Luk 21

Ghəy zənə ayey uti ture Nwiye awu

(Mak 12.41-44)

1Yeso ŋú ungɨŋ imbəŋ Nwiye, yə noʼ atey izən umugə ba imbon umə zi ukab ungɨŋ akubi zənə umə zi uturu Nwiye awu ungɨŋ. 2Wə nibi zən ayey ukwaŋ moʼ umugə yə zi ufraŋ bigə ungɨŋ akubi wu. 3Wə ghayn nigə ighayn kwi, “Ayə ghayn asiʼ inen kwi ayey ukwaŋ uŋu zi ukab ungɨŋ akubi zəŋ chigə ma akə ba mbənə ujum. 4Damugə ba umbi ujum naʼ ukab amə akə u nanaʼ ŋunə umə abú úŋwən asɨmə ayey ukwaŋ koro abam ma zi ukab ujum ŋunə yə mə abú uŋwən.”

Yeso ghayn umugə u mə ŋú saʼa imbəŋ Nwiye

(Mat 24.1, 2; Mak 13.1, 2)

5Mbə məŋə-anó ma moʼ mə inayn da umugə u chimi imbəŋ Nwiye nə atey zənə amə ika unun foro nə u aghəy mbənə umə ture Nwiye ungɨŋ. Yeso ghayn abú úŋwən kwi, 6“umugə mbən mə zənə u aghəy mbəŋ, aney moʼ yi zaʼa nu cha itey moʼ mi chomo igun chini umbi tu atey zəŋ ujum asey.”

Ingəʼ yə abú ba mbənə unaga anjim Yeso

(Mat 24.3-14; Mak 13.3-13)

7Mbə məŋə-anó Yeso biri abú uŋwən kwi, “Ataʼa unó amə akə amaʼ ngiya nu unó mbəŋ ngwə ghayn umi duw? Amə anwini ngiya ami itey kwi amaʼ si kəʼ abú unó wu iduw?” 8Yeso ywiri kwi, “Mbən num azom nji wa moʼ yi ghəy mbən faba. Ba nanaʼ u mbi zaʼa inum uŋu ukum ini yeŋ yə ghayn kwi, ‘Amə uŋwən’ anigə ‘Amaʼ si kə’ mbən beni ngwən nu uŋwən. 9Amaʼazənə mbən zəw kwi ubey mbə maʼa bêd, izəw kwi ubey mbə kyaba mbən goro ngwen damugə ukudu unó mbəŋ u mbi mə awu asɨmə cha adi itey ma kwi isəg yə sə ŋú nwi.” 10Yeso ghayn abú uŋwən kwi, “Ubey mbi maʼa bêd nə ubey chini, ubey mbənə ifon mə tumə u mbi maʼa bêd nə ubey chini mbənə ifon mə tumə. 11Ichəw yi mə choʼo kwaʼa akə ingəʼ, ajəgə nə isɨgə iboŋ iyi du usin ujum, uyere unó umbi du azobo nu ba mi zən ni gəd. 12Anigə ki unó mbəŋ ujum sə ŋú du, u mbi ibiya gwen aghəy kwi mbən zəw ingəʼ, naʼa gwen kwi u saʼa ungɨŋ na bomi Izre, izi ngwen andəŋ. Umbi num ngwen iŋú ifigi ifon nə ifigi gobuna da aŋu. 13Amə apan zigə inen ighayn ukən uchuŋ. 14#Luk 12.11, 12Mbən num ungɨŋ itən fiŋ kwi cha mbən mi mə tumə ngwen inyo ichi anó itən igun 15damugə ayi naʼ inayn iwe inen nu cha wa moʼ akaʼa umbən ba abana umi taŋ kə iton inayn wu. 16U mbən mbaʼ nə u mbən ingwo, u mbən unya ayey nə unya anóm, umbən ba unebey nə u mbən uzi u mbi naʼa ngwen abú mbə tumə ba anigə u mbi zwere ba moʼ injən akaʼa. 17Ba jum mbi bana ngwən da aŋu. 18Asɨmə cha inyoŋ moʼ igun umbən atəw mi nim. 19Mbən təm akə asiʼ mbən yi jəg itəni.”

Yeso ghayn da umugə umi saʼa Yerusanem

(Mat 24.15-21; Mak 13.14-19)

20“Amaʼazənə mbən zən kwi akama usogwi si kad Yerusanem, mbən kyay kwi ama zənə u mi saʼa Yerusanem si tinə. 21Anigə ba mbənə umə Judeya mbi noro ikoʼ ŋú igun ugum, u mbənə u mə ungɨŋ abey umbi du, u mbənə umə iyad iyad, cha umi nyi ungɨŋ abey. 22Damugə ungɨŋ unəy awu, ‘Nwiye yi zi usaʼa igun ba’ da unó ujum mbənə mbə́ ŋwaʼanayn ungɨŋ inayn Nwiye duw akə asiʼ. 23Ingəʼ yi nyi igun ayey mbənə umə ni ibom foro igun u mbənə umə nə buŋ bó! Ungɨŋ unəy wu, ingəʼ iboŋ yi zaʼa igun isəg, Nwiye yi sə itəm abú ba Jû. 24Umbi zwere ba moʼ nə ibey bêd, u mbi num u moʼ nu ba ndəŋ iŋu ungɨŋ ubey ujum, ba mbənə ikwiy ba Jû u mbi təʼe Yerusanem pey ama zənə Nwiye si kwi unó mbəŋ u mbi du ami zaʼa.”

Nyə̂ wa yi wene izaʼa

(Mat 24.29-31; Mak 13.24-27)

25 # Nwi 6.12, 13 “Usoʼo unó mbi mə duw abú nyama chugi, úməg foro abú itəni. Ingəʼ yi nyi ungɨŋ ubey ujum akə igun isəg, utəw ba mbi mə bure umugə une iba mə gha swiʼe 26Ba mbi sə goro ifwayn kənə akə unó mbənə umi zaʼa igun isəg damugə Nwiye yi cha Azugə ma azaʼa azobo. 27#Nwi 1.7Amə akə amaʼ wu nu mbən mi zən Ŋwə̂ Wa umə zaʼa ungɨŋ ipaʼ nə ikay zənə imə abú uŋwən foro nə iwumini zənə imə abú uŋwən. 28Uno mbənə bə sə aghəy, mbən beʼere umbən utəw aneŋ azobo damugə injən ma idu angəʼ si tinə.”

Anó ikweme abú azad fig

(Mat 24.32-35; Mak 13.28-31)

29Yeso ghayn inayn maʼa zəŋ abú úŋwən kwi, “Mbən ney azad fig nə uzad mbi ujum. 30Mbən bə zən ama zənə ifuʼ fey mə duw, mbən kyay kwi uchi si tinə. 31Amə ichin ichin, mbən bə zən ama zənə unó mbəŋ si aghəy, mbən kyay kwi anó ufon Nwiye si tinə.”

32“Ayə ghayn asiʼ inen kwi, cha ingwaʼ ba zəŋ ujum mi ku nu cha unó mbəŋ ujum mi si du. 33Azobo nə isəg ayi chigə asɨmə cha inyi inayn mi noʼo chigə.”

Wə boŋ ichomo ikyiʼi

34“Mbən num azom, mbən izi ngwen itən fiŋ akə anó ni mə jəgə azəd kə akə anó ni mə nugə azəd kə imə tumə inyo akə u aghəy ungɨŋ isəg nji aney wu yi saʼa zaʼa yi ibiya ngwen numugə atam mə ibiya nyə̂. 35Damugə aney wu yi zaʼa yi ibiya ba jum mbənə umə igun isəg. 36Mbən chomo ikyiʼi akə umaʼ ujum ni chaʼara Nwiye kwi u naʼa ikay kwi mbən chigə unó mbənə umə iŋu du igha chaʼara kwi amə aghəy mbən təm ifigi Ŋwə̂ Wa.”

37 # Luk 19.47 Yeso num unəy wu ujum ni yə tey unó ungɨŋ imbəŋ Nwiye. A sə afəb, u yə koʼo ŋuw igun Ugum Olif. 38A sə afəfəb ni mbiri, ba ujum mbə ŋuw kuw uŋwən ungɨŋ imbəŋ Nwiye, iŋú zəw unó mbənə u mə ghayn.

Chwazi Kounye ya:

Luk 21: NGI

Pati Souliye

Pataje

Kopye