Luka 22
22
1LOMBA siku likuru la mitanda iliye chizamba lenze pafupi, nilo luitiwa Pasaka. 2Naŵo akuru a ansembe na alembi esakasaka mompaira; pakuti eŵayopa ŵantu.
3Nipo Satana eloŵa mwa Yuda oitiwa Iskariote, enzopendewa mwa ŵala kumi na aŵiri. 4Naye efumapo nolaŵirana na akuru a ansembe na vilolo mwati ampunzire kwaŵo. 5Ŵeve esangalala nopangana naye kumpa ndalama. 6Naye ezomera nosaka nsita iweme yompunzira kwaŵo pepenzeve liumba.
7Lomba siku lila la mitanda iliye chizamba lichiza lonyemeramo nsembe ya pasaka. 8Naye etuma Petro na Yohana echiti, Nkoyani mkatiwamizizye pasaka tiyeko? 9Naŵo emnenera, Mupangwa tikawamizye kuni? 10Eŵauzya, Ŵonani, mkayoloŵa mu mzinda amchinguzyeni mwanalume otwala nongo ya manzi; mkonkeni mng'anda yati aloŵemo. 11Mkati ku mwine wa ng'anda, Msambizi akuti kwanu, Chiri kuni chipinda cha alwendo chinti nilyeremo pasaka pamo na asambili ŵangu? 12Naye amlangizyeni chipinda chikuru cha pamulu chosamikiwa: muwamizyemo mwamene. 13Ŵechiya nofwanga nga ni umo mwaŵauzyira, ewamya pasaka.
14Lomba ikaze nsita yake yeve enkala pansi na apostolo naye pamo. 15Enena naŵo, Kupangwa napangwisya kulya ili pasaka namwe panikaliyotamana: 16pakuti numnenelani, Sinti nilyeko mpaka paliti lisilizike mu ufumu wa Mlungu. 17Naye epokera ntumo, akayamike echiti, Ulani iyi muyaŵane mwekamweka: 18pakuti nikuti kwanu, Sinti nimweko chitatikile lero chotwala cha mpesya mpaka peuti ufwike ufumu wa Mlungu. 19Naye eula mtanda, akayamike eusuna eŵapa echiti, Uyu ni muŵili wangu wopewa pa milandu yanu: nkochitani ichi mchilukano cha neo. 20Na ntumo nayo tetila ukasile mulalilo kuti, Ntumo ino ni mapangano alomba a mu mlopa wangu, niwo wotiliwa pa milandu yanu. 21Sembe ŵonani, kwanja kwa uyo onipunza kuli nane pamo polyera. 22Pakuti Mwana wa muntu akuya chendi nga ni umo mkwiikiwira futira: sembe malilo ku muntu uyo wakupunziwa naye Mwana wa muntu! 23Naŵo eyambokonshana ŵekaŵeka kuti, Ni ŵani wa seo ati achite ichi?
24Lomba euka soti masusyano pali ŵeve akuti ni ŵani wa seo ochishiwa mkuru. 25Naye enena naŵo, Mafumu a Mitundu oiŵera asikuru, na aŵo ana upinguzi pali yeve oitiwa Anyaluwamya. 26Sembe mweo simti muŵe teti: wamene uyo ali mkuru pali mweo naaŵe nga ni muŵaye, naye wamene ali wotatika naaŵe nga ni uyo wotumikila. 27Mkuru ni ŵani, uyo oseama pakulya, kano uyo otumikila? kansi nte uyo oseama pakulya? sembe neo nili pakati panu nga ni uyo otumikila. 28Mwe nimwe ŵonkala nane pa no mkuyezyewa kwangu; 29nane numuŵikirani ufumu, nga ni umo Ŵata mwechiniikira ufumu, 30kuti mkalye na kumwa polyera pangu pofumu wangu; namwe mukonkala pa vilimba kuipingula mitundu kumi na iŵiri ya Israeli. 31Simoni, Simoni, ŵona, Satana esakokuula akupepete nga ni mapira: 32lomba nikupapatilila, mvwano wako usachepa: nawe, apo ukazoyaruka soti, wotang'isya akwanu. 33Enena naye, Asikuru, pamo na mweo nankalilatu kuya ku kambolimboli na ku imfwa. 34Echiti, Nukuuzya, Petro, pakaliyolila kombwe lero unikane katatu kuti suniziŵa.
35Nipo eŵanenera, Pamene penimtumani chiliye chibeti na mkoba na nkwaŵilo kansi kantu kemsoŵani? Echiti, Keka kantu. 36Naye enena naŵo, Sembe lomba uyo ana chibeti nachiule, na mkoba kumo: na uyo aliye nasitisye mtopola wake nosita chinkalammanja. 37Pakuti numuuzyani kuti ichi chilembewa sichingalekosilizika pali neo, Ependewa mwa anyaluŵifya: pakuti vya neo vina chisilizyo. 38Ŵechiti, Asikuru, ŵonani, vilipo pano vinkalammanja viŵiri. Enena naŵo, Vyakumana.
39Lomba efuma echiya, umo mwechiyoŵerera, ku lupiri lwa Elaya, na asambili naŵo emkonka. 40Akafwike ku malo eŵauzya, Sengani mngaloŵe mkuyezyewa. 41Naye etalamkana naŵo nga ni msinzo wopoza mwala; efukama nosenga 42kuti, Ŵata, mkazomera, imyaponi ntumo iyi pangu; lomba nte kupangwa kwangu sembe kwanu nakuchitiwe. 43Nipo emuŵonekera malaika wa kumulu, kumkosesya. 44Naye pokwinyilila ngako epulamo nosenga: na chiŵe chake chipompa nga ni mlopa utonta ngako pansi. 45Akaime posenga kwake eŵazila asambili noŵafwanga mtulo twa mandandauzi, 46enena naŵo, Mulaliranji? ukani nosenga, mngaloŵe mkuyezyewa.
47Akalulaŵira, ŵonani, liumba na uyo oitiwa Yuda, umo wa ŵala kumi na aŵiri, enzoŵatangulila; emvwenderera Yesu kumfyonta. 48Sembe Yesu emnenera, Yuda, umpunza Mwana wa muntu na mafyontero kansi? 49Pamene aŵo ŵomzinga pechiŵona chiti chiŵepo echiti, Asikuru, tichenchene na chinkalammanja? 50Lomba chite wa aŵo emchenchena kapolo wa mkuru wa ansembe nomtenda kwatu kwa kwendi. 51Sembe Yesu eyasuka echiti, Chilekeni ichi. Naye emkumya kwatu nompozya. 52Lomba Yesu eŵanenera akuru a ansembe na vilolo vya chipupilo na akuruakuru amene echizomkata, Mwafuma na vinkalammanja na minkuru nga ni ku kapondo? 53Penenze namwe nsiku na nsiku mchipupilo muliyotambikizya manja ŵanu pali neo: lomba nsita ino ni yanu, na nsaka ya mfinzi kumo.
54Naŵo emkata nomtanguzya, echiya naye mng'anda ya mkuru wa ansembe. Sembe Petro emkonka kutali. 55Naŵo akakozye mulilo pakati pa luŵanza nonkala pansi ŵonse pamo, Petro enkala pakati paŵo. 56Nipo chituntulu pomuŵona onkala mchingwengwengwe cha mulilo chimlolesisya nonena, Uyu soti enze naye pamo. 57Lomba ekana kuti, Mwanakaziwe, sinumziŵa. 58Kansita katonto muyake emuŵona echiti Weo nawe uli wa aŵo. Sembe Petro echiti, Muntuwe, nti neo. 59Nipo ikapite nsita imo muyake eyumilila kuti, Ng'aleze uyu muntu soti enze pamo naye, paali Mgalilaya. 60Lomba Petro echiti, Muntuwe, sinuziŵa chiunena. Lomba pano akalulaŵira kombwe elila. 61Asi kuru echeuka nomlolesisya Petro. Petro naye ekumbuka malizu a Asikuru ŵamnenera, Kombwe pakaliyolila lero unikane katatu. 62Naye efumila panja nolila ngako.
63Nipo analume ŵomkata Yesu emtotofya nomnyata. 64Emmanga chinkuwa nomkonsha kuti, Losya: ni ŵani wakunyata? 65Na viyakene vinyinji evinena vyomsusya nomtukana.
66Lomba kukache nsaka ya akuru a ŵantu ilongana, niŵo akuru a ansembe na alembi soti; emkulikira ku nsaka yaŵo echiti, 67Kati niwe Kristo, utiuzye. Lomba eŵanenera, Nikamuuzyani simzomera: 68nikamkonshani simyasuka. 69Sembe chitatikile lomba Mwana wa muntu akonkala ku kwanja kwendi kwa mpamvu ya Mlungu. 70Naŵo ŵonse ŵechiti, Kansi niwe Mwana wa Mlungu nakale? Enena naŵo, Mulaŵira kuti ni neo. 71Echiti, Tusakiranji untoni uyake? patamvwa seka pakanwa pake mwine.
Chwazi Kounye ya:
Luka 22: MA23
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Mapangano Alomba © Bible Society of Zambia, 1923.