G%E9nesis 8
8
Rik'awik i nim laj jab'
1Are uri i Dios xk'un ma Noé chuk'ux, xaq i chikop chi je manxo je aj ru' taq ja, chikop aj pa taq es chi je o ru' chupam i nim laj kanuw; i Dios xupetsaj jun nim laj tew chwach i jyub' ta'aj tzajsab'al re i ya. 2Xaq xtz'aptaj uchi' ralaxb'al ya chuxe' li nim laj mar, xaq xtz'aptaj uchi' i kaj, xaq xik'aw i jab'. 3I ya kok'ilal xutikb'a qajik chwach ulew; are xk'is lajuj wuqwinaq (150) ij, i ya le lik naj chik qajnaq. 4Che i ij wuqlajuj re uwuq ik', are uri xkub'i i nim laj kanuw chi pacha ja puwi i jyub' Ararat. 5I ya k'a ktijin uqajik are xuriqa i lajuj ik', che i nab'e ij re i ik' le xe'aljin uwi i nimaq taq jyub'.
6Are xel kawinaq (40) ij ukulem i nim laj kanuw puwi i jyub' Ararat, are uri ma Noé xujaq i wantana chi ukanam kan che i nim laj kanuw are xu'ano, 7are uri xro'taj b'i jun joj; i joj le to' xsutinik roy-em uchaqijik uwach ulew. 8Te'uri xro'taj chub'i jun palomax, krilb'ej re we tzajnaq chik i ya chwach ulew. 9Xwiri i palomax le xuriq taj ipa xchaki wi, rumali xtzalij chik chila ipa o wi i nim laj kanuw chi pacha ja, man i ya k'a o chwach ronojel uwach ulew. Are uri ma Noé xuk'am an i palomax, xukoj chub'i ru' chupam i nim laj kanuw chi pacha ja.
10Ma Noé xroy-ej chik wuqub' ij, are uri xukamulij chub'i ro'taxik i palomax chisaq. 11I palomax le xtzalij li xqaj i ij, rok'am li jun uxaq che' puchi' chi olivo, k'ate u'ipim loq; are uri xretamaj ma Noé chi qajnaq chik i ya chwach ulew. 12K'a xroy-ej chik wuqub' ij, are uri xuroxmulij chub'i ro'taxik i palomax, xwiri che i uroxmul le i palomax xtzalij ti chaloq.
13Are o jun lajujwinaq jumo' (601) junab' che ma Noé, are uri xqaj i ya chwach ulew, che i nab'e ij re i nab'e ik', ma Noé xresaj uwi i nim laj kanuw chi pacha ja, xtaqen k'ulala, are uri xrilo chi chaqijnaq chik uwach ulew. 14Che i wuqub' juwinaq (27) ij re ukab' ik', are xchaqij uwach ulew. 15Are uri xch'aw i Dios che ma Noé, xub'ij: 16“Chatel li yet chupam i kanuw, awixoqil, je ak'ojol, xaq i je awalib', iwonojel chixel loq. 17Xaq cheawesaj li konojel ni'pa i chikop chi je o awu', chrij kichikopil: Tz'ikin, chikop je manxo, xaq i kejukmay chwach ulew; chek'uwalinoq, chek'iyaroq xaq chkinojsaj uwach i jyub' ta'aj”. Keje ile xub'ij i Dios che ma Noé.
18Are uri ma Noé ku' uk'ojol, rixoqil xaq i je ralib' xe'el li chupam i nim laj kanuw chi pacha ja. 19Xaq xe'el li konojel i jalajuj taq chikop, tz'ikin, chikop chi kejukmay chwach ulew, konojel ni'pa kkiyin kib' chwach i jyub' ta'aj, chrij kichikopil xe'el li chupam i nim laj kanuw chi pacha ja. 20I ma Noé xuyijb'a jun sujb'al sipon re i Ajwal, xuk'am i jalajuj taq chikop je ch'am xaq i jalajuj taq tz'ikin je ch'am, xeukamsaj xaq xeuporoj chwi sujb'al sipon le. 21I Ajwal are xusiq ruxlab' i sipon chi lik muy xub'ij: “Tupu lik utz ti urayijb'al kik'ux i winaq chkik'ak'alil loq, lik kink'oqoj ti chik uwach i jyub' ta'aj kumal ike, xaq kinchup ti chik kiwach konojel ni'pa o kik'aslemal, pacha xin-an che iri.”
22Tz'aqat k'a o i ulew,
ksach ti uwach i tikanik xaq i molonik,
uk'atanal uwach i ij xaq i ujoronal i tew,
sa'ij xaq i alaj,
pa'ij xaq i cha'ab'.
Keje ile xub'ij i Dios.
Chwazi Kounye ya:
G%E9nesis 8: ACHICUB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© Biblia Achí de Cubulco, Derechos reservados de Sociedad Bíblica de Guatemala