मत्ती 4
4
ती़ह गो-छ्येवागी येशूला ङ्याहम च्येक्यो
(मर्क १:१२-१३; लूक ४:१-१३)
1ओ़ह तिङले ती़ह गो-छ्येवागी येशूला ङ्याहम च्येच्येला नाम्पार-ताहक्पा थुगी येशूला रिह-काम्बुला नोम फेप्सीन।#हिब्रू २:१८; ४:१५ 2रिह-काम्बुला येशूगी ङ्यिहन ज़्यिप-च्यु दाङ नुहप ज़्यिप-च्यु थु ङ्युङने ज़्य़ू नाङसीन। ओ़ह सोङबे येशू ज्यिबुराङ टे़दी येहकें। 3ओहजेला ती़ह गो-छ्येवा येशूसाला ओहङदी, “तेहम्बाराङ राहङ किन्ज्योगी स़ेबु यिहन्सीमानानी दि तोहया़ला खुरा डोज्यु म़ेदी सुङ नाङदोङ ले!” म़ेदी मासीन। 4यिहॱनाङ येशूगी दि ल़ेहमु सुङदी ल़ेहन क्याहप नाङसीन, “सुङरापला दि ल़ेहमु प्री़हदी येहबा– ‘साहएँ स़ेह च्यी़गीराङ मिह थार मी़हखुएँ, यिहॱनाङ खो किन्ज्योगी स्याहललेगी थेन्ग्योकी सुङ रे़ह-रे़हगीराङ थार्कें यिहम्बा।’” #व्य ८:३
5ओ़ह तिङला ती़ह गो-छ्येवागी येशूला नाम्पार-ताहक्पा क्याहसा यरूशलेमला ख्येर्सीन ओहले छ्योखाङकी चेला ख्येर्ती मासीन, 6“तेहम्बाराङ राहङ किन्ज्योगी स़ेबु यिहन्सीमानानी दिलेगी माहर छ्योङ नाङदोङ च्यिबेमाना सुङरापला दि ल़ेहमु म़ेदी प्री़हदी येहबा–
‘किन्ज्योगी राहङकी तेहन्दाला मिहरोगी स्यिहङगामकी स्याहप्च्यीया़ला ताङ नाङज्ये येह,
ओहले राहङगी स्याहप तोहला माह फो़ज्यु म़ेदी खुङया़गी राहङला लाहक्पा लाहक्पालाॱराङ सेहच्ये येह’।” #भज ९१:११,१२
7येशूगी खोला सुङ नाङसीन, “सुङरापला दि ल़ेहमुॱआङ प्री़हदी येह– ‘ख्येगी चो़वो छ्येवा राहङगी किन्ज्योला ङ्याहम-छे माहबे’।” #व्य ६:१६
8ओहले येहपाराङ ती़ह गो-छ्येवागी येशूला लाह थोम्बु च्यी़ला ख्येर्ती जाम्बुलीङगी थाम्ज्यीराङ क्याहल्सी दाङ ज़िज्यिद तेन्गेॱराङ मासीन, 9ओहले खोगी येशूला मासीन, “राहङगी ङाहला छ्या़ छाल्दी ज्याल्सीमाना दि थाम्ज्यी क्याहल्सी ङाहगी राहङला तेर्च्ये येह!” 10ओहजेला येशूगी सुङ नाङसीन, “ए ती़ह गो-छ्येवा, दिलेगी सोङ! च्यिबेमाना सुङरापला दि ल़ेहमु प्री़हदी येहबा– ‘ख्येगी चो़वो छ्येवा राहङगी किन्ज्यो च्यी़लाॱराङ ज्याल्दोङ, ओहले किन्ज्यो च्यी़मे च्यी़लाॱराङ स्याहप्तो डुप्तोङ’!”
11ओहजेला ती़ह #व्य ६:१३ गो-छ्येवागी येशूला क्युर ज़्या़दी काहल्सीन ओहले स्यिहङगामकी स्याहप्च्यीया़ ओहङदी येशूला स्याहप्तो डुप्सीन।
येशूगी गालीलला राहङगी छ्या़ले छ़ू नाङग्यो
(मर्क १:१४-१५; लूक ४:१४-१५)
12यूहन्ना चोन-खाङला छ्यिसीन दु माएँ ताम थे़दी येशू गालील ङो़ले फेप नाङसीन। #मत्ती १४:३; मर्क ६:१७; लूक ३:१९,२० 13यिहॱनाङ येशू नासरत क्याहसाला क्युर ज़्या़दी कफर्नहुम क्याहसाला ज़्य़ूज्येला फेप नाङसीन। कफर्नहुम क्याहसादी जबूलून दाङ नप्ताली साने़की छो-क्याहम्जोकी सुहरला येहकें। #यूह २:१२ 14दि ल़ेहमु पेहती यशैया लुहङतेम्बागी सुङ नाङग्योकी दि स्याहल तेहन्दा डुप्सीन–
15“ए यर्दन फार्केन छो ङो़ले डोएँ लाहमला येहकेन्गी जबूलून दाङ नप्ताली साने़की मिहया़
ओहले गालील साने़ला तेहकेन्गी लेहमेन क्यिहपागी मिहया़! #यशै ९:१,२
16ना़-जुबेला तेहकेन मिहया़गी क्या-साङे छ्यिम्बुज्यी थोङज्ये येह।
स्यिवा दाङ ना़-जुबेला छ्यिक्योया़, ख्याया़
थो़ला क्या-साङे येहसेर छ्यिम्बुज्यी क्याहप्च्ये येह।”
17ओ़ह ती़हजी यिहन्ज्यु येशूगी दि ल़ेहमु सुङदी सुङ ख्येप्टा नाङज्ये छ़ूसीन, “सेमगी स्या़बा पेहती तिहक्पा पाङदोङ च्यिबेमाना किन्ज्योगी क्याहल्बु जेकेन्गी ती़हजी लेप्च्ये पेह सिहन्दी येह।”#मत्ती ३:२
येशूगी ङ्याहबाया़ला क़े क्याहप नाङग्यो
(मर्क १:१६-२०; लूक ५:१-११)
18ङ्यिहमा च्यी़ गालील छो-क्याहम्जोगी सुहरता सुहर फेप्नाङगेमु येशूगी ङ्याहबा मेहन्दा ङ्यी़ छ्युला ङ्याहटा क्याहप तेहक्यो ज़ी़ नाङसीन। खुङ पत्रुस माएँगी सिमोन दाङ खोगी नो़ह अन्द्रियास यिहन्गे। 19ओहले येशूगी खुङ ङ्यी़ला सुङ नाङसीन, “ङाहगी तिङ ङ्यादी स्यो, ङाहगी ख्याया़ला मिह ज़ुङगेन्गी ङ्याहबा ज़ोज्ये येह।” 20दि थे़-लुहङ मे़हबाराङ खुङ ङ्यी़गी राहङगी ङ्याहटाया़ ओ़हलाराङ क्युर ज़्या़दी येशूगी तिङदा तिङ काहल्सीन।
21ओहलेगी फेप्केनॱराङ जेकेमु येशूगी जब्दियागी पुह पिन ङ्यी़ याकूब दाङ यूहन्नाला खुङ ङ्यी़ आबा ङ्याम्बुराङ टुह-छ्युङला तेहती ङ्याहटा च्ये़दी तेहक्यो ज़ी़ नाङसीन, ओहले येशूगी खुङया़ला क़े क्याहप नाङसीन। 22ओ़हजेलाराङ खुङ ङ्यी़ टुह-छ्युङ दाङ आबाला क्युर ज़्या़दी येशूगी तिङदा तिङ काहल्सीन।
येशूगी नेहपाया़ला टा़ह च्य़ू नाङग्यो
(लूक ६:१७-१९)
23ओहले येशूगी खुङया़गी छो़खाङया़ला लोप्केॱराङ, किन्ज्योगी क्याहल्सीगी तेहन्दाला लेहङगु या़हबुया़ स्येकेराङ, ओहले मिहया़ला क्याहप्क्योगी नमे-नाजो नाहजाया़ दाङ ज़ुबुगी ने़-क्यालया़ला टा़ह च्य़ू नाङदी गालील साने़ काहङ्येॱराङ कोरा क्याहप नाङसीन। #मत्ती ९:३५; मर्क १:३९ 24ओ़ह सोङबे गालील साने़की पोहला येहकेन्गी सिरिया क्याहल-खाप काहङ्येॱराङ येशूगी जे नाङग्योकी जेबापया़गी तेहन्दाला ख्येप्टा काहल्सीन। मिहया़गी यिहन्जे मिहन्जे नाहजाया़ दाङ क्येन क्याहप्क्यो नेहपाया़ला येशूसाला ख्योङसीन। खुङया़ नाहङला रेहरेला ल्हेन्डी स्युहक्यो येहकें, रेहरेला ज़ा नाहजा क्याहप्क्यो येहकें ओहले रेहरे ओङबु स्योरक्योगी मिहया़ येहकें। येशूगी थाम्ज्यीलाराङ टा़ह च्य़ू नाङसीन। 25ओहले गालील, डेकापोलिस, यरूशलेम, यहूदीया दाङ यर्दन चाङबुगी फार्केन यिहन्ज्युगी मिह-माहङ छ्यिम्बुज्यी येशूगी तिङ ङ्यादी ओहङसीन।
Chwazi Kounye ya:
मत्ती 4: HYLM
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2023 (Active), Wycliffe Bible Translators, Inc. All rights reserved.