Luka 10
10
Yesu atuma vanu makumi atanu na avali na vanu vavali
1Munima ya vyuma evi Mwene waangwile lalo vanalume veka makumi atanu na avali na vanu vavali#10:1: MAKUMI ATANU NA AVALI NA VANU VAVALI: Kunungulula kumo ngwavo, makumi atanu na avali. nakuvatuma vavali vavali kulutwe lwendi, ku vinganda vyoshe na ku mitambela yoshe kuje kwashakele kuya ikeye vavenya. 2#Mat 9:37-38 Wendekele kuli vakevo ngwendi, “Vimbuto vinatumu, oloni vaka-kuviteja vavandondo. Ngecivene, lombeleni kuli vavenya vimbuto ngeci atume vaka-kuteja vimbuto vyendi. 3#Mat 10:16 Yeni! Njimituma ngwe vana va vimanga akati ka tungunga. 4#Mat 10:7-14; Mak 6:8-11; Luk 9:3-5 Kesi mwambate nkombe, nambe lipakumuna, nambe vin̄aku, kesi mwimane nakulikandelela na munu umo a ngila. 5Mwoshe mu njuvo mumukakovela, akulivanga mukendeka ngweni, ‘Kwoloka kukale mu njuvo ino.’ 6Nga mu njuvo muje muli munu wazema kwoloka, co taveni kwoloka kweni kukale ali ikeye, oloni nga waimo, co kwoloka kweni kwiluke kuli yeni vavenya. 7#1 Koli 9:14; 1 Tim 5:18 Kaleni mu njuvo ije vene, lyeni nakunwa vyoshe vije vivakamyana, omwo muka-kupanga napande kutambula fweto yendi. Kesi mukendangane kutunda ku njuvo imo kuya ku njuvo ikwavo embwe. 8Mu nganda mwoshe mumukakovela nga vamitambula, lyeni vije vivakamyana, 9kangwiseni vaje vaka-kuvinja valimo, endekeni kuli vanu vaje valimo ngweni, ‘Vumwene vwa Njambi vunaija kuyehi neni.’ 10#Vil 13:51 Oloni mu nganda mwoshe mumukakovela nga kuvakamitambula, yeni mu vitapalo nakwendeka ngweni, 11‘Likungu lya nganda yeni lije lili ku myanja yetu tuli nakumitotomwenalyo. Oloni anukeni ngweni Vumwene vwa Njambi vunaija kuyehi neni!’ 12#Kus 19:24-28; Mat 11:24; 10:15 Mwa vushunga njimileka ngwange, a Litangwa Lyakusompa Njambi akamwesa vaka-Sondoma mema ku mbunge kutuvakana nganda ije!
Vinganda vya vaka-kujeneka kukulaela
(Mateo 11:20-24)
13 #
Isa 23:1-18; Ezek 26:1—28:26; Njwe 3:4-8; Amo 1:9-10; Zak 9:2-4 “Ngongo yove Kolazine! Ngongo yove Mbetesainda! Omwo vizivukiso evi vanalingi kuli yeni, nga vavilingilile mu Tile na mu Sindone, nga vanu vamwo vatumbamene laja asi nakuzala vikeleya nakulikwita lito kumwesa ngeci vanatenguluka ku vivi vyavo! 14Njambi akatetela manene vanu va ku Tile na Sindone a Litangwa Lyakusompa kutuvakana yeni! 15#Isa 14:13-15 Nove lalo Kapenauma! Washakele kulijundwila yove vavenya mwilu ndi? Ukashelumuka ku vukalo vwa vatsi!”
16 #
Mat 10:40; Mak 9:37; Luk 9:48; Yow 13:20 Yesu wendekele kuli vandongisi vendi ngwendi, “Woshe uje amitolilila, atolilila yange, woshe uje amivyana avyana yange, co woshe uje anjivyana, avyana uje wanjitumine.”
Kwiluka kwa miluwa makumi atanu na avali na vavali
17Co vaje vanalume makumi atanu na avali na vanu vavali#10:17 MAKUMI ATANU NA AVALI NA VANU VAVALI: Kenga 10:1. velukile lalo nakujolela kwakama. Vendekele ngwavo, “Mwene, nameme minzinzime yakujwala yatwononokele omwo twaishikile mu lizina lyove!”
18Yesu wavakumbulwile ngwendi, “Njamwene Satana awa kutunda mwilu ngwe muhyato. 19#Mya 91:13 Tolilileni! Njamyana moko ngeci mukalyatangele manyoka na manyewe, nakuhyana nzili yoshe ya Citozi, co nacimo cai cikamivulumuna. 20Kesi mujolele omwo minzinzime yakujwala imyononoka embwe, oloni joleleni omwo mazina eni vanawasoneka mwilu.”
Yesu ajolela
(Mateo 11:25-27; 13:16-17)
21A simbu ije vene Yesu washulile nakujolela kwa Munzinzime Wakujela,#10:21 NAKUJOLELA KWA MUNZINZIME WAKUJELA: Kunungulula kumo ngwavo, na munzinzime, kunungulula kukwavo ngwavo, mu munzinzime wendi. co wendekele ngwendi, “Njikukandelela yove Tate, Mwene wa lilu na ano asi! Omwo vyuma evi wavishwekele kuli vaka-mana na kuli vaka-kulilongesa, co unavisholola kuli vaka-kujeneka mana. Mukemwo vene Tate, mucavwaela ku mesho ove.
22 #
Yow 3:35; 10:15 “Vyuma vyoshe Tate nanjanavyo. Co lalo naumo wai azivuka Mwana kuvanga Ishe, co lalo naumo wai azivuka Ishe kuvanga Mwana, na vaje voshe vaashaka Mwana kuvasholwelaye.”
23Asinoni Yesu watengulukilile kuli vandongisi vendi, wendekele kuli vakevo mu vushweke ngwendi, “Mwavezika manene omwo mesho eni anamono vije vimulinakumona! 24Mwa vushunga njimileka ngwange vaka-kwimanena vavangi na vimyene vavangi vashakele manene kumona vyuma vije vimulinakumona, oloni kuvavimwene, nambe kuziva vije vimulinakuziva, oloni kuvavizivile.”
Cisimo ca muka-Samaliya wamuvwa
25 #
Mat 22:35-40; Mak 12:28-34 Mulongisi wa majwi a Lishiko wezile nakweseka Yesu wehwile ngwendi, “Mulongisi, vika njinapande kulinga ngeci njitambule mwonyo wa myaka yoshe?”
26Yesu wamukumbulwile ngwendi, “Visoneka vinendeka vati? Ukavinungulula vati?”
27 #
VaLe 19:18; Kwi 6:5 Co uje munalume wakumbulwile ngwendi, “Zema Shukulu Kalunga Njambi yove na mbunge yove yoshe, na mwonyo wove woshe, na nzili yove yoshe, na mana ove oshe, co zema mukweni ngwe muwalizema yove vavenya.”
28 #
VaLe 18:5
Yesu wakumbulwile ngwendi, “Unendeka mwamuvwa, linga ngeci, co ukayoya.”
29Oloni uje mulongisi wa majwi a Lishiko washakele kulisambesa, wendekele kuli Yesu ngwendi, “Mukwetu iya?”
30Yesu wakumbulwile ngwendi, “Kwakele munu umo watundile ku Yesusalema waile ku Yeliko, co waliwanene na mapwepwe, vamulwisile, vamushulwile vuzalo vwendi, nakumupupanga nakumuseza ashaka kutsa. 31Co muka-kukombelela wezile mu ngila ije, oloni omo wamwene uje munalume wamwongolokele. 32Mu cifwa cimo lalo kaLevi wetile mu ngila ije vene, washwenyeleko nakukenga uje munalume, co wongolokelele ku mutambela ukwavo. 33#2 Miz 28:15 Oloni umo kaSamaliya wendele mu ngila ije wetele aje akele uje munalume, omo wamumwene, wamuzivilile mema ku mbunge. 34Washwenyele kuli ikeye, wetilile mazi na vinyu a vimbandu vyendi, wamuzengeleo vinanga, co wamwakele a cimulu cendi wamutwalele ku njuvo ya vangenzi, wamunyungilileko. 35Alikaki wanonele vimbongo vivali vya siliva, wavyanene kuli vavenya njuvo, co wamulekele ngwendi, ‘Munyunge, vyoshe vije umbila ali ikeye, omo njikeluka njikakufweta.’ ”
36Yesu wamanesele ngwendi, “Mu viyongola vyove iya oni akati ka vaje vanu vatatu walingile ngwe mundambo wa uje munu ivalwisile mapwepwe?”
37Co mulongisi wa majwi a Lishiko wakumbulwile ngwendi, “Uje wamuzivilile mema ku mbunge.”
Yesu wakumbulwile ngwendi, “Nove lalo ya ukalinge ngacije.”
Yesu asikamesa Maliya na Mata
38 #
Yow 11:1
Omo Yesu na vandongisi vendi vaile mu ngila yavo, co wetele ku limbo limo kwakele munakazi umo lizina lyendi Mata uje wamutambwile mwamuvwa mu njuvo yendi. 39Mata wakele na ndokazi yendi lizina lyendi Maliya uje watumbamene ku myanja ya Mwene nakutolilila kulongesa kwendi. 40Mata wakele na cishota-mbunge ca vipangi vyavingi, co wezile kuli Yesu wendekele ngwendi, “Mwene, kuwashotele mbunge omo ndokazi yange nanjisezela vipangi ange lika ndi? Muleke aije akunjikwaseko!”
41Mwene wamukumbulwile ngwendi, “Mata, Mata! Ulinakuliyandesa a vipangi vyavingi, 42oloni kuli cuma cimo ciwunapande kulinga. Maliya naangula cuma cacivwa cije naumo wai lalo akamutambulaco.”
Chwazi Kounye ya:
Luka 10: MBB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
The Bible in Mbunda ©The Bible Society of Zambia, 2006