YOHANE 2
2
Ta nkhuvo wa Kana.
1Hi siku ra vunharhu, nkhuvo wa vukati wu va kona eKana wa Galeliya kutani mana wa Yesu a a ri kona. 2Yesu na yena a a rhambiwile enkhubyeni ni vadyondzisiwa va yena. 3Kuteloko vhinyo yi herile, mana wa Yesu a ku eka yena: “A va ha ri na vhinyo.” 4Yesu a ku eka yena: “Wansati, mhaka ya mina na wena hi yihi xana? Nkarhi wa mina a wu si fika.” 5Mana wa yena a ku eka malandza: “Endlani hinkwaswo leswi a nga ta mi byela swona.” 6Kutani swikhuwana swa ntlhanu na xin'we a swi ri kona, leswi Vayuda va hlambelaka eka swona; xin'wana ni xin'wana xi enela mipimo mimbirhi, kumbe minharhu. 7Yesu a ku eka vona: “Tatani swikhuwana leswi hi mati,” kutani va chela swi tala. 8A ku eka vona: “Kanani sweswi, mi yisa eka mufambisi wa nkhuvo.” Kutani va yisa. 9Kuteloko mufambisi wa nkhuvo a nantswile mati lama hundzukeke vhinyo (kambe a a nga tivi laha yi humaka kona, swi tiviwa hi malandza ntsena lama nga kelela mati), a vitana muteki, a ku eka yena: 10“Munhu un'wana ni un'wana u rhanga a humesa vhinyo leyo nandziha kutani loko va nwile, ku tisiwa leyi nga nandzihiki ngopfu; kambe wena u hlayisile vhinyo leyo nandziha ku fika sweswi!”
11Mahlori lawa hi wona lawa Yesu a nga sungula ha wona eKana wa Galeliya, a kombisa ku twala ka yena; kutani vadyondzisiwa va yena va pfumela eka yena.
12Endzhaku ka swona, a ngirimela eKapernawume a ri ni mana wa yena, ni vamakwavo, ni vadyondzisiwa va yena; kutani va xwa kona masiku ma nga ri mangani.
Ta Yesu loko a hlongola vaxavisi etempeleni.
13Paseka ya Vayuda a yi ri ekusuhi, kutani Yesu a tlhandlukela eYerusalema. 14A kuma exivandleni lexi hlawuriweke, vanhu lava xavisaka tihomu, ni tinyimpfu, ni matuva, ni lava bindzurisaka hi mali, va tshamisile kona. 15Kuteloko a endlile nkharisa wa tingoti, a va humesa hinkwavo etempeleni, ni tinyimpfu ni tihomu; ni mali ya lava bindzulaka a yi hangalasa, a susumeta ni matafula ya vona. 16A ku eka lava xavisaka matuva: “Susani swilo leswi kwala; mi nga tshuki mi endla yindlu ya Tatana yi va yindlu ya mixavo.” 17 Kutani vadyondzisiwa va yena va anakanya leswaku ku tsariwile va ku: “Ku hiseka ka yindlu ya wena ku ndzi dyile.”
18Kutani Vayuda va vulavula, va ku: “Hi xihi xikombiso lexi u hi kombisaka xona leswaku u nga endla swoleswo xana?” 19Yesu a va hlamula, a ku: “Hahlulani tempele leyi, ndzi ta yi pfuxa hi masiku manharhu.” 20Kutani Vayuda va ku: “Tempele leyi, yi akiwile hi malembe ya mune wa makume na ntlhanu na rin'we, kutani wena u ri, u ta yi pfuxa hi masiku manharhu xana?” 21Kambe yena a a vula tempele ya miri wa yena. 22Kuteloko a pfukile eku feni, vadyondzisiwa va yena va tsundzuka leswaku u va byerile mhaka leyi; kutani va pfumela Matsalwa ni rito leri nga vuriwa hi Yesu.
23Kakuloko a ha ri eYerusalema, hi siku ra nkhuvo wa Paseka, vanhu lavo tala va pfumela vito ra yena, loko va vona mahlori lawa a ma endlaka. 24Kambe Yesu a nga va tshembanga, hikuva a a va tiva hinkwavo; 25naswona a a nga fanelanga ku byeriwa swa munhu, hikuva yena a a tiva leswi nga etimbilwini ta vanhu.
Chwazi Kounye ya:
YOHANE 2: TSO29
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.