lamidkkulnu ii uɗimi. Iitta. Da am laa, Nug da meiɗe uɗimi ele, da nuhig dabmaknab awak dim lamidkkulnu uɗimi. 39Aria, laa Nug da meiɗe uɗimi amu, Nug oo niitte ele amu inam. Danab ah oh da meɗom ele amu, ag ohnab dahilib daaglag. Laa ii qettoɗma. Wan haen malakppa da ohnab maɗadappi, ag eɗun hippaidkkulag. 40Ao, da Mamel Nug oo niitte ele amu anam aakku. Danab aun ag Nug Bekka da, ag da aniɗna, ag dahilnu oolagppa genab dootteb ele amu, ag bauklel hanhannu aoglag. Da dakka geha wan haen malakppa maɗadakkul,” awa aum.
41Jesus Nug matu, “Da am hab aabppanu bret wanppa uɗimi,” awa aum amunu, Juda ag nuhignu oolagppa elele ii daye, akka akka nai kuɗum madippig. 42Ag inam mattinna appig. “Danab umu Nug am Jesus, Josep bekka. Nug anig mameg ele amu ig iite doottem? Attem he Nug, ‘Da hab aabppanu uɗimi,’ awa atte?” aon appig. 43Ag anam mattieg amu, Jesus Nug amelagppa aum. “Ag akka akka anam aib madippig. 44Am laa nug nukka dahilppa dokkunu elele iitta. Mame, Nug da meiɗe uɗimi ele amu, Nug laa amu ehanidkku dayeb aakkuib, nug dahilppa dokku. Dokku amu, da nug wan haen malakppa maɗedakkul. 45Propet dilag yaakppa, nai inam niitte. ‘Danab ah oh am Kayak nukka nuhig kobol ippunadkku.’ Aria aun aɗi Nug ag ehanatta ippuanatte, ag Mame oɗe doona, nuhig kobol aona amu, ag dahilppa dotteb. 46Danab ah wanppanu laippu laa nug amegppa Kayak ii anttom. Iitta. Laa nug Kayak toppanu uɗiom ele, Nug aakkuib Kayak anttom. 47Genabnab genab da ag amelagppa attem. Aun nug dahilnu ooppa genab dootte ele, nug bauklel hanhannu ele awom daatte. 48Da aakkuib am bauklelnu bret. 49Ag mamelkad aɗi atu taɗakppa ee onig maana lappig ele amu, ag mauhppig. 50Amge bret hab aabppanu neum am daib, amu laa nug bret imu lakku dayeb amu, nug ii mauhma, bau daakku. 51Bret bauklel ele hab aabppanu uɗiom am da. Am laa nug bret imu latte amu, nug bauklel hanhan daakku. Amu ele bret da wanppan danab ah bauklel daaglagnu madakkul ele imuam, da beɗul,” awa aum.
52Jesus Nug anam a amu, Juda laala ag akka akka aeg ona aeg do nai mattin, “Attemnab danab imu nukka nuhig teppu ig mekkeb lakkunig?” aon appig. 53Anam aeg amu, Jesus amelagppa aum. “Genabnab genab da ag amelagppa attem. Ag Danab Bekkalag da, da teppul tiil ele lakkulagoitte. Iitta dayeb amu, bauklel hanhannu ag oolagppa ii daama. 54Am laa nug da teppul tiil ele lakku amu, nug bauklel hanhannu ele, am wan haen malakppa da nug maɗedappi, nug eɗua hippaidkku. 55Aɗinu? Da teppul tiil ele amu lanaknu ee genab. 56Aun nug da teppul tiil ele latte amu, nug dahilppa daatte, da ele nuhigppa daattem. 57Mame, Nug bauklel daatte ele, Nug da meiɗe uɗimi amu, da nuhigppa bau daattem amubia, aun nug da laiɗtte amu, nug dahilppa bau daatte. 58Bret imu amu ag mamelkad aɗi maana lappig, amge dimppa mauhppig, am amubia iitta. Bret imu am hab aabppanu neum, am aun nug bret imu latte amu, nug haen oh bau daakku,” awa aum. 59Jesus Nug Kaperneamnu nai doyak lakka appa danab ah ippuanattatta, nai amu mattiom.
Jesus Nug bauklel hanhannu nai mattiom
60Aria Jesus Nug anam mattie, nuhig ippunittak awak danab kuɗum ag nai mattiom amu doona amu ag appig. “Nai umuam uug elenab; aun nug dookkunu elele?” aon appig. 61Ag anam appig, amge Jesus Nug ippunittak awak danab, ag akka akka nuhig nai mattiak amunu ag oolagppa elele ii daye, nai kuɗum madippig amu, Nug nukka ooppa matunab doyom amunu, Nug ag amelagppa aum. “Ag nai amu aoglagnu elele iite dootteb? 62Anam dayeb amu Danab Bekkalag da, da anukka daadmi, aben amuppa eɗuen tebippi aniɗna amu, ag attem dooglag? 63Ag doyeg! Kayak Ouɗi nukka, Nug danab bauklel medatte; danabnu ɠagattag am elele iitta. Am nai da ag mattami imuam Ouɗi, am bauklel ele. 64Anam daatte, amge ag oolagppa laala ag oolagppa genab ii dootteb,” awa aum. Jesus Nug digmakppan aun aɗi ag oolagppa genab ii dooppig, amu danab aun nug Jesus kekeɗ eppelagppa mekku amu, Nug amu oh doyom. 65Jesus Nug anam ana, Nug nai tuɗitta mattiaya aum. “Diig amunu da ag amelagppa ami. Laa nug nukka nuhig dabmakppa amu da gumiɗa ii doma. Iitta. Mame Nug laa ehanidtte, nug aakkuib da gumiɗa dotte,” awa aum.
66Jesus Nug nai amu mattiom, haen amuppa amu nuhikkud ippunittak awak danab kuɗum ag Nug dimedappig, tuɗidna Nug dim ii lamidppig. 67Jesus anam antta amu, Nug nuhig ippunittak awak danab 12 amelagppa aum. “Ag ele da uuiɗna gokkulagnu oolag daattete?” awa aum. 68Jesus anam a amu, Saimon Pita nug aum. “Naɗi, ig aun toppa gokkunig? Nai nahip aakkuib bauklel hanhannu megatte. 69Ig na dooidta, oonigppa genab ele doottem; na aakkuib am Kayak Bekka Oppiaawak Ele,” awa aum. 70A amu Jesus Nug nuhikkud ippunittak awak danab amelagppa aum. “Da ag danab 12 tituanadmi, amge laippu laa ag oolagppanu amu, nug ouɗi nau,” awa aum. 71Jesus Nug Saimon Iskariot bekka Judasnu aum. Ippunittak awak danab 12 amu oolagppanu, nug laa aakku, amge dimppa nug Jesus qeppeg mauhkkunu kekeɗ eppelagppa meum.
Chwazi Kounye ya:
Jon 6: NB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2022, Wycliffe Bible Translators, Inc. All rights reserved.