Genesis 42
42
Josep awakkud, ag Israel bekkod amu, ag ee daden mekkulagnu Isip goppig
1Amu haen Jakop nug Kanan wanppa dayaya, nug Isip wanppa ag ee aeg ele daatteb doya amu, nug bekkod amelagppa aum. “Aɗinu ag nug neekkidna daatteb? 2Isip wanppa ag ee aeg ele aeg doomi amunu, ig mauhmatanu, ag ahan, Isip wanppa gona, ee amu daden mena, aon uɗippeg latu!” awa aum.
3Nug anam a amu, nug bekkod, ag am Josep awakkud eblaih laih ele amu, ag ee aeg daden mekkulagnu ahan, Isip goppig. 4Ag goppig, amge Jakop nug Josep amag Benyamin hagakka awe, ii ukkom. Aɗinu? Jakop nug Benyamin mauhmanu oo okkai baɗom. 5Kanan wan ohppa enug haen beum amunu, Israel bekkod ag danab laala ele ee aeg daden mekkulagnu Isip goppig.
6Josep nug Isip wannu gawana dayeye, danab oh ag ee aeg daden mekkulagnu heppig ele, ag ee aeg Josep toppanu daden meppig amunu, haen Josep awakkud ag uɗin, ag ele Josep toppa gona, Josep noobppa gatelag qaun ona, gomelna, iɗulag wanppa meppig. 7Ag Josep toppa ukkaeg amu, Josep nug ag doyattom, amge nug ag amelagppa, “Da ag doyadttem,” ii aum. Iitta. Nug nai ɠagattag ag amelagppa inam aum. “Ag adeppanu uɗippig?” awa aum. Nug anam a amu, ag appig. “Ig Kanan wanppanu, ee daden mekkunignu uɗimut,” appig.
8Amu Josep nug awakkud anatta, nug ag doyattom, amge ag nug anidna, ag nug ii dooppig. 9Ele amu, Josep awakkud ag Josep noobppa teeg, Josep anatta, nug anukka ahilagnu tul niiom, tul niiak amu nug daugppa doum.
Aria, anam amu, nug ag amelagppa aum. “Ag am lokkumakppa atu italak danab. Ag ig wanenig laih atten ban haknu daup iitta, ag amu anidkkulagnu uɗippig,” awa aum. 10Josep anam a amu, ag oɗeppa aon appig. “O naɗi, iitta! Ig, nahip maɗi nid amu, ig eeib daden mekkunignu uɗimut. 11Ig oh am danab laippu bekkod. Ig, ig nahipad maɗi nid amu, ig nai genab mattiak danabib, ig lokkumakppa atu italak danab iitta,” aon appig. 12Ag anam aon aeg amu, Josep oɗelagppa awa aum. “Iitta! Ag ig wanenig adeppa ban danab iitta, ag amu anidkkulagnu aakku uɗippig,” awa aum. 13Josep anam a amu, ag oɗeppa aon appig. “O naɗi, ig, nahipad maɗi nid, ig am awag amag 12 ele. Ig oh mamenig laippu, amu nug Kanan wanppa daatte. Amanig yuɗnab am, nug ig mamenig ele uppa uma daattep; aria ig amanig laa amu, nug padal meum,” aon appig. 14Aon aeg amu, Josep nug aum. “Da matu ami aakku, ag am lokkumakppa atu italak danab. 15-16Anam amu, da ma anttak ib inamppa ag madakkul. Ag oolagppanu laippu laa nug ukka, ag amalag yuɗ omala uɗikku. Ag laa oh, ag nai genab appigte o iittate, da anidkkulnu amu, ag ippa maniguittakppa daaglag. Amu Paro genab bau daatte, genab amubia ag amalag yuɗ ii uɗikku dayeb amu, ag laa ag ippanu ii ahamna. Am ele, Paro genab bau daatte, genab amubia ag hambuppuak madippig dayeb amu, ag aakku lokkumakppa atu italak danab daatteb,” awa aum. 17Nug anam awowa nug he, laa ag diin, maniguittakppa maatteg, deɗ ewam daappig.
18Amu deɗ ewamppa Josep amelagppa aum. “Da Kayaknu ebehil oh bodoetta le mette amunu, ag inam hena, ag bau, ena daaglag. 19Ag nai genabib mattiak danab daatteb dayeb amu, ag oolagppanu laippu laa maniguittakppa dayebeb, laa oh ag eɗun, ee aeg aon goppeg, ag baelkadppa, ag ee iitta daatteb amu, ag ag ele lakkulag. 20Amge da nai ahilag am genab, o genab iitta, da amu dookkulnu, ag amalag aon uɗiglagoitte. Ag anam heppeg, da nai ahilag am genab dooppi, ag bau, ena daaglag,” awa aum. Nug anam a amu, ag, “Ig anam hekkunig,” aon appig.
21Ag Josep amegppa anam appig, amge ag akka akka inam madippig. “Ig amanignu anukka eheɗ heut, ig beɗunigppa aab daatte amunu, gemu ig eheɗ hak amunu nob iikku aottem. Haen amuppa nug mauhak uua heehe, ig oo uug naunab doyak nuhig anidmut, amge ig nuhignu oonig ii doye, nuhig nai oo doyak ele ig amenigppa aum elenu dab-ii-memut. Keeke amunu nob gemu ig anidttem,” aon appig. 22Ag akka akka anam anana amu, Ruben nug aum. “Da haen amuppa, ‘Ig amanigppa hipunin laa aib hemut,’ ami, amge ag dahil nai iinab dooppig. Aria, ig hemutnu nob amu, gemu ig aottem,” awa aum.
23Ag akka akka anam madippig, amge haen Josep nug awakkud ele nai mattiegeg, danab laa, nug am nai eɗuak danab amu, nug gamagppa dayaya, nug Hibru nai Isip naippa eɗuom, amu nug Isip nai Hibru naippa ele eɗuom amunu, Josep awakkud ag Josep nai ahilag doyom amu, ag ii dooppig.
24Josep nug nai ahilag doya, nug uuatta, aben laih ukka gayowa, nug eɗua gumatta noa, ag amelagppa nai mattia, ag amelagppa ele Simeon tituana he, ag hippalppig. 25Hippaleg amu, Josep nug maɗi nid nuhikkud ag Josep awakkud ag ahilag bek ohppa ee aeg inadna, silwa men doɗo, ee aeg dadennu, amu ele eɗun bekppa inadna, ibppanu ee ele bappaidkkulagnu aum. Nug anam aum amunu, ag anam heeg, 26Josep awakkud ag keeke oh aon, donki ahilag qaɗelagppa maadna, ag eɗun, Kanan gokkulagnu goppig.
27Ag gona, ibppa niiglagnu henana, ag oolagppa laippu laa nug nuhig doɗ ee medakkunu ha, bek oɗe uhuqom. Uhuqa amu, nug silwa men doɗo nuhig bek oɗeppa dayeye anttom. 28Antta amu, nug laikkud amelagppa aum. “Silwa men doɗo dahil am, danab laa eɗua meɗom. Am dahil bek oɗeppa iikku daatte,” awa aum. Awa a amu, ag ottaina, eheɗ baɗan, akka akka madippig. “Kayak Nug ihinignu attem hekkunu hette?” aon appig.
29Aria, haen ag gona, Kanan tena amu, ag mamelag Jakop amegppa nai amu oh mattina, 30ag inam appig. “Isip dilag gabman okkai nug ig amenigppa nai ɠagattag mattiom. Ihinignu nug ig Isip wan attem daatte lokkumakppa atu italak danab bia heum. 31Nug anam heum, amge ig nug amegppa amut. ‘Ig am nai genabib mattiak danab. Ig am lokkumakppa atu italak danab iitta. 32Ig awag amag 12, danab laippu bekkod oittem. Oonigppanu laippu padal meum, amu amanig yuɗ nug mamenig ele Kanan uppa uma daattep,’ aot amut. 33Ig anam aut, nug aum. ‘Da ag danab nai genabib maditteb dookkulnu amu, ag inam heig! Ag oolagppanu laippu amu, nug da ele ippa daagnih. Ag laa oh eɗun, ee aon goppeg, ag baelkadppa, ag ee iitta daatteb amu, ag ag ele lakkulag. 34Ag anam hekkulag, amge ag eɗun uɗiglag henana, ag amalag yuɗ ele aon uɗiglag. Ag anam heppeg amu, da ag danab nai genabib maditteb doyeye, ag lokkumakppa atu italak danab iitta ele doyen, da ag lailag eɗue madappi, ag wan imuppanu ee aoglagnu elele,’ awa aum.” Ag anam appig.
35Ag mamelag amegppa anam ana amu, ag oh ee aon gona, ee mak abenppa gokkaɗadnana, ag anen anen ahilag silwa men doɗo bek ooppa anidppig. Haen ag mamelag ele oh silwa men doɗo amu anidna amu, ag Isip dilag danab okkai aladmanu baɗappig 36Amu keeke amu oh anam be, Jakop nug ag amelagppa aum. “Ag heppeg, da nid iitta daakkul. Josep am iitta. Simeon ele am iitta, gemu ag Benyamin aon gokkulagnu hetteb. Uug amu oh da maottem,” awa aum. 37Jakop anam a amu, Ruben nug aum. “Na Benyamin da eppelppa meppe, da omale gokkul. Da nug awen eɗuen ii uɗippi amu, na oot heeb, na da bekkalaɗ aɗit aakkud aqatppe mauhkkulah,” awa aum. 38Ruben anam a amu, Jakop nug aum. “Benyamin ag ele ii gomana. Aɗinu? Nug awag mauhom, nukkaib daatte. Ag nug aon goppeg, oiyak ahilagppa padal meeb amu, da ool naɗi guittebeb, mauhkkul,” awa aum.
Chwazi Kounye ya:
Genesis 42: NB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2022, Wycliffe Bible Translators, Inc. All rights reserved.