Luk 10
10
Jézu mi yɔ yaa wɔlɛ vu nwunvɔ
(Mt 10:5–15; Ébr 2:1–14)
1’Bɛ zuo Mizan mi yɔ yaa wɔlɛ vu si a va yé é wo dɔ é ziin é zuomunu nya, yé é wo nwunvɔ mi fié mi fié é ’lɛ, fla faa valé fɛ faa lé é dan go lɛ wona bɛ, ana. 2É lé wo lɛ léé: ’Sa tana kiɛre yé a gyɛmunu ’ka di lo. Amalé ’ka zanté vɔ ’sazan lɛ léé, ’é nyanamapazannu pa zia yé ’wo alé ’sa gyɛ. 3’Ka go; maa a ka nwunvɔna bélé ’blanénu zo glaunu méléna. 4Gɔɔlipabala koo, bala koo, sawala koo, té ka go wo do kpen nya ka lee lo, yé té ka we mi do kpen va zia lo. 5Dé ka bɔ kɔn‐an ’léé, ’ka fe é vinin léé: Kɔn ’ko ’é vo drɔɔ ma. 6Yé dé ka mian ye ana mi drɔɔ nya, kalé a drɔɔ vole é dan vo lɛ a ta; dé ’bɛ kaan lo, kalé a drɔɔ vole é dan si lɛ a ta é ziin. 7’Ka vo kɔn ’ko ’léé, yé fɛ lé wa nɔ ka lɛ, ’ka ble; naa, a yara léé, nyanamapazan ’é gooli ye. Té ka go gole nya kɔnnu gi lo. 8Dé ka bɔra flaofla‐an ta yé wo ka bɛn si, fɛ lé wa nɔ ka lɛ, ’ka ble, 9’ka ana gyɛgyɛmunu béli yé ’ka fe wo lɛ léé: Kazambale lé plale munu nwiin bɔ ka lɛ é pu. 10Naa, dé ka bɔra flaofla‐an ta yé wo ’ka ka si lɛ bɛn nya lo, ’ka go vuun la yé ’ka fe léé: 11Kalé fla vungoi lé é zén ko gane ma, ko a nwɛɛn ka ta ko gane ma puole nya; naa, a sele é dɔ ka gi léé, Kazambale lé plale mi nwiin bɔ é pu ma. 12’Bɛ yi nya fla ’ko zé kleblele é dan mini lɛ Sɔdɔm zé ta. Maa fe ka lɛ.
Flanu lé wo lamunu ’ka ’wo bli nɔlaan lo
(Mt 11:20–24)
13Korazɛn munu, ka gale nyɔ. Bɛtsaida munu, ka gale nyɔ. Gyɛzorowenu lé maa a kɛlɛ ka méléna, dé é vo léé, maa a kɛlɛ Tii valé Sidɔn, ’té ana munu wo bli nɔla namɔn é kwakwa ’plawuli valé kyɛyee zénle nya wo ta. 14Bɛwemalé webleyi nya kazé kle é dan mini lɛ Tii valé Sidɔn zé ta. 15Yé bii Kapɛnaum, i dan nwa lɛ fɔɔ la gii? Gba, wo dan i zun lɛ fɔɔ gamunu nyanana.
16Mi lé éé tɔné dɔa ka lɛ, éé tɔné dɔa an lɛ, yé mi lé éé sɔn vɔa ka ma, éé sɔn vɔa an ma; yé mi lé éé sɔn vɔa an ma, éé sɔn vɔa mi lé é an pa zia, a ma.
Mi yɔ yaa wɔlɛ vu da wo pa gi
(Mk 6:12, 13, 30)
17Mi yɔ yaa wɔlɛ vu da é ziin gi nanale nya yé wo léé: Mizan, yonu é ziin wo pla ko wuo i tɔ ma. 18Jézu lé wo lɛ léé: Maa Satan ye sina la gi yé é zun bélé lɛɛ yuɛ wuovɔle zo. 19Ka ye, maa tawole ménénu valé zɛnɛanu ta se kɛlɛ ka lɛ, yé maa plɛplɛ nɔ ka lɛ léé, ka pla mi nyanézan lé plɛplɛ faa nwiin; yé fɛan é bɔa wenyané kɛlɛle lɛ ka lɛ, ’bɛ fɛ do kpen ’ka lo. 20Naa, té ka gi é nana léé, yonu a é plale ka wuo lo; naa, ka gi ’é nana léé, ka tɔ a é gyɛle la gi.
Jézu gi nana
(Mt 11:25–27; 13:16–17)
21A bléyi duo nya Léli Sauun Jézu fan gi nanale nya yé é léé: An Ti, Lazan valé Tɛrɛzan, maa i tɔ zin fé léé, i we ’konu yɔɔ wedɔɔzannu valé ’wuoatazannu ma yé i wo nagɔɔn nénu lɛ. Iin, an Ti, maa i tɔ zin fé léé, bii a a va léé, ’é kɛlɛ ’bɛ zo. 22An Ti fɛnu faa nɔ an lɛ, yé mi lé maa, a Be ke a nya, mi do kpen ’ka a dɔɔa lo, ’té dé é ’ka an Ti nya lo; yé mi lé an Ti ke a nya, mi do kpen ’ka a dɔɔa lo, ’té dé é ’ka maa, a Be nya lo; é valé mian é sɔ an lɛ léé, maa a nagɔɔn ’bɛzan lɛ, ’bɛ nya lo. 23É yara nɔla é zuomunu va yé é lé wo saa lɛ léé: We lé ka ke a yena, dé mi a ye, a yuɛ gi éé kɛla a ma néné. 24Fɛ lé ka ke a yena, balelayemunu kiɛre valé minwiinmunu kiɛre a a va léé, ’wo ’é a ye, yé wo ’ka a ye lɛ lo, yé we lé ka ke a ’mana, wa a va léé, ’wo ’é a ’ma, yé wo ’ka a ’ma lɛ lo. Maa fe ka lɛ.
Samarizan zin
(Rom 13:8–10)
25Bélidɔwedɔɔzan do nwa yé é Jézu gi dan a fele nya léé: Anzan, maa kɛla kaa yé an vo é yuɛma lɛɛfaama yé a glɛ ’ka dɔa loo? 26Jézu lé a lɛ léé: Wa gyɛ bélidɔwe gi kaa? Dé i a ’bɛ ta fena, i mɛ we ’ma a gii? 27Yé yee gɔnézan léé: Maa ’ma léé, ’i Mizan izé Bale lɔrɔ pa i bli faa koo, i boen faa koo, ilé plɛplɛ faa koo, i gi bɔrɔle faa koo, wo nya; yé ’i bɔluzan lɔrɔ pa bélé biibozen zo. 28Jézu lé a lɛ léé: Bé zi pa tegele; ’i ’bɛ kɛlɛ yé i dan vo lɛ é yuɛma. 29Naa, é sɔ gɔnézan lɛ léé, élé we ’é kɛlɛ néné Jézu yuɛ gi yé é léé: De ɛ ke an bɔluzan nyaa? 30Jézu lé a lɛ léma: Gɔné do si Jérusalɛm yé é a gona Jériko. Kyeenwozannu baa a ta zia, yé wo alé sɔnu si a ta, yé wa bla kaii, yé é zɔrɔ yé wa vo a zo yé wo go. 31Yé é kɛlɛ léé, Balebanzan do zun yee zi duo ’léé; é mi ’ko ye aan wo, é paa a ma. 32Lévi mi do bɔ fɛkona é ziin; é gɔnézan ’ko ye aan wo é paa a ma. 33Naa, Samarizan do lé é ke ta la, ’bɛ bɔ ana yé ’bɛ gɔnézan ye aan wo, ’bɛ nyanai zén a ta. 34’Bɛ bié a ma yé ’bɛ nyɔnɔ valé dɔrɔ zén a tuonanu gi, yé ’bɛ sɔbɛ vuru wo ta; a zuo ’bɛ a vɔ ébozen lé sokofale ta yé ’bɛ go a nya otɛli ta yé ’bɛ a mawe kɛlɛ. 35’Bɛ é tu kini, ’bɛ dénié fié si yé ’bɛ a nɔ otɛlizan lɛ a fele nya léé: ’I bɔ a va an lɛ, dé i gɔɔli bɛ sɛrɛ a we gi, dé maa da é ziin maa dan a lɛgi nɔ lɛ i lɛ. 36É dɔ i gi kaa? Mi yaa ’ko va mi kyɛn ɛ ke mi lé kyeenwomunu baa a ta bɛ, a bɔluzan nyaa? 37Bélidɔwedɔɔzan léé: Mi lé a nyanai zén a ta, yee lé. Yé Jézu lé a lɛ léé: ’I go, yé izé kɛlɛ a zo.
Jézu go we lɛ Maate valé Mari va
(Jn 11:1–5; 12:1–7)
38Jézu valé é zuomunu a zia aan wo, wo bɔ fla do la, yé le do lé wa laama Maate, ’bɛ a si élé bɛn nya. 39A buru a, wa laama Mari; ’bɛ nyana Mizan gane ma, ’té ’bɛ éé tɔné dɔa a dére lɛ. 40’Té Maate yuɛ gi kyɛ a é dɔle fɛ kɛlɛle nya yé é da yé é léé: Mizan, dé an buru an vo an do fɛ kɛlɛna, ’bɛ ’ka ’na i ma loo? ’Bé fe a lɛ léé, ’é bɔ an va. 41Mizan a zi pa a lɛ léé: Maate, Maate, i yuɛ gi kyɛ a, yé i we kiɛre gi bɔrɔ paan. 42Naa, we do kpen ɛ ke mi mawe nya. A zin lé Mari a si ézé nya, yé wo ’ka dan a si lɛ a lee lo.
Chwazi Kounye ya:
Luk 10: GOURU
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Alliance Biblique de Cote d'Ivoire 1979