Genesis 38
38
Juda Tamar ele dilah nai
1Aria haen gamag amuppa amu, Juda nug awakkud amakkud ele uuatta ukka, aab onig Adulam appa danab onig Hira ele daapiɗ. 2Appa dayaya, nug Kanan danab onig Sua aɗeg antta awe oiyya, 3nug oo ele daya, nid danab menue, mameg nug onig Er ataɗom. 4Aa baula oiyya, Juda wau nug nid danab laa onig Onan menuom. 5Aria, aa baula oiyya, aab onig Kesip daayya, Juda wau nug nid danab onig Sela menuom.
6Er, Judanu nid naanaeg amu, nug ena me, Juda nug nuhignu ah onig Tamar awom. 7Awom, amge Er, Judanu nid naanaeg, nug Yawe noobppa nuhig kobol ena iitta, am kobol nau. Kobol nuhig anam daye, Yawe Nug he mauhom.
8Nug mauhom amunu, Juda nug Onan amegppa aum. “Na ihinig ɗo dim lamidna, na awan qappu aoppe oiyya, nid menueb amu, nid amu nug na awan buɗub daakku,” awa aum. 9Anam aum, amge Onan nug nid amu nug nuhig ii daama doya, nug uua he, nug awag wau ele nug oo ele dayaknu tutukku ii oipiɗ. Nug awag buɗub humakkunu oo ii dayom. 10Nug kobol anam he, kobol amuam Yawe noobppa kobol nau ele amunu, Yawe Nug nug ele he mauhom.
11Nug mauhe, Juda antta, dabmakppa Selanu aum. “Nug awakuɗ mauhpiɗ bia mauhkkutai,” awa aum. Anam dabmakppa aum amunu, nug Tamar ⌊hambubuitta⌋, amegppa aum. “Na goppe, ah qab bia mamen ele daapeɗ, Sela ena meeb, aa ewau matulak aoglah,” awa aum. Nug anam a amu, Tamar nug aha ukka, mameg laugppa dayom.
12Haen elab ukke dimppa, Juda wau Sua aɗeg, nug mauhom. Mauhe, Juda nug mahitta malowa amu, nug aha, Timna gokkunu ukkom. Timna appa nuhikkud maɗi nid ag sipsip uɗilag otaɗadppig; amu nug layag Hira, Adulam ted, nug ele gopiɗ. 13Ukkaeheh, danab laa nug Tamar amegppa aum. “Na ahipan Juda, nug sipsip uɗilag otaɗadkkunu Timna gotte,” awa aum. 14Nug anam a, Tamar nug ah qabnu lamen uɗa, lamen laa takkowa, lamen teppu iitta, amuppa Juda anidmanu iɗu hauta, Timnanu ukkak ibppa, aab onig Enaim taknu ib oɗatleppa dayom. Sela nug ena ma malom, amge Juda nug he, aa ewau matulak ii aopiɗ doyom amunu, Tamar amu heum. 15Nug appa dayaya, iɗu hautom amunu, Juda nug dabmakppa, “Ib baag ah laa aakkutai,” awa aum. 16Anam ana amu, nug ah amu nug ahipa ii doyom amunu, nug gumitta wa, amegppa aum. “Ahappe, da ele oiɗu,” awa aum. Nug anam a amu, ah nug eɗua nug oɗ mettom. “Da na ele oignihnu amu, na nob aɗi meɗakkut?” awa oɗ mettom. 17Anam oɗ mette amu, Juda aum. “Dimppa da meeme nag laa meppi uɗikku,” awa aum. Awa a, ah nug oɗeppa awa aum. “Dimppa na meeme nag amu genab meɗakkutnu amu, na aɗi keeke laa at daakkunu geha iikku meɗakkut?” awa oɗ mettom. 18Nug anam oɗ mette amu, Juda nug, nug oɗ mettom. “Da na aɗi keeke at daakkunu medakkul?” awa oɗ mettom. Oɗ mette amu, ah nug aum. “Nahip doyaknu at stemp-ppa daatte, nuhig muɗi ele, amu dudqak hokkat nahip ele meɗe,” awa aum. Anam a amu, Juda awa mette, nug ele niipiɗ. Aa anam niioya, Tamar nug aakku oo ele dayom. 19Amge, aa anam hewoya amu, Tamar aha ukka, iɗu hautak lamen nakok uɗowa, ah qab dilag lamen eɗua takkom.
20Tamar nug anam he, Juda nug meeme nag laa nug layag Hira, nug am Adulam ted, nug eppegppa, nug awa ukka, Judanu keeke oh ah mettom ele eɗua aokkunu me, nug meeme amu awa ukkom. Nug ukka, ah mattia ii anttom. 21Ii antta, nug appan danab oɗ mattom. “Kayak hambuppuaknu mettid lag nakoknu ib baag ah Enaim guguittak ib giginppa dayom ele amu, nug adeppa daatte?” oɗ mattom. Oɗ matte, ag appig. “Mettid lag nakok amunu ib baag ah laa ibppa, ippa ii dayom, gemu ele ii daatte,” aon appig. 22Ag anam aeg, nug eɗua ukka, Juda amegppa aum. “Da ah amu ii anidmi. Appan danab ag ele, ‘Ippa ah anam laa ii dayom, gemu ele ii daatte,’ appig,” awa aum. 23Nug anam a amu, Juda nug aum. “Uue! Appan danab ag imitmananu, nug keeke mettak, nug aɗakku. Da meeme nag nug mettalom, amge na nug ii anidme,” awa aum.
24Aria, kalam ewam keeke dimppa, danab laa nug Juda amegppa aum. “Na ahipan Tamar nug ib baag ah hette bia danab laa ele oiyya, oo noum,” awa aum. Awa a, Juda nug aum. “Ag aon dona, dimittim aab aɗuppa manappeg mauhaɗ!” awa aum. 25Nug anam a amu, ag ah amu omalna, dimittim ukkaegeg, nug ahipanu nai imu me ukkom. “Da keeke imu aɗami ele amu, na antte! Laanu doyaknu at stemp-ppa daatte, nuhig muɗi ele, amu dudqak hokkat imu ele na anidna doottemte? Keeke amu mameg amu, nug da nid meɗom,” awa aum. 26Nug keeke amu me ukke, Juda nug genab nuhig keeke antta, nug aum. “Da eheɗ okkai hemi. Ah imu nug eheɗ okkai anambia ii heum. Da nid danab dahil Sela, aa ewau matulak aoglahnu ii mettami,” awa aum. Anam a amu, nug ah amu ele baula ii oipiɗ.
27Aria, Tamar nug oo ele dayeye ukke, nid awak haenppa nid danab gani ele ooppa daaeheh menuatom. 28Menuewe amu, laa nug eppeg tatam no, nid awak gumak ah nug muɗi teppu iitta kokoɗnab eppeg baagppa qakkowa nug aum. “Nid imuam tatamnu,” awa aum. 29Nug anam he, nid amu nug eppeg eeɗe te, nug laa tatam do, gumak ah nug aum. “Attem hena, na tatam dome?” awa aum. Awa a amu, ag onig Peres ataɗppig. 30Aria, nid laa nug eppeg baagppa muɗi teppu iitta kokoɗnab ele amu do, ag onig Sera ataɗppig.
Chwazi Kounye ya:
Genesis 38: NB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2022, Wycliffe Bible Translators, Inc. All rights reserved.