Mateo 11
11
Ro Pangutana ni Juan nga Manogbawtismo
(Luc 7:18-35)
1Pagkatapos ni Jesus it hambae ku anang mga bilin sa anang dose nga ka sumueunod hay naghalin dayon imaw sa ratong lugar ag nag-adto sa iba pang mga kabanwahan it Galilea agod magturo ag magwali.
2Si Juan ma't-a nga Manogbawtismo hay idto sa prisuhan tag nakabati imaw ku mga ginahimo ni Kristo. Ginpaadto dayon nana idto ro pila ku anang sumueunod agod mangutana. 3Pag-abot idto, naghambae sanda kay Jesus, “Ginapapangutana kamon ni Juan kon ikaw eon baea kuno ro among ginapaabot nga ginpromisa it Dyos, o mahueat pa kami it iba?” 4Nagsabat si Jesus, “Balik kamo kay Juan ag sugiran imaw ku inyo nga mga hakita ag habatian. 5Sugiri imaw nga nakakita eon ro mga bulag, nakatikang eon ro mga eupog, nagmayad eon ro mga aruon, nakabati eon ro mga bungoe, nabanhaw ro mga patay, ag ginawali sa mga kubos ro Mayad nga Balita. 6Sugiri man imaw nga bulahan ro tawo nga owa gatalikod sa anang pagtuo kakon.”
Naghambae si Jesus Hanungod kay Juan nga Manogbawtismo
(Luc 7:24-35)
7Pagkatalikod ku mga ginpaadto ni Juan nga Manogbawtismo, naghambae dayon si Jesus parti kay Juan sa kaabo nga mga tawo nga nagtilipon idto. Hambae ni Jesus, “Ano ro inyo nga ginapaabot nga makita pag-adto ninyo kay Juan idto sa *disyerto? Gapaabot baea kamo nga makakita it tawo nga owa it tinindugan pareho it tigbaw nga ginahuyop-huyop it hangin? Owa siguro no? 8O basi gapaabot kamo nga makakita it tawo nga nakasuksuk it maeahaeon nga eambong? Bukon baea it sa mga palasyo gaistar ro mga nagasuksuk it maeahaeon? 9Bukon abi it ro inyong gusto nga makita idto sa disyerto hay isaeang ka propeta it Dyos? Huo propeta gid imaw pero may anang katungdanan nga mas pa ku ana it propeta 10dahil imaw ro ginahambae it Dyos sa Sagrado nga Kasueatan nga:
‘May akon nga mensahiro nga paunahon kimo agod pahaumon nana ro imong aeagyan.’ ”#11:10 Mal 3:1a.
11Hambae pa ni Jesus, “Matuod rang ginahambae kinyo nga owa pa it natawo iya sa ibabaw it kalibutan nga eabaw pa kay Juan nga Manogbawtismo. Pero mas pa kay Juan ro pinakakubos sa mga sinakpan it Dyos. 12Umpisa ku pagwali ni Juan nga Manogbawtismo hasta makaron, ro Mayad nga Balita nga puydi eon ikatapoe ro mga tawo sa mga sinakpan it Dyos hay madasig nga nagaeapta ag grabi ro epekto karon sa mga tawo. Abo nga mga tawo ro pursigido gid nga matapoe sa mga sinakpan ngaron it Dyos.#11:12 Raya nga bersikulo hay may daywa pa nga posible nga kahueugan. 1) “ro Mayad nga Balita nga puydi eon ikatapoe ro mga tawo sa mga sinakpan it Dyos hay madasig nga nagaeapta ag grabi ro epekto karon sa mga tawo. Pero may mapintas nga mga tawo nga nagabaeabag sa mga naila matapoe sa mga sinakpan ngaron it Dyos.” 2) “may mga gabaeabag agod nga indi mageapta ro Mayad nga Balita nga puydi eon ikatapoe ro mga tawo sa mga sinakpan it Dyos ag gamitan pa ron nanda it kusog. Ag may mapintas man nga mga tawo nga nagabaeabag sa mga naila matapoe sa mga sinakpan ngaron it Dyos.” 13Ro tanan abi nga ginsueat ku mga propeta ag ro Kasuguan it Dyos nga ginsueat ni Moises hay nagapahayag kon ano ro matabo sa ulihi. Pag-abot ni Juan hay nag-umpisa man nga natuman ratong mga ginsueat. 14Kon magpati kamo sa akong ihambae ngara hay maeubtan ninyo nga ro ginsueat kato ku sangka propeta nga magabalik si Elias sa ulihi hay owa napatungod kay Elias mismo kundi kay Juan 't-a. 15Paino-inoha ninyo it mayad ro inyo ngarang habatian.”
16Naghambae pa gid si Jesus, “Sa ano nakon ikakompara ro mga tawo sa rayang tyempo? Ano ro andang kapareho? Pareho sanda it mga unga nga mga artihan nga nagahinampang#11:16 Sa Griniyego, raya hay “nagapungko sa tindahan.” Sa andang kultura siguro hay sa tindahan nagahinampang ro mga unga. ag nagasinggit sa andang mga kahampang. Hambae nanda, 17‘Gintukaran namon kamo agod magsaot kamo, owa man kamo magsaot. Nagkanta kami it para sa namatyan pero owa gid kamo bisan magtangis-tangis eon lang.’ 18Ro mga tawo makarong tyempo hay pareho gid-a ku mga unga ngaron nga artihan. Ham-an abi? Tungod si Juan nga Manogbawtismo hay gapuasa ag owa gainom it bino, pero sinanda ku mga tawo hay ginsudlan imaw it demonyo. 19Ako ma't-a nga Unga it Tawo hay gakaon ag gainom sa mga okasyon ag sinanda ku mga tawo hay ‘Haron ro sueok ag paeahilong ag nagaamigo pa sa mga manogluko nga *manogsukot it buhis ag sa ibang mga makasasaea.’ Pero di bali tungod ro kaaeam it Dyos hay mapamatud-an nga tama paagi sa matarong nga pagpangabuhi ku mga nagasunod karon.”#11:19 Sa Griniyego, raya hay “ro kaaeam hay mapamatud-an nga tama paagi sa anang buhat.”
Ginpaandaman ni Jesus ro mga Pumueuyo it mga Banwa nga Owa Magtalikod sa Saea
(Luc 10:13-15)
20Pagkatapos kato, ginpangisgan ni Jesus ro mga pumueuyo ku mga banwa kon siin nana ginhimo ro kaeabanan nanang mga milagro tungod bisan hakita nanda rato hay owa sanda magtalikod sa andang mga saea. 21Hambae nana, “Makangigidlis gid ro matabo kinyo nga mga tagaCorazin ag mga tagaBetsaida, tungod owa't-a kamo magtalikod sa inyong saea! Kon ginhimo ko't-a kunta sa Tiro ag Sidon#11:21 Ro mga tagaTiro ag Sidon hay mga bukon it Judio. ro mga milagro nga ginhimo ko iya kinyo hay kabuhay eo't-a sanda nga nagsuksuk it magaeas nga eambong ag nagbutang it abo sa andang ueo bilang tanda ku andang pagtalikod sa saea. 22Ngani ginahambae ko eagi kinyo nga kon mag-abot ro adlaw it paghukom, ro pina nga inyong batunon hay mas grabi pa kaysa sa pina nga batunon ku mga tagaTiro ag Sidon. 23Ag kamo man nga mga tagaCapernaum, ayaw eon kamo magpaabot nga itue-og kamo sa eangit agod padunggan it Dyos#11:23 Eaom siguro nanda hay dayawon sanda ay ro andang banwa ro ueulian ni Jesus kada maghalin imaw sa anang mga pagpamanawon sa Galilea. dahil idto gid kamo sa impyerno#11:23 Sa Griniyego raya hay “Hades.” Basaha sa Luc 16:23-24. itagbong agod pinahan. Kon nakakita ro mga tagaSodoma ku mga milagro nga pareho ku akon nga ginhimo inha kinyo hay sigurado nga gahinuesoe ag gatalikod sanda sa andang mga saea, ag nagatindog pa't-a ro andang syudad hasta makaron. 24Ginahambae ko eagi kinyo nga mas pa ro inyong pina nga batunon kaysa sa pina ku mga tagaSodoma kon mag-abot eon ro adlaw it paghukom.”
Si Jesus ro Nagatao it Katawhayan it Paino-ino
(Luc 10:21-22)
25Tapos, nagpangamuyo si Jesus, “Ama, Ginuo ka ku tanan sa eangit ag sa kalibutan. Ginapasaeamatan ko ikaw tungod ro mga ginlipod mo sa mga may tinun-an nga nagaeaom nga mga maaeam sanda hay ginpahayag mo't-a sa mga mapainubuson ag naila magpaturo pareho it mga unga. 26Tama gid-a ring paagi ngaron, Ama, ay suno ron sa imong plano.”
27Pagkatapos ni Jesus it pangamuyo hay naghambae pa gid imaw, “Ro tanan-tanan hay gintugyan kakon ku akon nga Ama. Owa it nakakilaea gid sa Unga mageuwas sa Ama. Owa man it nakakilaea it mayad sa akong Ama kundi ako eang nga anang Unga ag ro bisan sin-o nga gusto nakon nga pakilaeahan kana kon mauno gid imaw.”
28Naghambae dayon si Jesus, “Kamo tanan nga mga ginagaoy ag ginabug-atan ku inyong mga paeas-anon, paeapit kamo kakon ay papahuwayon ko kamo. 29Magpasakop kamo sa akong pagdumaea ag magpaturo kamo kakon, tungod mapinasensyahon ako ag mapainubuson ag magatawhay ro inyong paino-ino. 30Maeumo eang ro mga sugo nga akong ipatuman kinyo ag indi kamo karon malisdan.”#11:30 Ro mga ginpatawad eon ni Jesus hay nalipay magtuman sa anang mga sugo ngani maeumo eang kanda magtuman. Mas nalisdan pa sanda magtuman ku mga sueundanan nga gin-obra eang ku mga owa it konsiderasyon ag strikto nga mga Pariseo (basaha sa Mateo 23).
Chwazi Kounye ya:
Mateo 11: akl
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
2024 (Active) Wycliffe Bible Translators, Inc.