Yonasi 1
1
Yonasi kaanbi ki Ŋuntiŋ Kirinŋ wɔ cinŋ ki tɛ
1Jibi bɛɛ, Ŋuntiŋ Kirinŋ i wulubi Amitayi danshuru Yonasi tɛ tu : 2« Jɔrɔkɔ, ŋi i tiri Nininfɛ kili sinaŋ ki ru, ŋi i ta wulubi furu ǹʼnu konaŋ kiri tɛ, sabu kɔ́ɔ́ juubi ki a fyiisan-i míŋ nu haali. »
3Yonasi i jɔrɔkɔ tu a ra bili tiri Tarisi kili ki ra, nwɔma a i amaŋ nari Ŋuntiŋ ki ra. Ntiŋ i ta so Jafa kwurinŋ tumaŋ ki ru. Ntiŋ i ta fa kwurinŋ bɛɛ wu niŋ kwurinŋ tumaŋ ki ru, niŋ i ta-ri Tarisi kili ki ra. Ntiŋ i a kansa ki sali, ntiŋ i de niŋ kwurinŋ ki ru tɔnŋ kiri fan, nwɔma a i a ranari Ŋuntiŋ Kirinŋ ki ra.
4Ŋuntiŋ Kirinŋ i faa sinaŋ jɔrɔkɔ wɛɛlufinju ki sun. Faa ki juuka jɛ ki, kwurinŋ ki i ji ǹʼtɛ a i li. 5Kwurinŋ bilitɔnŋ kiri i kɛni kusɛbɛ. Kí fɔn i arɔɔ pɛli li dɔri-ri tu nini na ye arì tɛ. Kí i kwurinŋ ki ru finŋ kiri bataa kee ju fan, nwɔma kwurinŋ ki i fyɛ. Nwɔ̀ i Yonasi i, niŋ i jɛri ta a bili kwurinŋ ki cɛru, ntiŋ i ɲinintan-ni. 6Kwurinŋ ki kapitɛni ki i a kpari Yonasi tɛ, ntiŋ i ǹʼbi ntiŋ tɛ tu : « Miŋ nfɛnŋ ma-a kwumaŋ, miŋ i ɲinintan-a wa? Jɔrɔkɔ, ŋi i nʼwɔ kirinŋ ki rafɛ, niŋ i a na yi sunmakwulupa, ŋì i yi mwu beŋ ki wu woo, koŋ ǹʼtɔ kì. » 7Niŋ kɔɔtɛ, kwurinŋ ki ru baara matɔnŋ ki i ǹʼbi tu : « Yi baalinŋ bili, ka ɲaanfɛkwulu ka i yibɛɛ kila-a konwɔtiŋ bira, yi i nintiŋ tɔ. » Kí i baalinŋ kiri bili, baalinŋ ki i Yonasi pa.
8Niŋ na, kí i ntiŋ nanɔri tu : « Miŋ nfɛnŋ ma ka ɲaanfɛkwulu ka i yibɛɛ kila-ri? Miŋ po-a da? Miŋ nfɛnŋ baara ma-a? Miŋ po-a kɛniŋ danwɔ ru? Miŋ shiya danwɔ ru koŋ i? » 9Ntiŋ i kí rupwulu : « Míŋ i Iburu u, ŋí i Ŋuntiŋ ki, kirinpɔlila Kirinŋ ki gbɛ-ri, ninwɔ̀ ki pwɔkulinŋ ki fa wɛɛlufinju ki po-i. » 10Ntiŋ tu kí tɛ sɛbɛ tu afinŋ bili-la Ŋuntiŋ ki jɛŋ. Kí niŋ nama-i waarinŋ wɔ̀ ru, kɛmi sinaŋ i de kí bataa ru. Kí i ntiŋ nanɔri tu : « Miŋ nfɛnŋ bi ma kɔɔn? » 11Kí na-i ǹʼja tu wɛɛlufinju ki juu na-a a ru, kí i ntiŋ nanɔri tu : « Yibɛɛ ra nfɛnŋ ma miŋ wu, nwɔma ju ki i a sunjɛri? » 12Ntiŋ i kí rupwulu tu : « Ábɛɛ miŋ pa kee ju ki ru, wɛɛlufinju ki ra a sunjɛri. Míŋ ǹʼtɔ-i ńʼtu míŋ bira, ńʼtu faa ki ábɛɛ yɛli-la ka ɲaan ka tɛ. »
13Kwurinŋ bilitɔnŋ kiri tu arì ra arì banba arì i bili so tankpiŋ ki sun, nka kí so kì, sabu ǹʼbɛɛ wuru bo ta-a ju ki faan ki sun. 14Niŋ na, kí i Ŋuntiŋ Kirinŋ ki rafɛ tu : « Ŋuntiŋ Kirinŋ, á fa yi haliki ka koŋ ka bira kì. Á fa ncusun yi i koŋ pɔlibali kilɛn kì, sabu ntiŋ bi tɔri ma yibɛɛ wu kì. Nwɔ̀ di-i ábɛɛ tɛ, ábɛɛ i ninki ma-a. » 15Ka koŋ kari i Yonasi pa kee bo ju ki ru, mìŋ manaanŋ tenŋ ki ru, ju ki i a sunjɛri. 16Niŋ i kɛmi sinaŋ de kwurinŋ ki ru baara matɔnŋ kiri ru Ŋuntiŋ Kirinŋ jɛŋ. Kí i saraka wɔri ǹʼtɛ, niŋ fa kí i arì tɔnye ǹʼna.
Chwazi Kounye ya:
Yonasi 1: JOB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© Wycliffe Bible Translators, Inc.