लूका 16
16
थुं का पा परमप्रभु कली ठेयब सेल्लीन
1काबु येसुमी आ शेंसीब आन कली “क्येट थीब मुर कामी आ मार मार बाक्मा, मेको नेल्ल हिसाब पाइब का कली जिम्मा गेशा वोइश्शो बाक्माक्त। मिनु काबु मुरपुकीमी ‘हजुर, इन हिसाब पाइबमी क्येट मारेइ मारेइ हेंथे पा थुम्तु’ दे शेंदमे बाक्त। 2मिनु क्येट थीबमी आ हिसाब पाइब कली ब्रेश्शा ‘गेमी आं क्येट थुम्शा गेयी बाक्त। ङोंइती रे ङा दोशो चेमी दोशो थुमी, लो, नेल्ल कोंइदी। मुल ङा मेरे इ कली मवोइक्नन’ दे मदा बाक्त। 3मिनु मेकोमी ‘आं गेय रोइश्शा सोइक्ताक्यी। मुल गेय मताइनुङ। कोदाली दोने यो मचाप्नुङ। पुंइशा जचा कली यो मुने पाइनुङ। 4मुल मार पचा माल्नुङा। गो मेको तुइक्नुङ। मुर आन खिं लङानु आं कली दोपा लोव़ पाइनीमी, मेको यो तुइक्नुङ’ दे मिम्ता बाक्त। 5मिनु मेकोमी आ होव़प आ जेर लाइब आन कली का का पा ब्रेश्शा, ङोंइती जाक्ब कली ‘गे दोशो, मार लदी?’ दे हिल्लो पवा बाक्त। 6मिनु मेकोमी ‘सहे का बाथ जचा तेल लाइश्शो नङ’ देंमेनु ‘लो, नक कागज का सेल्स। मिनु जोल पा ५० बाथ ला ब्रेक्ताक्स’ देंमाक्त। बाथ का २२ लिटर खोदेंशो बाक्ब। 7मिनु अर्को कली ‘गे दोशो मार लदी’ दे हिल्लो पवानु, ‘सहे का कोर चेरब लाइश्शो नङ’ देंमेनु ‘लो, नक कागज सेल्शा, जोल पा ८० कोर ब्रेक्तस’ दे नक कागज का सेल्से बाक्त। कोर का २२० लिटर बाक्ब। 8मिनु जेर लाइक्ब नेल्ल आन के नक कागज सेल्शा, होव़प कली कोंइदा बाक्त। मिनु मेकोमी कोव़शा ‘गे मेको आन कली वारच सेल्शा, निप्स पाइश्शो गेय पा कोंइताक्यी’ देंमाक्त। रागीमी थमा सुइक्ब क्येङा थमा मसुइक्बपुकीमी निप्स पाइश्शो गेय पाइनीम। एफिसी ५:८-९ 9मोपतीके गे यो निप्स पाइश्शो गेय पा वारचपुकी सेलीने। इन शोंप क्येट मारेइ मारेइ यो मथीब आन कली शिशी पा गेतीनी हना, परमप्रभु यावेमी इन पशो खोदेंशो पा गेब” देंमाक्त। लूका १४:१४; मत्ती ६:२०; मत्ती १९:२१
थुं निक्शी पाइश्शो मदुमीन
10मिनु लेंशा “सुमी थम आइक्च गेय कली रिम्शो पा पाइबा, मेकोमी ठेयब गेय यो रिम्शो पा पाइब। सुम आइक्च गेय, दे मरिम्शो पा पाइबा, मेकोमी ठेयब गेय यो मरिम्शो पा पाइब। लूका १९:१७ 11मोपतीके गे रागी ङा क्येट आ पर्बम जोल पाइब दुम्तीनी हना, स्वर्ग ङा शोंप दोपा ताइब दुम्ने चाप्नीनी? 12गे अर्को मुर आन थोव़क आ पर्बम जोल पाइतीनी हना, आंमा इन शोंप इन कली सुम गेबा ङा? 13गेय पाइब कामी होव़प निक्शी आस गेय पने मचाप्ब। मारदे हना का आ देंशो टिप्तु हना, अर्को कली मटीब दुम्ब। का कली दाक्ताक्व हना, अर्को कली चहिं काइ मदाक्ब। मोपतीके गे यो परमप्रभु यावे नु शोंप निक्शी आस नोले खोइक्ने मचाप्नीनी” दे येसुमी शेंदीमी बाक्त। मत्ती ६:२४
फरिसी आन कली हुइश्शो
14फरिसीपुकीमी क्येट नु शोंप दाक्बाक्मा बाक्त। मिनु येसु आ लोव़ नेंशा गाइश्शा, शुक्शी पामे बाक्त। 15मिनु येसुमी “मुर आन कली ‘गो ठीक नकी’ देंखु पा कोंइनीनी। मिनु मुरपुकीमी इन कली ठेयब सेल्नीम। परमप्रभु यावेमी चहिं इन मिम्शो नेल्ल तुइक्ब। मुर आन दातेमी हिक्सीशो नेल्ले परमप्रभु यावे आ ङोंइती थम आइक्च दुम्नीम। लूका १८:९-१४
साइ ब्रेक्शो लोव़ आ पर्बम शेंशो
16साइ ङोंइती रे परमप्रभु यावे आ अरेशो लोव़ नु आ लोव़ पाइब आन ब्रेक्शो यूहन्ना आ पाला सम्म शेंताक्म। यूहन्ना जाक्म रे परमप्रभु यावे आ राज्य ङा लोव़ नेंपाइक्नीम। मिनु शुश मुरुमी मेको लोव़ नेंशा, थमा सुइश्शा, परमप्रभु यावे आ राज्यम ओव़चा बोल पाइनीम। मत्ती ११:१२-१३ 17परमप्रभु यावेमी ब्रेक्पाइश्शो लोव़ का यो मग्याम्ब। मेको ग्याम्चा क्येङा सरीङ नु रागी ग्याम्ब। मत्ती ५:१८; मत्ती १९:९
18सुमी आ मीश कली प्रोंइशा, अर्को मीश चाक्बा, मेकोमी मीश वोंइश आस नाता ख्रोइश्शा, हेंथे पाइब। सुमी आ वोंइश नु ब्राशा गाक्शो मीश चाक्बा, मेकोमी यो वोंइश मीश आस नाता ख्रोइश्शा, हेंथे पाइब।
शोंप पाइश्शो मुर नु लाजरस
19शुश शोंप पाइश्शो मुर का बाक्माक्त। मेको रिम्शो रिम्शो फेक्शा, ब्रोव़ब्रोव़शो जशा बाक्बाक्माक्त। 20आ खिं ङा लाङगाम चहिं जचा मतथु, श्येत जशो लाजरस माइश्शो मुर का गोल्शा बाक्बाक्माक्त। मेको रोइ पा आ रां नेल्ल गार ग्रूशा राक्शो बाक्माक्त। 21मेको शोंप पाइश्शो मुरुम आ जशो रे खपीम दोक्शो जचा ताइनुङा कों, दे आस पा कोव़शा बाक्बाक्माक्त। आ गार कुचुमपुकीमी तुक्बाक्मा बाक्त। 22मिनु लाजरस शुश श्येत जशा बेक्माक्त। मिनु परमप्रभु यावे आ स्वर्ग ङा गेय पाइबमी अब्राहाम आ थुकुमी वोदमे बाक्त। मेको नोले शोंप पाइश्शो मुर यो बेक्शा थिम्चा पुंइसे बाक्त। 23मेको शोंप पाइश्शो मुर बेक्शो मुर आन बाक्तीक जाक्दीम्माक्त। मिनु शुश श्येत जशा, ङोन रे कोव़ङानु, लाजरस कली अब्राहाम आ थुकुम बाक्शो तवा बाक्त। 24मिनु ठेयब सेंदा पा ‘ए, आं आफ अब्राहाम, शिशी पाइय्यीनी। मारदे हना गो मीम दुप्शा, आं शोव़ सोव़शा बेक्चता। लाजरस कली आ ब्रेप्चो ब्वाक्कु ख्रुम्शा, ब्वाक्कु तोक्पाइक्थ सोइक्तीने’ दे ब्रेम्माक्त। 25तन्न अब्राहाममी ‘ङोंइती थम रिम्शो पा बाक्ते। लाजरस चहिं शुश श्येत जशा बाक्त। मुल चहिं लाजरस आ थुं नाइक्चा ताप्तु, गे चहिं श्येत जशा बाक्नेवे। लूका ६:२४ 26मोशो ला ममाइ। परमप्रभु यावे आ राज्य ङा मुर नरक मलाइनीम। मिनु नरक ङा मुर यो परमप्रभु यावे आ राज्यम ओव़चा मताइनीम’ देंमाक्त। 27मिनु मेकोमी ‘आं आफ, सेउ पाइनन्नी, खिंमी आं के ५ जना लोक्ब बाक्नीम। 28मेको आन कली “इन लोक्ब बेक्शा, नरक लशा श्येत जशा बाक्त। आ पशो खोदेंशो मपने। मो पाइतीनी हना, आ खोदेंशो दुम्नी” दे माइक्थ, लाजरस कली सोइक्तीने’ दे सेउ पवा बाक्त। 29मिनु अब्राहाममी ‘परमप्रभु यावेमी मोसा कली ब्रेक्पाइश्शो लोव़ नु परमप्रभु यावे आ लोव़ पाइब आन ब्रेक्पाइश्शो लोव़ मेकोपुकी नु बाक्नीम। मेको पढेशा नेन्मेक्ल’ देंमेनु, २तिमोथी ३:१६ 30‘ममाइ, आ आफ, बेक्शो रे सेंसीशो मुर सोइक्ताक्नी हना ला, मेको आ लोव़ नेंशा टिशा, पाप पचा प्रोंइशा, आन थुं परमप्रभु यावे गे लेत्नीम’ दे सेउ पवा बाक्त। 31मिनु अब्राहाममी ‘ममाइ, परमप्रभु यावे आ ब्रेक्पाइश्शो लोव़ मटिम्तेक्म हना, बेक्शो रे सेंसीशो मुर तशा यो थमा मसुइक्नीम’ देंमाक्त” दे येसुमी शेंदीमी बाक्त।
Chwazi Kounye ya:
लूका 16: susz
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2011, Wycliffe Bible Translators, Inc. All rights reserved.