Wepélisiananu 1
1
Tɛrɛ plale valé mi kɛlɛle
(Rom 1:20; Wg 4:11; Jn 1:1–3)
1Fɛkɛlɛle pélisia bléyi va, dé Kazambale la valé tɛrɛ kɛlɛ,
2’té tɛrɛ a munuɔɔ, ’té fɛ do kpen ’ka ana lo; yé a guru blɛn ta gunu a tiritiri, ’té Kazambale Léli éé giéan ’yinu ta loru.
3Yé Kazambale léé: Fɛna fu ’é kɛlɛ. Yé fɛna fu kɛlɛ. 4Kazambale a ye léé, fɛna fu a é zima; yé Kazambale fɛna fu valé gunu kini ékema. 5Kazambale fɛna fu laa, tu, yé é gunu laa, béli. ’Bɛ zo lé nyanadi kɛlɛ yé bladi kɛlɛ; ’bɛ ɛ ke a yi vininzan nya.
6Kazambale léé: Fɛna pla ’é kɛlɛ ’yinu méléna, yé fɛna pla ’é ’yinu kini ékema. 7Yé ’yinu lé ke fɛna pla ta loru koo, ’yinu lé ke a wuo koo, Kazambale wo kini ékema yé é wo méléna vo é pla. 8Yé ’bɛ kɛlɛ a zo. Kazambale fɛna pla laa, la. ’Bɛ zo lé nyanadi kɛlɛ yé bladi kɛlɛ; ’bɛ ɛ ke a yi fiézan nya.
9Kazambale léé: ’Yinu lé wo ke la wuo, ’wo zén ékeva fɛdona, yé fɛna gale ’é bɔra. Yé ’bɛ kɛlɛ a zo. 10Kazambale fɛna gale laa, tɛrɛ, yé ’yinu lé wo zén ékeva bɛ, é ’bɛnu laa wɛyi. Yé Kazambale a ye léé, ’bɛ a é zima. 11’Bɛ zuo Kazambale léé: Tɛrɛ ’é fɛ kɛlɛ; ziannu lé wo wɔlɛnu éé kɛla wo gi bɛ, wo koo, yilinu lé wo poro éé baan wo dɔgɔnɔ yɛrama, ’té wo wɔlɛ éé kɛla ’wo gi bɛ, wo koo, tɛrɛ ’é wo kɛlɛ. Yé ’bɛ kɛlɛ a zo. 12Tɛrɛ fɛ kɛlɛ; ziannu lé wo wɔlɛ éé kɛla wo gi wo dɔbɛ gi, wo koo, yilinu lé woo poro baan, ’té wo wɔlɛ éé kɛla wo gi wobozen dɔbɛ gi, wo koo, tɛrɛ wo kɛlɛ. Yé Kazambale a ye léé, ’bɛ a é zima. 13’Bɛ zo lé nyanadi kɛlɛ, yé bladi kɛlɛ; ’bɛ ɛ ke a yi yaazan nya.
14Kazambale léé: Fɛnakinifɛnu ’é kɛlɛ fɛna pla lé wa laama la, a gi, tu valé béli kinile ékema we gi; ’wo kɛlɛ bléyinu koo, yinu koo, lɛɛnu koo, wo gɔɔnzannu nya ma. 15’Wo kɛlɛ fɛnakinifɛnu nya la gi, yé ’wo tɛrɛ ta kini. Yé ’bɛ kɛlɛ a zo. 16Kazambale fɛnakinifɛ blɛn kɛlɛ fié; é a blɛnzan kɛlɛ yiéyizan nya, yé é a kiénézan kɛlɛ bélizan nya; yé é monénénu kɛlɛ é ziin. 17Kazambale wo pla la gi, tɛrɛ ta kinile koo, 18wo kɛlɛle yiéyi valé bélizannu nya koo, fɛna fu valé gunu kinile ékema koo, ’bɛ faa we gi. Kazambale a ye léé, ’bɛ a é zima. 19’Bɛ zo lé nyanadi kɛlɛ yé bladi kɛlɛ; ’bɛ ɛ ke a yi ziɛnzan nya.
20Kazambale léé: Wi yuɛmalenu ’é kɛlɛ ’yinu va di, yé mianénu ’é si tɛrɛ ta loru la worona. 21Yé Kazambale pɔ blɛnblɛnnu kɛlɛ, é valé wi yuɛmalenu faa lé woo giéan ’yi va, é wo kɛlɛ kiɛre wo dɔgɔnɔ yɛrama; yé mianénu faa lé wo bɛa ke, é wo kɛlɛ é ziin wo dɔgɔnɔ yɛrama. Kazambale a ye léé, ’bɛ a é zima. 22Kazambale wo drɔɔ vo yé é léé: ’Ka né yaa, ’ka kɛlɛ kiɛre, ’ka fan wɛyi va; yé mianénu ’é kɛlɛ kiɛre tɛrɛ la ma. 23’Bɛ zo lé nyanadi kɛlɛ yé bladi kɛlɛ; ’bɛ ɛ ke a yi soruzan nya.
24Kazambale léé: Wi yuɛmalenu ’é bɔra tɛrɛ la wo dɔgɔnɔ yɛrama do do; flawinu koo, tawoplɛlawinu koo, bwiiwinu koo, ’wo bɔra yé ’wo vo ’bɛ bɛ gi, Yé ’bɛ kɛlɛ a zo. 25Kazambale bwiiwinu kɛlɛ wo dɔgɔnɔ yɛrama do do, yé é flawinu kɛlɛ wo dɔgɔnɔ yɛrama do do, yé é tawoplɛlawinu kɛlɛ wo dɔgɔnɔ yɛrama do do; yé Kazambale a ye ’léé, ’bɛ a é zima. 26’Bɛ zuo Kazambale léé: Kaa mi kɛlɛ kaa dɔbɛ gi, kaa bɔmazan nya, yé ’é pla wɛyi va pɔnu koo, lagi mianénu koo, winu koo, tɛrɛlafɛnu faa koo, tawoplɛlawinu faa lé woo giéan tɛrɛ la koo, wo faa nwiin. 27Yé Kazambale mi kɛlɛ é dɔbɛ gi, é a kɛlɛ Bale dɔbɛ gi, é gɔné valé le kɛlɛ. 28Kazambale wo drɔɔ vo, yé Kazambale lé wo lɛ léé: ’Ka né yaa, ’ka kɛlɛ kiɛre, ’ka fan tɛrɛ la yé ’ka pla a tafɛnu nwiin; wɛyi va pɔnu koo, lagi mianénu koo, wi faa lé éé giéan tɛrɛ la koo, ’ka pla wo nwiin. 29Yé Kazambale léé: Ka yé loo? Zian faa lé é ke tɛrɛ la, ’té a wɔlɛ éé kɛla a gi, é valé yili faa lé wo poro éé baan, ’té a wɔlɛ éé kɛla a gi, maa a nɔ ka lɛ kalé fɛblele nya. 30Wi faa lé é ke tɛrɛ la koo, mianénu faa lé é ke la gi koo, fɛ faa lé éé giéan tɛrɛ la, ’té éé flin‐é, wo koo, maa lu drɔɔdrɔɔ faa nɔ wo lɛ wolé fɛblele nya. Yé ’bɛ kɛlɛ a zo. 31Yé fɛ faa lé Kazambale a kɛlɛ, é a faa nagini yé é a ye léé, a faa a é zima é baba. ’Bɛ zo lé nyanadi kɛlɛ yé bladi kɛlɛ; ’bɛ ɛ ke a yi suiɛdozan nya.
Chwazi Kounye ya:
Wepélisiananu 1: GOURU
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Alliance Biblique de Cote d'Ivoire 1979