Genesis 25
25
Abraham mauhom
1Amu haen laa Abraham nug ah laa onig Keturah awe, 2aa nid danab eblaih laippu ele menuadpiɗ. Ag onilag am Simran, Joksan, Medan, Midian, Isbak, Sua ele. 3Joksan bekoɗ am Seba, Dedan ele. Dedan buɗub amu Asur danab, Letus danab, amu Leum danab ele. 4Midian bekkod am Epa, Eper, Hanok, Abida, Elda ele. Ag am Keturah buɗub aakku.
5Abraham bau dayaya, nug nuhig mauhak haenppa aɗi keeke oh nug eppegppa daakku am Aisak aokkunu nai babaitta, 6nug ele bekkod laa, ag anilti am nug wauuɗ amge wauuɗnab iitta amu, nug aa bekkalti keeke ahilkad daakkunu hamu mattom. Matta malowa amu, nug ag nug bekka Aisak uuidna gokkulagnu a, ag laih kaɗag uɗitteppanu gona, wan amuppa daanna oippig.
7Amu Abraham nug maɗ 175 dayaya, 8nug mauhom. Nug am danab kainonab. Haen elab wanppa oiya, nug mauhom. 9-10Nug mauhe amu, nug bekoɗ Aisak, Ismael ele aa nug men oɗe onig Makpela, tatam Hit danab Sohar bekka Epronnu dayom, dimppa Abraham nug Hit danab eppelagppanu daden meum, Sarah boumomppa, appa boumpiɗ. Makpela amu, Mamre guguittak dayom. 11Abraham mauhe, Aisak, nug Ber Lahai Roi guguittak daye, amu Kayak nug itittom.
Ismael buɗub
12Anukka Sarahnu maɗi ah Hagar, Isipnu, nug Abraham bekka Ismael menuom amu, nai imuam Ismaelnu nai.
13Ismael bekkod 12, naanaeg ukkak huh bieg, ag onilag am inam: Nebaiot, Ismaelnu nid danab naanaeg, aria Kedar, Adbil, Mipsam, 14Misma, Duma, Masa, 15Hadat, Tema, Jetur, Napis, Kedema ele. 16Ismael bekkod 12 onilag aakku, amu ag oh ahilkad huu okkai anen anen ikki danab daaeg, danab ag, ag onilkad aon, aab anen anenppa ele ataɗppig.
17Aria, Ismael nug maɗ 137 dayaya, nug mauhe, 18dimppa nug buɗub ag Hawila, Sur ele gamalahppa oittappig. Wan amuam Isipnu tom kaɗag uɗitteppanu, am tom amu dim lamitta daye, am tom amuppanu ukka ukka, Asur batak. Ag wan amu ooppa oinna, ag ahilkad tiig laippu ele kekeɗ mettak daadttappig.
Aisak, Rebeka ele aa Jakop, Esau ele menuatpiɗ
19Imuam Abraham bekka, Aisaknu nai.
Abraham nug Aisak mameg, amu 20Aisak nug maɗ 40 dayaya, nug Betuel aɗeg Rebeka awom. Betuel nug Aram ted Mesopatemianu, amu nug bekka Laban, Rebeka awag, nug ele amu Aram ted. 21Aisak wau Rebeka nug nid iitta, nug ah mattoi amunu, Aisak nug Yawe amegppa amunu unuqitte, Yawe Nug he, Rebeka nug oo ele oiyom. 22Nug ooppa nid aɗit daayya, aa nug ehalpiɗ. Aa anam heeheh amu, Rebeka nug aum. “Aa anam hettep amunu, da ool iitta daalom, amuam ena,” awa aum. Anam ana amu, nug keeke amunu Yawe oɗ medakkunu ukkom. 23Oɗ mette, amu Yawe Nug aum.
“Danab ameg aɗit na ootppa daattep.
Ao, na menuatppe, aa appatya, ameg piɗe piɗe daaglah.
Ameg laa amu, nuhig ɠagattag am laa eɗidkku.
Ge, nid tatamnu am nid gehanu waappa daya, nuhig uɗat hekku.”
Yawe Nug anam aum.
24Yawe anam a, dimppa nid aokkunu haen do, Rebeka nug nid danab aɗit menuatom. 25Matunu amu nug beɗu kokoɗ, uɗig alala amunu, ag nug onig Esau ataɗppig. 26Aria, gehanu nug anig menuewe, nug Esau baeg bittub aɗaɗa neum amunu, ag nug onig Jakop ataɗppig. Haen aa dopiɗ amu, Aisak nug maɗ 60 ele dayom.
27Dimppa aa ena meya, Esau nug hikan danab dayom. Nug dad okkaippa oiyom, amge Jakop nug toetta dayak danab; nug ag daappigppa dayom. 28Aisak nug doɗ dakkuɗ lakkunu baag gottom. Esau nug hikan danab amunu, Aisak nug Esaunu oo mauhom, amge Rebeka nug Jakopnu oo mauhom.
29Deɗ laa Jakop nug ee heehe, Esau uɗia, enug eheɗ qeeqe, Jakop amegppa aum. 30“Enug huan iutte amunu, na paha lewa kokoɗ amu meɗappe lai!” awa aum. Anam aum amunu, ag Esau onig laa Edom ataɗppig. 31Esau anam a amu, Jakop nug oɗeppa awa aum. “Na am nid danab naanaeg. Tatam na nid danab tatamnu dilag itittak ena anuqak oh da meɗappe, da lewa imu medakkul,” awa aum. 32Jakop anam a amu, Esau nug aum. “Da mauhkkul hettem amunu, nid danab tatamnu dilag itittak ena anuqak am attemun da ehaniɗkku?” awa aum. 33Esau anam aum, amge Jakop nug aum. “Na keeke amunu meɗakkutnu tatam nahip nai ɠagattag qettana, da amelppa appe doyen, da ee imu medakkul,” awa aum. Anam a amu, Esau nug nuhig nid danab tatamnu itittak ena anuqak Jakop medakkunu nuhig nai ɠagattag qetta aum. 34Anam he amu, Jakop nug Esau bret, amu bin diig laa onig lentil, amunu lewa ele mettom. Mette, Esau nug lawowa, aha ukkom. Nug nuhig nid danab tatamnu itittak ena anuqak am keeke anuqak dab-ii-mettom.
Chwazi Kounye ya:
Genesis 25: NB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2022, Wycliffe Bible Translators, Inc. All rights reserved.