Medheteththa Maxaafa 3
3
Asi Azazettontta Ixo
1Shooshshay GODAA Xoossay medhdhida do7a ubbaafe aadhdhida genanchcha; issi gallas shooshshay he maccassayo, «Xoossi tumu inttena, ‹Edenen diza miththa ayfe ubbaafekka moopite› gidee?» gi oychchides.#Ajju 12:9; 20:2
2-3Maccassaya shooshshas zaarada, «Gidenna! Xoossi hessaththo gibeena; nuni Edenen diza miththata ayfe maanaas dandayoos; gido attiin Xoossi nuna, ‹Edene giddon diza miththaa ayfe moopite; bochchofte; histtontta aggiko intte hayqqana› gides» gadus.
4Shooshshay maccassayo, «Gidenna! Intte tuma hayqqeketa; 5Xoossi hessa giday he miththay ayfe intte miikko intte ayfey doyettiin, Xoossa mala intte lo7onne iita shaakki eranayssa izi eriza gishshassa» gides.
6Maccassaya he miththaa ayfey maanaas mal7izayssa, xeellanaas lo7izayssa, qasse asi aadho erateth demmanaas amosizaaz gididayssa beyada he miththaa ayfeppe ekkada madus; qasse banara diza ba azinaaska hessafe immiin izikka mides.
7Mida wode istta nam7aa ayfeykka doyettiin istti baas paxa kallo dizayssa eridi balase#3:7 Balase geetettiza miththay Tophphiyan issi issi sohon erettiza mala eth misatiza izas hayththay agunththi bayndaaz gidi uttidi izas ayfezi mal7iza miththa. geetettiza miththa hayth sikkidi ba xeessan gixxida.
8Omarsa wode, Edene giddon GODAA Xoossay hemettishin, iza cenggurssaa addezinne iza machcheya siyidi GODAA Xoossaafe Edene miththa giddon qotettida. 9Gido attiin GODAA Xoossay addeza xeygidi, «Addaame awan day?» gides.
10Addezikka, «Edene giddon ne cenggurssaa siyada tani kallo diza gishshas babbada qotettadis» gides.
11GODAA Xoossay iza, «Neni kallo daasa giidi nees yootiday oonee? Tani nena, ‹Mooppa› gaada azazida miththaa ayfeppe madii?» gi oychchides.
12Izikka, «Tanara daana mala ne immida maccassaya he miththaa ayfeppe taas immiin madis» gides.
13GODAA Xoossay hessafe guye maccassayo, «Neni hessa ays ooththadii?» gi oychchides.
Maccassayakka, «Tana shooshshay baleththiin madis» gadus.#2Qoro 11:3; 1Xim 2:14
Xoossa Pirda
14GODAA Xoossay hessafe guye shooshshaa,
«Neni hayssa ooththida gishshas,
mehe ubbaanne
do7a ubbaa garsan
ne xallay qanggettidaaza!
Neni ne ulon biittara gooshettana;
ne de7o layth ubbaankka
biitta gudulla laacca.
15Tani neessinne maccassays,
ne zereththassinne
izi zereththas giddon
morkketeth medhdhana;
izi ne hu7e qoxxana;
nenikka iza qirphe
dukkana» gides.#Ajju 12:17
16Maccassayokka GODAA Xoossay,
«Ne shaaraza#3:16 Shaaraza: Shaaraza gizayssa issi issi bagga gamoththo qaalan abbe ixeta, qanththa gees. aginan
neni daro tuggatana;
qasse neni wolqqama miixan
nayta yelana.
Gidikkoka neni ne azinara
aqanaas amottana;
izikka nena haarana» gides.
17Addaamekka GODAA Xoossay, «Neni ne machchey qaala siyida gishshas tani nena, ‹He miththaa ayfe mooppa› gaada azazida miththaa ayfeppe neni mida gishshas,
«Ne geedon biittay
qanggettidaaz gido!
Neni ne de7o layth ubbaan
gita daaburan
biitta ooththada maana.
18Biittay nees agunththinne
kindichcho mokisana;
neni biittafe mokkidayssa maana.#Ib 6:8
19Neni biittan simmana gakkanaas
daaburan ne cawa gussa
ooththada maana;
neni biittafe medhettida gishshas
biittan simmandasa» gides.
20Addaamey ba machchiyo Hewaano#3:20 Hewaano: Hewaano guussi paxa duus guussa. gi sunththides; ays giikko iza asa ubbaas aayo.
21GODAA Xoossay Addaamessinne iza machcheys ite giigsidi istta mayzides.
22Hessafe guye GODAA Xoossay, «Histtiin asi nuuppe issaade mala lo7onne iita erizaade gidides; izi ba kushe yeddidi de7o immiza miththaafe ekkidi qasse montta malanne mernaas paxa de7ontta mala teqettanaas koshshees» gides.#Ajju 22:14 23Hessa gishshas izi ba medhettida biittaa ooththana mala, GODAA Xoossay Edeneppe iza kessides. 24Iza kessidi, de7o miththaako efiza oge naagana mala, kirube geetettiza kiitanchchatanne popol7u gi aadhdhi aadhdhi wodhdhiza tama laco misatiza giththa mashsha Edeneppe arshey mokkiza baggara woththides.
Chwazi Kounye ya:
Medheteththa Maxaafa 3: GM
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
The Word for the World International