Jon 11
11
Lasarus mauhom
1Aria, danab laa onig Lasarus, Betani ted, nug am oɗe ele. Amu Maria, Marta ele, aa am e makkeg amu, aa ele am aab amuppanu. 2Maria imu, nug am leppu muttuɗig enanag ele Jesus baeg gokkaɗ qettowa, ikki uɗugppa baeg oppiom ele, ah amu aakkuib, nug oɗe danab Lasarus ele, aa eappinag. 3Lasarus nug oɗe meum amunu, Maria, Marta ele aa nai meeh, Jesus toppa ukke apiɗ. “Naɗi, na nuhignu oot mauhtte ele, danab amu aakku oɗe meum,” aoya apiɗ. 4Jesus Nug amu doya aum. “Oɗe amunu gogppa tak am mauhak, ⌊wan imuppa baula daamanu⌋ iitta. Iitta. Oɗe imuppa Kayak Nug binag amahlak oppiaawak ele awebeb, Kayak Bekka da, da ele amuppa binal amahlak oppiaawak ele aokkulnu daatte,” awa aum. 5Jesus Nug Maria, Marta amu Lasarus ele dilagnu oo mauhttom, 6amge Nug Lasarus oɗe me doyowa, Nug deɗ aɗit laa ele appa dayom. 7Dayaya, dimppa Nug nuhikkud ippunittak awak danab amelagppa aum. “Ig eɗut, Juda wanppa gotu!” awa aum. 8Nug anam a amu ag appig. “Ippunittak danab, tumainab iikku Juda ag menppa oidkkulagnu heppig, am na eɗun gokkutnu aakku hettemte?” aon appig. 9Aeg amu Jesus aum. “Amun laippu am aua 12 haen oh iite daatte? Danab nug amunppa aam amahlakppa oitte, nug amahlakppa keeke anidtte amunu, nug baeg taataɗ ii qette. 10Amge danab nug tuqan oitte dayeb, nug amahlak laa iitta amunu, nug baeg taataɗ qette,” awa aum. 11Jesus nai amu mattia mala am Nug aum. “Ig lainig Lasarus nug niiom daatte, amge da ukken maɗedakkul,” awa aum. 12Anam a amu ippunittak awak danab ag appig. “Naɗi, nug niitte dayeb amu, nug ena daakku,” aon appig. 13Jesus Nug Lasarus mauhomnu aum, amge ag oolagppa amu, “Nug genab niitte” aon appig. 14Ag anam dabmeegeg amu Jesus Nug miag atia amelagppa aum. “Lasarus mauhom, 15amge da nug ele appa ii daamuɗ amunu amu, da ool gamag ahatte. Aɗinu? Da ahilagnu dabmettem. Da dahil uɗat laa heppi, ag kobol amuppa ag dahilnu oolagppa genab dooglag. Ahappeg, ig gota anidtu!” awa aum. 16Amu Tomas, nuhignu ag Didimus ele atteb amu, nug ippunittak awak danab laa amelagppa aum. “Ig Nug ele mauhkkunignu, ahappeg, ig Nug ele gotu!” awa aum.
Jesus Nug hibaittak, bau dayak ele diilah
17Aria ag ahan gona, Betani appa teeg, appanu danab ag Jesus amegppa Lasarus deɗ waɗele moɗppa niiomnu appig. 18Jerusalemnu Betani ukkak am 3 kilomita bia, umanab iitta 19amunu, Juda kuɗum ag Marta, Maria ele, aa Lasarus mauhomnu oolah mekkunu ehanatkkulagnu gumatna goppig. 20Ag gona daaegeg, Jesus Nug uɗieye, Marta nug Jesus ibppa uɗittenu nai doya, nug Jesus ibppa anidkkunu ukkom, amge Maria nug lakka dayom. 21Marta nug ukka, Jesus antta amegppa aum. “Naɗi, na ippa daalom, da appinal nug ii mauhlo, 22amge da doottem, na geha iikku ele keeke laanu Kayak unuqidppe amu, Nug amu medakku,” awa aum. 23Nug anam a amu Jesus Nug amegppa aum. “Lasarus nug eɗua hippaidkku,” awa aum. 24A amu Marta nug aum. “Ao, da doottem, gog tak haenppa, haen danab ah eɗun hippaidkkulag, haen amuppa nug ele eɗua hippaidkku,” awa aum. 25Anam a amu Jesus Nug aum. “Da am eɗua hibaittaknu diig, bauklel hanhannu diig ele. Laa nug dahilnu ooppa genab dootte ele nug mauhkku, amge nug bauklel aokku; 26danab oh ag bau daan, dahilnu oolagppa genab dootteb ele ag mauhakppa hanhan iinab daamna. Na nai amu ootppa genab doottemte?” awa aum. 27Jesus anam a amu Marta aum. “Ao Naɗi, na am Kristus. Na Kayak Bekka wan imuppa uɗime. Da amu oolppa genab doottem,” awa aum.
28Marta anam awowa, nug lakka ukka, nug Maria, nug Maria ele aa emakkeg, nug nug onigppa e do, omala nakok giginppa ukka, amegppa aum. “Ippunittak danab uɗiom, uppa uma ibppa dayaya na oninppa ette,” awa aum. 29Maria nai amu doya, nug pahanab aha, Jesus gumitta ukkom.
30Jesus Nug aabppa paha ii teum, Nug ibppa, Marta ukka anttom ele, aben amuppa appa dayom. 31Aria, Juda ag Maria ele lakka appa nug oo ena daakkunu daappig ele, haen ag nug pahanab aha dimittim ukke anidna ag, “Nug Lasarus mahidkkunu matmatppatai gokkunu gotte” ana, ag ahan Maria dim lamidna goppig. 32Maria nug ukka, Jesus aben amuppaib dayeye anttom. Antta, nug guguitta wana, Jesus baegppa gateg qaun o, gomela, nug amegppa aum. “Naɗi, na ippa daalom amu Lasarus ii mauhlo,” awa aum. 33Maria anam a amu Jesus Nug Maria gayeye antta, Juda ag Maria ele uɗippig amu, ag ele gaaegeg anattom. Anam anatta, Nug ele oo hik boppane, gaakkunu heum. 34Anam haaha amu Nug aum. “Ag adeppa meppig?” awa aum. A amu ag appig, “Naɗi na uɗin antte!” aon appig. 35Anam aeg amu Jesus gayom. 36Juda ag amu anidna appig. “Antteg! Nug danab amunu oo huanak mauhom,” aon appig. 37Amge laa amu appig. “Nug danab ameg gaɗuak ele he ena dayom amunu, nug danab imu ele ehanitteb ena daakkunu elele iittate?” aon appig.
Jesus Lasarus maɗettom
38Aria, Jesus aakku anam baula oo hik boppane, Nug moɗ guguitta waum. Moɗ amuam men oɗe laa, amu ag men laa buɗibɗib metteg ukke, men oɗe qehagppig. 39Amu Jesus Nug amelagppa aum. “Ag men oɗe amu matuleg!” awa aum. Nug anam aum amge Marta nug aum. “Naɗi, nug deɗ waɗele moɗppa niiom amunu uɗig otte,” awa aum. 40A am Jesus Nug aum. “Da tatam na amenppa imu ami. ‘Na ootppa genab dookkut amu, na Kayak ebehi gemu anidkkut,’ ” awa aum. 41Jesus anam a, ag men oɗe ameg matulppig. Matuleg, Jesus hab attan neekkakka aum. “Mame, na unuqittak dahil doome amu da amunu, ‘Ena heme,’ awe attem. 42Da doottem, na dahil unuqittak haen oh doottem, amge da danab ah daatteb imu dilag dabmein heina, nai imu na amenppa ami. Amuppa ag na da meiɗe uɗimi amu, ag oolagppa genab dooglag,” awa aum. 43Nug anam unuqittowa, Nug huanak ewa aum. “Lasarus, na ahan dimittim do!” awa aum. 44Anam a amu danab mauhak amu aha, dimittim doum. Ag nug baeg eppeg ele linen lamen qatti elab elabppa itan, iɗu am lamen laappa itappig amunu, nug uɗie Jesus ag amelagppa aum. “Lamen uhuqppeg ukkaɗ!” awa aum.
Ikki danab ag Jesus qekkulagnu nai qagappig
45Jesus danab mauhak maɗette amu, Juda kuɗum Maria anidkkulagnu uɗippig ele ag Jesus uɗat amu he anidna, ag nuhignu oolagppa genab dooppig. 46Amge laa ag gona, ɗo gumak danab-Parasia amelagppa Jesus aɗi heum amunu madippig.
47Mattieg amu, mana mettak danab okkai, amu ɗo gumak danab-Parasia ele ag Juda dilag hettoɗiak okkai onig Sanhidren, amunu danab oh qagmaadna appig. “Ig attem hekkunig? Danab imu Nug Kayak dabmettaknu kobol danab haknu elele iitta kuɗum hette. 48Ig dootta daappupput, Nug inamib tuɗitta hekku dayeb amu, danab ah oh nuhignu oolagppa genab dooglag. Genab dooppeg amu, geha Rom ag, ‘Umuam king laa ahom daatte,’ anana, ag uɗin, ihinig Kayaknu mettid lag loppaɗppeg nauheb, ihinig wan ele heppeg nauhkku,” aon appig. 49Amge danab laippu laa, ag oolagppa dayom ele amu, nug onig Kaiapas, nug maɗ amuppa mana mettak ikki danab dayom amu, nug laikkud amelagppa aum. “Ag keeke laippu iinab dootteb. 50Ag imunu dabmak iitai aoppig? Ig oh Rom eppegppa mauhkkunig dayeb am ena iitta. Yo, danab ah oh mauhkkulag dayeb am ena iitta, amge danab laippu laa nug danab ah oh abenlag awa mauhkku dayeb, amuam ena amunu, danab umu Nug mauhaɗ!” awa aum. 51Nug nukka nuhig dabmakppa Jesus mauhkkunu nai amu ii aum. Iitta. Maɗ amuppa nug mana mettak ikki danab dayom amunu, Jesus mauha, Juda danab ah ehanadkkunu propet nai mattiom. 52Amu ele nug Jesus, Juda dilagib mauhkkunu ii aum. Iitta. Nug Jesus mauhkku, amuppa Kayaknu danab ah atu ohppa daatteb amu, Nug ag oh diia qagmaatteb, ag oh laippu daaglagnu aum.
53Aria, Juda okkai ag deɗ aguppaib digmena, Jesus qeppeg mauhkkunu nai madippig 54amunu, Jesus Nug baula Juda oolagppa miag atiak ii oiyom. Nug aab amu uua, aha aab laa onig Epraim, atu taɗak guguittak, appa ukkom. Ukke, nuhikkud ippunittak awak danab ele ag aab amuppa daappig. 55Ag appa daaegeg, Juda dilag Pasowanu Hobul miag doum amunu, aab laih laihnu danab ah oh Jerusalem appa, ag akka tatam oolag ihan oppiak daappeg, hobul digmekkunu hena gona amu, 56ag Jesus madippig. Ag Kayaknu mettid lag nuhig tomppan keeke oh ele ooppa daanna, ag akka akka nug oɗ mettan appig, “Ag attem dootteb? Nug Pasowanu Hobul anidkkunu iitai uɗima,” aon appig. 57Am mana mettak danab okkai amu ɗo gumak danab-Parasia ele ag tatam danab amelagppa, danab laa nug Jesus adeppa daatte amu doya amu, nug ag amelagppa ab, Jesus aon maniguittakppa mekkulagnu appig.
Chwazi Kounye ya:
Jon 11: NB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2022, Wycliffe Bible Translators, Inc. All rights reserved.