San Juan 14
14
Jesús na̱j nejz guidxinnë bejn loj Dios
1Rëb tëë Jesús:
―Ad rudi xgab. Gol bililadx Dios, gol bililadx tëë naj. 2Lidx da Dadan dád zien luar lod guiban bejn yuꞌ. Bal iche yuꞌ, ad ziant ganin lojdi, chiguienchaawan xluaridi. 3Chi ma benchaawan luar guin, dxel yaguialan guidgaxin lëjt din sudi lod gazun. 4Ma nünbeedi nejz zë lod gan.
5Zeel rëb Tumajs lojman:
―Dad, ad rayagbeetan ban chel, ¿xhienaag yaguieenbeen nejz guin?
6Badxiꞌman laan rëbaman:
―Naj na̱j nejz, najn diidxli, naj tëën guialnaban. Tijbzi naj zajc chinëꞌ bejn ree loj da Dadan. 7Bal nünbeedi naj, në da Dadan güünbeedi. Per ma nünbeedi laaman diizd yan, din ma baguiaadi laaman.
8Dxel rëb Felip:
―Dad, banee mod majsi yaguiaazan bén na̱j xDadil.
9Badxiꞌman laan rëbaman:
―Felip, ma gojc xchej zaꞌnëꞌn lëjt. ¿Nid wayünbeel naj ya? Din bén ruguiaa naj, da Dadanan ruguiaaman. ¿Chexc zeel nal gunen mod guguiaal da Dadan? 10¿Nid rliladxil ya, naj zaꞌnëꞌ da Dadan, guiáad laaman zaꞌnë naj? Ni rnin lojdi, ad rbëguictanan. Da Dadan, bén nabannëꞌn, laaman rüjn dxiin guin. 11Gol bililadx naj zaꞌnëꞌ da Dadan, guiáad laaman zaꞌnë naj. Balgui majsi ni rünzan gol bililadx. 12Diidxliczi ganin: Bén rliladx naj, nëgajcaman güün ni rünan, güünman ni mazri naroob, din naj yayaꞌ lod zaꞌ da Dadan. 13Graczi ni guiniabidi lojman por naj, günanan din gulün xguialrniabeeman. 14Günan xhietëëz ni guiniabidi.
Guixhiaal Jesús xSprijtaman
15’Bal rëndi naj, gucaagdiajguidi ni balün. 16Din guië loj da Dadan guixhiaalaman Sprijt sunë lëjt, 17Sprijt gulüü diidxli, din zianczi sunëman lëjt. Bén ad rliladxt ree Dios ad zajct tiaꞌ reeman Sprijt guin, din ad ruguiaat reeman ad nünbee tëët reeman laaman. Per lëjt nünbee laaman, din sunëman lëjt yayaꞌn tëëman luxdoodi tiblayaa. 18Ad zusaꞌntan xtijbidi, yaguialan stijb guidganan lëjt. 19Staꞌnz riaadx ad zuguiaatri ree bénguidxliuj naj, per lëjt guguiaadi naj, guibandi din nabanan. 20Dxej zii ree, gagbeedi zaꞌnëꞌ da Dadan, lëjt zaꞌnë naj, guiáad naj zaꞌnëꞌn lëjt zianczi. 21Bén rucaagdiajg ni rniabeen rüjn tëëman laan, walicaman rënman naj. Guiën da Dadan bén rën naj, në naj guiën laaman din güünbeeman naj.
22Gunabdiidx Judas (ad bén bayüt Jesús) rëbaman:
―Dad, ¿chexc zeel dunujzan yayagbee chu lüj, guiáad ree bénguidxliuj ad zagbeet reeman?
23Badxiꞌ Jesúsan rëbaman:
―Bén guiën naj guzoobaman da diidxan, guiën da Dadan laaman, guiáad naj guidnëꞌ da Dadan din yabajnnëꞌn laaman. 24Bén ad zënt naj ad zuzoobtaman da diidxan, din diidx cucaagdiajguidi yan ad da diidxtanan, xtiidx da Dadanan bén guxhaal naj.
25’Canin lojdi gra nine, laꞌtgaj zaꞌnëꞌn lëjt. 26Per xSprijt Dios, bén sunë lëjt zianczi, bén guixhiaal da Dadan por naj, graczi gulüüman lëjt din gusaaladxidi ni canin.
27’Chi yayaꞌn, yabecdxen luxdoodi, gunen guialnazaꞌc lojdi, ad ziꞌc runeet ree bénguidxliujn, ad bal ru nayadi ad rdxeb tëëdi. 28Ma rnin lojdi, yayaꞌn, dxel yaguialan zatijb. Bal walidi rëndi naj, chuꞌ luxdoodi zagdxe, guial gagbeedi yayaꞌ loj da Dadan, din mazri zojblojman guial lon. 29Ma rugojnan lëjt, din chi gac zian, chililadxidi.
30’Ad zroꞌtri ganenëꞌn lëjt, din ma zëëd xin rniabee guidxliuj, majsi ad nët naj rniabeex. 31Per zian gac din gagbee ree bénguidxliuj, rënan da Dadan, zeel rünan ni rniabeeman. Gol bisu, yoꞌ ree yan.
Chwazi Kounye ya:
San Juan 14: zas
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2010, Wycliffe Bible Translators, Inc. All rights reserved.