Marcos 11
11
Kívɨ Jesús ñuunꞌ káꞌnú Jerusalén
(Mateo 21:1-11; Lucas 19:28-40; Juan 12:12-19)
1Sáá nku̱yatin ráa ñuunꞌ káꞌnú Jerusalén, xíꞌna nkenta ráa kuaríáꞌ Betfagé jín ñuunꞌ Betania, ya̱ káá jie̱ꞌe̱ꞌ yuku Olivos, jee nta̱jí Jesús u̱vi̱ꞌ rá te̱e súkuáꞌa re̱ꞌ ráa, 2jee nkachiꞌ re̱ꞌ nu̱u̱nꞌ ráa:
―Kuáꞌán rán kuaríáꞌ káá ichinúúnꞌ rán. Jee sáá ki̱vɨ rán yukuán, jee ntañúꞌún kuitɨꞌ naniꞌinꞌ rán ɨɨn burrúꞌ lúlí jiáá núꞌníꞌ, ya̱ ni ɨɨn ñɨvɨ ni ntiáꞌan kosoꞌ maa. Jee nanají rán maa kiji rán jín‑i. 3Jee ré ɨɨn ñɨvɨ kachiꞌ‑i nu̱u̱nꞌ rán: “¿Na̱chi sáꞌá rán sukuán?”, kachiꞌ rán nu̱u̱nꞌ‑u: “Maá I̱toꞌoꞌ‑ó jíniñúꞌún maa. Jee ya̱chi̱ꞌ natají i̱i̱ꞌ re̱ꞌ ti̱ꞌ yaꞌá” ―nkachiꞌ Jesús nu̱u̱nꞌ ráa.
4Jee ña̱ꞌa̱nꞌ ráa, jee nna̱niꞌinꞌ ráa burrúꞌ, núꞌníꞌ ti̱ꞌ yuíchí káꞌnú ichinúúnꞌ ɨɨn yuvéꞌí. Jee nna̱nají ráa ti̱ꞌ. 5I̱ña̱jée rá ñɨvɨ káꞌví ni ya̱ íñɨ́ yukuán nkachiꞌ ráa nu̱u̱nꞌ rává:
―¿Ná sáꞌá rán ya̱ nánají rán burrúꞌ yaꞌá?
6Jee ni núvíꞌ rá te̱e vá nkachiꞌ sáni ya̱ nkachiꞌ Jesús nu̱u̱nꞌ ráa. Jee njia̱ꞌa rá ñɨvɨ kua̱ꞌa̱nꞌ ráa jín ti̱ꞌ. 7Jee sáá ña̱keꞌen ráa burrúꞌ lúlí, jee nchi̱só ráa saꞌma ráa ya̱ta̱ꞌ ti̱ꞌ, jee ña̱ko̱so̱ꞌ Jesús ti̱ꞌ. 8Kue̱ꞌe̱ꞌ rá ñɨvɨ ñakɨnꞌ ráa saꞌma ráa iniꞌ ichi, jee rá inka ka̱ꞌ ñakɨnꞌ nayúkuꞌ, ya̱ ñeꞌneꞌ ráa nu̱u̱nꞌ rá yutun. 9Jee rá ñɨvɨ kua̱ꞌa̱nꞌ ichinúúnꞌ re̱ꞌ jín rá ñɨvɨ níkɨ́nꞌ ya̱ta̱ꞌ re̱ꞌ nka̱najíín ráa:
―¡Sikáku ránuꞌuꞌ! #11:9 Hosanna ví tu̱ꞌun yaꞌá ya̱ kúvi ɨɨn tu̱ꞌun arameo. ¡Na̱ ka̱ꞌ netuꞌ ka̱ꞌ kúvi te̱e ya̱ va̱ji‑i nu̱u̱nꞌ súví I̱toꞌoꞌ‑ó! 10¡Na̱ ka̱ꞌ netuꞌ ka̱ꞌ ya̱ va̱ji nakui̱ñɨ̱ꞌ re̱ꞌ nu̱u̱nꞌ tátáꞌ‑ó David #11:10 David nkuvi rey ya̱ nta̱túníꞌ re̱ꞌ rá ñɨvɨ ñuꞌun ñuunꞌ Israel yanaꞌán víꞌí. sáva tatúníꞌ maáréꞌ nu̱u̱nꞌ‑ó! ¡Hosanna! Na̱ ka̱ꞌ ñáꞌnú ka̱ꞌ Ndiosíꞌ ya̱ nééꞌ antivɨ́ ―nkachiꞌ rá ñɨvɨ.
11Jee nki̱vɨ re̱ꞌ ñuunꞌ káꞌnú Jerusalén, jee kua̱ꞌa̱nꞌ re̱ꞌ nu̱u̱nꞌ veñu̱ꞌun káꞌnú. Nne̱ꞌyá re̱ꞌ nɨꞌɨ rá nantíñú yukuán. Jee kua̱ꞌa̱nꞌ re̱ꞌ ñuunꞌ Betania jín ni uxúꞌ u̱vi̱ꞌ (12) rá te̱e chi yánini ví‑i.
Nchi̱sónínu Jesús yutun higo ya̱ ntu kúun rá vixíꞌ
(Mateo 21:18-19)
12Jee ki̱vɨ̱ꞌ xtéñu̱ꞌún, sáá nkene ráa ñuunꞌ Betania, jee niso̱ko Jesús. 13Ne̱ íká ka̱ꞌ niniꞌ re̱ꞌ ɨɨn yutun higo ya̱ nééꞌ naꞌá yu̱ku̱ꞌ, jee ña̱ꞌa̱nꞌ nne̱ꞌyá re̱ꞌ ré nínta ya̱ vixíꞌ nu̱u̱nꞌ‑u. Sáá nkenta re̱ꞌ ntu̱náꞌ nnániꞌinꞌ re̱ꞌ, kua̱chi naꞌá yu̱ku̱ꞌ ni nééꞌ, chi nsú tiempúꞌ kúun higo ví‑i. 14I̱ña̱jée nkachiꞌ re̱ꞌ nu̱u̱nꞌ yutun vá:
―Ni nsáꞌ kajiꞌ ka̱ꞌ ni ɨɨn ñɨvɨ ya̱ vixíꞌ nú nɨ́ɨ́nkání.
Jee nteso̱ꞌo rá te̱e súkuáꞌa re̱ꞌ ráa ya̱ nkachiꞌ re̱ꞌ.
Nna̱saꞌá ninuꞌun Jesús veñu̱ꞌun káꞌnú
(Mateo 21:12-17; Lucas 19:45-48; Juan 2:13-22)
15Jee ña̱ꞌa̱nꞌ ráa ñuunꞌ káꞌnú Jerusalén, jee sáá nki̱vɨ ráa chíkéꞌi nééꞌ iniꞌ veñu̱ꞌun káꞌnú, jee nki̱jiéꞌé Jesús táváꞌ re̱ꞌ rá ñɨvɨ xíkó jín rá ñɨvɨ kéꞌen yukuán rá nantíñú sókóꞌ rá ñɨvɨ. Jee nsi̱kókáni re̱ꞌ rá mesa rá ñɨvɨ sáma xu̱ꞌún jín silláꞌ rá ñɨvɨ xíkó paloma. 16Jee ntu jiáꞌa re̱ꞌ jiáꞌa ni ɨɨn rá ñɨvɨ níso ráa nantíñú chíkéꞌi nééꞌ iniꞌ veñu̱ꞌun vá. 17Jee nxi̱néꞌénꞌ re̱ꞌ rá ñɨvɨ tu̱ꞌun yaꞌá, jee nkachiꞌ re̱ꞌ nu̱u̱nꞌ ráa:
―Nu̱u̱nꞌ Tutuꞌ níso Tu̱ꞌun Ndiosíꞌ káchíꞌ ya̱: “Veꞌi ni̱ꞌ kuna̱ní veꞌi nu̱u̱nꞌ káꞌánꞌ nɨꞌɨ ñɨvɨ ñɨ̱vɨ́ jín ni̱ꞌ.” Soo suvirán nsa̱ꞌá maa ɨɨn kava rá kui̱ꞌná ―nkachiꞌ Jesús nu̱u̱nꞌ ráa.
18Jee rá su̱tu̱ꞌ kúñáꞌnú jín rá te̱e xínéꞌénꞌ jie̱ꞌe̱ꞌ tu̱ꞌun nta̱túníꞌ Ndiosíꞌ yanaꞌán, jee sáá nteso̱ꞌo ráa tu̱ꞌun yaꞌá nkachiꞌ re̱ꞌ, jee nki̱jiéꞌé ráa núkú ráa na̱ja kuvi kaꞌniꞌ ráa re̱ꞌ. Chi yúꞌví ráa maa, chi nɨꞌɨ rá ñɨvɨ nti̱vɨ́ xíniꞌ jie̱ꞌe̱ꞌ ya̱ xínéꞌénꞌ‑e.
19Sáá nkua̱a̱ꞌ jee nkene Jesús jín rá te̱e súkuáꞌa re̱ꞌ ráa nu̱u̱nꞌ ñuunꞌ vá.
Nnachi yutun higo ya̱ ntu nkúun rá vixíꞌ
(Mateo 21:20-22)
20Sáá njia̱ꞌa ráa ya̱neꞌenꞌ, jee niniꞌ ráa yutun higo, jee ya̱ nɨꞌɨ‑ɨ nnachi ne̱ jín yoꞌo‑o. 21Jee sáá nna̱ku̱ꞌun iniꞌ Pedro ya̱ nkachiꞌ Jesús nu̱u̱nꞌ yutun vá, jee nkachiꞌ‑i nu̱u̱nꞌ Jesús:
―¡Mestrúꞌ! ¡Kune̱ꞌyá! Yutun higo vá, ya̱ nchi̱sónínu nú maa, jee ya̱ nnachi‑i.
22Jee nna̱xiníkó Jesús jee nkachiꞌ‑i nu̱u̱nꞌ ráa:
―Kuneí iniꞌ rán Ndiosíꞌ. 23Máá nááꞌ vá káchíꞌ ni̱ꞌ, ya̱ néni ɨɨn ñɨvɨ ya̱ kachiꞌ nu̱u̱nꞌ yúkú yaꞌá: “Kuiyo jee sukuíkó maánú nu̱u̱nꞌ nteñúꞌún.” Retú ntu íyó tu̱ꞌun síjiáni iniꞌ ánímaꞌ ñɨvɨ vá, soo ínúꞌ iniꞌ‑i ya̱ kuvi ya̱ káchíꞌ‑i, jee sikúnkuvi Ndiosíꞌ maa. 24Káchíꞌ ni̱ꞌ nu̱u̱nꞌ rán ya̱ nɨꞌɨ ya̱ ka̱ka̱nꞌ rán, ni jíkánꞌ táꞌvíꞌ rán nu̱u̱nꞌ Ndiosíꞌ, i̱nu̱ꞌ iniꞌ rán ya̱ ya nni̱ꞌi̱nꞌ rán maa, jee ni̱ꞌi̱nꞌ rán maa. 25Jee sáá káꞌánꞌ rán jín Ndiosíꞌ, jee kunekáꞌnú iniꞌ rán jie̱ꞌe̱ꞌ néni ɨɨn kua̱chi ya̱ nsa̱ꞌá ñɨvɨ si̱kɨ̱ꞌ ránoꞌó. Saꞌá rán suꞌva, sáva suni Tátáꞌ rán, ya̱ nééꞌ re̱ꞌ antivɨ́, kunekáꞌnú iniꞌ re̱ꞌ jie̱ꞌe̱ꞌ kua̱chi rán ya̱ njia̱ꞌa nsa̱ꞌá rán nu̱u̱nꞌ tu̱ꞌun re̱ꞌ. 26[Retú ntu nékáꞌnú iniꞌ rán, jee suni Tátáꞌ rán, ya̱ nééꞌ antivɨ́, nsáꞌ kunekáꞌnú iniꞌ re̱ꞌ jie̱ꞌe̱ꞌ kua̱chi rán] ―nkachiꞌ Jesús.
Tiñu níso Jesús
(Mateo 21:23-27; Lucas 20:1-8)
27Jee nkenta tuku ráa ñuunꞌ káꞌnú Jerusalén. Jee ni jíka Jesús chíkéꞌi nééꞌ iniꞌ veñu̱ꞌun káꞌnú, jee rá su̱tu̱ꞌ kúñáꞌnú, jín rá te̱e xínéꞌénꞌ jie̱ꞌe̱ꞌ tu̱ꞌun nta̱túníꞌ Ndiosíꞌ yanaꞌán, jín rá te̱e kúñáꞌnú nku̱yatin ráa nu̱u̱nꞌ re̱ꞌ. 28Jee ni̱ka̱tu̱ꞌún ráa re̱ꞌ:
―¿Ná tiñu níso nú ya̱ sáꞌá nú rá tiñu yaꞌá?, áxí, ¿né ɨɨn ntaji tiñu níso nú ya̱ sáꞌá nú rá tiñu yaꞌá rúja?
29Jee nna̱xiníkó Jesús nu̱u̱nꞌ ráa:
―Suni katu̱ꞌún ni̱ꞌ ránoꞌó ɨɨn tu̱ꞌun. Ré nna̱xiníkó rán nu̱u̱nꞌ ni̱ꞌ, jee naxiníkó ni̱ꞌ nu̱u̱nꞌ rán ná tiñu níso ni̱ꞌ ya̱ sáꞌá ni̱ꞌ rá tiñu yaꞌá. 30¿Né ɨɨn njia̱ꞌa tiñu nu̱u̱nꞌ Juan nkisikuánuté re̱ꞌ? ¿Á Ndiosíꞌ, ya̱ nééꞌ antivɨ́, áxí á rá te̱e rúja? Naxiníkó rán nu̱u̱nꞌ ni̱ꞌ ―nkachiꞌ Jesús nu̱u̱nꞌ ráa.
31Saájee nna̱túꞌún maáráa, jee nkachiꞌ ɨɨn inka ráa:
―Retú kachiꞌ‑ó ya̱ Ndiosíꞌ, ya̱ nééꞌ antivɨ́, njia̱ꞌa‑a tiñu vá nu̱u̱nꞌ Juan, jee kachiꞌ re̱ꞌ: “Saájee, ¿na̱kui chi ntu nínúꞌ iniꞌ rán rá tu̱ꞌun ya̱ nkachiꞌ Juan rúja?” 32Soo ¿na̱ja kúvi kachiꞌ‑ó rá te̱e njia̱ꞌa tiñu vá nu̱u̱nꞌ re̱ꞌ?
Nkachiꞌ ráa suꞌva chi yúꞌví ráa rá ñɨvɨ kue̱ꞌe̱ꞌ. Chi ínúꞌ iniꞌ nɨꞌɨ rá ñɨvɨ, ya̱ Juan nkuvi nijia ɨɨn te̱e ya̱ nna̱kani re̱ꞌ tu̱ꞌun ya̱ nkene yuꞌú Ndiosíꞌ. 33Saájee nna̱xiníkó ráa nu̱u̱nꞌ Jesús:
―Ntu jíníꞌ ránꞌ.
Saájee nkachiꞌ Jesús nu̱u̱nꞌ ráa:
―Suni nuꞌuꞌ, ni nka̱chíꞌ ni̱ꞌ nu̱u̱nꞌ rán na̱ tiñu níso ni̱ꞌ ya̱ sáꞌá ni̱ꞌ rá tiñu yaꞌá.
Chwazi Kounye ya:
Marcos 11: meh
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2022, Wycliffe Bible Translators, Inc. All rights reserved.