Néra Njékaḭkulaje 9
9
Kun mee lə Sool
NNk 22.6-16, 26.12-18
1Nɛ Sool lé rɔ gə njékwakila lə Mbaidɔmbaije lé əmə tar biriri-biriri ndəji dee kɔr. 2Yeḛ aḭ haar aw rɔ ŋgɔ-njekinjanéməs’g dəjee maktub gə mba kaw ne kəi-kiŋga-na̰je’g gə́ to Damas, bèe ɓa ɓó lé yeḛ a kiŋga diŋgamje əsé denéje gə́ d’un rəw goo Mbaidɔmbaije’g ndá yeḛ a twa dee tɔ dee gə kúla kaw sə dee Jerusalem.
3Loo gə́ yeḛ nai rəbə gə́ unda dɔ Damas dəb ya ɓəi ndá léegəneeya loo ḭ dara ndogó gugu dəa sub. 4Yeḛ guru naŋg rug ndá yeḛ oo ndu dəw ɓar dəa’g wəl-wəl pana: Sool, Sool, see ban ɓa i ula kəm ndòo bèe wa.
5Yeḛ tel ilá keneŋ pana: Mbaidɔmbaije, see i to gə́ na̰ wa.
Mbaidɔmbaije tel ilá keneŋ pana: Ma m’to gə́ Jeju gə́ i ula kəm ndòo lé ya. Nékad gə́ d’ɔs ne kudi ɓèsèsè-ɓèsèsè lé ɓó gad kudi gə́ gogo ndá a koso rɔi’g pal ya.
6Sool unda bala tigi-tigi ɓəl undá badə gaŋgee, aree pana: Mbaidɔmbaije, see ɗi ɓa i ndigi kam m’ra wa. Tɔɓəi Mbaidɔmbaije ulá pana: Uba naŋg ḭta aw uru mee ɓee’g ndá d’a kulai né gə́ kəm kari ra ɓəi.
7Dəwje gə́ njédaneeje lé d’aar dɔ na̰’d jim. D’oo ndu dəw gə́ ɓar lé nɛ d’oo darɔ debee lé el. 8Sool uba naŋg ḭta, teḛ kəmee bəsəsə nɛ yeḛ oo loo el. Deḛ d’wa jia ndɔree d’aw səa Damas. 9Yeḛ si keneŋ ndəa munda oo loo bèe el ləm, sɔ né el ləma, ai mán el ləm tɔ.
10Njekwakila kára bèe si Damas ria lə Ananias. Mbaidɔmbaije teḛ dəa’g gə́ némḭdi ɓaree pana: Ananias.
Yeḛ ndigi təa’g pana: Mbaidɔmbaije, yḛ̀ m’aar nee.
11Mbaidɔmbaije tel ulá pana: Uba naŋg ḭta aw gə mban-rəw gə́ deḛ ɓaree Rəw gə́ danasur, saŋg dəw kára gə́ ḭ Tarsə gə́ ria lə Sool gə́ si kəi lə Judas. 12Mbata yeḛ si ra tamaji lé ndá yeḛ oo né teḛ dəa’g gə némḭdi aree oo dəw gə́ ria lə Ananias gə́ andə kəi ila jia dəa’g ɓó gə mba kar kəmee inja bərəŋ aree oo ne loo.
13Ananias ilá keneŋ pana: Mbaidɔmbaije, m’oo ta néra gə́ majel gə́ dəw neelé ra gə njémeendaje gə́ Jerusalem lé ta dəwje wəg-wəg. 14Tɔɓəi ree gə́ yeḛ ree neelé mbai dɔ njékinjanéməsje-je ɓa d’un ndu dee d’aree gə mba karee ree twa deḛ gə́ ɓar rii lé.
15Nɛ Mbaidɔmbaije ilá keneŋ pana: Maji kari ɔd aw ya mbata ma nja m’ɔree kəm’g gə mba karee un rim as ne loo no̰ ginkoji dəwje gə raŋg’g ləm, gə no̰ mbaije’g ləma, gə no̰ Israɛlje’g ləm tɔ. 16Tɔɓəi ma nja m’a tɔjee loo némeeko̰ gə́ a kiŋgá gə mbata lə no̰’m gə́ yeḛ a kunda lé karee oo gao ya ɓəi.
17Ananias unda loo teḛ aw. Loo gə́ yeḛ andə mee kəi’g neelé ndá yeḛ ila jia dɔ Sool’g ulá pana: Ŋgokɔm Sool, Mbaidɔmbaije Jeju gə́ teḛ dɔi’g rəbee loo gə́ i si aw ne gə́ nee lé yeḛ nja ulam gə mba kar kəmi inja ari oo ne loo ləm, gə mba kar Ndilmeenda taa məəi yal-yal ləm tɔ.
18Léegəneeya né teḛ kəmee’g to gə́ ŋgwɔi né bèe, tɔr pərəŋ-pərəŋ ɔm naŋg, aree oo loo njai-njai. Yeḛ uba naŋg ḭta ar dee rəa batɛm. 19Loo gə́ yeḛ lam nésɔ sɔ ndá siŋgá uru na̰’d sigi.
Sool ila mber mee ɓee gə́ Damas
Sool nai gə njékwakiláje gə́ d’isi Damas’g lé ndəa aḭ bula bəl ya. 20Yen ŋga waga ndá yeḛ un kudu kɔr gin ta mee kəi-kiŋga-na̰je’g pana: Jeju to gə́ Ŋgon-Ala gə́ gəd lé ya. 21Deḛ lai gə́ d’oo ta ləa lé kaar dee wa dee paḭ ar dee pana: See yeḛ gə́ aa’n lé to gə́ yeḛ gə́ tuji njé gə́ Jerusalem gə́ d’un ri neelé ula ne kəm dee ndòo el wa. See ree gə́ yeḛ ree neelé see yeḛ ree gə mba twa dee kaw sə dee no̰ mbai dɔ njékinjanéməsje-je’g el wa.
22Nɛ siŋga Sool ḭ dɔ maree’g gə́ kédé-kédé ar ta kɔr ləa gə́ ɔr ar dee d’oo to gə́ Jeju to Kristi lé dum dɔ Jibje gə́ d’isi Damas’g lé təs.
23Gée gə́ gogo ndá Jibje d’ɔm na̰’d téréré gə mba tɔlee. 24Nɛ Sool oo no̰ dee kédé. Deḛ ŋgəm tarəw ɓeeje dan kàrá gə loondul’g gə mba karee udu. 25Nɛ ndɔ kára bèe loondul’g lé njékwakiláje d’ilá mee karè’g d’al səa dɔ ndògo-bɔrɔ d’aree uru naŋg gir ndògo’g#2kɔr 11.32-33.
Sool aw Jerusalem
26Loo gə́ Sool teḛ Jerusalem mba̰ ndá yeḛ naa loo gə mba nam sə dee, nɛ deḛ lai ɓəl giree d’ə̰ji pana: Yeḛ to gə́ njekwakila el ɓəi. 27Yen ŋga Barnabas undá aw səa no̰ njékaḭkulaje’g, ɔr sor loo teḛ gə́ Mbaidɔmbaije teḛ dɔ Sool’g rəbə ləm, gə ta gə́ yeḛ ulá ləma, gə loo ta gə́ yeḛ ɔr gə ri Jeju ar deḛ gə́ Damas gə kəm ŋgon diŋgam lé ləm tɔ. 28Yeḛ wa sə dee boa néra dee Jerusalem, ɔr ta gə ri Mbaidɔmbaije ɓó ɓəl ne kəm dəw el. 29Yeḛ pata ləm, gə maḭta gə Helenje ləm tɔ, nɛ deḛje neelé saŋg rəw gə mba karee udu tɔ. 30Loo gə́ ŋgako̰ na̰je d’oo ndá deḛ d’undá d’aw səa Sejare d’aree aw njal teḛ Tarsə.
31Togə́bè ɓa Eglisə si ne gə loo kulee lɔm dɔ naŋg gə́ Jude ləm, gə Galile ləma, gə Samari ləm tɔ. Deḛ d’ula diŋgam meḛ na̰’d ləm, deḛ njaa na̰’d ɓəl ne Ndil Mbaidɔmbaije ləm tɔ ndá deḛ ra tɔg gə́ kédé-kédé mbata Ndilmeenda to gə́ dərgel dee tɔ.
Piɛrə ɔr rɔko̰ rɔ Enée’g
32To gə́ Piɛrə aw gə mba koo deḛ gə́ to gə kəmee lai lé ndá yeḛ teḛ rɔ deḛ gə́ d’isi Lidə tɔ. 33Yeḛ iŋga diŋgam kára keneŋ gə́ ria lə Enée, dəb rəa wəi wɔ aree to dɔ tira-rɔko̰’g ya ləbee jinaijoo. 34Piɛrə ulá pana: Enée, Jeju Kristi ajii mba̰, uba naŋg ḭta wa dɔ gɔl nétoi.
Léegəneeya yeḛ uba naŋg ḭta ya tɔ. 35Dəw-mee-ɓeeje gə́ Lidə gə deḛ gə́ Saron lai d’ée ndá d’un meḛ dee d’ar Mbaidɔmbaije lé tɔ.
Tabida lé tel si kəmba
36Dené kára bèe mbuna njékwakilaje gə́ d’isi Jope lé ria lə Tabida nɛ gin ria lə Dɔrkas, yeḛ to gə́ dəw-noji gə́ wa noji gə njéndooje yaa̰. 37Mee ndəa’g neelé yeḛ oso gə rɔko̰ keneŋ ndá wəi. Loo gə́ deḛ ndogee mán mba̰ ndá d’unee d’aw d’unda dɔ kəi gə́ to dɔ maree’g tar. 38To gə́ Lidə to mbɔr Jope’g dəb lé ndá njékwakiláje d’oo sor Piɛrə gə́ si keneŋ ndá d’ula dəwje joo rəa’g mba kar dee ra ndòo rəa’g gə mba karee ḭ sə dee ree sə dee ɓó a tila gə́ tila el. 39Piɛrə uba naŋg ḭta aw gə dəwje neelé na̰’d tɔ. Loo gə́ yeḛ teḛ keneŋ mba̰ ndá d’ɔr nea̰ d’aw səa mee kəi gə́ dɔ maree’g tar lé tɔ. Njékəisiŋgaje lai gə́ d’aar keneŋ lé kiri dəa yir tɔjee kubu kur Dɔrkas loo gə́ yeḛ si ne sə dee gə kəmee ɓəi lé. 40Piɛrə ar dəwje lai teḛ ɗaga budu-budu ndá yeḛ ɔs kəjee naŋg ra ndòo rɔ Ala’g. Tɔɓəi yeḛ tel rəa gə́ dɔ nin’g ulá pana: Tabida, uba naŋg ḭta!
Ndá yeḛ teḛ kəmee yərərə dɔ Piɛrə’g orè twa ḭ si tar. 41Piɛrə ula jia wá ne aree ḭta. Tɔɓəi yeḛ ɓar njémeendaje gə njékəisiŋgaje lé ulá ji dee’g kəmba. 42Ta neelé oso mbi dəwje lai gə́ d’isi Jope, ar dəwje bula d’un ne meḛ dee d’ar Mbaidɔmbaije. 43Piɛrə nai Jope kəi lə Simo̰ gə́ njekɔr-girŋgira lé ndəa aḭ bula bəl ya.
Chwazi Kounye ya:
Néra Njékaḭkulaje 9: SBA2015
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Ngambai Bible © Alliance Biblique du Tchad 1989, 2015.