Genesis 3
3
Danab ah ele hipuninppa neya qepiɗ
1Haen amuppa, mat nug dabmak lokkumakppa kobol kobol hekkunu doya auta awawa, nug amu hekkunu doɗ dakkuɗ laa oh Yawe Kayak hattom ele, nug amu oh eɗattak dayom. Dayaya amu, nug ah amegppa aum. “Kayak Nug genabte aa ad imu oh meulkad ii lamayanu amelahppa aum?” awa oɗ mettom. 2Nug anam a amu, ah nug mat oɗeppa awa aum. “Iitta. I ad meulkad imu oh lakkunihnu elele, 3amge Kayak Nug ad laippu, dad imu gamagppanab daatte umu, nuhig meunu amu, Nug i amenihppa inam aum. ‘Aa aib lapiɗ, aib aɗapiɗ. Aa lakkulah dayeb, aa mauhkkulah.’ Kayak Nug anam i amenihppa aum,” awa aum. 4Ah nug nai anam a, mat nug ah oɗeppa awa aum. “Iitta. Aa ii mauhmaya. 5Kayak dootte, haen aa ad amu meu lakkulah amu, aa keeke ena, nau ele dooyya, Nug bia daaglah amunu, ⌊Nug ɗo meum⌋,” awa aum.
6Aria, haen ah nug ad meu amuam anttaknu ena antta, lanaknu ele ena antta, doyak dabmak ena ele medakkunu elele, ele antta, amu nug meu awa lawowa, gamu nug ele daapiɗ ele mette, nug ele laum. 7Lawoya amu, aa pahanab beɗulah hamu dayeye dabmakppa doopiɗ amunu, aa ad fig uɗug aoya, lamen heya, tagapiɗ.
8Aa anam heeh, deɗ amuppa tueb Yawe Kayak Nug dad ooppa oiyeye, danab ah ele oqotti dooyya, Yawe Kayak anatmanu dad amunu ad oolagppa lokkumya daapiɗ. 9Anam daaeheh, amu Yawe Kayak Nug Adam onigppa ewa aum. “Na adeppa daattem?” ewa oɗ mettom. 10Anam ewa a amu, danab nug aum. “Da na dad imu ooppa oiye doyen, da lamen iitta amunu, da baɗe, lokkume daattem,” awa aum. 11Adam nug anam awa a amu, Yawe Kayak Nug aum. “Aun na lamen iitta daattem a doome? Da ad meu laa na ii lamananunab ami amu, na aon lamete?” awa oɗ mettom. 12Yawe Kayak Nug anam oɗ mette amu, danab nug aum. “Ah imu na da meɗame amu, nug ad meu meɗe lami,” awa aum. 13Awa a amu, Yawe Kayak Nug ah oɗ mettom. “Aɗinunab na anam heme?” awa oɗ mettom. Oɗ mette amu, ah nug eɗua amegppa aum. “Iitta! Mat nug da hambuppuiɗe, ad meu imu lami,” awa aum.
14Ah nug anam a, Yawe Kayak Nug doya, Nug mat amegppa aum. “Na keeke nau imu heme amunu,
nahip eheɗ laa awaknu anak waappa dayak am aabppan doɗ laa oh eɗattak.
Ge, am doɗ dakkuɗ ele laa oh eɗattak.
Na ootppaib oinna;
amu na gappud lanana oippeppe ukkeb, na mauhkkut.
15Amu da heppi, na ah ele gamalahppa hanhan kekeɗ daakku. Ele amu, ah buɗub, amu na buɗun ele gamagppa kekeɗ daakku. Amu ah buɗub laa aha, na ikkin tappeb toɗeb, na danab amu baeg bittub heppe hinqekku,” awa aum.
16Yawe Kayak Nug anam awowa, Nug eɗua, ah amegppa aum.
“Da heppi, nid awak haenppa na guittak okkai dookkut.
Ao, na guittak doon, nid menuadkkut.
Na gamutnu oot huanaknab daakku,
amu nug na gumidkku,” awa aum.
17Yawe Kayak Nug anam awowa, nug eɗua Adam amegppa aum. “Na waatnu nai dim lamidna, ad meu aa ii lamayanunab ami ele lame amunu, na beɗunppa wan am eheɗ laa awaknu anak waappa daatte. Anam daatte amunu, na haen oh ee aokkutnu uɗat okkai guittak ele hekkut. 18Uud keeke qaun ele wanppanu bena, na uug mettaglag, amge na ee aeg wanppanu betteb lakkut. 19Na wanppa uɗat naɗi, heɗi ele henana, na ee aokkut. Anam henana, na mauhna, wan mekkut. Aɗinu? Da na gappudppa heidmi amunu, na beɗun eɗua, gappud mekku,” awa aum.
20Adam wau nug danab ah oh anilag amunu, Adam nug onig Ewa ataɗom.
21Dimppa Yawe Kayak Nug doɗ gaɗappa lamen ha mate takkaeh, Nug aum. 22“Danab nug keeke ena, nau ele doya, ig bia daatte. Bau dayaknu ad dad gamagppa daatte amu, nug meu amu lawowa, haen oh daamanu, nug dad imuppa ii daama,” awa aum. 23Aum amunu, Yawe Kayak Nug danab dad ooppanu lamitte, dimittim, Nug Adam heumppa, wan amuppa Adam nug eewak uɗat hekkunu ukkom. 24Yawe Kayak Nug danab ah ele lamatowa, nug dad Iden wanppa dayom laih kaɗag uɗitteppanu, appa engel okkai-kerubim, amu aab aɗu, qep iɗu bia ele maattom. Ag dad amunu ib, danab ooppa eɗua bau dayaknu ad meu lakkunu ii nomanu gumappig.
Chwazi Kounye ya:
Genesis 3: NB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2022, Wycliffe Bible Translators, Inc. All rights reserved.