Genesis 8
8
Le hiɗ iitta meum
1Le hiɗ naɗi anam ba daye ukke, Kayak Nug Noa, nug baekkudppa ele, doɗ dakkuɗ, doɗ aabppanu ele, ag Noa ele uubppa daappig amu, Nug amu oh dilag dabmak awa he, ulah uɗia le iwale, digma hiɗa noum. 2Amu Kayak he, wan ooppanu le qeppuɗia ii beum. Gu ele ii neum 3amunu, le hiɗ hiɗa ugekke, deɗ 150 uue, le ⌊qauko ikkilkad guguittak⌋ no, 4uub amu kalam ebqak eblaih aɗit ele, kalam amunu deɗ 17ppa Araratnu qauko laappa aolom. 5Le hiɗ hiɗa ukke ukke, kalam eblaih tanig elenu deɗ digmakppa qauko laa ele miag atippig.
6Miag atieg, deɗ 40 dimppa amu, Noa nug uub gililppa ulah ippu heum ele amu, nug amunu od nakok matula, 7ai laa alɗal bia me ukkom. Me ukka, nug ugakka uɗiaya, ugakka uɗieye ukke ukke, le qaɗaiettom. 8Alɗal me ukke dimppa, Noa nug ai uppuɗil beɗulag nakok, le iitta meumtai, amu anidkkunu me ukkom. 9Amge le wan tona dayom amunu, uppuɗil beɗulag nakok nug dayak aben iittanu nug eɗua ukke, Noa nug eppeg bahie ukke, ai uɗie, nug awa, uub ooppa meum. 10Mewowa amu, nug uubppa deɗ eblaih aɗit baula ameg mak dayaya, nug uppuɗil beɗulag nakok bau laa me ukka, 11oiya oiya, tueb, haen nug eɗua uɗiaya, nug olip ad, nug ad amu uɗug nobohippa awa ele uɗie, Noa antta, le hiɗa noum amu, nug aakku doyom. 12Aria, Noa deɗ eblaih aɗit baula ameg mak dayowa, nug uppuɗil beɗulag nakok amu baula me ukka, eɗua ii uɗiom. 13Haen amuppa Noa nug maɗ 601 aokkunu dayeye, maɗ amunu kalam digmak, kalam amunu deɗ digmakppa, le qaɗaiettom. Qaɗaiette amu, Noa nug uub haug ⌊laih⌋ huma awa, wan qaɗeppa amu qaɗaiettak anttom. 14Antte ukke, kalam ebqak aɗit, kalam amunu deɗ 27ppa wan oh qaɗaietta malom.
15Anam daye amu, Kayak Nug Noa amegppa aum. 16“Na, na waat, na begapad, amu ag waalkad ele, ag oh uub uun, dimittim noig! 17Amu na doɗ iɗu iɗu oh, ag na ele uubppa daatteb, amuam doɗ, ai, doɗ laa ag oolag wan qeeqe oitteb oh ele amu, ag wanppa daanna, kuɗum appatkkulagnu, na amu oh diiadna dimittim ukke!” awa aum.
18Kayak Nug anam aum amunu, Noa, nug wau, bekkod, amu ag waalkad ele oh uub uun, dimittim noppig. 19Noeg amu, doɗ, ai, doɗ laa ag oolag wan qeeqe oitteb ele oh amu, ag uub dimittim noppig. Doɗ iɗu laa, anig, dawai ele aa noeh, doɗ iɗu laa anig, dawai ele nopiɗ. Ag anamib nona nona, malappig.
20Ag nona malaeg, Noa nug qaɗab qa, nug doɗ, ai ele iɗu iɗu oh mana mettaknu elele, nug amu laippu laippu diiatta, manaknu ofa daaglagnu manatta, Yawe mettom. 21Mana mettette, Yawe Nug mana mettak amu muttuɗignu ooppa ena doya, Nug nukka, Nug ooppa inam aum. “Da danab dilag eheɗ hak amunu wan eheɗ laa awaknu anak waappa daakkunu memi imubia baula iinab hepa. Aɗinu? Da doottem, danab nug menuak haenppa ukka ukka, mauhak nuhigppa amu, keeke laa nug danab ooppa hipuninppa eeɗkkunu daatte. Amu laa ele, da hemi bia, da keeke oh bau daatteb ele amu, baula heppi, ii mauhmana. 22Wan nug dayebeb, ee eppak haen, ee awak haen, oug haen, gakkaɗak haen ele, gu haen, aam haen, tuqan, amun ele, keeke amu oh iitta ii mema; anamib daakku,” awa aum.
Chwazi Kounye ya:
Genesis 8: NB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2022, Wycliffe Bible Translators, Inc. All rights reserved.