Hechos 4
4
Pedrowan Juan autoridadkunapa qayllanpi kasqankumanta
1Runakunata Pedrowan Juan rimapayachkaptinkuraqmi sacerdotekunawan templo waqaychaq guardiakunapa kamachiqninkuna hinaspa saduceokuna hamururqaku. 2Paykunam llumpay piñasqallaña kachkarqaku Pedropawan Juanpa yachachisqankuwan. Paykunam yachachichkarqaku:
Jesucristom kawsarimurqa, chaynam lliw wañuqkunapas kawsarimunqa, nispanku.
3Pedrotawan Juanta hapiruspankum tutaykuqña kaptin paqarinnintinkama carcelman wichqarurqaku. 4Chaywanpas achkaq uyariqkunam iñikurqaku, qarikunallam karqa yaqa pichqa waranqa.
5Paqarinnintinñataqmi Jerusalén llaqtapi huñunakururqaku judiokunapa kamachiqninkuna, ancianokuna, Diospa leynin yachachiqkuna, 6sumo sacerdote Anás, Caifás, Juan, Alejandro chaynataq lliw sumo sacerdotekunapa ayllunkunapas. 7Hinaspam Pedrotawan Juanta chay kasqankuman pusarachimuspanku tapurqaku:
¿Pipa kamachikuyninwantaq hinaspa pipa sutinpitaq kaykunata ruwachkankichik? nispanku.
8Chaymi Pedroñataq Chuya Espiritupa huntaykusqan nirqa:
Llaqtapi kamachikuqkuna hinaspa Israelpa ancianonkuna: 9Qamkunam tapuwachkankiku onqoq runata allin ruwasqaykumanta hinaspa imaynam sanoyarusqanmanta. 10Chaynaqa, yachaychikyá qamkunapas, yachachuntaqyá Israel llaqtapas, Nazaretmanta kaq Jesucristopa sutinpim kay runaqa allinyarun hinaspam sanoña qayllaykichikpi sayachkan. Chay Jesustam qamkuna chakatarurqankichik, aswanqa Diosmi wañusqanmanta kawsarirachimurqa. 11#Sal 118.22.Qamkunaqa wasi perqaqkuna hinam huk rumita wischupakurqankichik, chay rumiqa Jesusmi. Paymi kunanqa wasipa cimientonpi esquinan hapiq rumiña rikurirun. 12Jesusmanta hukpiqa manam salvación kanchu, kay pachapiqa manataqmi huk sutiqa kanchu salvakunapaqqa aswanqa Jesusllam, nispa.
13Pedrowan Juan mana manchakuspa rimaptinkum llapa kamachikuqkuna uyarispanku admirakurqaku, paykunaqa yacharqakum Pedrowan Juanqa mana estudioyuq kasqankuta, chayraqmi musyarurqaku paykunaqa Jesuspa puriqmasinkuna kasqankuta. 14Paykunawantaqmi sayachkarqa suchumanta sanoyaq runapas chaymi paykunapa contranpiqa mana ima niytapas atirqakuchu. 15Chaymi Pedrotawan Juanta cortemanta lloqsirachirqaku kikinkupurallapi rimanankupaq. 16Paykunam ninakurqaku:
¿Imatataq ruwasun kay runakunawanqa? Jerusalén llaqtapi llapallan runakunam yachanku kay suchu runa sanoyarachisqankutaqa. Manam kaytaqa pakayta atichwanchu. 17Wakin runakuna amaña yachanankupaqyá amenazaykusunchik kunanmantaqa amaña pimanpas Jesucristopa sutinpi rimanankupaq, nispanku.
18Hinaspam Pedrotawan Juanta huktawan qayaykuspanku kamachirqaku, Jesucristopa sutinpi amaña willakunankupaq hinaspa amaña yachachinankupaq. 19Ichaqa Pedrowan Juanmi nirqaku:
Kikikichikpuni tanteaspa niwayku: ¿Diospaq allinchu kanman payta mana kasukuspa qamkunataña kasukuyniyku? 20Ñoqaykuqa manam upallaymankuchu rikusqaykumantawan uyarisqaykumanta willakuytaqa, nispanku.
21Chaykuna pasakusqanmanta llapa runakuna Diosta yupaychasqankuraykum Juantawan Pedrota autoridadkuna mana imayna castigayta atispanku amenazaykuspalla kachaykurqaku. 22Chay sanoyaq suchu runaqa karqa tawa chunka masnin watayuqñam.
Diospa kallpanchakuyninta mañakusqankumanta
23Pedrotawan Juanta kachaykuptinkum wakin iñiqmasinkunaman rirqaku, hinaspam llapa sacerdotekunapa kamachiqninkunapa chaynataq ancianokunapa tukuy ima nisqanta willakurqaku. 24#Ex 20.11; Sal 146.6.Chayta uyariykuspam llapallanku huk sonqolla Diosta mañakuspa nirqaku:
Señorniyku, qanmi unancharqanki hanaq pachata, kay pachata, lamar qochata chaynataq chaykunapi tukuy imakunatapas. 25Qanmi Chuya Espirituykiwan serviqniki ñawpaq taytayku Davidta nirqanki:
“¿Imanasqataq nacionkuna piñakuywan hatarinku?
¿Imanasqataq runakuna yanqakunata tanteanku?
26 #
Sal 2.1-2. Kay pachapi reykunam huklla hoqarikurunku,
kamachikuqkunam Señorpa chaynataq sapaqchakusqan Cristopa contranpi rimanakurunku”.
27 #
Lc 23.7-11. #
Mt 27.1-2; Mr 15.1; Lc 23.1; Jn 18.28-29. Cheqaptapunim rey Herodeswan Poncio Pilato kay llaqtapi huñunakururqaku huklaw nacionniyuq runakunawan hinaspa Israel llaqtawan qampa sapaqchakusqayki serviqniki Jesuspa contranpi. 28Chaynataqa ruwarqaku ñawpaqmantaraq qampa munasqayki cumplikunanpaqmi. 29Taytayku kunanqa qawayá imaynam amenazawasqankuta hinaspa serviqnikikunata kallpanchawayku mana manchakuspa qanmanta willakunaykupaq. 30Qawachikuyá atiynikita llapa onqoqkunata sanoyachispayki hinaspa admirakuypaq milagrokunata sapaqchakusqayki serviqniki Jesuspa sutinpi ruwaspayki, nispanku.
31Dios mañakuyta tukuruptinkum chay huñunakusqanku wasi katkatatarurqa, hinaptinmi Chuya Espíritu lliwman huntaykurqa. Chaymi manaña manchakuspanku Diospa palabranta willakurqaku.
Ima kapuqninkupas lliwchankupaq kasqanmanta
32 #
Hch 2.44-45. Lliw iñiqkunam huk sonqolla kaspanku huk runa hinalla karqaku, manam pipas ima kapuqninkutapas “ñoqallapam” niqkuchu, aswanqa tukuy imankupas lliwchankupaqmi karqa. 33Apostolkunam aswan atiywanraq willakurqaku Jesucristopa kawsarimusqanmanta, chaymi llapallankuta llumpayta Dios yanaparqa. 34-35#Mt 19.21; Mr 10.21; Lc 12.33; 18.22.Paykuna ukupiqa manam pipas pisichikuqchu. Kapuqniyuqkunam chakrankuta chaynataq wasinkuta rantikuspanku qollqeta apostolkunaman apamuqku, paykunañataqmi sapakamaman necesitasqankuman hina aypuqku. 36Chaynatam Joseypas ruwarqa. Payqa Leviypa castanmanta Chipre lawpi nacekuqmi karqa. Paytataqmi apostolkuna suticharqaku Bernabeywan, chay sutiqa “sonqo tiyachiq” ninanmi. 37Paymi chakranta rantikaramuspan qollqetañataq apostolkunaman qorqa.
Chwazi Kounye ya:
Hechos 4: RCHQ2
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Chuya Qellqa Revisión @ Sociedad Bíblica Peruana, 2012