M. Yohana 6
6
1PAVULI pa ivi Yesu etaukila kusilya kwa chimana cha Galilaya, nicho cha Tiberiya. 2Liumba likuru limkonka, chikomo liŵona viziŵikwilo vyechiŵachitira aŵo ŵenzelwele. 3Naye Yesu ekwera ku lupiri nonkala pansi kwamene pamo na asambili ŵake. 4Lomba pasaka, siku likuru lila la Ayuda, lipanamila. 5Teti Yesu eŵinusya menso eŵona liumba likuru lumzila emnenera Filipo, Tisite kuni mitanda ŵalye aŵa? 6Elaŵira teti momuyezya, poziŵa mwine mwati achitire. 7Filipo emyasuka, Mitanda ya makobiri myanda iŵiri singakumane kwaŵo, kuti ŵonse apokeko patonto. 8Umo wa asambili ŵake, Andreya mkwaŵo wa Simoni Petro, emuuzya, 9Alipo pano mlumbwana ana mitanda isano ya maŵere na masaŵi aŵiri: ni tyani ivi ku ŵanyinji ŵoteti? 10Yesu echiti, Kankalikeni ŵantu. Lomba wenzepo palapa msipu unyinji. Teti analume enkala pansi popendewa kwaŵo nga ni myanda makumi asano. 11Naye Yesu eiula mitanda; akayamike eyaŵira aŵo ŵenzenkezi, tetyo na masaŵi umo mwechipangwila. 12Akakute ŵeve euzya asambili ŵake, Fusani tonyenyeuka twasalapo kasachenekeka kantu. 13Naŵo etufusa, na maluŵango kumi na aŵiri ezula tonyenyeuka twa mitanda ila isano ya maŵere twiŵasalira ŵala ŵechilya. 14Teti pamene ŵantu pechiŵona chiziŵikwilo chechichita echiti, Uyu chendi ni muŵirizi ula akuza mcharo chino.
15Teti Yesu poŵona kuti osakozomkata amchisye mfumu epatuka echiya soti ku lupiri ulo yeka.
16Lomba chikaze chingulo asambili ŵake esikira ku chimana; 17eloŵa mu wato echiti titauke chimana tiye ku Kapernaumi. Kwifipa lomba, na Yesu akaliyekuza kwaŵo. 18Lomba chimana chenzouka chikomo cha chinkuka chikuru chenzokunta. 19Teti akayoŵe msinzo wa mastadiya makumi aŵiri na asano, kano makumi atatu, emuŵona Yesu enzoyenda pamulu pa manzi noupanamila wato: naŵo eyopa. 20Lomba eŵauzya, Ni neo; msayopa. 21Tetyo ezomera kumulovya mu wato: nipo lomba pano apa wato wenze pa chau penzekuya.
22Mmawa mwake maumba enzepeneme pasilya la chimana eŵona kuti sikenzepo kawato kambine sembe kamo, na kuti Yesu nteloŵamo mu wato pamo na asambili ŵake, sembe kuti asambili ŵeka eimapo 23(lomba twichiza tumawato tumbine twifuma ku Tiberiya, kufupi na kwechilya mitanda apo akayamike Asikuru): 24teti maumba akaŵone kuti Yesu salipo kano asambili ŵake eloŵa ŵeka mtumawato echizomsaka Yesu ku Kapernaumi. 25Naŵo akamfwange pasilya la chimana emkonsha kuti, Rabbi, mwaza zuŵanji kuno? 26Yesu eŵayasuka echiti, Lezee lezee numnenelani, Munisaka nte pakuti mwiŵona viziŵikwilo sembe kuti mwilyako mitanda nokuta. 27Msakatira milimo chakulya cholopa, sembe chakulya chiri kankalilo mpaka ku moyo wosasila, chamene chati ampeni Mwana wa muntu: pakuti uyo ni wechikoma lilaka Ŵata, ni Mlungu. 28Tetyo ŵenena naye, Nga seo tichitenji tokata milimo ya Mlungu? 29Yesu eyasuka eŵauzya, Uyu ni mulimo wa Mlungu wakuti mommvwila uyo wechituma. 30Naŵo enena naye, Nga mweo muchita chiziŵikwilo chanji chakuti tiŵone seo nommvwilani? muchitanji? 31Amausu wasu echilya manna mula mmalambo: umo mkwilembewera, Eŵapa mitanda yofuma kumulu alyeko. 32Teti Yesu eŵauzya, Lezee lezee numuuzyani, Nti Musa empani ila mitanda yofuma kumulu; sembe Ŵata ni ompani mitanda yendi yofuma kumulu. 33Pakuti mitanda ya Mlungu ni ila yusikila kufuma kumulu nochipa moyo charo cha pansi. 34Naŵo enena naye, Asikuru, chitatikile lero tipekoni mitanda iyi. 35Yesu eŵauzya, Ne nine mtanda wa moyo: uyo onizila saamvwa njala, na uyo onimvwila saamvwa njota nsiku zyonse. 36Lomba namuuzyani kuti muniŵona, lomba mkaliyozomera. 37Vyonse vyakunipa Ŵata vivize kuli neo; na uyo akuza kuli neo sinti nomtaya peka patonto. 38Pakuti nifuma kumulu ntenichizochita vinupangwa namwine, sembe vyakupangwa uyo enituma. 39Ichi ni chakupangwa uyo enituma, chakuti mvyonse vyechinipa nisataya keka kantu, sembe kukazyusya pa siku losililila. 40Pakuti ichi ni chakupangwa Ŵata, chakuti ali wonse omuŵona Mwana nommvwila aŵekuŵa na moyo wosasila; nane nize nimzyusye pa siku losililila.
41Teti Ayuda emng'onimila pakuti echiti, Ne nine mtanda wifuma kumulu. 42Echiti, Kansi uyu nti Yesu, mwana wa Yosefe, utuziŵa awisi na anyina? oneneranji lomba, Neo nifuma kumulu? 43Yesu eyasuka eŵauzya, Msang'onima mweka. 44Paliye muntu anganizile akakanomuita Ŵata enituma: nane nize nimzyusye pa siku losililila. 45Kwilembewa mwa aŵirizi, Naŵo ŵonse azasambizyiwe na Mlungu. Ali wonse wamene echimvwa kwa Ŵata nosambila akuza kuli neo. 46Nte kuti muntu eŵona Ŵata, sembe uyo efuma kwa Mlungu, wamene uyo ni eŵona Ŵata. 47Lezee lezee numuuzyani, Uyo omvwila ana moyo wosasila. 48Ne nine mtanda wa moyo. 49Amausu wanu echilya manna mula mmalambo, naŵo ŵechifwa. 50Uyu ni mtanda ufuma kumulu, wakuti muntu alyeko nosafwa. 51Ne nine mtanda wamoyo wamene wifuma kumulu: kati ali wonse akalyako mtanda uyu azaŵe moyo wa mtatakuya: inde, mtanda unti nipe ni nyama yangu, iŵere moyo wa charo cha pansi.
52Teti Ayuda esusyana echiti, Uyu muntu angatipe syani nyama yake tilyeko? 53Yesu naye eŵauzya, Lezee lezee numnenelani, Mkakanolyako nyama ya Mwana wa muntu nomwako mlopa wake simwina moyo muli mweo. 54Uyo olyako nyama yangu nomwako mlopa wangu ana moyo wosasila; nane nize nimzyusye pa siku losililila. 55Pakuti nyama yangu ni chakulya chendi, na mlopa wangu ni chakumwa chendi. 56Uyo olyako nyama yangu nomwako mlopa wangu onkala muli neo, na neo muli yeve. 57Nga ni umo Ŵata wamoyo mwechinitumira, nane mnilili moyo chikomo cha Ŵata, tetyo na onilyako soti ni mwati aŵoŵera moyo chikomo cha neo. 58Uyu ni mtanda wifuma kumulu: nte umo amausu wanu mwechilyera na kufwa: uyo olyako mtanda uyu azaŵe moyo maŵeromaŵero. 59Ivi evilaŵilila msunagage posambizya mKapernaumi.
60Tetyo asambili ŵake anyinji pechimvwa echiti, Malizu aŵa ni ŵokosa; ni ŵani angaŵamvwe? 61Sembe Yesu poziŵa yeka kuti asambili ŵake eng'ung'unzila pali aŵa enena naŵo, Kansi aŵa ompilingisyani? 62Nga kati muŵone Mwana wa muntu okwera kuya kwenze kale? 63Ukupa moyo ni mzimu; muŵili sukufwa kantu: malizu analaŵira namwe ni mzimu na moyo. 64Lomba pali ayake a mweo asazomera. Pakuti Yesu eziŵa chitatikile poyamba ni ŵani aŵo asazomera, na ŵani ati amvumbule. 65Naye echiti, Chikomo choteti ni panamuuzyani kuti paliye muntu anganizile kukakanopewa kwake na Ŵata.
66Pa ichi asambili ŵake anyinji ewererako nosayenda naye soti. 67Teti Yesu enena naŵo ŵala kumi na aŵiri, Namwe kumo kansi mupangwoimapo? 68Simoni Petro emyasuka, Asikuru, nga tiye kwa ŵani? mwina malizu a moyo wosasila. 69Nase tuzomera noziŵa kuti mweo nimwe Uyo Wozila wa Mlungu. 70Yesu eŵayasuka echiti, Kansi sinimsalulani mweo kumi na aŵiri, na umo wa mweo ni muŵepeki? 71Lomba enzonena Yuda, wa Simoni Iskariote, pakuti uyo ni ati amvumbule, ni umo wa ŵala kumi na aŵiri.
Chwazi Kounye ya:
M. Yohana 6: MA23
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Mapangano Alomba © Bible Society of Zambia, 1923.