Jona 1
1
Ia Jona e choho basiaa ia Yawe
1Nina valagu ia Yawe#1:1 Tana Ol Testamen, ia God e ngavina ira nina tinoni kara hanaa na asana kalavata ia, ia Yawe. e mai vania ia Jona na dalena mane ia Amitai, me kori vahai vania de, 2“Tuchau, mo ko longa tana vera leho i Nineve, mo ko valagu susuliha vanira, rongona nidira seko te chau dato mai tatagu nau.”
3Ma ia Jona e lovo tuu me choho basiaa ia Yawe, me tave i Jopa me ke ni dia tovosi chikai tabana levu i Tasis. Tahuna te laba ia i Jopa, me haea chikai na vaka te oni hana dia i Tasis, me pelu vakana me sahe lalona me ke ni dia kolura ira, me ke ni choho basiaa ia Yawe.
4-5Tahuna te chobo na vaka nia me dia, me sivo ia Jona tana tabulou me biku mate. Ma ia Yawe e sau maia na hurihuri leho me vahania na tasi nia me leho solehana, me maravia ke resea na vaka nia. Ira kode na tinoni tara ago tana vaka nia ara matahu, me chikai me chikai ara ilahia nidira god. Mara uni kodea visa na tatamani ngolingoli mara choni sivora i tasi me ke ni malamala na vaka nia.
6E sivo na tinoni lehona tana vaka nia me ba morosia ia Jona te bibiku, me halisia me gesua vahania de, “?Na hua to biku matena hoe? !Tatuhuru mo ko ilahia nimu god! Kevu nimu god hoe te ke sahavilohita me ke hanaa taha maurilodada.”
7Ara vaisolosaihi ira na tinoni ago tana vaka nia mara kori vahai de, “Mai, ma ka gesu vota ma ka choni buloru#1.7 Choni buloru e chikai na nego i sau te vahai na choni daes. , ma ka ni chaulia isei nimu nina ruri te kalelohita lohita na rotana de.” Mara gesu vota loera tana buloru nia, me ba tihisi dia ia Jona.
8Ba, mara gesuaa ira ia Jona, “Ko kori vanilohami lohami. ?Nina ruri sei te hadovilohita lohita na rotana de? ?Na hua nimu ago hoe? ?Ivei to vota mai? ?Ivei na veramu? ?Isei maira na kamamu?”
9Me tu ia Jona me kori vahai vanira de, “Inau na Hibru, minau u livu kaea ia Yawe, na God te toha i heven, te volaa na pari ma na tasi.”
10Ma ia Jona e kori lakaa vanira ia e choho basiaa ia Yawe. Tahuna tara valingea ira, mara matahu mate, mara gesuaa, “?Na hua sahata to goni savia hoe?”
11Tana tahu nia, na tasi e leho laka ba, mara gesuaa ira ia Jona, “?Na hua ngeni ba kami goni vaniho hami hoe me ke ni beata vanihita na tasi de?”
12Me kori vahai vanira ia Jona de, “Kamu ragechi datou ma kamu choni sivou i tasi, me ke ni beata na tasi de. Nau hanaa nomua na rongogu nau e vu ni mai na hurihuri ma na tasi leho de.”
13Seisuge ia Jona te kori vahai nia, ira na tinoni tara ago tana vaka nia ara tovoa kara vose suliha laka baa na vaka nia me ke ni longa i lihilihi, me utu rongona na tasi te leho solehana. 14Mara ora dato tatana ia Yawe, mara kori vahai de, “Ihami ami ngangaisi kikiho, Yawe, ko mui hoe na talasangahami hami na mate, rongona ta kami taha chonia na mamaurina na tinoni de. Ko mui hoe na rotasihami hami matena na tinoni de, rongona hoe o agosia na omea te taonia na manasamu.” 15Mara ragechia ia Jona mara choni sivoa i tasi, me luba sivo kesakesa na tasi leho nia me beata kalavata. 16Tana tahu vahai nia, visa na tinoni tana vaka nia ara matahu mate, mara kere vania ia Yawe, mara vacha kara ago vania ia.
17Tahuna vahai nia, me tu ia Yawe me raia chikai na cheche leho me tomodolua ia Jona. Ma ia Jona e toha lalo ni tobana na cheche nia e tolu na dani, me tolu na puti.
Chwazi Kounye ya:
Jona 1: mln
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2024 (active), Wycliffe Bible Translators, Inc. All rights reserved