Yɔanɨ 12
12
Malɨa ɔɓasakɔ Yeso nɔ malasɨ amɨtɨndɨ
(Mat 26:6-13; Mlk 14:3-9)
1Ya꞉ɓio yɔtukooeni makwaa mɛɗɨa, akɔɓɔya akɔ Ʉmbɔ wɔ chwɛa aɓubaya. Kʉdɔ, Yeso ɔ꞉sa anɔ Bɛtania, aɓandaɓʉ ɓɔ Lajalɔ ngɨa a꞉mʉjʉkaniso jɛnɛ akɔ ingwo. 2Inani, ɓɔ꞉mɨsɨa idyo, nɔ Malata akɛ a꞉ɓio naɓɔ anapiokio idyo agbɔ́gbɔ. Lajalɔ a꞉ɓio kʉ mʉngana ati ɔ ɓombi ngʉɓa, ɓa꞉ɓio adyakaka ɨhɔ nɔ atɨ Yeso. 3Kʉdɔ, Malɨa a꞉sɨka iboyo yɔ litɛlɛ wɔ malaji ngʉwɔ ɨgabʉ ɓʉmʉ nɔgbɛ, ʉwa ba꞉ʉkɨa nɔ nalado#12:3 ino yɔ ɨbʉla yɔ ɨʉa ngɨyɛ ba꞉kɨa nayɔ malaji ingainga. Ɔ꞉mʉɓasaka Yeso nawɔ amɨtɨndɨ, nɔ ɔ꞉mʉbɨaka nɔ ndii ngɨangɔ. Ɨkáá iɓomu yɔ꞉sɨka tɨta imbo yɔ malasɨ. 4Ga Yuda Ɨsɨkalɨɔta, mʉngana wɔ ɓakpata ngɨa a꞉ɓio anɨsa agaba Yeso, ɓɔ: 5«Ɓɔ꞉gaɓamʉ-sɨ malasɨ ngʉwa akɔ ɓagyɛgyɛ lɨmɨa ɗietu, nɔ ɓagyɛgyɛ ɓɔngɔ, ɓɔɓinjekio ɓajanga, dɔtanɨ?» 6Ɨyɔ Yuda a꞉sugomʉ ɓanɨ, dɔ, a꞉ɓio nɔ ikoko nɔ ɓajanga. Yakamɛngana, dɔ, a꞉ɓio mombi ɔ ndiɓo. Ɨyɔ akɛ, a꞉tɨpɛmakɨa ɓagyɛgyɛ, nɔ, ɔ꞉ɓio naɓɔ kʉ akɔchwʉchwakiso. 7Yakamɛngana, Yeso ɔ꞉tosio ɓɔ: «Mʉsɨeni ɓaka yangɔ sɨanɨ! Ɔkɨɔ ɓanɨ akɔ yaka yɔ ɓisi ɓɔ hʉnanɨa ngʉɓɔsɛmɨ. 8Inu, nákɨa ɨhɔ nɔ ɓajanga masi ta maɓomu. Yakamɛngana, ɨmɨ, nangɔɓiomʉ ɨhɔ nenu, masi maɓomu.»
Ɓɔsingekio Lajalɔ idimi nayɔ anɨwa
9Ɨyɛ ndʉ ambaja ata mʉja ɔ Ɓayuda ɛ꞉mbɨa ɓɔ Yeso a inani anɔ Bɛtania, ga ɨɓɔ ɓɔ hɨtɔɔ. Ɓɛ꞉kamʉ ta akɔ yaka yɔ Yeso, yakamɛngana, ɓɛ꞉ka kʉ anɨna Lajalɔ ngɨa a꞉mʉjʉkaniso akɔ ingwo. 10Kʉdɔ, ɓatataɓasie ɓɔ ɓakumukumu ɓa꞉kwaisio anɨwa kʉ nɔ Lajalɔ. 11Dɔ, ya꞉ɓio akɔ yaka yangɔ, ɨyɛ Ɓayuda ɓaja ɓa꞉ɓio-ɔɔ naɓɔ asɨa, nɔ, nɨsa abaya tɨta Yeso.
Yeso ɔkumonio anɔ Yelusalɛma
(Mat 21:1-11; Mlk 11:1-11; Luk 19:28-40)
12Tɨa nekuɓa yɔngɔ, ambaja ɔ ɓombi ata mʉja ngɨa ɛ꞉ka aʉmbɔ, a꞉tɔka ɓɔ Yeso anɨsa anɔ Yelusalɛma. 13Kʉdɔ, ɓombi ɓa꞉sɨka mamba kɔ ɓadɨdɔ, nɔ, ɓɔ꞉sa nayɔ atɛtɨa anɔ ɨngbaa. Ɓɔ꞉pʉnga tʉɓɨa ɓɔ:
«Hɔjana, ɨsɨ yɔngɔ ɓɔ atɨheiso ɓaka!
Asɔɓɨɨ ukiokio mombi ngɨa anɨka akɔ ino yɔ Makwɔɓɨɨ!
Asɔɓɨɨ ukiokio kʉ nɔ ngama ɔ Ɓaɨsalaɛlɛ!»
14Yeso ɔ꞉tɔgbʉka mʉndambʉ wɔ punda, ga ɨyɔ ɓɔ kpʉka akʉʉ angɔ. Ndʉ aka ya꞉tɛndanakɨa-ɔɔ ɓɔ:
15«Watɨkwamʉ ʉɓá, ʉwɛ ɨkʉmbʉ yɔ Sɨɔna,
kanga dɔ, ngama ngɨasɔɔ anɔ ɨngbaa,
ɓawele akʉʉ ɔ mʉndambʉ wɔ punda.»
16Ɓakpata ngʉɓangɔ ɓa꞉pemisomʉ ɨsɨ yɔ yaka ngɨyɛnɛnɨ. Yakamɛngana, ɨyɛ ndʉ Yeso a꞉kumonio amati ɔ ʉbɨba ngʉwangɔ, kʉdɔ, ɨɓɔ ɓa꞉tɔtunguo tɨa ɓɔ, yaka ngɨyɛnɛnɨ ya꞉tɛndanakɨa akɔ ɨyɔ, nɔ, ɓa꞉mʉkɨa ngbanga kʉɓanɨ.
17Mombi muɓomu ngɨa ɓa꞉ɓio nɔ atɨ Yeso, angbinga ngɨa a꞉soko-ɔɔ Lajalɔ amati ɔ ɓʉnjaʉ, nayɔ ajʉkaniso akɔ ingwo, a꞉ɓio ta anʉngaka ɨsaʉ yɔ yaka ngɨyɛnɛnɨ ɓa꞉ɨna jɛnɛ. 18Kʉdɔ, ɓombi ɓaja ɓa꞉sa nayɔ atɛtɨa, dɔ ɓɔ꞉ka ɓanɨ ɓɔ a꞉kɨa kɔkɔ ata mʉmbangɛ ngɨananɨ. 19Ɓafalisayɔ ɓɔyakanaka ati eɓo ɓɔ: «Nángɔmʉ ndɨ anɨna ɓɔ tangɔmʉ ɓata nɔ ɨkyɛmʉ akɨa, ɓombi ɓaɓomu ɓa tɨta ambise angɔ.»
Ɓagiliki ɓanɔ taa yɔ nɨna Yeso
20Amati ɔ ɓombi ngʉɓa ɓɛ꞉ka aʉmbɔ akɔbibiso Asɔɓɨɨ, ɓɔmɔ ɓa꞉ɓio Ɓagiliki ɓɔngɔ.#12:20 ga pɔ ɓɔ ʉɓa, ɓa꞉ɓio ɓɔ ɓɔbayeni ɨtandɛ yɔ Ɓayuda 21Kʉdɔ ɓa꞉sa atɨ Filipo ngɨa a꞉ɓio mombi ɔ ɨkʉmbʉ yɔ Bɛtɛsaida, anɔ Galilaya. Ga ɨɓɔ nayɔ ɓɔ: «Makweso, takʉnda anɨna Yeso.» 22Nɔ Filipo ɔ꞉sa anʉngɨa Andɛlɛa, nɔ ɨɓɔ ɓapɨnɨ ɓaɓomu ɓɔ꞉sa tɨa anʉngɨa Yeso. 23Yeso ɔ꞉ɓutosio ɓɔ: «Angbinga ɔndanɔ tɨa ʉndananɨ, ɨya Mwana ngɨyɔ Mombi ɔsisekio-ɔɔ sɨka ʉbɨba.» 24Nanenu asigio ta ingono ɓɔ: «Ipumo yɔ mʉpʉnga yɔkweni aɨtaka nɔ sɔkɔmʉ yɔwo, yaɓio ta ɨyɔ mukpekpe wɔngɔ ɓɔ kpekele. Yakamɛngana, ndʉ yawo, yɔ꞊tɔnɔta dɔ tɨa masɔɔ maja. 25Mombi ngɨa akʉnda uɓei ngʉwangɔ, aʉyangiso yangisoo. Nɔ mombi ngɨa angɔsɨka uɓei ngʉwangɔ ndʉ ɨkyɛmʉ, adɔdɔ aka, aʉpɛmakɨa pɛmakɨanɨ akɔ uɓei ngʉwɔ mago nɔ mago. 26Mombi ɔkʉndeni nɛmɨ akyananakɨa, yɛtɔ ɓɔ ɨnakpata. Dɔ, aɨda ngɨyɛ ɨmɨ naɓio-ɔɔ, ɨyɔ baya asɛmɨ a꞊ɓio sina tɨa kʉ ananɨ. Mombi ɔnakyananakɨeni ɨmɨ, Aba a꞊mʉbɨba bɨbanɨ.
Yeso ɔɓɨanɨa ingwo ngɨangɔ
27Ɨtakɨtakɨ ngɨyɛ, na tɨa ambambanɨɔ amati ɔ mʉtɨma. Nangɔmʉ tii pɔ anɨmbɨa ɓɔ nasugo tanɨ. Nasugo ɓɔ: ‹Aba anaɓwanakiso ɓaka amati ɔ ɓʉkaɓʉkaɨ ngʉɓa, ɓanɛmɨ anɨkɨa ɨtakɨtakɨ ngɨyɛ! Yakamɛngana, nɛ꞉ka dɔ pɛpɛ ingainga akɔchana ta amati ɔ angbinga ngɨa. 28Aba, injiso ino ngɨyɛsɔɔ ʉbɨba!›» Isó mɛngana yɔ꞉kanɨa anɨngwa akʉʉ ɔ ɓisi asugo ɓɔ: «Na꞉ɨbibiso bibisoni, nɔ, na꞊ɨbibiso ɓata ta ɓanɨ.»
29Ambaja ɔ ɓombi ngʉɓa ɓa꞉ɓio ananɨ, nɔ ʉɓa ɓɔ꞉ka ɓanɨ, ga ɨɓɔ ga: «Ʉgbaa ʉwɔnanɨ wɔgbuo!» Ga ɓɔmɔ ga: «Malaika ɛ꞉kɔ nayɔ anʉngɨa yaka!» 30Ga Yeso naɓɔ ɓɔ: «Yaka ngɨyɛ iso ngɨyɛnɛnɨ yɔ꞉sugo, yangɔmʉ akʉʉ asɛmɨ, yakamɛngana, ya akʉʉ eno. 31Ɨtakɨtakɨ ngɨyɛ, Asɔɓɨɨ a tɨa anɨsa akio mʉkɔmbʉ wɔ ɓombi ɓɔ dɔdɔ ngɨa. Nɔ, ɨtakɨtakɨ ngɨyɛ, Asɔɓɨɨ ɔmanɔ tɨa akpʉngbʉa ngama wɔ dɔdɔ ngɨa. 32Yakamɛngana, angbinga ngɨa ɓa꞊nɛmaiso-ɔɔ akʉʉ#12:32 ɓa꞊nɛmaiso-ɔɔ akʉʉ: pɔ ɓɔ akumonio amati ɔ ʉbɨba ambise ɔ ingwo, kʉ ɓɔ akʉʉ ɔ mʉsalaba anɨngwa akɔ dɔdɔ, na꞊ɗuɗuo ɓombi ɓaɓomu anɨka andamɨ.»
33Yeso a꞉sugo ɓanɨ akɔpana ɓɔ ingwo ngɨangɔ ya꞊ɓio tanɨ. 34Ga ambaja ɔ ɓombi nɔ Yeso ɓɔ: «Isu tɔ꞉ka amati ɔ ɨtaɓʉ yɔ mapanʉ ɓɔ ya꞉tɛndanakɨa ɓɔ, Masia a꞊ɓio akɔ uɓei mago nɔ mago. Dɔtanɨ tɨa wɔ꞉sugo ɓata kʉ ɓɔ: ‹Yɛtɔ ɓɔ ɓinjenjo Mwana ngɨyɔ Mombi?› Mwana ngɨyɔ Mombi ngɨananɨ tɨa anɨ?»
35Kʉdɔ, Yeso a꞉ɓusigio ɓɔ: «Ʉwanga wa-sɨ ɓata ta ɨhɔ nenu akɔ angbinga bele. Kyɛndakeni angbinga ngɨa na sɨ-ɔɔ kʉ nɔ ʉwanga, dɔ, umomo watɨnikutomʉ. Nɔ, mombi ngɨa akyɛndaka amati ɔ umomo, angɛmbɨamʉ aki a-ɛɛ anɨsa. 36Bayeni-sɨ ʉwanga kʉ angbinga ngɨa wa-ɔɔ ɨhɔ nenu, iɗo ambɔ ɓieni tɨa kʉ ɓombi ɓɔ ʉwanga.»
Ɓayuda ɓɔbayamʉ Yeso
Ambise ɔ yaka ngɨyɛnɛnɨ, Yeso ɔ꞉ngwa, nɔ, ɔ꞉sa anʉɓa ɗu nɔ ambaja ɔ ɓombi. 37Gʉtʉ ndʉ a꞉kɨa ɓakɔkɔ ɓɔta ɓambangɛ ɓaja apɛɨ eɓo, ɓa꞉ɓiomʉ nayɔ akɔbaya. 38Yaka ngɨyɛnɛnɨ, ya꞉kyanakɨa ngbanga ta ndʉ ɨyɛ ɨgbɛ Isaya a꞉sugo jɛnɛ ɓɔ:
«Makwɔɓɨɨ, mombi nga ino tanɨ akɛ, a꞉baya ɨsaʉ ngɨyeso ta꞉ɓɨakɨa?
Nɔ anɨ akɛ, Makwɔɓɨɨ a꞉mʉpananiso ɨkɔndɔ yɔ angu ngɨangɔ?»
39Gʉtʉ ɓanɨ, ambɔ ɓa꞉bayamʉ pɔ kʉɓanɨ, akɔkpatanakɨa nɔ yaka ngɨyɛ Asɔɓɨɨ a꞉sigio jɛnɛ ɨgbɛ Isaya ɓɔ:
40«Asɔɓɨɨ a꞉ɓukuto mesu,
nɔ ɔ꞉ɓukiiso mɨtɨma ɓʉmʉ
dɔ, katɨnamʉ.
Dɔ, ɓatɨpemisomʉ yaka nɔ mɨtɨma ngɨyeɓo
dɔ ɓa꞉tɨnachomʉ mɨtɨma,
adaa ngɨa, naɓuheiso-ɔɔ.»
41Ɨgbɛ Isaya a꞉sugo yaka ngɨyɛnɛnɨ, dɔ, ɛ꞉na ʉbɨba ngʉwɔ Yeso kʉ pɛɨ, nɔ ɔ꞉ngaka kʉɔ yaka akʉʉ angɔ. 42Gʉtʉ ɓanɨ, ɓangama ɓɔ Ɓayuda ɓaja, ɓa꞉mʉbaya yeso. Yakamɛngana, sɔkɔmʉ ɓɨpananiso aɓʉmba, akumo Ɓafalisayɔ, dɔ, ɓatɨɓuchweisomʉ aɨkáá yɔ nɨta. 43Ɨɓɔ, ɓatɨhata ta ʉbɨba atɨ ɓombi, yakamɛngana, ɓɔ꞉sɨa ʉwɔ Asɔɓɨɨ ta sɨa.
Ɓombi ngʉɓa ɓayaa báya ɓadya mʉkɔmbʉ
44Yeso ɔ꞉sugo nɔ iso yɛta ɓʉmʉ ɓɔ: «Mombi ngɨa anabaya ɨmɨ, ɔnabayɔmʉ ta ɨmɨ, yakamɛngana, ɔbayɔ kʉ nɔ mombi ngɨa a꞉natʉma. 45Nɔ mombi ngɨa anɛmɨ anɨna, anɨna kʉ nɔ mombi ngɨa a꞉natʉma. 46Ɨmɨ, nɛ꞉ka adɔdɔ aka ndʉ ʉwanga, tiɗo ɓɔ mombi muɓomu ngɨa anabaya, atɨɓiomʉ ɓata amati ɔ umomo. 47Mombi ɔkeni mapanʉ ngʉkɔsɛmɨ, sɔkɔmʉ ɨkʉkyananakɨa, sɔkɔmʉ ɨmɨ akɛ, nakio mʉkɔmbʉ ngʉwangɔ. Dɔ ɨmɨ ingainga, nɛ꞉kamʉ akɔkio mʉkɔmbʉ ngʉwɔ ɓombi, yakamɛngana, nɛ꞉ka naɓɔ aheiso.» 48Mombi ngɨa anayaa ɨmɨ, nɔ sɔkɔmʉ ɨbaya mapanʉ ngʉkɔsɛmɨ, ɓa꞊kio sina mʉkɔmbʉ ngʉwangɔ ta kioni. Akɔ ɓisi ɓɔ mupipio, ta mapanʉ ngʉkakɛ napanɨa, ka꞊kio sina mʉkɔmbʉ ngʉwangɔ. 49Dɔ ɨmɨ, na꞉yakamʉ nɔ mʉtʉ wɔsɛmɨ makwɔngɔ. Yakamɛngana, Aba ngɨa a꞉natʉma akɛ, a꞉nenjo ʉpanʉ wɔ yaka ngɨyɛ nɔkwananɔ sugo, nɔ panɨa. 50Ɨmɨ, nanɨmbɨa iɗo ɓɔ, ʉpanʉ wɔngɔ wenjo ɓombi uɓei ngʉwɔ mago nɔ mago. Kʉdɔ ɨmɨ, naɓɨakɨa ngbanga kʉndʉ aka ɨyɔ, a꞉napanɨa-ɔɔ.
Chwazi Kounye ya:
Yɔanɨ 12: buuN
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2021, Wycliffe Bible Translators, Inc.