लूका 24
24
यीसू मरगे जींवता हो'ग्या
(मत्ती 28:1-10; मरकुस 16:1-8; यूहना 20:1-10)
1फेर बे लुगाईयां दीतवार गै दिन झांझरकैई सुरम आळी चिजां झिकी बां तैयार करी बानै लेगे कबर पर आई। 2जद बां कबर ऊं पथर नै पासै होयड़ो देख्यो अर कबर गो मूं खुलो पड़यो देख्यो। 3जद बां कबर में देख्यो तो यीसू गी ल्हास बठै कोनी ही। 4बे ओ देखगे हेरान हो'गी तो दो सुरगदूत चमकता कपड़ा पेरेड़ा बांगै कनै आ'गे खड़ग्या। 5अर बे बानै देखगे डर गी आपगो सिर नीचो कर'गे खड़ी रेई। जद बां सुरगदूतां बानै केयो, “थे जींवतै नै मरेड़ा में क्यामी ढूंढो हो? 6बे अठै कोनी क्यूंकै बो जींवतो हो'ग्यो। थे याद करो बा बात झिकी थानै बण गलील में बताई ही कै 7एक दिन ‘मिनख गो बेटो’ पापी लोगां गै हात ऊं पकड़ाईज्यैगो करूस पर चढायो जावैगो अर तीसरै दिन पाछो जींवंतो होज्यै'गो।” 8जद बिंगी बात बांनै याद आई। 9अर बां कबर पर ऊं पाछी आ'गे बिंगै ग्यारा चेला अर दूसरै लोगां नै सारी बात बताई। 10आ बात चेला नै बताण में मरियम मगदलीनी, योअन्ना अर याकूब गी मां मरियम अर केई लुगाईयां ही। 11पण बांगी बात बानै मजाक सी लागै ही अर बां भरोसो कोनी करयो। 12पण पतरस कबर कानी उठगे भाज्यो अर जा'गे देख्यो तो बठै यीसू गा मलमल गा कपड़ा पड़या। ओ देखगे बो हेरान हो'ग्यो। अर बठूं पाछो आ'ग्यो।
इम्माऊस गाम गै रा पर यीसू गो दो चेला नै मिलणो
(मरकुस 16:12,13)
13बिं दिन'ई बांगै चेला मू कोई दो जणा इम्माऊस नाम गै गाम में जाण लागरया। बो गाम यरुसलेम ऊं ग्यारा किलोमीटर दूर हो। 14बे यीसू गै बारै में होयड़ी बातां आपसरी में करता जाण लागरया। 15जद यीसू ई बांगै सागै रळग्या। 16पण परमेसर बां दोनां गी नजर बंद कर दी। झिकै ऊं बे बिनै पिछाण कोनी सक्या। 17यीसू बानै पूछयो, “थे किंगै बारै में बातां करण लागरया हो।” जद बे दोनूं घटना नै याद कर'गे उदास हो'ग्या अर रूकग्या। 18ओ सुणगे क्लियोपास नाम गो आदमी बांऊ बोल्यो कै तूं एक ई यरुसलेम में परदेसी है के झिकै नै कीं ठा कोनी कै आं दिनां में बठै के के होयो? 19यीसू बानै पूछयो किसी बातां? फेर बां बतायो नासरत आळै यीसू गै बारै में। बो परमेसर अर लोगां गी नजर में हिस्यो परमेसर गी बात बोलण आळो हो झिको चमत्कार करणै में अर परमेसर गो बचन सुणाण में भोत सकतीसाली हो। 20अर म्हारै मुख्य याजकां अर पंचायती नेतावां बिनै पकड़ागे मोत गी सजा दिरवा दी अर करूस पर चढा दियो। 21म्हानै भोत मोटी आस ही कै बो इसराएल नै छुटकरो देसी। पण ईं बात गै बदळै में ईं घटना नै आज तीसरो दिन हो'ग्यो। 22अर केई लुगाईयां म्हानै चकर में घाल दिया झिकी झांझरकै सी कबर पर गेई। 23अर आ'गे बतायो कै बठै बिंगी ल्हास कोनी अर सुरगदूतां म्हानै दरसण देगे केयो है कै बे जींवता हो'ग्या। 24जद म्हारा केई साथी कबर पर जा'गे देख्यो तो बां लुगाईयां गी बात साची निकळी। पण यीसू नै देख्यो कोनी। 25जद यीसू बानै केयो, “हे मूरखो, अर परमेसर गी बात बोलण आळा गी बातां पर कम बिस्वास करण आळो। 26ओ जरूरी कोनी हो के मसी दुनियां में दुख भोगै अर घणै आदर गै सागै सुरग में जावै।” 27जद यीसू बानै मूसा ऊं लेगे अर सारा परमेसर गी बात बोलण आळा ऊं सरू कर'गे सारै पवितर सासतर गै माऊं आपगै बारै में लिखेड़ी बातां गो मतलब समझा दियो। 28इतैन बे बिं गाम में पूगग्या झिकै में बां जाणो हो। पण यीसू ईं तरियां चाल्या मानो बे आ'गै जाणो चांवंता होवै। 29जद बां बिनै रोक लियो कै अब अंधेरो भोत पड़ग्यो आज म्हारै कनैई ठेरज्या। अर बे बांगै सागै ठेरग्या। 30जद बो बांगै सागै रोटी जीमण बेठयो तो बण हात में रोटी लेगे परमेसर गो धन्यवाद करयो अर तोड़गे बानै देण लागग्या 31जद बांगी आंख खुलगी अर बां बिनै पिछाण लियो कै ऐ तो प्रभु यीसू मसी है। अर बे बठूं गायब हो'ग्या। 32जद बे दोनूं आपसरी में बतळाण लागग्या कै जद बे आपणै सागै बात करै हा अर पवितर सासतर गो मतलब समझावै हा तो आपणै मन में भोत खुसी कोनी होई के? 33बे दोनूं बिं घड़ी खड़या होगे पाछा यरुसलेम आग्या अर बां ग्यारा चेला नै अर बिंगै साथिया नै बठै कठैई बेठया देख्या। 34अर बे आपसरी में केवा, “प्रभु यीसू साची जींवंता हो'ग्या अर बे समौन नै दिख्या है।” 35जद बां आपगै सागै रा में होएड़ी सारी बात बानै बता दी अर ओ ई बतायो म्हे बानै रोटी तोड़तां टेम किंया पिछाण्यो।
यीसू चेला नै दरसण दिया
(मत्ती 28:16-20; मरकुस 16:14-18; यूहना 20:19-23; खास चेला 1:6-8)
36बे ऐ बातां करण ई लागरया कै यीसू खुद बांगै बिचाळै आ'ग्यो। अर बानै केयो, “थानै सांती मिलै।” 37पण बे देखगे डरग्या अर घबराग्या अर समझयो कै आपां किसैई भूत नै देखण लागरया हां। 38यीसू बानै केयो, “क्यामी घबराओ?” अर “क्यामी मन में बेम करण लागरया हो? 39मैं यीसू ई हूं। ना मानो तो मेरा हात पग देखल्यो। मेरै हात लगागे देखल्यो क्यूंकै भूत गै तो हाड मांस कोनी होवै। झिको मेरै में थे देखो हो।” 40ओ केगे बण आपगै हातां पगां में कीलां लागणै गी निसानी दिखाई। 41जद खुसी गै मारै बांनै बिस्वास कोनी होयो अर अचंभो करै हा। जद बण बानै पूछयो कै थारै कनै रोटी है के? 42जद बां बिनै मछली गो भूंदेड़ो टुकड़ो दियो। 43अर बण बिं टुकडै़ नै लेगे बांगै सारा गै सांमणै खायो। 44फेर यीसू बानै केयो, “ऐ बातां मेरी बे है झिकी मैं थानै सागै रेंती बारी थानै बताई ही जिती बातां मूसा गै नेम विधान में अर परमेसर गी बात बोलण आळा अर भजन संहिता गी किताब में मेरै बारै में लिखेड़ी बे सारी पूरी होणी जरूरी है।” 45जद बण पवितर सासतर समझण खातर बांगी बुद्धी खोल दी, 46अर बानै केयो, “इंया लिखेड़ो है कै मसी दुख भोगैगो, अर तीसरै दिन मरेड़ा माऊं पाछो जींवंतो हो जासी, 47अर यरुसलेम ऊं लेगे सगळी जातियां में बिंगै नाम में ओ परचार करयो जावैगो कै झिका मन बदळ गे माफी मांगैगा बांगा पापां नै परमेसर माफ करैगो। 48थे आ सगळी बातां गा गुवा हो। झिकी थे देखी है अर सुणी है। 49झिकी पवितर आत्मा देण गो वायदो मेरै पिता परमेसर थारूं करयो है बिनै भोत बेगो थारै उपर उतारूंगा अर जद तांई पवितर आत्मा आ'गे थानै सामरथ ऊं ना भरै जद तांई थे ईं गाम में ई रेईयो।”
यीसू गो सुरग में जाणो
(मरकुस 16:19,20; खास चेला 1:9-11)
50अर केई दिनां बाद यीसू बानै यरुसलेम नगर ऊं बारै बेतनियाह नगर तांई लेग्या, अर आपगा हात चक'गे बानै आसिस दी। 51आसिस देंता गेया अर बांऊं न्यारा होंता गेया अर बिनै सुरग में जांता नै सगळाई देख्यो। 52जद सगळा लोग बिनै झुकगे परणाम करयो अर भोत आनंद करता पाछा यरुसलेम आग्या, 53अर बे रोज मिन्दर में जा'गे परमेसर गी स्तुति करता हा।
Chwazi Kounye ya:
लूका 24: BGQ
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2023 (Active), Wycliffe Bible Translators, Inc. All rights reserved. © WIn Publishing Trust