Néra Njékaḭkulaje 20
20
Pool aw Masedoinə gə Grɛs
1Loo gə́ taree wəi bèm mba̰ ndá Pool mbo̰ njékwakiláje dɔ na̰’d. Loo gə́ yeḛ ndəji dee ndá yeḛ ra dee ne lapia ɓa ḭ mba kaw dəb ɓeeko̰ gə́ Masedoinə ɓəi. 2Yeḛ aw gə loo-loo dɔ naŋg neelé ula ne njékwakiláje ta ndəji dee ne bər-bər loo bula ɓa yeḛ ɔd keneŋ aw Grɛs. 3Yeḛ si keneŋ naḭ munda. Nai lam bèe yeḛ a gə kuru mee bato’g gə mba kaw Siri ndá yeḛ oo no̰ Jibje gə́ d’umee rəw. Togə́bè yeḛ ɔs tel taa rəw gə́ Masedoinə. 4Deḛ gə́ d’aw səa saar teḛ Asi lé ri dee ɓa to nee: Sopater, dəw gə́ Bere, ŋgolə Pirus ləm, gə Arisitarekə gə Səkund njé gə́ Tesalonik ləm, gə Gayus, dəw gə́ Derbə ləma, gə Timote gə Tisik gə Tropim gə́ to dəwje gə́ Asi lé ləm tɔ. 5Deḛ neelé d’aw no̰ sí’g kédé ŋgina sí Troas. 6Jeḛ lé loo gə́ deḛ ra naḭ gə́ wɔji dɔ muru gə́ nétiee godo keneŋ lé ndá jeḛ j’ḭ j’uru mee bato’g Pilibə, j’aw saar as gə ndɔ sí mi ɓa j’iŋga dee Troas ɓəi. Lée neelé j’isi sə dee keneŋ as gə ndɔ sí siri tɔ.
Pool si Troas
7Ndɔ gə́ doŋgɔr gə́ njekorè goo ndɔ-kwa-rɔ lé jeḛ j’wa dɔ na̰ gə mba gaji muru kar na̰. Pool gə́ bèlè a gə kḭ lé yeḛ ɔr ginta ar njékwakiláje ula dee ta yaa̰ saar ar dan loo bab. 8Kəi gə́ dɔ maree’g gə́ j’wa dɔ na̰ keneŋ lé néndogóje bula ndogó keneŋ bən. 9Basa kára ria lə Etykus si ta kəmbolè’g tebdé bèe, nɛ ɓi oso kəmee’g pərəg mbata Pool ɔr ginta ar kuree əw yaa̰. Yeḛ lé suru gə ɓi jogè-jogè aree ḭ dɔ kəi gə́ to dɔ na̰’d munda lé oso naŋg parag ar dee ndɔree gə́ yée ya d’aw səa. 10Nɛ Pool lé risi uru naŋg rəm ree səa naŋg rəw wá kaaree’g sud ula dee pana: Arje kaar sí ndəb el mbata ndilee nai rəa’g ɓəi.
11Tɔɓəi yeḛ tel tuga loo gə́ kəmee gə́ tar ndá yeḛ təd muru o̰ ɓa yeḛ wɔji sə dee ta kuree əw ya saar ar loo àr ɓəi. Gée gə́ gogo yeḛ uba naŋg ḭ aw ɓəi. 12Basa neelé deḛ ndɔree d’aw səa ɓee kəmba ya. Yee ɓa meḛ dəwje lai neelé oso ne naŋg po̰ ɓəi.
Pool ḭ Troas aw Milet
13Nɛ jeḛ lé j’uru mee bato’g j’aw kédé no̰ Pool’g mba kaw Asos loo gə́ jeḛ j’wɔji-kwɔji kiŋga Pool keneŋ mbata yeḛ ndigi kun rəw lé gə gɔlee. 14Loo gə́ yeḛ iŋga sí Asos mba̰ ndá j’aree uru sə sí mee bato’g ar sí j’awje Mitilenə. 15Tɔɓəi j’ḭ keneŋ j’aw dan baa-boo’g saar bèlè lookàree ndá j’oo dɔ ɓee gə́ Siɔs no̰ sí’g dil. Ndɔ gə́ njekorè gée gə́ raŋg jeḛ n’teḛ Milet. 16Pool wɔji-kwɔji gə mba dəs Epesə tar lal kwa naŋg keneŋ mbata yeḛ ndigi kaw go̰-go̰ ɓeeko̰ gə́ Asi el. Yeḛ ɔs rəa ɓad gə mba kaw, ɓó lé banelə teḛ Jerusalem’g mba̰ ɓa ɓó gə kar ndɔ Pa̰dekɔt teḛ ɓəi.
Pool ula ŋgatɔgje gə́ Epesə ta
17Loo gə́ j’isi Milet lé Pool ula kula ɓar ŋgatɔgje gə́ Eglisə gə́ Epesə. 18Loo gə́ deḛ teḛ rəa’g mba̰ ndá yeḛ ula dee pana: ndɔ gə́ dɔtar gə́ m’ila gɔlm Asi pà lé saar ɓasinè seḭ gərje néram gə́ m’ra ta-ta mbuna sí’g gao ya. 19M’ula dɔm m’ra ne né m’ar Mbaidɔmbaije ləm, m’isi gə mán-no̰ kəm’g dan né gə́ naam’g loo kumum rəw’g lə Jibje ləm tɔ. 20Seḭ gərje gao ma m’lɔm sə sí dɔ né gə́ njekorè sí més loo-kula’g lé el ləm, ma m’ɓəl ndəji sí əsé ndoo sí né raga kəm dəwje’g əsé mee kəije’g el ləm tɔ. 21Ma m’ula ne Jibje gə Grekje ta kwa ndòo rɔ dɔ kaiya’g lə dee rɔ Ala’g lé ɓó gə kar dee d’un ne meḛ dee d’ar Mbaidɔmbaije Jeju Kristi. 22Aa ooje, ɓasinè Ndil ɓa ndɔrm aw səm Jerusalem, né gə́ a gə teḛ dɔm’g keneŋ lé ma m’gər el tɔ. 23Nɛ gə ɓee-ɓee lai lé Ndilmeenda ulam keneŋ təsərə pana: Kula tɔm ləm, gə nékəmndoo gə́ a gə ram lé to ŋginam ya. 24M’ra né kára kara gə mba taa ne rɔm el ləm, m’oo rɔm gə́ né gəd kəm dɔ’g el ləm tɔ. Né gə́ wa məəm lé kɔr suna rəw ləm gə meendakaḭ ləm, gə tɔl ta kula gə́ Mbaidɔmbaije Jeju ɔm jim’g, am m’ula dee ne tagə́maji gə́ wɔji dɔ noji lə Ala lé ləm tɔ lé yee ɓa gə́ né gə́ wa məəm ya#2Tim 4.7.
25Aa ooje, seḭje lai gə́ m’aw mbuna sí’g m’ula sí ta lə ɓeeko̰ lə Ala lé ɓasinè ma m’gər gao to gə́ seḭ a kilaje kəm sí dɔm’g gogo el ŋga. 26Gelee gə́ nee ɓa ma m’ula sí ne təsərə ɓogənè ya, ɓó lé dəw kára mbuna sí’g tuji ndá ta məsee wa dɔm el. 27Mbata torndu Ala lai lé ma m’wɔji sí ɓó m’kusu dəa kára kara bèe el. 28Bèe ndá arje meḛ sí dɔ rɔ sí’g ləm, aaje dɔ badə-kosoje gə́ Ndilmeenda unda sí gə́ njékaa dɔ deeje lé gə mba kar sí ulje Eglisə lə Mbaidɔmbaije gə́ yeḛ uga gə məsee-yeḛ nja ləm tɔ. 29Ma m’gər gao loo gə́ m’a kuba naŋg kḭ kya̰ sí lé ndá jagmjərje gə́ njetɔr kwɔi néje d’a kuru mbuna sí’g ndá d’a busu badə-kosoje busu-busu ləm, 30njé gə́ na̰je mbuna sí-seḭ’g ya d’a kḭ gaŋgta badə-badə ndoo dəwje ɓó gə kɔr ne njékwakiláje kɔm dee ne goo dee’g ləm tɔ. 31Yen ŋga sije kəmba jəgəgə, arje meḛ sí olé dɔ ta gə́ ma m’ndəji sí kára-kára lai gə mán-no̰ kəm’g as ləb munda, dan kàrá gə loondul’g m’ar tam wəi el.
32Ɓasinè lé m’ɔm sí ji Ala’g ləm, gə m’ɔm sí ta noji ləa gə́ askəm rɔd sí mba kar sí iŋgaje nénoji lə sí gə njémeendaje na̰’d lai. 33Ma lé larnda əsé larlɔr əsé kubu lə dəw kára kara malee ram el. 34Seḭje lé seḭ gərje gao jim-ma ya ɓa m’ra ne kula m’iŋga ne né gə́ lalm ləm, gə lal deḛ gə́ d’isi səm lé ləm tɔ. 35M’ra né ɓəd-ɓəd m’tɔji sí né gə mba kar kula raje gə́ togə́bè ɓa seḭ a kodoje ne yɔ-dəwje ləm, meḛ sí a kolé ne dɔ Mbaidɔmbaije Jeju gə́ yeḛ nja pana: Kun né kar lé to rɔlel unda taa né!
36Loo gə́ yeḛ pata nee ar dee mba̰ ndá yeḛ ɔs kəjee naŋg ra sə deḛ lai tamaji. 37Deḛ lai neelé kəm dee təd gə mán-no̰, ar dee nim na̰ dɔ tamee’g njururu. 38Kəm dee to ndòo mbata ta gə́ yeḛ ula dee pana: D’a koo kəmee gogo el lé ya. Yen ɓa deḛ danee saar d’aw səa ta bato’g.
Chwazi Kounye ya:
Néra Njékaḭkulaje 20: SBA2015
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Ngambai Bible © Alliance Biblique du Tchad 1989, 2015.