LUKA 12
12
Kineihkhemna thu Hilhkholhna
1Mi a tul tampite hong kikhawmin khatlekhat a kisik kha gawp dongin kinehcipin a om laitakin Jesu in a nungzuite kiangah thu gen masa a, “Farisi miteʼ kineihkhemna ahi, a silngo uh limtakin kidawm un.#Mat 16:6; Mrk 8:15 2A kiseelte khatvei teitei kimu dinga, thusimte khatvei teitei thulang suak ding hi.#Mrk 4:22; Luk 8:17 3Zan khuamial sunga na gente uh sun khuavak sungah kigenkik dinga, inn sung tawng ah na kihuau simnate uh mi khempeuh in thei thang ding uh hi.
Kua Kihta Ding
(Mat 10:26-31)
4“Lawmte aw, note kiangah kong genin ah, pumpi a thah khit ciangin a sia zaw a hih thei nawn lote na kihta kei un. 5Kuate kihta ding na hi uh hiam cih leh, mite in a thah khit sa mipa pen hell khuk sungah a khia thuah thei lai Pasian na kihta un. 6Gitta nga ciangin hamu-in kizuak lel hi lo ahi hiam? Tua bang hi lel napi-in Pasian in gitta khat beek mangngilh lo hi. 7Na lutung uh a om na sam mal zah ciat nangawn uh Pasian in thei khin hi. Note lunghimawh kei un. Gitta tampi sangin na manpha zaw ciat uh hi.
Khris Mi Hiʼng, ci-in Miʼ Theihin Genna
(Mat 10:32-33; 12:32; 10:19-20)
8“Note kiangah kong cih in ah, keima mi ahihna miʼ theihin a gen khiate, Mihing Tapa in zong Pasianʼ vantung miteʼ mai ah, keima mi hi, ci-in gen khia dinga, 9ahi zongin keima mi ahihna miʼ theihin a gen khia nuam lote, Pasianʼ vantung mite mai ah zong keima mi hi, ci-in Mihing Tapa in gen khia nuam lo ding hi. 10Mihing Tapa a langpangte a mawhna uh kimaisak thei dinga, Kha Siangtho a langpangte a mawhna uh kimaisak lo ding hi.#Mat 12:32; Mrk 3:29 11Thusitna a thuak dingin kikhopna inn ah ahi a, hausa zumah ahi zongin hong paipih uh ciangin bang gen dinga, bangci kihut ding ka hi hiam, ci-in lunghimawh kei un. 12Bang hang hiam cih leh a hun a tun ciangin Kha Siangtho in na gen ding teng uh hong hilh ding hi,” a ci hi.#Mat 10:19-20; Mrk 13:11; Luk 21:14-15
A Hau Mihai pa Thu gentehna
13Tua laitakin mihon lak panin mi khat in Jesu kiangah, “Sia aw, ka pa un a hong sihsan gamh pawl khat tawh ka u in kei hong inntuan nadingin hong gensak in,” a ci hi. 14Ahi zongin Jesu in a mipa kiangah, “No unauʼ gamh a hawm dingin kua in kei hong seh ahi hiam?” ci-in a dawng hi. 15Tua ciangin Jesu in amaute khempeuh kiangah, “Hoihtakin kidawm unla, na huaiham loh nadingun kikem un. Bang hang hiam cih leh bangzah ta-in mi khat a hauh hangin a neihsa tawh a nuntakna taktak kicing zo lo hi,” a ci hi.
16Tua ciangin Jesu in amaute kiangah thu gentehna khat gen a, “Mihau pa khatʼ lo ah an tampi a piang hi. 17Tua ciangin amah in a lungsim sungah, ‘Ka an khempeuh ka koih nading mun kicing lo ahih manin bang cih ding ka hi hiam? 18Tua ahih manin hih bangin ka gamta ding hi: Ka ansalte phelin a lian zaw ansalte ka lam dinga, tuate sungah ka ante le ka neih khempeuh ka seng ding hi. 19Tua ciangin keimah in: Mi hampha mahmah ka hi hi. Kum tampi sung ka khom ding an nek tui dawn le na hoih tampi ka nei hi. An ne, zu ne-in, a nuam theithei-in ka om hithiat ding hi,’ ci hi. 20Ahi zongin Pasian in ama kiangah, ‘Mihai pa aw, tu zan mahmah in na si ding hi. Hih na neihsa teng kuaʼn zang nawn ding ahi hiam?’ ci hi,” a ci hi.
21Tua ciangin Jesu in a thugen a khupna-in, “Tua mah bangin amau ading bekin a kholcipte pen Pasianʼ muhna panin mihau hi lo uh hi,” a ci hi.
Lunghihmawh Kholhna
(Mat 6:25-34)
22Tua ciangin Jesu in a nungzuite kiangah, “Tua ahih ciangin note kiangah kong genin ah: I nuntak nadingin bang ne dinga, i pumpi tungah bang silh ding ihi hiam, ci-in lunghimawh kei un. 23Nuntakna pen an sangin thupi zaw a, pumpi pen puan sangin thupi zaw hi. 24Vasate ngaihsun dih un: Amaute in khai tuh lo uh a, an lak cih zong nei lo uh hi. Amaute in beemlepang zong nei lo napi-in Pasian in annek tasamsak lo hi. Vasate sangin note nakpi takin na manpha zaw uh hi. 25Note na lunghihmawh manun na nuntak hun uh nai khat sung bek a sot to thei kua om na hi uh hiam? 26Tua bang a themno khat nangawn hih thei lo na hih uh leh bang hangin a dangte lunghimawh se na hi uh hiam? 27Gamlak a paakte ngaihsun dih un. Tuate in a nek ding uh na sem lo uh a, a silh ding uh puan zong gan lo uh hi. Ahi zongin note kiangah kong genin ah: Bangzahin a hauh hangin Solomon nangawn, hih paakte khat zahin a hoihin kizem zo lo lai hi.#1Kum 10:4-7; 2Khang 9:3-6 28Upna neu mite aw, tu ni-in om a, zing ciangin keutumin meikhuk sungah a kikhultum lopa kungte, Pasian in puansilh guan ahihleh note hong guan zaw kan ding hi lo ahi hiam? 29Tua ahih manin bang ne ding, bang dawn ding, ci-in lunghimawhin om tawntung kei un. 30Gentail mi khempeuh in hih nate lunghihmawh penin nei uh hi. Hih nate na kisap lamtak uh zong na Pa un hong thei hi. 31Tua ahih manin Pasianʼ Ukna ngaihsutin nei masa zaw un. Tua hileh hih na kisapna dangte uh zong Pasian in hong pia thuah ding hi,” a ci hi.
Vantungah Sumkholna
(Mat 16:19-21)
32Tua ciangin Jesu in, “Tuu hon tawmnote aw, lau-in lunghimawh kei un. Na Pa un ama Ukna sungah ukna thu a nei dingin a hong seh sa ahi hi. 33Na neihsa uh zuak unla, mizawngte tungah tua sumte na pia un. Note adingin a sia thei lo sumkholna na bawl unla, gutate in a luh zawh lohna, leikha in zong a nek zawh lohna, cikmahin a kiam ngei het loh nading mun vantungah na sumte uh na khol un. 34Bang hang hiam cih leh na sum uh a omna munah na lungsim uh om tawntung ding hi,” a ci hi.
A Kiging Nasemte
35Tua ciangin Jesu in, “Na kawng uh gakin, na mei uh vakin a kiging sa-in om unla,#Mat 25:1-13 36a topa uh mopawi simna panin hong tungin kongkhak a kiuh ciangin thakhatin kong a hon pah theih nadingun a topaʼ ciah ding a ngak nasemte bangin om un.#Mrk 13:34-36 37A topa hong ciah ciangin a kiging sa-in amah ngakin a om uh a muh nasemte pen mi hampha mahmah ahi uh hi. Note kiangah kong genin ah, a topa zong hong kithawi-in a nasemte an vak dingin tusak dinga, a mahmah in a nasemte an thukin na a sem ding hi. 38Zankim laitak ahi a, zingsang khuavak kuan lam ahi zongin a hong ciah hun peuhpeuh ciangin amah ngakin a om a muh nasemte pen mi hampha mahmah ahi uh hi. 39Ahi zongin na phawk ding uh thu khat om hi. Mi khat in guta paʼ hong pai ding hun thei khol leh a inn luhsak lo ding hi. 40Tua mah bangin Mihing Tapa zong na upmawh loh uh hun laitakin hong pai ding ahih manin note zong a kiging sa-in om tawntung un,” a ci hi.#Mat 24:43-44
A Citak le A Citak lo Nasem
(Mat 24:45-51)
41Peter in, “Topa aw, hih thu gentehna ko bek nong cihna ahi hiam, ahih kei leh mi khempeuh ading na cihna ahi hiam?” ci-in a dong hi. 42Topa in, “A pil a citak nasem pa i cih a bangcite ahi hiam? A nasep pih dangte ukin a hun manmanin amauteʼ nekzah ding ciat a pia dingin a topa in a seh nasem pa ahi hi. 43A topa hong ciah ciangin hih ama sawl bangin a sem a muh nasem pa pen mi hampha mahmah ahi hi. 44Keʼn kong cih in ah, a neihsa khempeuh a uk dingin a topa in tua nasem pa koih takpi ding hi. 45Ahi zongin tua nasem pa in a lungsim sungah, ‘Ka topa hong ciahkik hak ding hi,’ ci-in ngaihsunin a nasep pih numei le pasalte sat gawp henla, zukham ankhamin om mawk leh, 46tua nasem paʼ topa pen ama upmawh loh ni, a theih kholh loh hunin hong tung ding hi. A topa in nakpi takin amah gim pia dinga, a thumang lo mite tawh a kibangin a thuaksak khawm ding hi. 47A topaʼ deihna thei napi-in a topaʼ deih bangin a gamta nuam lo nasem pa pen nakpi takin kisat ding hi. 48Ahi zongin a topaʼ deihna a theih lohna hangin sat thuak nading a gamta kha nasem pa pen kidam sat zaw deuh ding hi. Tampi a kipiakna pa tung pan tampi kikal dinga, a tam zaw a ki-apna pa tung pan a tam zaw kikal ding hi,” ci-in a dawng hi.
Jesu, Kikhenna A Piangsak pa
(Mat 10:34-36)
49Tua ciangin Jesu in, “Leitungah meikuang a khah dingin a hong pai ka hi a, tu mahmah in a meikuang kipan khinta hileh ka ut hi. 50Gimna sungah ka kiphum nading khat om a, tua thu a kikhit matengin ka lungsim a nuam thei kei hi.#Mrk 10:38 51Leitungah kilemna a omsak dingin a hong pai hong sa na hi uh hiam? Hi lo hi. Keʼn kong cih in ah, kikhenna a omsak dingin a hong pai ka hizaw hi. 52Tu a kipanin innkuan sungah mihing nga a phate, a langah thum, a langah nihin kikhenin kido ding uh hi. 53A pa in a tapa do-in, a tapa in a pa do dinga, a nu in a tanu do-in, a tanu in a nu do dinga, a teeknu in a monu do-in, a monu in a teeknu do ding hi,” a ci hi.#Mik 7:6
Hun Theihna
(Mat 16:1-4; Mrk 8:11-13)
54Jesu in mihonte kiangah zong, “Nitumna lamah meiipi hong kai na muh uh ciangin, ‘Guah hong zu ding hi,’ ci-in thakhatin na gen thei pah uh a, tua mah bangin guah hong zu takpi hi. 55Leitaw lam panin huih hong nun ciangin, ‘Ni hong sa ding hi,’ na ci uh a, tua mah bangin ni hong sa takpi hi. 56No a kineihkhem mite aw, vanlelei na et uh ciangin a piang ding thu thei na hih uh leh, tu hun thute bang hangin theithei lo na hi uh hiam?” a ci hi.
Na Langte uh tawh Kilem Un
(Mat 5:25-26)
57Tua ciangin Jesu in, “Bang hangin na gamtat nading uh a manin khen thei lo na hi uh hiam? 58Mi khatpeuh in na tungah thu hong bawlin zum ah hong paipih leh, zum a, thukhente mai ah hong kai gawpin, thukhente in palikte kiangah hong apin, palikte in thong sungah a hong koih loh nadingin, na lang pa uh tawh na thu uh a sian theih nadingin na siam tawpun lamkal ah hanciam un. 59Keʼn kong cih in ah, tua bangin gamta kei le-uhcin, na liau sum uh na piak khit matengun thong panin na suakta kei ding uh hi,” a ci hi.
Chwazi Kounye ya:
LUKA 12: TBR17
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Tedim Bible © Bible Society of Myanmar, 2017.