Mako 15
15
Yesu vamutwala kuli Pilato
(Mateo 27:1-2,11-14; Luka 23:1-5; Yowano 18:28-38)
1Co alikaki mutondo-tondo vakulunu va vaka-kukombelela na vakulunu, na valongisi va majwi a Lishiko, na vaka-Munga voshe, valiwanene vwasi-vwasi nakutumba matumbe. Co vakutile Yesu mu malyenge, vamutwalele nakumwana kuli Pilato. 2Co Pilato wamwihwile ngwendi, “Yove Mwene wa vaYunda ndi?”
Co Yesu wamukumbulwile ngwendi, “Omu muunendeka mukemwo vene.”
3Co vakulunu va vaka-kukombelela vavangelele Yesu vyuma vyavingi, 4ngecivene, Pilato wamwihwile lalo ngwendi, “Kuma kuwasa kukumbulula ndi? Tolilila vyoshe evi valinakukuvangela!”
5Oloni Yesu kakumbulwile lijwi nalimo lyai, ngecivene, Pilato walikomokelele manene.
Yesu vamusompela kutsa
(Mateo 27:15-26; Luka 23:13-25; Yowano 18:39—19:16)
6A simbu yoshe ya Ciwano ca Pasovala, Pilato wakele na cilika cakwecela cinzinda uje vashakele vanu. 7Co a simbu ije munalume umo lizina lyendi Mbalambasa wakele mu kamenga amo na vakwavo vaje vatsiile vanu na mpindangano. 8Omo mbunga ya vanu vakungulukilile kuli Pilato, co wehwile ngeci avalingile ngwe muje akavalingila simbu yoshe 9co wavehwile ngwendi, “Mushaka ngeci njimyecelele mwene ya vaYunda ndi?” 10Omwo wazivukile mwamuvwa ngwendi vakulunu va vaka-kukombelela vakundikile Yesu ku mavoko endi omwo vakele na lifuwa.
11Oloni vakulunu va vaka-kukombelela vashongangeyeye ije mbunga vehwile Pilato ecele Mbalambasa. 12Co Pilato wendekele lalo ku mbunga ngwendi, “Vika mushaka ngeci njilinge nou mutumbula ngweni mwene ya vaYunda?”
13Co vatambekele ngwavo, “Mushukike a cilindakano!”
14Oloni Pilato wavehwile lalo ngwendi, “Mulonga ukajo wanalingi?”
Oloni voshe vatambekele manene ngwavo, “Mushukike a cilindakano!”
15Ngecivene, Pilato washakele kuvwaelelesa ije mbunga, ngecivene, wecelele Mbalambasa. Asinoni wapupile Yesu makote,co wavaneneye ngeci vakamushukike a cilindakano.
Mashwalale vashendumuna Yesu
(Mateo 27:27-31; Yowano 19:2-3)
16Co mashwalale vakovelesele Yesu mukati ku cipango ca lipela lya nguvulu, co vasanene mbunga yoshe ya mashwalale. 17Co vamuzikile cikoveyo cacilaja cakuvenga, co vavindile cilongo ca minango ya mambimbo, vacakele ku mutwe wendi. 18Asinoni vashangumukile kumukandelela ngwavo, “A vulye mwene wa vaYunda!” 19Co vamupupile na citi ku mutwe, co vamujekwilile mate, co vatsikamene a mavuli nakumulemesa. 20Omo vamanesele kumushendumuna, vamushulwile cikoveyo cakuvenga, co vamuzikile lalo vuzalo vwendi. Asinoni vamutwalele anja ngeci vakamushukike a cilindakano.
Yesu vamushukika a cilindakano
(Mateo 27:32-44; Luka 23:26-43; Yowano 19:17-27)
21Co a ngila valiwanene na munalume umo lizina lyendi Simoni, uje wezile ku nganda kutunda kwimbo, co mashwalale vamusindiiye ngeci ambate cilindakano ca Yesu. (Simoni watundile ku Silene ishe ya Alekizanda na Lufuse.) 22Co vatwalele Yesu ku mutambela uje vatumbwile ngwavo Ngolongota, kulumbunuka ngwawo, “Mutambela wa Cikola.” 23Co kuje vamwanene vinyu vyakukumbasana na miila, oloni Yesu kavinwile. 24Asinoni vamushukikile, co valipangelele vuzalo vwendi akati kavo, vatele n̄ela ngeci vawane munu na munu canapande kwambatao. 25Co yapwile simbu yamucitanu na viwana ku mutondo omo vamushukikile. 26Co vasonekele canukiso cakumuvangela ngwavo, “Mwene ya vaYunda.” 27Co vakevo lalo vashukikile vanu vavali amo na Yesu, umo ku cilyo mukwavo ku cimoshwe. 28Mu ngila eyivene visoneka vyapwilemo vije vyendekele ngwavyo, “Vamulavelele amo mu luvinda lwa vaka-kutsiya.”#15:28 MU NGILA EYIVENE...LUVINDA LWA VAKA-KUTSIYA: Kunungulula kumo vesi 28 yaimo.
29Co vanu vaje vakele nakwita kuje vaningangesele mitwe yavo nakushaula Yesu ngwavo, “Lelo tumona! Yove washakele kusiwula Njuvo ya Shukulu Kalunga, co ukayitunga lalo a matangwa atatu! 30Ololo shulukao oho a cilindakano ngeci ulyamene yove vavenya!”
31Ngecivene, mu ngila eyi vene vakulunu va vaka-kukombelela na valongisi va majwi a Lishiko vamushendumwine, nakwendeka kuli umo na mukwavo ngwavo, “Wovwele vakwavo, oloni kasa kulyovola ikeye vavenya! 32Tumoneni Wakuvwavesa, mwene wa Isalele, ashuluka a cilindakano ololo, co tukulaela kuli ikeye!”
Co vaje lalo vavali vavashukikile amo na Yesu vamutengulukilile nakumushaula.
Kutsa kwa Yesu
(Mateo 27:45-56; Luka 23:44-49; Yowano 19:28-30)
33Co omo litangwa lyakele akati ka mutwe, kwakele lisusulungu mu lifuti lyoshe a maola atatu. 34Co a ola yamucitatu, Yesu watambekele na lijwi lyakama ngwendi, “Eloi, Eloi, lama sambakatani?” Kulumbununa ngwavo, “Njambi yange, Njambi yange, vikajo unanjisezela?”
35Co vamo vaje vemanene kuje, vazivileko vendekele ngwavo, “Tolilileni, alinakusana Elinja!” 36Co umo wavo washatukile vwasi, wanonele mupelo, waujavekele mu vinyu vyakulula, wawakele ku shongo ya lihongo. Asinoni waakele uje mupelo ku kanwa ka Yesu wendekele ngwendi, “Vandamena! Tumone nga Elinja aija nakumutundisa a cilindakano!”
37Co Yesu watambekele na lijwi lyakama manene, co watsile.
38Co nanga ije yajenjelele mu Njuvo ya Shukulu Kalunga yatavukile akati, kutunda kwilu nakweta asi. 39Co mukulunu wa mashwalale uje wemanene kulutwe lwa cilindakano omo wamwene muje mwatsile Yesu wendekele ngwendi, “Mwa vushunga munalume ou wapwile Muna Njambi!”
40Kuje lalo kwakele vanakazi vamo vakele kuje, vakele kulyala nakukengelela, akati kavo akele Maliya Mandalena, na Maliya vaina ya Yakomba na Yosefa, na Salome. 41Vaje vakevo vakavele Yesu omo wakele ku Ngalileya nakumukwasa. Vanakazi vakwavo lalo vavangi vaje vezile amo nendi ku Yelusalema navo vakele kuje.
Yesu vamutsinda
(Mateo 27:57-61; Luka 23:50-56; Yowano 19:38-42)
42Co omo vetele ku cingwezi, lyapwile Litangwa Lyakulivwaesela, te kanda Litangwa Lyakuhwima lya vaYunda lyete, 43Yosefa wa ku Alamatiya wezile. Wapwile wa kasingimiko mu Munga yavo, wavandamenene kwija kwa Vumwene vwa Njambi, wasimpile waile kuli Pilato nakulomba muvila wa Yesu. 44Co Pilato walikomokelele akuziva ngwavo Yesu natsi laja. Co wasanene uje mukulunu wa mashwalale nakumwihula nga Yesu natsi laja. 45Omo wazivile vukaleo kuli uje mukulunu wa mashwalale, co Pilato walekele Yosefa ngeci akambate muvila wa Yesu. 46Co Yosefa walandele nanga ya linyu, co washukwile muvila a cilindakano, wauzengelele a nanga ya linyu, co waulangekele mu mbumbo ije ivacokwele mu limanya. Co waandumwinine ku cikolo limanya lyakama. 47Maliya Mandalena na Maliya vaina ya Yosefa vakele nakukengelela, co vamwene kuje valangekele muvila wa Yesu.
Chwazi Kounye ya:
Mako 15: MBB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
The Bible in Mbunda ©The Bible Society of Zambia, 2006