Luka 17
17
Vuvi
(Mateo 18:6-7,21-22; Mako 9:42)
1Yesu wendekele kuli vandongisi vendi ngwendi, “Vyuma vije vyasa kukovelesa vanu mu vuvi vyasa kulingiwa, oloni tuyando twendi uje avinena! 2Mwamuvwa kuli ikeye nga vamukutiiya limanya lyakama lyakulolela vunga mu mukoshi wendi nakumumbila mu mema a kalunga kutuvakana atanganese mwanike umo wamundondo kulinga vuvi! 3#Mat 18:15 Nyanyameni ku vije mulinga.
“Nga mukweni alinga vuvi munangule, co nga alitavela, musambese. 4Co nga akuvulumwina lutanu na luvali mu litangwa limo, co lalo aija kuli yove lutanu na luvali nakulitavela, musambese.”
Kukulaela
5Co miluwa vendekele kuli Mwene ngwavo, “Wezelela kukulaela kwetu.”
6Mwene wavakumbulwile ngwendi, “Nga mwakele nakukulaela kwakama ngwe mbuto ya musalata, ngwe mwasa kwendeka ku muti ou wa mukuyu ngweni, ‘Tukuka ukashimbame mu mema a kalunga!’ Co ukewo umyononoka.
Vipangi vya ngamba
7“ Nga umo weni ali na ngamba muka-kulima nambe kunyunga vimanga, co omo aija kutunda ku mahya, kuma mukendeka kuli ikeye ngweni, ‘Zambulako wakulye vilya vyove ndi?’ 8Mwa vushunga kumwesi kulinga ngacije! Oloni mukendeka ngweni, ‘Njivwaesele vyakulya, lizitike cikoveyo cove unjipangele noo njinali, njinanu, omo njinamanesa cooni nove ulye nakunwa!’ 9Uje ngamba kuvesi kumukandelela akwononoka mashiko a shukulu yendi, indi vakalingimo? 10Cinapu mumo neni lalo, omo munalingi vyoshe vije vamilekele kuvilinga, endekeni ngweni, ‘Tu vangamba vangoco, tunapanga vipangi vyetu!’ ”
Yesu ajelesa vanalume vaka-mbumba likumi
11Omo Yesu wakele nakuya ku Yelusalema, wetile mukati ka Samaliya na Ngalileya. 12Omo wakovelele mu limbo limo, waliwanene na vanalume vaka-mbumba likumi. Vemanene kulyala, 13co vatambekele ngwavo, “Yesu! Shukulu! Tuzivileko mema ku mbunge!”
14 #
VaLe 14:1-32
Yesu wavamwene wendekele kuli vakevo ngwendi, “Yeni kuli vaka-kukombelela ngeci vakamiilule.”
Omo vakele nakuya, co vajelele.#17:14 CO VAJELELE: Kenga 5:12. 15Umo wavo omo wamwene ngeci nenduka, co welukile washangazale Njambi na lijwi lyakama. 16Co wavulumanene ku myanja ya Yesu nakumukandelela. Ikeye wapwile kaSamaliya. 17Yesu wehwile ngwendi, “Kuma kuvapwile likumi vaje njinakangwisile ndi? Cooni vakwavo vatanu na vawana vali kuli? 18Omo vika ou lika kesi kaYunda neluka nakukandelela kuli Njambi?” 19Yesu wendekele kuli ikeye ngwendi, “Katuka uye, kukulaela kwove kunakukangwisa.”
Kwija kwa Vumwene vwa Njambi
(Mateo 24:23-28,37-41)
20VaFaliseo vamo vehwile Yesu ngwavo, “Simbu ikajo Vumwene vwa Njambi vukaija?” Wavakumbulwile ngwendi, “Vumwene vwa Njambi kuvwasa kwija mu ngila ije mwasa kuvumona embwe. 21Naumo wai akendeka ngwendi, ‘Kengeni, vuno vulikuno!’ Nambe, ‘Kengeni, vuje vulikuje!’ Omwo Vumwene vwa Njambi muli navwo akati keni.”
22Asinoni Yesu wendekele kuli vandongisi vendi ngwendi, “Simbu ikaija omo mukashaka kumona litangwa limo lya Muna Munu, oloni kumukasa kulimona. 23Co kukakala vamo vakendeka kuli yeni ngwavo, ‘Kengeni kuje!’ Nambe ngwavo, ‘Kengeni kuno!’ Kesi mukayeko, ngeci mukacimone. 24Ngwe omo muhyato ukahyatula mwilu, co vaumona utunda ku mutambela umo wa lilu uya ku mutambela ukwavo wa lilu, ngeci lalo Muna Munu mwakafwa a litangwa lyendi. 25Oloni akulivanga napande kuyanda manene nakumuyengula kuli vanu va matangwa ano. 26#Kus 6:5-8 Co ngwe mucafwile a matangwa a Nowa, mukemwo lalo mucikafwa na ku matangwa a Muna Munu. 27#Kus 7:6-24 Voshe valile vanwile, vashombwesele na kulyambatela, noo ku litangwa lije Nowa wakovelele mu vwato, co livazi lyezile nakuvanyongesa voshe. 28#Kus 18:20—19:25 Mucikafwa lalo ngwe mucafwile ku matangwa a Lote. Voshe valile vanwile valandele nakulandulula, vakunine nakutunga. 29A litangwa lije Lote watundile mu Sondoma, tuhya na mamanya akunyongolokota vyanyokele ngwe nyonzi yakutunda mwilu, co vyavanyongesele voshe. 30Mukemwo lalo mucikafwa a litangwa lyakasholoka Muna Munu.
31 #
Mat 24:17-18; Mak 13:15-16 “A litangwa lije, munalume uje ali akamwa ya njuvo yendi,#17:31 AKAMWA YA NJUVO YENDI: Kenga Mateo 24:17. kesi akashulukeo nakwambata vije vili mu njuvo yendi, na uje lalo ali mu lihya lyendi kesi ekeluke ku njuvo. 32#Kus 19:26 Anukeni munakazi wa Lote! 33#Mat 10:39; 16:25; Mak 8:35; Luk 9:24; Yow 12:25 Munu woshe ashaka kunyunga mwonyo wendi vavenya auzimbalesa, oloni uje azimbalesa mwonyo wendi akauwana. 34Njimileka ngwange, a vutsiki vuje, vanu vavali vakalala a vulili vumo, umo vakaya nendi, co mukwavo vakamuseza. 35Vanakazi vavali vakatwa vunga mu n̄unju imo, umo vakaya nendi, co mukwavo vakamuseza. 36Vanalume vavali vakapanga mu lihya, umo vakaya nendi, co mukwavo vakamuseza.”#17:36 VANALUME VAVALI...MUKWAVO VAKAMUSEZA: Kunungulula kumo vesi 36 yaimo.
37Co vandongisi vamwihwile ngwavo, “Kulijo Mwene?”
Yesu wavakumbulwile ngwendi, “Kwoshe kuje kuli civimbi kukekwo kukalikungulwila makuvi.”
Chwazi Kounye ya:
Luka 17: MBB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
The Bible in Mbunda ©The Bible Society of Zambia, 2006