Néra Njékaḭkulaje 14
14
Pool gə Barnabas d’ila mber tagə́maji Ikɔnə
1Mee ɓee gə́ Ikɔnə lé Pool gə Barnabas d’ɔd na̰’d d’aw kəi-kwa-dɔ-na̰’g lə Jibje ndá deḛ d’ɔr ta lə dee d’aree ɓar mḭ yaa̰, bèe ɓa Jibje gə Grekje bula yaa̰ d’un ne meḛ dee. 2Nɛ Jibje gə́ d’ɔm meḛ dee dɔ ta’g lə dee el lé pélé meḛ njépole-magəje d’ar meḛ dee adə dee dɔ Pool gə Barnabas’g. 3Lé bèe kara deḛ nai Ikɔnə ndɔ dee bula bəl ya ɓəi. Deḛ d’ɔr ne ta gə kəm ŋgondiŋgam nduna rɔ dee rɔ Mbaidɔmbaije’g. Yeḛ nja ɓa ɔr ne goo ta noji’g ləa ar dee ra ne némɔrije gə néje gə́ dumkoo gə ji dee. 4Dəw-mee-ɓee-booje lé d’ɔr kəm na̰ ar njé gə́ na̰je to gə́ ka̰ Jibje ləm, njé gə́ na̰je to gə́ ka̰ njékaḭkulaje ləm tɔ.
5Njétar-Alaje gə Jibje d’ɔm na̰’d gə mbaije lə dee mba ra sə dee majel tila dee gə kɔri-ər. 6Loo gə́ Pool gə Barnabas d’oo no̰ dee kédé ndá d’ḭ d’uru njo̰loo’g mee ɓeeje gə́ Likaoni ləm, gə Listrə ləm, gə Derbə ləma, gə ɓeeje gə́ gugu dɔ dee ləm tɔ. 7Lée neelé deḛ d’ila mber tagə́maji keneŋ.
Pool gə́ Barnabas d’aw Listrə
8Dəw kára gə́ gɔlee unda ndolé mee kea̰je’g ɓa d’ojee ɓəi aree oo loo kuba naŋg kḭ njaa ndɔ kára el lé si Listrə. 9Yeḛ si naŋg ur mbia oo ne ta gə́ Pool pa. Pool lé ar kəmee wəi dəa’g sḭ ée ne gə́ dəw gə́ mée to yel gə́ dɔ kaji’g, 10ndá yeḛ pata gə ndia gə́ boi wəl pana: Uba naŋg ḭ aar tar dɔ gɔli’g paar.
Léegəneeya dəw neelé uba naŋg ja̰gjaŋ ḭ tar ɔs njaa ɓad-ɓad. 11Loo gə́ boo-dəwje d’oo né gə́ Pool ra lé ndá deḛ pata gə ndu dee gə́ tɔg pir gə takɔji lə njé gə́ Likaoni pana: To magəje ɓa d’ḭ tar tel rɔ dee gə́ dəwje ree rɔ sí’g nee ya.
12Deḛ ɓar Barnabas Jəwus#14.12 Jəwus lé to ri mbai dɔ magəje lə Grekje. tɔɓəi Pool ɓa deḛ ɓaree Hermɛs#14.12 To ri magə gə́ njekaḭkula lə jəwus. mbata yeḛ ɓa gə́ njekun ta pa. 13Njekinjanéməs lə magə Jəwus lé ḭ kəi-magə gə́ to loo kandə mee ɓee’g ree gə bɔ maŋgje gə́ pḛdé puduje d’ɔm gwɔs dee’g tarəwɓee’g, mbata yeḛ gə koso-dəwje neelé ndigi kinja bɔ maŋgje lé gə́ məs mba pole ne Pool gə Barnabas gə́ magəje. 14Pool gə Barnabas gə́ to njékaḭkulaje lə Jeju lé loo gə́ deḛ d’oo bèe ndá d’wa kubu gə́ rɔ dee’g hao̰-hao̰ til ɓa deḛ teḛ pəd-pəd d’uru mbuna koso-dəwje’g neelé. 15Deḛ pata tɔg pir pana: Seḭ dəwje lé see ban ɓa seḭ raje ne né bèe wa. Jeḛ lé jeḛ n’to gə́ dəwje to gə́ seḭ nja tɔ. Jeḛ j’ula sí tagə́maji gə mba kar sí ya̰je ne goo magəje gə́ gə mḭdé ba nee mba telje rɔ sí goo Ala gə́ njesikəmba’g lé. Yeḛ nja ɓa gə́ njekunda dara gə naŋg nee gə baa-boo-kad gə néje lai gə́ to keneŋ#Tr 20.11, Pak 146.6. 16Mee ləbje gə́ ləw gə́ dəs mba̰ lé yeḛ ar ginkoji dəwje gə raŋg d’aw gə loo kaw dee kaw dee to gə́ meḛ dee ndigi. 17Nɛ yeḛ ɔr gin rəa gə́ kédé-kédé gə némeemajije ləa ɓó yeḛ əw el. Yeḛ ar sí mán ndi gə́ dara ləm, yeḛ ar naḭ kàr gə ɓar taa tor na̰ ləma, yeḛ ar kó lə sí unda gə mba kar sí síje ne dan nésɔ’g bèdèg kar meḛ sí ndá ne kaḭ ləm tɔ.
18Ta neelé ar dee d’əw rɔ dee kinja néməs pole dee ya nɛ meḛ dee to kəmba dɔ’g ɓəi ɓó meḛ dee ɔr dɔ’g el.
19Yen ɓa Jibje gə́ d’ḭ Antiɔs gə Ikɔnə ree d’iŋga dee keneŋ ndá d’ula meḛ koso-dəwje na̰’d, d’ar dee tila Pool gə kɔri-ər, deḛ ndɔree d’ilá ŋgaŋloo’g d’ə̰ji ta meḛ dee’g pana: Yeḛ wəi mba̰. 20Nɛ njékwakiláje d’aḭ na̰ dəa’g yir ndá yeḛ uba naŋg ḭta ɔd uru mee ɓee’g. Bèlè lookàree yeḛ ḭ gə Barnabas na̰’d mba kaw Derbə.
Deḛ tel d’aw Antiɔs gogo
21Loo gə́ d’ila mber tagə́maji mee ɓee’g neelé d’iŋga njékwakiláje keneŋ bula bəl ya ndá d’ɔs tel d’aw Listrə ləm, gə Ikɔnə ləma, gə Antiɔs ləm tɔ. 22Deḛ d’ula diŋgam meḛ njékwakiláje’g ndəji dee gə mba kar dee d’ai meḛ dee sam-sam dɔ meekun’g lə dee pana: Némeeko̰je gə́ gə ria-ria ɓa gə́ kuma̰ kar sí j’andə ne mee ɓeeko̰’g lə Ala lé.
23Deḛ d’ɔr ŋgatɔgje mee Eglisəje gə loo kára-kára lai tɔɓəi loo gə́ deḛ ra tamaji ɓa d’ɔg meḛ dee ɓoo ɓəi ndá d’ɔm dee ne ji Mbaidɔmbaije’g yeḛ gə́ d’un meḛ dee d’aree lé.
24Yen ŋga deḛ d’unda mee ɓee gə́ Pisidi gaŋg d’aw Pampili ləm, 25d’ula dee ta mee ɓee gə́ Perjə ɓa d’ɔd d’aw Atali ɓəi ləm tɔ. 26Lée neelé d’uru mee bato’g keneŋ gə mba tel kaw gə́ Antiɔs. To ɓee gə́ d’ɔr dee keneŋ d’ɔm dee ji noji lə Ala’g mba kar dee d’aw ra kula nee gə́ deḛ tɔl ne təa bém ɓasinè lé.
27Loo gə́ deḛ teḛ Antiɔs mba̰ ndá deḛ d’ula kula ɓar Eglisəje d’ar dee d’wa dɔ na̰, tɔɓəi deḛ d’ɔr gin néje lai gə́ Ala ra sə dee d’ar dee d’oo ləm, d’ula dee ta loo rəw gə́ yeḛ ɔr ar njépole-magəje d’un ne meḛ dee ləm tɔ. 28Deḛ ra ɓee gə njékwakiláje kur dee əw bəl ya.
Chwazi Kounye ya:
Néra Njékaḭkulaje 14: SBA2015
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Ngambai Bible © Alliance Biblique du Tchad 1989, 2015.