JOHAN 13
13
Jesu in A Nungzuiteʼ Khe Silsak
1Tu-in Paisan Pawi hun ding ni khat bek in sam a, Jesu in hih leitung nusia-in a Pa kiangah a pai ding hun a tunna thu a thei hi. Hih leitungah a om ama mite it mahmah ahih manin a hih theihna zah ciang tawh a itna a lak hi. 2Jesu le a nungzuite nitak an ne-in a tukhawm uh hi. Tua hun laitakin dawimangpa in Simon Iskariotʼ tapa Judasʼ lungsim sungah Jesu lehhek nading ngaihsutna koih khinzo hi. 3A Pa in ama khut sungah vangliatna khempeuh a piakna le Pasian in amah a sawl mah bangin tu-in Pasian kiangah a paikik ding ahihna thu zong a thei hi. 4Tua ahih manin a annekna sabuai panin Jesu ding khia-in a puan tungsilh suah khia a, a kawng ah a mainulpi a teeng hi. 5Tua ciangin kuangpi sung khat ah tui sung a, a nungzuiteʼ khe silsakin a kawng ah a teen a mainulpi tawh a nul keusak dingin a kipan hi. 6Simon Peterʼ khe silsak dingin a kipat ciangin Peter in, “Topa aw, ka khe hong silsak zenzen ding na hi hiam?” a na ci hi.
7Jesu in, “Tu-a ka gamtatna thu na theih loh hangin nidang ciangin na thei ding hi,” a ci hi. 8Peter in, “Nang peuhmah ka khe ka hong silsak ngei buang kei ding hi,” a cih ciangin, “Na khe hong silsak kei leng, kei tawh na kipawl thei nawn kei ding hi,” a ci hi. 9Tua ciangin Simon Peter in, “Topa aw, tua bang ahihleh ka khe bek hong silsak kei inla, ka khutte le ka lu zong hong silsak in,” a na ci leuleu hi. 10Jesu in, “A kipumsil khin sa mite siangtho ta ahih manin a khe sim loh silkik ding kisam nawn lo hi. Note sung panin khat sim loh na vekpi-un na siang khin uh hi,” a ci hi. 11Jesu in amah a lehhek ding pa thei khin ahih manin, “Note sung panin khat sim loh na siang khin uh hi,” a ci ahi hi.
12Jesu in amauteʼ khe a silsak khit ciangin a puan silhkik a, annek sabuai ah a tutnasa mun hong zuanin, “Tu-a note tungah ka hong gamtatna thu na thei uh hiam? 13Note in kei pen Siapa le Topa, na hong ci uh hi. Na hong cih uh mah bangin a man ka hi hi. 14Noteʼ Topa le Siapa in na khe uh hong silsak ka hih leh note khatlekhat na kisilsak kan ding uh kilawm hi. 15Note tungah ka hong gamtat bangin note na gamtat theih nadingun a lim a hong lak ka hi hi.#Luk 22:27 16A mantakin ci lehang, sila pen a topa sangin lian zaw ngei lo a, a kisawl pa zong a sawl pa sangin lian zaw ngei lo hi.#Mat 10:24; Luk 6:40; Joh 15:20 17Hih thu thei-in na zuih uh leh na lung uh nuam mahmah ding hi.
18“Hih bangin ka hong genna in note khempeuh hong huam kim lo hi. Ka teel sa mite ka thei hi. Lai Siangtho in, ‘Ka an a ne pa in kei hong langpang hi,’ a cihna thu a tun ding kisam hi.#La 41:9 19Hih thu hong tun taktak ciangin, ‘Kei kua ka hihna,’ na hong theih nadingun a hun ma-in a hong ma gen ka hi hi. 20A mantakin ci lehang, keima hong sawl mite a sangte in kei zong a hong sang ahi uh a, kei a hong sangte in kei a hong sawl pa zong a sang ahi uh hi,” a ci hi.#Mat 10:40; Mrk 9:37; Luk 9:48; 10:16
A Kilehhek ding Jesu in Gen khol
(Mat 26:20-25; Mrk 14:17-21; Luk 22:21-23)
21Jesu in hih thu teng a gen khit ciangin lungkham mahmah ahih manin, “A mantakin ci lehang, note khat in kei nong lehhek ding uh hi,” ci-in a kilangin a gen khia hi. 22Kua a cihnopna hi ding ahi hiam, ci-in a nungzuite khatlekhat a ki-en uh hi. 23Jesu in a it diak a nungzuite khat ama kiangah tu ahih manin, 24Simon Peter in a mitheek tawh amah hopih a, “Kua a cihnopna ahi hiam?” dong in, ci-in a sawl hi. 25Tua ahih manin tua nungzui pa in zong Jesu neh phei lai deuhin, “Topa aw, kua ahi hiam?” ci-in a dong hi.
26Jesu in, “Anlum, meh sungah diahin ka piak ding pa ahi hi,” a cih khit ciangin a anlum diahin Simon Iskariotʼ tapa Judas a pia hi. 27Judas in tua an a nek khit phetin ama sungah Satan hong lut pah hi. Tua ahih manin Jesu in ama kiangah, “Na hih ding peuhpeuh hih pak in,” a ci hi. 28Ahi zongin sabuai ah a tut khawm pih mite in hih bangin a cihna thu thei lo uh hi. 29Amah sumkem ahih manin hih pawi a zat ding a kisam na pawl khat a lei dingin a sawl hi ding hi; tua ahih kei leh zong mizawngte pawl khat tungah sum a pia dingin a sawl hi ding hi, ci-in nungzui pawl khat in a ngaihsun uh hi. 30Tua hi a, Judas in a an a san khit ciangin a paikhia pah hi. Tua hunin khua mial khinta hi.
Thupiakna Thak
31Judas a paikhiat khit ciangin Jesu in, “Tu-in Mihing Tapa in Pasianʼ pianzia a neihna hong kilang ding hi ta hi; ama hangin Pasian in minthanna a ngah ding ahi hi. 32Ama hangin Pasian in minthanna a ngah mah bangin Pasian in zong ama pianzia amah ngahsak dinga, a sawt loin ngahsak pah ding hi. 33Ka tate aw, note tawh sauvei ka hong om khawm nawn kei ding hi. Note in kei na hong zong ding uh a, ahi zongin Jerusalem khua-a Jew uliante kiangah, ‘Ka paina munah na hong pai thei kei ding uh hi,’ ci-in ka gen mah bangin note kiangah zong tu-in kong gen hi.#Joh 7:34 34Note tungah ka hong piak thak thu in: Note khatlekhat na ki-it ding uh ahi hi. Note ka hong it mah bangin note khatlekhat na ki-it un.#Joh 15:12,17; 1Joh 3:23; 2Joh5 35Note khatlekhat ki-it le-uhcin keima nungzuite na hihna uh mi khempeuh in hong thei ding uh hi,” a ci hi.
Peterʼ Nial ding Kigenkhol
(Mat 26:31-35; Mrk 14:27-31; Luk 22:31-34)
36Tua ciangin Simon Peter in, “Topa aw, koi ah pai ding na hi hiam?” ci-in a dot ciangin Jesu in, “Ka paina dingah tu-in na hong zui thei nai kei ding hi; ahi zongin nidang ciangin na hong zui ding hi,” ci-in a dawng hi. 37Peter in, “Bang hangin tu-in hong zui thei lo ding ka hi hiam? Nang ka hong sihpih ding hi,” a cih ciangin 38Jesu in, “Kei hong sihpih ngam ding na hi hiam? A mantakin kong genin ah, kei thum veina hong nial khit matengin ak khuang lo ding hi,” ci-in a dawng hi.
Chwazi Kounye ya:
JOHAN 13: TBR17
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Tedim Bible © Bible Society of Myanmar, 2017.