Matəw 2
2
Mbə́ kyay tənə ŋu zən Yeso
1Mbə́ ibə́ Yeso Betrehem á Judeya, mbə́ ibə́ uŋwen akə Amaʼazənə Herod mə́ ufon. Amaʼazənə agha sara, ba moʼ nu u kyay anó da itəni noʼ aba zənə nyamachugi mə duw awu ŋuw Yerusanem. 2Mbə́ pey yi biri kwi, “ŋwə̂ ŋunə ubə́ nu, ayi mə ufon abú ba Jû u mə aŋwayn? Mba zən utəni ma aba zənə nyama chugi mə duw awu anigə mba zaʼa iwumini uŋwen.”
3Amaʼazənə ufon Herod zəw anó zəŋ, yə toboro uŋwen, nibi toboro ba ujum mbənə mbə́ mə́ Yerusanem. 4Anigə yə́ tiya ba kyayn ambəŋ Nwiye nibi tiya ba mbənə mbə́ mə́ taʼa ba akə unoʼo ibiri abú úŋwen kwi, “U mi ibə́ wa ŋunə Nwiye zoʼo aŋwayn?” 5Mbə́ ywiri kwi, “U mbi ibə́ uŋwen Betrehem a Judeya anji zənə wa ukən Nwiye si ŋwaʼanayn kwi,
6‘U ngwə Betrehem ŋunə ngwə mə ungɨŋ abey Juda,
Cha ngwə mə ayə ŋwə̂ asin, chigə usin ujum mbənə umə Juda,
Damugə a tumə abey moʼ yi du ungɨŋ nigə,
Uŋunə umi tumə umbəŋ ba Izre.’”
7Amaʼazənə Herod zəw anó zəŋ, yə tiya ba mbənə umə kyay anó da itəni anjim anjim inwine amaʼazənə utəni wu duw. 8Yə nwine nigə icha úŋwen a Betrehem ghayn kwi, “Mbən jeʼe kab ŋwə̂ wu anji chuŋ, Amaʼazənə mbən mi zən úŋwen, mbən wene zaʼa ighayn iniŋ da ami ŋú wumine uŋwen.”
9Amaʼazənə mbə́ zəw anó zənə ufon wu ghayn abú úŋwen, mbə́ du ni ŋuw. Mbə́ pey anji izən utəni ŋunə mbə́ zən aba zənə nyama chigə mə́ duw awu. Utəni wu mə ŋuw imbəy uma. Yə́ pey yi təm igun asin zənə ŋwə̂ wu mə́ awu. 10Amaʼazənə mbə́ zən utinə wu, iwuʼi sugi ungɨŋ fiŋ uma. 11Mbə́ nyi ŋú ungɨŋ na zənə utəni wu təm awu igun. Anigə izən ŋwə̂ wu nə ingo ma Meri. Mbə́ zən nigə izum utəw anwi asey iwumini uŋwen. Mbə́ zá ubama uma ichi gol, frankinsens foro mur ineʼe ŋwə̂ wu awu. 12Nwiye chere mbə kyayn itəni wu anjəm kwi, ka ugha chigə uma aki Herod, anigə mbə́ num inji chini iŋu ungɨŋ abey uma.
Josef num məri nə ŋwə̂ u nod ŋuw Ijip
13Amaʼazənə ba mbənə umə́ kyay anó da itəni si ŋu ma, angəd Asɨyisəg ŋu abú Josef anjəm pey yi ghayn abú uŋwen kwi, “Noʼo inum ŋwə̂ ŋunə nə ingo ma mbən noro ŋuw Ijip. Mbən chomo awu pey Amaʼazənə, ami ghayn inen kwi mbən wene zaʼa damugə Herod yə kaba izwere ŋwə̂ ŋunə.”
14Anigə Josef noʼ atey, inum ŋwə̂ wu nə ingo ma u ŋuw Ijip aba awə afəb. 15Mbə́ chomo awu pey Amaʼazənə Herod kuw. Anó zəŋ num usin da inayn zənə Asɨyisəg chigə anjim wa ukən ghayn a duw akə asiʼ kwi, “Mə́ tiya uŋu ŋwə̂ u du ungɨŋ Ijip.”
Herod zwere buŋ anóm ubo
16Amaʼazənə Herod zən kwi ba mbənə umə kyay anó da itəni tama uŋwen, Yə siy itəm azəd. Anigə yə cha usogwi a Betrehem foro ungɨŋ usin ujum mbənə umə iyad iyad kwi, u zwere buŋ anóm ubo ujum mbənə umə́ sə́ ŋuw itu abigə nibi zwere u mbənə cha u di si kə ituʼ abigə. Yə́ ghayn nigə damugə mbə́ kyay anó da itəni ghayn abú uŋwen kwi, amə ituʼ abigə nu utəni wu duw. 17Anigə anó zənə wa ukən Nwiye Jeremiya ghayn du akə asiʼ kwi,
18“Mbə́ zəw igəg moʼ a Ramah,
Igəg wu yə chwey isɨy nibi idey akə ikay,
Rashel yə idey buŋ ma,
Cha u di beni ma kwi u boŋo uŋwen,
Damugə buŋ ma ku.”
Josef, məri foro Yeso wene iŋuw Ijip
19Amaʼazənə Herod si ku, angəd Asɨyisəg buw abú Josef anjəm nu mbə́ mə́ bugə Ijip ighayn abú uŋwen kwi, 20“Noʼo num ŋwə̂ nə ingo ma mbənə wene ŋuw Izre damugə ba mbənə mbə́ mə́ kaba izwere uŋwen si ku.”
21Anigə Josef noʼ num ŋwə̂ wu nə ingo ma u wene ŋuw Izre. 22Asɨmə amaʼazənə Josef zəw kwi Achelus si jəg atən mbaʼ ma Herod sə tumə Judeya, yə god iŋu awu. Angəd chere uŋwen anjəm anigə yə ŋu aba abey Galeli. 23#Mak 1.24; Luk 2.39; Jon 1.45Yə pey yi chomo asin zənə umə tiya akə Nazared, da anó zənə ba ukən Nwiye ghayn a duw akə asiʼ kwi, “U mbi sə tiya uŋwen kwi wa Nazared.”
Chwazi Kounye ya:
Matəw 2: NGI
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2023 CABTAL