Luka 24
24
Kusanguka kwa Yesu
(Mateo 28:1-10; Mako 16:1-8; Yowano 20:1-10)
1A mungulungengu a litangwa lya Calumingo vanakazi vaile ku mbumbo, vambatele n̄undu ivavwaesele. 2Vawanene limanya vanalitundisa ku mbumbo, 3co vakovelelemo, oloni kuvawanenemo muvila wa Mwene Yesu. 4Vemanene muje oku vanalikomokela, co vwasi-vwasi vanalume vavali vanazala vuzalo vwakuvyazima manene vemanene kuyehi navo. 5Co vaje vanakazi vazivile lyova, vakulamenene asi, omo vaje vanalume vendekele kuli vakevo ngwavo, “Omwo vika mushakezeka muka-kuyoya akati ka vatsi? 6#Mat 16:21; 17:22-23; 20:18-19; Mak 8:31; 9:31; 10:33-34; Luk 9:22; 18:31-33 Waimo muno, nasanguka. Anukeni muje mwendekele kuli yeni omo wakele mu Ngalileya ngwendi, 7‘Muna Munu vanapande kumwana ku mavoko a vaka-vuvi, vakamushukika a cilindakano, co munima ya matangwa atatu akasanguka.’ ”
8Co vaje vanakazi vanukile majwi endi, 9vatundile ku mbumbo, co vambulwile vyuma vyoshe evi kuli vaje vandongisi likumi naumo, na vakwavo voshe lalo. 10Vaje vanakazi vapwile Maliya Mangandalena na Yowana na Maliya vaina ya Yakomba na vanakazi vakwavo lalo vambulwile vyuma evi kuli miluwa. 11Oloni miluwa vayongwele ngeci vije vivendekele vanakazi vyapwile vyakujeneka seo, kuvavakulaelele. 12Oloni Petulu wakatukile washatukilile ku mbumbo, washumbililemo, wamwene lika vinanga mu mbumbo cuma ceka cai. Co welukile kwimbo nakulikomokela a vyuma vije vyalingiwile.#24:12 OLONI PETULU...VYUMA VIJE VYALINGIWILE: Kunungulula kumo vesi 12 yaimo.
Kwenda kuya ku Emausi
(Mako 16:12-13)
13A litangwa lije vene vandongisi va Yesu vavali vakele nakuya ku limbo limo livatumbwile Emausi, nunda yakwo yapwile makilomita likumi na imo kutunda ku Yelusalema, 14vakale nakusimutwiya akati kavo a vyuma vyoshe vije vyalingiwile. 15Omo vakele nakwendeka nakuyongola, Yesu vavenya washwenyele kuyehi, co wendele amo navo, 16vamumwene, oloni kuvamunongonwene. 17Yesu wendekele kuli vakevo ngwendi, “Vin̄anda muka mulinakusimutwiya oku mulinakwenda?”
Vemanene, vihanga vyavo vyakele na vusiwa. 18Co umo wavo lizina lyendi Kilyopase, wamukumbulwile ngwendi, “Yove lika u mungenzi mu Yelusalema uje kazivuka vika vinalingiwa a matangwa awa amandondo ndi?”
19Co wavehwile ngwendi, “Vyuma muka?”
Vamukumbulwile ngwavo, “Vya ali Yesu wa ku Nazaleta. Munalume ou wapwile muka-kwimanena, co Njambi na vanu voshe vamuyongwele kupwa muka-nzili mu vyuma vyoshe wendekele na vije vyalingile. 20Co vakulunu vetu va vaka-kukombelela na vaka-kushwana vamwanene ngeci vamutsiye, co vamushukikile a cilindakano. 21Co twakele na cinyangavili ngeci, ikeye akapatula Isalele! Co lalo lelo linapu litangwa lyamucitatu kutunda aje vyalingiwile vyuma evi. 22Vanakazi vamo va mu munga yetu vatukomokesele, vamenekelele ku mbumbo, 23oloni kuvakawanene muvila wendi. Co velukile nakwendeka ngwavo vanakamwene cimona ca tungelo vaje vavalekele ngwavo alinakuyoya. 24Co vamo va mu munga yetu vanaileko, co mwa vushunga vakawanene ngwe muje vene vendekele vanakazi, oloni kuvamumwene.”
25Co Yesu wendekele kuli vakevo ngwendi, “Eni vilema vaka-kwishwala kukulaela vije vyoshe vivendekele vaka-kwimanena! 26Kuma Wakuvwavesa kapandele kuyanda a vyuma evi nakukovela mu vumpau vwendi ndi?” 27Co Yesu washangumukile kuvanungulwila mu Visoneka vyoshe vyuma vije vendekele vyakutumbula ikeye, kushangumuka na mavulu a Mosesa nakutwala ku visoneka vya vaka-kwimanena voshe.
28Omo vetele kuyehi na limbo kuje vakele nakuya, Yesu walingile ngwe atuvakana kamandondo kuya kulutwe, 29oloni vamusindiiye ngwavo, “Unapande kukala netu kuno omwo litangwa linatoko.” Co waile nakukakala navo. 30Co watumbamene navo ku mesa nakulya, co wanonele likende nakulivezikisa, co walipazwile walyanene kuli vakevo. 31Co mesho avo ashokolokele vanangukile ngwavo kuma ikeye, oloni walavukile ku mesho avo. 32Co valyendekesele umo na mukwavo ngwavo, “Kuma vimbunge vyetu kuvyezukile omo nakele nakwendeka netu mu ngila nakutunungulwila vya mu Visoneka ndi?”
33Vakatukile a simbu ije vene velukile ku Yelusalema, vawanene vandongisi likumi na umo vanalikungulula na vaje vakwavo veka lalo 34vendekele ngwavo, “Mwa vushunga vene Mwene nasanguka! Nalisholola kuli Simoni!”
35Co vaje vavali valangulwile vije vyalingiwile mu ngila, nomu vanongonwene ngwavo kuma ikeye Mwene omo wapazwile likende.
Yesu alisholola kuli vandongisi vendi
(Mateo 28:16-20; Mako 16:14-18; Yowano 20:19-23; Vilinga vya Miluwa 1:6-8)
36Simbu vaje vavali vakele nakuvaleka vyuma evi, vwasi-vwasi Yesu vavenya wemanene akati kavo wendekele kuli vakevo ngwendi, “Kwoloka kukale neni.”#24:36 WENDEKELE KULI VAKEVO NGWENDI KWOLOKA KUKALE NENI: Kunungulula kumo majwi awa aimo.
37Vazivile lyova lyakama, omwo vayongwele ngwavo vanamono ndumba ya munu. 38Oloni wendekele kuli vakevo ngwendi, “Omwo vika munalijujukila? Omwo vika muli na vimata mu vimbunge vyeni? 39Kengeni mavoko ange na myanja yange, co moneni ngeci yange vene. Njikwateni, co muzivuka, omwo ndumba ya munu kakele na muvila na vitsiya, ngwe evi mwamono njilinavyo.”
40Wendekele evi, co wavamwesele mu mavoko endi na mu myanja yendi.#24:40 WENDEKELE EVI,...MYANJA YENDI: Kunungulula kumo vesi 40 yaimo. 41Nameme ngoco kuvakulaelele, vavwaelelele manene nakulikomokela, co wavehwile ngwendi, “Muli na vyakulya ndi?” 42Co vamwanene mbazuvwila ya isi wakuteleka, 43co waitambwile nakuyilya ku mesho avo.
44Co wavalekele ngwendi, “Evi vikevyo vyuma vije njamilekele omo njakele neni ngwange, vyuma vyoshe vije vasonekele mu Lishiko lya Mosesa, na mu visoneka vya vaka-kwimanena, na mu Myaso vyakunjitumbula yange vinapande kulingiwa.”
45Co washokolwele mana avo ngeci vazivuke Visoneka, 46co wendekele kuli vakevo ngwendi, “Eci cikeco vasonekele ngwavo, Wakuvwavesa napande kuyanda, co akasanguka munima ya matangwa atatu, 47ngeci kutenguluka nakusambesa kwa vivi vakavyambulule mu lizina lyendi ku mafuti oshe, kushangumukila mu Yelusalema. 48Yeni munapu mu vakaleo va vyuma evi. 49#Vil 1:4 Yange njikatuma kuli yeni vije vyanjikulaese Tate. Oloni munapande kuvandamena mu nganda noo nzili yakutunda kwilu inaija ali yeni.”
Yesu vamutwala mwilu
(Mako 16:19-20; Vilinga vya Miluwa 1:9-11)
50 #
Vil 1:9-11
Co watuukile navo mu nganda wavatwalele kuyehi na Mbetaniya, kuje wajundwile mavoko endi nakuvavezikisa. 51Omo wakele nakuvavezikisa, co walyangunukile navo vamutwalele mwilu.#24:51 VAMUTWALELE MWILU: Kunungulula kumo majwi awa aimo. 52Vamulemesele, co velukile mu Yelusalema nakujolela manene, 53co simbu yoshe vakele mu Njuvo ya Shukulu Kalunga nakushangazala Njambi.
Chwazi Kounye ya:
Luka 24: MBB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
The Bible in Mbunda ©The Bible Society of Zambia, 2006