Mateo 2
2
Sema Inpanbisita Iren Na Iyangkedaing A Too
1Si Jesus, iyay-anak cha Bethlehem cha Judea nonta timpo na inpantoray Herod a ari. Idi engkay, gwariy iyangkedaing a toon mimothok cha Jerusalem a edafod bosakan. 2Iyansalodsod ira i “To la iwa nga-ngen iyay-anak a ari di na Hodjos i? Tep gwariy mita win pasingsing cha bosakan a engipaamted si-kawi i iyay-anak, et kimowan kawi din chejawen mi.”
3Idi chingel Herod ira man, chimanag, pati emiin a tood Jerusalem. 4Inpasa-nop ton emiin ira ma aafo na papari tan mamaistoro na dinteg, et inbagaan to ira i “Toy kay-anahan na Cristo i?”
5Kigwan cha i “Cha Bethlehem cha Judea. Tep seman i insolat na profita a:
6‘Si-kam a Bethlehem a
gwared sahop na Judah,
kahejangan ka
angken ot-otihan ka
iy say sema iren echom a
siyodad na Judah
tep si-kam i kedepoan na
afon mengitoray na took a
poli-polin Israel.’ ” #2:6 Micah 5:2
7Tiya-gway men Herod ira ma iyangkedaing a toon dini-kod to iren timbal et iyamtaan toy koston timpon inbo-day niwa pasingsing. 8Et into-no tho wa ira ma iyangkedaing a tood Bethlehem a kigwan to i “Jo singpet i anap niwa nga-nga, et no sepolen jo, ipaamta yod si-kak say onkowanak ngon chejawen ko.”
9Idi chingel iren ma iyangkedaing a too ma kigwan Herod, bimetik ira. Et sema pasingsing a mita red bosakan, edagwas ingkathod insalcheng tod dogad a kad-an niwa nga-nga. 10Idi mita ra ma pasingsing, paladoy imdeng cha. 11Simekep ma ired ma baliy. Idi mita ra ma nga-nga tan si Maria a ineto, iyantalimohod ira et chijaw cha. Et inbo-day cha wiy ebanol a rigalo chen balitok, frankincense a manbangdo, tan myrrh a para cha agas, et in-i-kan ched ma nga-nga.
12Et idi iyamtik ma ira, afil i chidan cha tep inbanchen Afo Chiyos babaen na kokip cha i eg ira on-olid Herod.
Sema Inbetik Joseph, Maria, Tan Si Jesus Cha Egypt
13Idi iyamtik ma ira ma iyangkedaing a too, iyanparang i anghil Afo Chiyos cha Joseph babaen na kokip a kigwan to i “Bangon ka, olop mo itha nga-nga tan si ineto, et betik kayod Egypt. Pan-iyan kayod man ingkathod konen ko i on-oli kayo di tep piyan Herod a pa-nap itha nga-nga et say bonoen to.”
14Et bimangon mes Joseph a iyodop to ma nga-nga tan si ineto, et iyamtik ired Egypt na kalebian. 15Et iyan-iyan ired man ingkathod ingkathiy Herod. Epasamak iyay say metongpal i inpangowan Afo Chiyos cha profita a “Tiya-gway koy anak kon on-ekal alid Egypt.” #2:15 Hosea 11:1
Inpabonon Herod I Chakel A Nga-nga
16Nonta nat imoli ira ma iyangkedaing a too, iyamtaan men Herod i siyaol cha, et paladoy bonget to. Isonga, into-no tho iriy solcharo thod Bethlehem tan sema iren iyay-askang a siyodad say bonoen cha iriy nga-ngen dalekin chegwiy tawen cha tan sema iren an-anengan a mantawen na chegwa. Tep iyamtaan Herod ired ma iyangkedaing a too i timpo na inbo-day niwa pasingsing. 17Isonga, etongpal iwan a kigwan Jeremiah a profita a:
18“Mapkes i nangis tan
ngogngog a inki-ngelan
ched Ramah
tep si Rachel, towan
nangisi iriy aanak to.
Nat intolok ton gwariy
mengipamapteng na
dekna tho
tep nagwara la iriy
kaana-anak to.” #2:18 Jeremiah 31:15 Cha nemnem Jeremiah, iyaybilang si Rachel a ina iren ma emiin a Hodjos, pati sema iren poli-poli thon epilit a imekal cha ili ra et iyanbalin na bagaen cha Babylonia. In-arig Jeremiah si Rachel a inechen mannanangis iy maramen chiyan ibetik ired Babylonia. Nem si Matthew, in-arig tos Rachel a iina na Bethlehem a iyangketiy iriy anak cha.
Imoli Ches Joseph Cha Israel Alid Egypt
19Idi etiy si Herod, iyanparang i anghil Afo Chiyos cha Joseph babaen na kokip nonta gwara pay ired Egypt 20a kigwan to i “Bangon ka, olop mo itha nga-nga tan si ineto, et oli kayod Israel tep sema iren piyan chen memono nitha nga-nga, iyangketiy ma ira.” 21Et bimangon mes Joseph a iyodop to ma nga-nga tan si ineto, et imoli ired Israel.
22Nem idi inki-ngelan Joseph i si Archelaus a anak Herod, siya-dat tos aweton torayan toy Judea, timahot a on-olid man. Et binidin mowan Afo Chiyos babaen na kokip, et kimowan ires Joseph cha sahop na Galilee, 23et iyan-iyan ired siyodad a nakigwan cha i Nazareth. Sejay i etongpalan na kigwan iren ma profita a “Mengechanan na i-Nazareth.” #2:23 Sejay a esel a Nazareth, nagwared Chaan a Tolagan, nem nonta timpon Jesus, say Nazareth, otik a siyodad a nadiyamsis cha. (Naebased John 1:46). Isonga, sema piyan Matthew a a-seden, kigwan iren ma profita i damsisen na tothoos Jesus.
Chwazi Kounye ya:
Mateo 2: KAR
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2023 Wycliffe Bible Translators, Inc. All rights reserved.