Yɔanɨ 11
11
Ingwo yɔ Lajalɔ
1Ya꞉ɓio jɛnɛ nɔ gue mʉngana, ɨya a꞉kwiso kaɓu, ino ɓɔ Lajalɔ ngɨyɔ Bɛtania, ɨkʉmbʉ ngɨyɛ ɓamanye atɨ Malɨa nɔ Malata. 2(Malɨa ngɨananɨ, ɨyakɛ, a꞉to jɛnɛ Makwɔɓɨɨ malaji amɨtɨndɨ nɔ ɔ꞉ɨbɨaka nɔ ndii ngɨangɔ. Manye Lajalɔ akɛ, a꞉ɓio nɔ kaɓʉ.) 3Ɨɓɔ ɓamanye ɓeɓoi ngʉɓɔnanɨ, ɓɔ꞉tʉmɨa Yeso mombi asugo ɓɔ: «Hii Makwɔɓɨɨ, awai asɔɔ anɔ kaɓu.»
4Ɨyɛ ndʉ Yeso ɔ꞉ka ɓanɨ: «Ga ɨyɔ ɓɔ, nyɔɔ, angɔmʉ aniwo nɔ kaɓu ngɨananɨ. Yakamɛngana, kaɓu ngɨananɨ, aninjiso Asɔɓɨɨ ʉbɨba, iɗo ambɔ ɨngbaa akɔ kaɓu ngɨananɨ, Mwana ɔ Asɔɓɨɨ ɨbɨbanɨa bɨbanɨanɨ.» 5Ɨnadɔ, Yeso a꞉tɨkʉnda atɨ Malata ɨhɔ nɔ manye, nɔ Lajalɔ kʉtaa. 6Ɨyɛ ndʉ, Yeso ɔ꞉ka ɨsaʉ ɓɔ, Lajalɔ anɔ kaɓu, ɔ꞉gbalɨa ɓata-sɨ ananɨ a꞉ɓio-ɔɔ ta makwaa kapɨnɨ. 7Mbise ngɨananɨ, ga ɨyɔ nɔ ɓakpata ɓɔ: «Tɨtɔweni anɔ Yudɛa.»
8Ɓakpata ɓɔ꞉musigio ɓɔ: «Mʉpananakɨa, makwaa kangɔchanamʉ pɔ maja, anɨngwa aka Ɓayuda ɓa꞉hata pɛ-ɔɔ nɔwɛ agisio makopi. Wa ndɨ ɓata ahata anɨsa ta inani andaɓʉ?» 9Kʉdɔ, Yeso a꞉ɓio naɓɔ ɓɔ: «Anɨngwa nekuɓa akɔɓɔya nɛpasɨ, ya nɔ ɓasaa tɛkɛɓɛ nɔ ɓapɨnɨ. Ndʉ mombi akyɛndaka amati ɔ ɓisi ɓʉta ɓʉyɛ, angɔngbʉsanamʉ, dɔ, ʉmʉa waɓio ʉbɨyanɨɛ ɓɔ pɛ nɔ ɨpá. 10Yakamɛngana, ndʉ mombi akyɛndaka naɓutu, agbʉsana gbʉsananɨ, dɔ, angɔmʉ nɔ ʉwanga amati angɔ.» 11Ɨyɛ Yeso a꞉pipo ngaka yaka ngɨyɛnɛnɨ ɓɔ gba, ɔ꞉matɨa ɓata asugo ɓɔ: «Nduku eso Lajalɔ ɔ꞉kwaɔ ta tɔɔ, yakamɛngana, ɨmɨ, na꞊nɨsa nayɔ ajʉkaniso.»
12Ga ɓakpata nayɔ ɓɔ: «Makweso, ndʉ yaɓio ɓɔ ɔ꞉kwaɔ ta tɔɔ, ahɛya ta hɛyanɨ.» 13Yeso a꞉ɓio akʉnda asigio ɓakpata ɓɔ Lajalɔ ɔ꞉wo woni. Yakamɛngana, ɨɓɔ ɓakpata ɓa꞉ɓio ayongo ɓɔ, ɔ꞉sugo ɓɔ ɔ꞉kwaɔ ta tɔɔ. 14Kʉdɔ, Yeso a꞉ɓʉɓɨa tɨa aɓʉmba ɓɔ: «Lajalɔ ɔ꞉wo woni. 15Ɨmɨ, nanɨkwa ɨgyagya ta akʉʉ ɔ eno, dɔ, nɔ́꞉ɓiomʉ pɛngɛ inani, iɗo ambɔ ɨnɨanɨeni nɔ báya.» Yakamɛngana, ikeni, kiseni inani a-ɛɛ. 16Tɔma ngɨa ɓa꞉tɨmusoko kʉ ɓɔ «Ipiyo», a꞉sigio ɓakpata ngʉɓɔmɔ ɓɔ: «Tɨseni isu kʉ inani, ambɔ tiwo ta ɨhɔ naɓɔ.»
Yeso ɔsugo ɓɔ na jʉkana akɔ ingwo nɔ ubei
17Ngbinga ngɨa Yeso a꞉ɓɔya-ɔɔ inani, a꞉gbʉka ndʉtʉ ngɨyɔ Lajalɔ yɔɓieni aɓʉnjaʉ tɨa makwaa ɓɔgɨna. 18Ɨnadɔ, anɨngwa anɔ Bɛtania, akɔɓɔya anɔ Yelusalɛma, ya ta ndʉ kilomɛtɛlɛ ɓeetu ɓʉtʉʉ. 19Ɓayuda ɓaja ɓɛ꞉ka atɨ Malata nɔ Malɨa, naɓɔ asungo mʉtɨma, akʉʉ ɔ ingwo yɔ manye eɓo ata gue.
20Ɨyɛ Malata ɔ꞉ka ɓɔ Yeso a tɨa anɨka, kʉdɔ, ɔ꞉sa nayɔ atɛtɨa ta anɔ ɨngbaa. Yakamɛngana, Malɨa ɔ꞉tukoo ɨyɔ, ɓawele ta andei. 21Kʉdɔ, Malata a꞉ɓio nɔ Yeso ɓɔ: «Makwɔɓɨɨ wɔ꞉ɓieni pɔngɔ ta aka, ambɔ aya ngɨasɛmɨ a꞉wo pɛ kɔmʉ. 22Yakamɛngana, nanɨmbɨa iɗo ɓɔ gʉtʉ ta ɨtakɨtakɨ ngɨyɛ, ɨkyɛmʉ iɓomu ngɨyɛ wamɨta Asɔɓɨɨ, aninjo ta injoni.» 23Ga Yeso nayɔ ɓɔ: «Mwana ɔ anʉ a꞊jʉkana akɔ ingwo jʉkananɨ.» 24Malata ɔ꞉mutosio ɓɔ: «Nanɨmbɨa iɗo ɓɔ a꞊jʉkana sina akɔ ingwo ta jʉkananɨ akɔ ɓisi ɓɔ mupipio.» 25Yeso ɔ꞉mutosio ɓɔ: «Ɨmɨ akɛ na jʉkana akɔ ingwo nɔ uɓei, mombi ngɨa anabaya ɨmɨ, aɓio nɔ ubei, gʉtʉ ta ɓɔ ɔweni woni. 26Mombi muɓomu ngɨa anɔ uɓei, nɔ ɔnapɨa báya akʉʉ asɛmɨ, a꞊ngɔwo sina. Wɔbayɔ ndɨ yaka ngɨyɛnɛnɨ bayanɨ?» 27Kʉdɔ, Malata a꞉ɓio nayɔ ɓɔ: «Iii, Makwasɛmɨ, nanɔ báya ɓɔ ʉwɛ ingainga, akɛ wa Masia, Mwana ɔ Asɔɓɨɨ, ɨyakɛ anɨka akɔ dɔdɔ.»
28Ɨyɛ ndʉ Malata a꞉pipo angaka yaka ngɨyɛnɛnɨ ɓɔ gba, ɔ꞉sa anisoko manye Malɨa, nɔ ɔ꞉mʉngakɨa iso nɔ mʉdʉʉ ɓɔ: «Mʉpananakɨa ɛ꞉kɔ dɔ ɨkanɨ, anɔwɛ anisoko.» 29Angbinga ngɨa Malɨa ɔ꞉ka-ɔɔ yaka ngɨyɛnɛnɨ ɓanɨ, ɔ꞉sa nayɔ agbʉka ta gagaa. 30Dɔ Yeso a꞉ɓio-sɨ ta ɓɔ angɔɓoyenimʉ andei, ɨyɔ-sɨ ta aɨda ngɨyɛ Malata ɛ꞉ka-ɔɔ nayɔ atɛtɨa. 31Inani andei, ya꞉ɓio nɔ Ɓayuda ngʉɓa ɓɛ꞉ka asungo Malɨa mʉtɨma. Ɨyɛ ɓɛ꞉na Malɨa anɨngwa gagaa ɓɔ ɗasa, nɔ chwɛa aɓei, ga ɨbɔ ambise angɔ bɔ sioo. Ɨɓɔ ayongo ga anɨsa andɨa aɓʉnjaʉ. 32Ɨyɛ ndʉ Malɨa a꞉ɓɔya inani, Yeso a꞉ɓio-ɛɛ, nɔ nayɔ anɨna, ɔ꞉kwa amɨndɨ yangɔ ga kpru, ga ɨyɔ nayɔ ɓɔ: «Hii Makwasɛmɨ, wɔ꞉ɓieni pɔngɔ ta aka, ambɔ ayaa a꞉womʉ pɛ.»
33Ɨyɛ ndʉ, Yeso ɛ꞉na ɓɔ a tɨta andɨa, nɔ Ɓayuda ngʉɓa ɓɛ꞉ka naɓɔ, ɓɔkumonokio ɨɓɔ tɨa kʉ ndɨa, ikoko yɛta ɨja yɔ꞉mʉkwa, nɔ mʉtɨma wɔmʉmbambanio. 34Kʉdɔ, a꞉ɓokuo ɓɔ: «Ɓa꞉mʉhʉna pɛ gbanɨ?» Ga ɨɓɔ nayɔ ɓɔ: «Hii, Makweso! Ika tɛna ta nɔ mesu.»
35Yeso ɔ꞉ndɨa ta nɔ masoi. 36Anɨna ɓanɨ, ga nganangana ɔ Ɓayuda ɓɔ: «Atɨmʉkʉnda pɛ ta nɔ ingono!»
37Yakamɛngana, Ɓayuda nga ɓɔmɔ ɓɔ꞉pʉnga sugo ɓɔ: «Ɨyɔ ngɨakɛ, a꞉heiso pɔngɔ mombi ɔ mamɔmɔ, dɔtanɨ ɔ꞉kɔnangyɔmʉ pɛ ɓɔ Lajalɔ a꞉tɨwomʉ?»
Yeso ɔjʉkanɨso Lajalɔ aingwo
38Yeso ɔ꞉kwa ɓata ikoko, nɔ ɔ꞉sa aɓʉnjaʉ. Ɓʉnjaʉ ɓɔngɔ, ɓa꞉ɓio ta ʉgbʉ amati ɔ ikopi, ɓa꞉kuto monu kɔngɔ tɨa kʉ nɔ ikopi yɛta ɨja. 39Ga Yeso ɓɔ: «Unguseni ikopi ngɨyɛ!» Malata ngɨa manye ɔ gue ngɨa a꞉wo, ɔ꞉mutosio ɓɔ: «Hoo Makwɔɓɨɨ, a tɨa anumvo, dɔ, makwaa ka tɨa ɓɔgɨna anɨngwa aka ɓa꞉mʉhʉna pɛ-ɔɔ!»
40Yeso ɔ꞉mutosio ɓɔ: «Ɨmɨ, nɔ꞉nasigio ndɨ pɛ-sɨ ɓɔ, wɔbayeni, wɛ꞊na ʉbɨba wɔ Asɔɓɨɨ?» 41Kʉdɔ, ɓɔ꞉nguso ikopi ngɨyɛnɛnɨ. Yeso ɔ꞉tɨna ɓajwa akʉʉ, nɔ ɔ꞉sugo ɓɔ: «Aba, nɔnabibiso, dɔ, wɔ꞉nɔka ʉkanɨ. 42Ɨmɨ, nanɨmbɨa iɗo ɓɔ, ʉwɛ, wanɔka ɨmɨ, masi ta maɓomu. Yakamɛngana, nɔsugo ɓanɨ ta dɔ ɓombi ngʉɓa ɓɔnakunguo aɓɛ, ɓɨbaya ɓɔ ta ʉwɛ ingainga akɛ, wa꞉natʉma.» 43Ɨyɛ ndʉ a꞉pipo sugo yaka ngɨyɛnɛnɨ ɓɔ gba, ɔ꞉natɨa ɓumu ɓɔ: «Lajalɔ, chwɛa ɓɔ puu!» 44Kʉdɔ, ɨyɔ Lajalɔ ngɨa a꞉wo, ɔ꞉chwɛa ga puu, lɨkɔndɔ nɔ mɨtɨndɨ, ɨsangakɛ nɔ magbaa kʉ lɨpʉkʉ, nɔ mesu kʉ makute nɔ ɨtambala. Ga Yeso ɓɔ, muɓonokeni, nɔ, nɔmʉsɨa anɨsa.
Ɓangama ɓɔ Ɓayuda ɓɔkwaisio aniwa Yeso
(Mat 26:1-5; Mlk 14:1-2; Luk 22:1-2)
45Ɓayuda ɓaja ati ɔ ɓiga ngʉɓa ɓɛ꞉ka atɨ Malɨa, ɓa꞉baya Yeso, dɔ, ɓɛ꞉na yaka ngɨyɛ a꞉kɨa. 46Yakamɛngana, ɓɔmɔ ati eɓo ɓɔ꞉sa ɨɓɔ ta angakɨa Ɓafalisayɔ, yaka ngɨyɛnɛnɨ Yeso a꞉kɨa. 47Kʉdɔ, ɓatataɓasie ɓɔ ɓakumukumu ɨhɔ nɔ Ɓafalisayɔ, ɓɛ꞉soko ubua wɔ ɨkʉʉ, ga ɨɓɔ ɓɔ: «Takɨeni tanɨ? Mombi ngɨa anɨsɨnganaka nɔ kɨa ɓakɔkɔ ɓɔta ɓambangɛ tɨta nɔ pɛɨ.
48Ndʉ tamʉsɨa akɨa ta ɓanɨ, ya adaa ngɨa ɓɔ ɓombi ɓaɓomu ɓa꞊mʉbaya tɨta ɨyɔ. Ɨnadɔ, ambɔ kyɛnda ngɨyɛ Ɓalɔma anɨka ayangiso ɨkáá yɔ Asɔɓɨɨ ngɨyeso, ɨhɔ nɔ ɨkʉmbʉ ngɨyeso tɨa ɨyɛnɛnɨ!»
49Ananɨ ati eɓo, ya꞉ɓio nɔ mombi mʉngana ino ɓɔ Kayafa. Nɔ igo ngɨyɛnɛnɨ, ɨyɔ akɛ, a꞉ɓio kumukumu ngɨa ata mʉja. Ga ɨyɔ ɓɔ: «Inu ɓa! Na ta ndʉ lijangi! 50Nákɨmbɨa ndɨ-sɨ kʉɔ ɓɔ, yanɔ dada gɔ pɛngɛ mombi mʉngana aniwo akɔ ɨda yɔ ɨbaba yɔ ɓombi, sɔkɔmʉ pɛpɛ tɨa ɨkʉmbʉ iti adʉka?» 51Yaka ngɨyɛnɛnɨ a꞉sugo, ya꞉ngwanamʉ nɔ ɨyɔ makwɔngɔ. Yakamɛngana, ya꞉ɓio dɔ nɔ igo ngɨyɛnɛnɨ, ɨyɔ, Kayafa akɛ a꞉ɓio Kumukumu ngɨa ata Mʉja. Kʉdɔ, a꞉kwa ɨgbɛ asugo ɓɔ, Yeso anɨsa aniwo akɔ ɨbaba yɔ Ɓayuda. 52Angɔmʉ aniwo ta akɔ yaka yɔ ɨbaba yɔ ɓombi ngʉɓɔnanɨ, yakamɛngana, ya ɓata kʉ akʉʉ ɔ nujonokiso ɓana ɓɔ Asɔɓɨɨ ta ɓaɓomu aki ɓandanaka-ɛɛ akɔ dɔdɔ, aɓio ta ɨkyɛmʉ mɛngana.
53Anɨngwa nɔ ɓisi ngʉɓɔnanɨ, ɓɔ꞉pʉnga sagɨa Yeso ɓɔ ɓamʉwa ta nɨwa. 54Tɨa kʉɓanɨ, anɨngwa nɔ ɓisi ngʉɓɔnanɨ, Yeso ɔ꞉sɨa kyɛndaka aɓʉmba apɛɨ ɔ Ɓayuda. Mbise ɔngɔ, atɨ Yeso nɔ ɓakpata ngʉɓangɔ, ɓɔ꞉ngwa ananɨ ɓaɓio-ɔɔ, nɔ, ɓɔ꞉sa yeɓo aɓio tɨta amati ɔ ihoi ngɨyɛ ya tinene nɔ mukengu, akɔ gʉlʉ ɔ Ɛfalaimu.
55Ɨnadɔ, Ʉmbɔ wɔ chwɛa aɓubaya ngʉwɔ Ɓayuda wa꞉ɓio tɨa tinene. Kʉɓanɨ, ɓombi ɓaja ɓɔ꞉ngwa amati ɔ lɨkʉmbʉ di di di, anɨsa anɔ Yelusalɛma, ayaka yɔ gyaɓanakɨa apɛɨ ɔ ʉmbɔ ngʉwɔnanɨ. 56Tɨa amati ɔ ɨkáá yɔ Asɔɓɨɨ, ɓɔ꞉pʉnga ahata Yeso dɔ ɓɨmʉfa. Ɓɔ꞉pʉnga ɓokuonoko ati eɓo ɓɔ: «Inu ná-sɨ anɨna tanɨ? Yeso a ndɨ kʉ anɨka aʉmbɔ ngʉwawɛ?» 57Ambeni gɔ ɓɔ pe, ɓatataɓasie ɓɔ ɓakumukumu, ɨhɔ nɔ Ɓafalisayɔ, ɓe꞉njo ʉpanʉ ta pɛɨ ɓɔ, mombi ngɨa aɓio anɨmbɨa aki Yeso a-ɛɛ, ɨɓʉpanaka ɨda yɔngɔ, dɔ ɓɨmʉfa.
Chwazi Kounye ya:
Yɔanɨ 11: buuN
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2021, Wycliffe Bible Translators, Inc.