Matyo 6
6
I dii bòʼ mwam u fuu wə tə̀ ghə̂ a laa ghə
1Yeso n kəm dza tə ghə nə̀, “Ney na ghə̂mə zə, kə̂ ghaa nə̂ ghəŋŋənə ghəə a Kəzə̀ a ghaa ghə n sə̂ kə aghə̂ ni dii iwû nə̀ ghə̂ ghə i tɔʼɔ koʼo bə ghaa. Abə ghaa ghəŋŋənə sey, ghaa i keeli dzə way naamə kə loʼ kə n wɔ Bày ghaa idəŋ.”
2“I sey dii nə̀, abə ghaa fuunə wù laa n fə kə, kə̂ ghaa nə tɔŋɔnə ndɔŋ fə, tə̀ nghee ghə nəb ityim a ghəŋŋənə n ndaw tə udzəŋi tə ghə̂ a Təjuu nsə n faabə tə jìi. Ghə sey ghəŋŋə nə̀ ghə̂ ghə i kali tsuu ghə. N dza bə isəŋə tə̀ ghaa nə̀, ghə n sey keeli tən naamə kə ghə kə. 3Abə ghaa dza i fuu wù laa n gaamə zə, kə̂ ghaa nə ghəŋŋənə nə̀ wɔɔ kə ghaa kə kwɔɔ kə keeli fə key wɔɔ kə zə̂ə kə ghəŋənə. 4Sey nə̀ kə wù loʼ nə keelinə nə̀ wə mə fuu wù tii n gaamə zə. À loʼ Bày wə wey tə koʼonə ghəə ghey adzəm a tsəghənə nə kələm, tə i naamənə wɔ.”
Yeso dii aghə̂ kuum igɔŋŋə
(Luk 11.2-4)
5Yeso n nam dza ndow tə̀ ghə nə̀, “Abə ghaa dza i gɔŋŋə, kə̂ ghaa nə̂ ghəŋŋənə tə̀ a loʼ nghee ghə nəb ityim a ghəŋŋənə, n təŋkey, ghə ləghə ni təmi gɔŋŋə n ndaw tə udzəŋi tə ghə̂ a Təjuu nsə n faabə tə jìi sey nə̀, aghə̂ adzəm i koʼo bə ghə. N kuum dza bə tə̀ ghaa nə̀, ghə n sey keeli tən naamə kə ghə kə. 6Abə ghaa dza i gɔŋŋə, nyi ndòw n dzuu i ndaw zə, wə fii kɔʼ fuʼ u ndaw, wə gɔŋŋə ndòw tə̀ Bày wə̀ wey ghə koʼo way wi. Bày wə wey tə koʼonə ghəə ghey a tsəghənə nə kənyì i fuu wɔ n naamə kə. 7Abə wə gɔŋŋənə, ka i dza kuulə dzə ghəə ghə kənunu tə̀ a loʼ ghə̂ ghey ghə bəghəm way tə Zə̀ kə. Ghə moʼlə kə nə̀ Zə̀ kə i tɔʼɔ zow gɔŋŋə i ghə abə ghə gɔŋŋə daabənə. 8Kə̂ ghaa nə ghəŋŋənə tə̀ a loʼ ghə, n təŋkey, tə̀ ghaa ni bəb ighəə, à n loʼ nə̀ Bày ghaa n keeli zey fə key ghaa ləghənə. 9Sey, abə ghaa dza i gɔŋŋə, ghaa khə ni gɔŋŋə tsu nə̀,
‘Bày ghey idəŋ,
Ghey gɔŋŋə nə̀ ghə̂ ghə i fuu kɔʼlə mə n zəd zə.
10Bə səd tsu fɔɔ wə wə̀ fa n mbi idzəm,
Ghə̂ ghə i zow tə̀ wɔ fa aghəlitsə, tə̀ i loʼnə idəŋ.
11Fuu ghey n fəzəə wey u kpiinə tə̀ ghey na.
12Neyzəə ghəə a ghey a bəbə ghə,
Tə̀ ghey neyzəə soʼonə ghəə a bəbə ghey ghə̂ a loʼ a ghəŋənə tə̀ ghey.
13Kə wə nə bəghəm nə̀ vəətsəə a mɔm koʼ ghey,
Kee bəghəshi kə ghey n wɔɔ kə avəətsəə.’
14Abə ghaa neyzəənə bəb zə aghə̂ zə, Bày ghaa idəŋ î neyzəə soʼo bəb i ghaa. 15Abə ghaa kee tuunə ni neyzəə bəb zey ghə̂ a ghəŋənə tə̀ ghaa, Bày ghaa idəŋ î neyzəə soʼo way ghəə a ghaa a bəbə ghə.”
Yeso dii aghə̂ kuum dzuu i bam zə
16Yeso n dza tə̀ ghə nə̀, “Abə ghaa bamnə dzuu zə, kə ghaa nə njuʼu naŋŋənə koʼ tə tə̀ ghə nəb ityim a ghəŋŋənə, n təŋkey, ghə njuʼu naŋŋə tsuu təkoʼ tə̀ ghə̂ ghə koʼo bə nə̀ ghə bam idzuu. N dza bə isəŋə tə̀ ghaa nə̀ ghə n keeli tən naamə kə ghə kə. 17Abə ghaa bamnə dzuu ghə, tsoʼlə tsu na tûm usə̂ u ghaa wə, ghaa n saʼi kɔʼ kətow, 18kə̂ ghə̂ a nə koʼo keelinə nə̀ ghaa bam idzuu, a i khə kə Bày ghaa wey ghə̂ a koʼo way wi, sey, Bày ghaa wey tə kòʼonə ghəə ghey ghaa ghəŋŋənə nə kənyì, i naamə ghaa.”
Nyi naŋa na kûm i ghaa zə idəŋ
(Luk 12.33-34)
19Yeso n dza kpiʼi ndow tə̀ ghə nə̀, “Kə̂ ghaa nə zuŋŋə naŋanə fə̂ u ghaa wə fa n mbi, n luʼu kən dzî tə loʼnə ni kwu, səsoʼo tə u loʼ soʼonə ni fə, nkee ghə̂ a tsɔŋɔ a loʼ ni bə tsɔŋ. 20Fət nyì naŋa ndow na fə̂ u ghaa u səŋi wə idəŋ, n luʼu key tədzî nsə səsoʼo tə way ni kwu, ghə̂ a tsɔŋɔ a way ni ndow tsɔŋ soʼo. 21N təŋkey, wù gaʼa kə fə̀ŋ n luʼu key fə̂ u wi u səŋi u loʼnə tii.
22Sə̂ a wù a loʼ tə̀ a loʼ kədaa tə̀ wû u wi wə udzəm. Abə sə̂ ghə a loʼ kədzuŋ, wû wə udzə̀m wə i loʼ n sə̂ a zow ghə. 23Abə sə̂ ghə a way kədzuŋ, wû wə udzə̀m u sey loʼ nə kələm. Sey abə daa key kə loʼnə n kow wɔ lòʼ kələm, ləm kə tii kə i faalə.”
24“Wù kəfwaʼ way ni keeli dzə ghə mûkəbii abəghə nəŋə imɔʼ. Abə tə ghəŋənə sey, tə i ləghə umɔʼ, bàa u loʼ wey, nkee tə i ngii ngɔɔmə umɔʼ, koʼo kìi u loʼ wey. A loʼ soʼo ighələ nə̀, wù way ni ləghə Zə̀ kə, tə i ləghə soʼo khəə wə.”
Kə ghaa nə̂ tsəŋənə, gaʼ na fə̀ŋ n kow Zə̀ kə
(Luk 12.22-31)
25Yeso n daŋŋə dza tsu nə̀, “N dza n dza bə tə̀ ghaa nə̀, kə fə̀ŋ nə baŋanə ghaa n muu i ghaa nə̀ ghaa i zə̂ə kee, nkee nə̀ ghaa i mə̂ə kee tə̀ ghaa ni doʼo utaw. Kə fə̀ŋ nə̂ baŋanə ghaa n vən fə uwû fə ghaa, nə̀ ghaa i dzə̀ŋŋə kee. N dza ni keeli imuu, i tsəghəshi ni keeli ufəzəə ə? N dza vən fə uwû fə wù fə tsəghəshi təndzə̂ ə? 26Koʼo na nnən mə ə, ghə zəghə way fəzəə wə, ghə kpey naŋa soʼo way fəzəə wə nə utaa, ghə nam kpuu koʼo tsə way dzəŋ, n təŋkey, Bày ghaa idəŋ laalənu tə̀ ghə. Tə i laalənu tə ghaa, n təŋkey, ghaa buʼ tsəghəshi nnən. 27A loʼ ndee n fəŋŋə kə ghaa tə loʼnə ni kuu kpiʼi nyaŋi fə inəŋə n muu i wi fa n mbi a dza tə mə tɔʼ khə baŋ kə fəŋ ə?
28Ghaa wû i ghaa baa fəmmə i kee zə bòʼ ghəə a təndzə̂ ə? Koʼo ndòw na nghee tə ghìi u nyîmmə tii, ghə fwaʼa way ni keeli təndzə̂, ghə taŋi soʼo way ndzə̂ tə ghə tə. 29N nam kee dza bə tə̀ ghaa nə̀, kasə fɔ̀ɔ Solomun wən tə â ngii khənə ghaʼ zə, tə â khə way ndzə̂ tə dzuŋu tə tə̀ a loʼ kəghìi kəmɔ̀ʼ. 30Abə Zə̀ kə loʼ ni dzəŋə təndzə̂ n kow ghìi wən u nyim kɔʼɔ na, ambə tsətsə nə̀ ghə sàŋ, kpəghə maʼa nə uvəllə, tə i boʼo laalə ngee tə ghaa a? A loʼ nə̀ bəghəm i fə̀ŋ zey ghaa khənə tə Zə̀ kə, i ngii təbənu. 31Sey, kə̂ fə̀ŋ nə baŋanə ghaa nə̀ ghaa i zə̂ə kee, nkee nə̀ ghaa i mə̂ə kee, nkee nə̀ ghaa i dzəŋŋə kee. 32N təŋkey, ghə̂ ghey ghə ka bəghəm tə̀ Zə̀ kə, ghə nyəŋə n baa fə̂ u wən. Bày ghaa idəŋ khənu nə̀ ghaa ləghə soʼonu ni keeli fə u tii wə udzəm. 33Fəd ndəmi ndow na wû zə n ghəə a fɔɔ u Kəzə̀ nsə ni loʼ tsətsəghə n sə K-a-zə̀, ghaa i keeli may fə̂ u tii wə udzə̀m. 34Sey, kə̂ fə̀ŋ nə baŋanə ghaa nə̀ tsətsə î doʼlə ngee, n təŋkey, tsətsə khə soʼo ndəmə chɔd n wi n nəŋ. Tsuʼ fə loʼ fə way fə laʼanə fəm kə wi kə.”
Chwazi Kounye ya:
Matyo 6: WEH
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2022 CABTAL