Kejadian 8
8
1Ila mokon deipra dakuramupane, Allahdi Nuh cap, er nyapsilip cap, sun cap kikiman kunmai gam keca yala-yala yuma cap, tupa teninmaua cadi, erdi peipupa, ila mungna kupupa, amokon meda yambula di kwerepbanmaue. 2Uda, laut mokon pumbon kwamu me bungna cap, im deiki di dokotenmau mokon capda, Allahdi peipupa, ayuma cepropupa, gum kupu. Tonda, ila mo cemau ngeda, gum kupupa, dou mapu.
3-4Ukupupa, tuai mutu ban-ban yuma deiki deipmau mokonda, tupa-tupa ceprobanmau. Cepropnen kwerepbanmauanen, denge weik 150 tumi konum kupupa, ware yoneitam bari, tumida tanggal tujuh belas (17) deiki di kwerepbanmaupa, agapung co peda, mokon deiki kwerepudi, ila mutu dup deiki tara bungyau. Amutu dup sida, Ararat mutu perami. 5Gapung co dabukmaupane, mokonda pio tupa cepropnen kwerepbanmaupane, sepuluh war dinin tanggal satu tumi deiki di, Ararat mutu dup dana-dana tarange yuma, mokon pumbon di belepupa, katuai kupu.
6Agapung co acapu bungmaupane, tumi denge weik, 40 tumi konum kupupa, Nuhdi agapung co dela deiki tara potokamu jendela, bisi tenpu paktapu. 7Paktapu dingeda, tenpu ma, nong weik mirin ma, er sida kong-kong ma loptapupa, amadi dau tara benapyane, tamupra atarapu yakanmauanen, pio ukemamupane, mokon yuma konum cepropu tarupuda, tuai kwererbeu. 8Amada pio embanapu, embanapu kemaua cadi, yuk tumida, Nuhdi yal ma utopu ma ton loptapra dokotepupa, lakra benmaue. Ada, ‘Mokon yuma konum cepropupa, tuai mutu katuai kuprepa, ngokra betu do, gum do?’ tenen, ama dokotepu.
9Yal madi, ‘Dan cei ngoktene do?’ tenen, pio lakra banmauanen, dana-dana tara yuma dipetepra banmaupane, tuai mutu ban-ban yumada, mokon tupa kupka tep, Nuh er gapung co ati kunmauaipu tamupra yaue. Nuhdi ajendela bisi neitamaipu, er buru bura tara dokotepupa, amada er buru deiki yana bukmaupa, dopra ati pumbonpu deipu. 10Ukupu dingeda, Nuhda yoneitam bari tumi ton cap, tali dakunmaupane, yoneitam tumi konum kupupa, yal ma utopu ma ton dopra, jendela bisi bura dokotepu.
11Ipna taru dokotepupa, Nuhdi keteng komuni neitamai yumada, ama ton men epu dinin, keteng wengbenkou tarupuda, ama tamupra yaupa, Nuh dipetepupa, er sipyal pumbonda, ukupu topmau ara co bo ton talepmaupa, epu. Aco bo epka deiki di, ‘E, ukutaru tuai mutu deiki kwamu mokon yuma, konum cepropmare’ tenen, kael kepu. 12Nuh kael kepudi, ‘Yoneitam tumi deiki di ton cap tali dakunkamne,’ tenepudi, dakunmaupane, yoneitam tumi konum kupupa, ayal ma utopu ma ton cap loptapupa, lakra beu. Beu dinin, ataruda ama Nuh damai tamupra men yaue.
13Nuhda, keteng tamun denge weik, 601 tahun konum kupu tumi, war tenpu, tanggal satu deikida, amokon yuma pio cepropupa, gawal dakupa, tuai mutu ban-ban yuma kalapropupa, teleppu kupu. Ukupupa, Nuhdi gapung co deiki dopu ati arum yuma uruprapudi, tuai tara dana-dana dipetepudi, ‘E, tuai yumada, konum kalapmara cadi, telep kupre’ tenen, kael kepu. 14Ada war butene dinin, tanggal 27 deikida, tuai mutu ban-ban yuma konum kalapka cadi, teleppu kupu. 15Teleppu kupka cadi, Allahdi Nuh tep upepu. 16“Kan cap, kan ner cap, kan nyapu cap, sundi domi nerapu cap, sun yumada agapung co deiki dopmum ati tapra, bura tara tali lupra yakaso.
17Yamum taruda, sun cap kikiman kure keca, ma cap, gam kure keca cap, tuai deiki embaramre keca cap, akeca yala-yala yuma akuretopu dopra, bura yankurume. ‘Akeca-keca yumada, nyakdangedi, sun nyapu weika di deipmengedi, gung pio weik kupbankameng’ tenen, akeca-keca yuma loptapkurume,” pepu. 18Allahdi upepra deipka tep, Nuh cap, er ner cap, sun nyapu cap, sundi domi nerapu cap, gapung co di pumbon di bura tara bei.
19Tonda atarupuda, tuai mutu kuramu gam keca yuma cap, tu deiki yanipra embaramu keca cap, ma cap, akeca-keca tuai mutu kure keca yala-yala yuma, yuk-yuk dinin, bura yakanmaidi, bendopi. 20Ukupipa, Nuhdi, ‘Allah si erepra, er tep gispal dopkun’ tenen, pala gel taplakra yakeipudi, Allah er si Yahweh, er karen keca tep keteneipu. Ada, menopa Allahdi, “Agam kure keca telepe, ama yalada telepe,” peipu yala kecapu, yambula di dopra popudi, pala gel taplakra yakeipmaua deiki, uku sekudi, akeca yuma uku dongopu.
21Nuhdi, Allah er gispal dona tep, akeca yuma uku dongopupa, uku jenmaupane, nintong telepnge welepupa, Allah er si Yahweh gekepudi, ‘Telepe,’ tenepu. Utenepudi, Allah er dipru neitamai, ange ton tenepu. ‘Uda, ukutaru di dipra doryakankamre taru neitamai yumada, nimi tuai nesala tep, tuai mutu ton cap, ikin keca deipra, mali kupra men deipkamne. Tuai mutu yuma tep, ka di ton cap men wipkamne.
Nimi tuai nesala yumada, ukupu deipmenge taru di dipra, sun gam kunge taru neitamai yumada, sun kange tenenge keca cap, sun dipru putaramre keca yuma capda, pio malipu kurur dinin, tuai mutuda kange di ton cap mali men deipkamne. Tuai mutu tep, ka di ton cap men wipkamne. Tonda, tuai mutu gam kure keca yala-yala yuma popra, gum kupra deipmantopu, yuk taruda kange di ton cap men kupkamne,’ tenepu.
22Tonda, ‘Tuai mutu ban-ban yuma, tupa kunkamre taru neitamai yumada, pio men gum kupkamre keca pepkune. Ada, yal keca koun taru cap, ekrepa kin taru cap, bul li cap, bupu li cap, dou maramre taru cap, mo cap, kapi cap kuramre taru cap, keteng komuni cap, lukunda cap, akeca-keca yuma pio tupa kunkamre. Tuai mutu tupa kure taruda, akeca men gum kupkamre,’ tenepu. Ada, Allah er kange dipru neitamai di tenepu.
Chwazi Kounye ya:
Kejadian 8: KNTOT
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
©2022 Wycliffe Bible Translators, Inc