Jɔn 13
13
Yeso sow fuu i ngəd tə wi
1N tsuʼ fey Zə̂ kə taa zaʼa kə bwu bweelinə tii, Yeso n khə zey nə̀ nəŋə zə n kpii tə̀ wi ni zəghə maʼa mbi zən, tə ndow dzəŋŋə n səə Bày. Yeso â ngii ləghə ghə̂ ghən tə â loʼnə ghi ghə fa n mbi, tə n dii may tsu ləghə i wi tə̀ ghə ni ndow kùm n tsuʼ fey tə khə ni zəghə ghə.
2Nghee Yeso sə zə̂ənə n kuubə tə ghi ngəd tə wi tə, à n loʼ nə̀ vəətsəə ghə n nyi bəəbə n fə̀ŋ ə Judas Iskariɔt, tɔŋŋə waa Shimun nə̀ tə ndow fìi fuu Yeso. 3Yeso â khənu nə̀ Bày n fuu naŋa ghəə ghə adzəm n wɔɔ a wi. Tə n khə soʼo nə̀ tə â nuu bə n səə Zə̀ kə, tə ndow dzəŋŋə n səə Zə̀ kə. 4Sey, tə n buu naŋa tsu izə̂, ghaʼ nuu kɔʼ, tsɔʼ kɔʼ ndzə tə wi tə bii tə, gaʼ naŋa tsu, kow nyi ndow badali n sad i wi. 5Tə n daŋŋə tsow kuu tsu mmuu n towfəkaŋa, kaʼ ndow ni sow fuu i ngəd tə wi tii, zədlə tsu n badali zey tə â kow keelinə nə isad. 6Ambə Yeso bə kuum bə n səə Shimun Pita, Pita n bəb tə̀ wi nə̀, “Mûkəbii, wə dza i sow soʼo fuu zuŋ ə?”
7Yeso n beeli ndow wi nə̀, “Wə kam way ni zowkeeli ghəə zən n ghəŋŋənə nya, wə i wɔ̀ zowkeelinu.”
8Pita n dza tə̀ wi nə̀, “Wə nə sow koʼ way fuu zuŋ zə.”
Yeso n dza tə wi nə̀, “Abə n ka sow fuu zə, a sey loʼ nə̀ ghi wɔ kəm khə way ghə i loʼ zə.”
9Pita n kəm dza tə̀ wi nə̀, “Mûkəbii, abə a loʼ sey, ka kad sow kə fuu zuŋ zə, baa sow tsu soʼo wɔɔ ghuŋ ghə nsə tow kuŋ kə!”
10Yeso n dza tə̀ Pita nə̀, “Abə wù loʼ nə̀ tə n wû u sow, tə khə kə ni kali kɔʼ ifuu kuum nə̀ wû u wi udzəm u zownu. Ghaa adzəm ghaa zownu, a may kə wù umɔʼ n fəŋŋə kə ghaa tə dzəənə.” 11Tə Yeso ni dza shi bə nə̀, “A way dzə ghaa adzəm ghaa zownə”, â loʼ n təŋkey, tə â khə zeynu wù wey tə i fìilə fuunə wi.
12Ambə Yeso sow may tsu fuu i ngəd tə wi tə, tə n ney dzəŋə dzəŋŋə kɔʼ ndzə̂ tə wi, ndow doʼo dzəŋŋə ndow n bənə kə wi. Tə n daŋŋə bəb ndow tə̀ ghə nə̀, “Ghaa n zowkeeli ghəə ghən n ghəŋənə fa n kow ghaa a? 13Ghaa tɔŋŋə mə nə̀ a loʼ Wù dìi, tɔŋŋə soʼo nə̀ a lo Mûkəbii. À loʼ isəŋə, ghaa tɔŋŋə dzɔbnu, n təŋkey, a loʼ fə key n loʼnə ghii kə. 14Abə mə wən n loʼnə Mûkəbii ghaa nsə Wù dii ghaa, loʼ ni sow fuu i ghaa, a sey loʼ nə̀ ghaa khə soʼo ni sow fuu i ghə̂ a loʼ ghə. 15Fwaʼ kən n fwaʼnə n kow ghaa, n sey moʼ dii bə fwaʼ key ghaa khə ni fwaʼa ghii kə. 16N sa kùm dza bənu tə̀ ghaa, wù kəfwaʼ u lo u way ni tsəghəshi mûkəbii wi, wù tûm way soʼo ni tsəghəshi wù wey tə tûmnə wi. 17Nya wən ghaa khənə isəŋə zən, Zə̀ kə i fuu ghaa n buulə zə abə ghaa dii ndow isəŋə i tii zə n ghəə a ghaa a ghəŋŋə ghə.”
18Yeso n dza kpiʼi ndow tə̀ ngəd tə wi tə nə̀, “N ghəə ghən ghɔɔmə dzə way tə̀ ghaa adzəm, n təŋkey, n khənu ngəd tuŋ tey n sày shi bənə. À kee loʼ nə̀ ghɔɔmə i Kəzə̀ i khə ni bə shi isəŋə nə̀, ‘Wù wey tə zə̂ə dzəŋi ghi mə, à loʼ wi tə kəm fəd doʼo bənə wù təngəmə wuŋ.’ 19N dza naŋa zey bə ghəə ghən tə̀ ghaa, nə̀ abə ghəə a tii a bə shi kɔʼnə, ghaa i bəghəm fuu nə̀, ‘N loʼ wù wey n dza nə̀ n loʼ wi.’ 20N kùm dza bə tə̀ ghaa nə̀, wù wey tə bəghəm naŋanə wù wey n tûm bənə, tə sey ney naŋa soʼo mə, nsə nə̀, wù wey tə bəghəm naŋanə mə, tə sey bəghəm naŋa soʼo wù wey tə tûm bənə mə.”
Yeso dza zey nghee ghə i fìilə fuunə wi tii
(Mat 26.20-25; Mak 14.17-21; Luk 22.21-23)
21Ambə Yeso ghɔɔmə may tsu ghəə ghən, ghəə a tii ghə ngii fəmmə wi n fə̀ŋ, tə n daŋŋə dza shi bə n dzə̀ i taw zə nə̀, “N kùm, dza bə tə̀ ghaa nə̀, wù ghaa umɔʼ i fiilə fuu mə.”
22Ngəd tə wi tə n laalə baalə iwû, ghə məʼlə wù wey Yeso dzanə. 23Ngəd zey Yeso â ngii ləghənə n doʼ n teybow i wi. 24Shimun Pita n fòʼ ndow awɔɔ tə̀ wi nə̀ tə bəb ndow tə̀ Yeso nə̀ tə dza bə wù wey tə dza i fìi fuu wi.
25Ngəd ə tii n səŋŋə kəŋə ndow n səə Yeso, bəb ndow tə̀ wi nə̀, “Mûkəbii, a loʼ ndee, tə i fìi fuunə wɔ ə?”
26Yeso n dza nə̀, “À loʼ wù wey mə i fuu ndow baa kən tə wi abə n tsum kɔʼ nûmə kə tii.” Tə n daŋŋə ney kɔʼ boʼo fə baa, tsum kɔʼ kənûmə tii, fu ndow tə̀ Judas, waa Shimun Iskariɔt. 27Nghee Judas zə̂ kɔʼnə baa fən, Satan n nyi ndòw n kow wi. Yeso n daŋŋə dza tə̀ wi nə̀, “Zaŋŋə ghəŋə ndow ghəə zey wə dza i ghəŋə.” 28Wù umɔʼ fu n ndaw n ka tsəm zowkeeli ghəə zey Yeso dza ndow tə̀ Judas. 29Nghee Judas â loʼ wù wey tə â naŋŋənə mbəghə kə ukhəə kə, ngəd tə wi tə loʼ tey n moʼo kə nə̀ Yeso sey dza nə̀ tə ndow zuu bə fə kə loʼ kə ni zə̂ Kəzə̀ tii, nkee nə̀ tə fuu ndow fə kə loʼ kə tə̀ ghə̂ a laa ghə.
30Nghee tə̀ Judas daŋŋə ney zə̂ ndownə boʼo fə baa fey, tə n nuu shi ndow. À n loʼ nə tsuʼ wə n dzə.
Yeso fu laŋ kə fəghə kə tə̀ ngəd tə wi tə
31Ambə Judas nuu shi ndow, Yeso n dza tsu nə̀, “Nəŋə zə n kpi tə̀ Zə̀ kə ni fuu nkɔʼlə tə̀ Waa Wù sɔŋtsuʼ, sey nə̀, Zə̀ kə i keeli soʼo nkɔʼlə n bam i wi. 32Abə Zə̀ kə loʼ ni keeli nkɔʼlə n bam i Waa wi, a sey loʼ nə̀ Zə̀ kə i fuu soʼonu kɔʼlə mə tə̀ Waa wi, tə fuu tən kə kɔʼlə n tii mə n nəŋə i tii zə. 33Waa ghuŋ ghə, n kəm ngii khə way nəŋə zə ni doʼo fa ghi ghaa. Ghaa i kəŋə mə, kəŋə kii. N nam dza bə tə̀ ghaa ghə i mɔʼɔ zey mə â dzanə tə̀ ngəd tə Təjuu tə nə̀, ‘Luʼu key n ndownə tii, ghaa way ni bə fu.’ 34N fuu bə ghaa n laŋ kə fəghə kə, laŋ kə tii kə loʼ nə̀, ghaa i ləghə tiilə wû i ghaa zə. Ghaa khə ni ləghə tiilə wû i ghaa zə ighələ tə̀ n ləghənə ghaa. 35Abə ghaa khə ləghə zə n wû i ghaa, aghə̂ adzəm ghə i daŋŋə koʼ keeli bə nə̀ ghaa loʼ ngəd tuŋ.”
Yeso dza zey nə̀ Pita i tuu maʼa wi
(Mat 26.31-35; Mak 14.27-31; Luk 22.31-34)
36Shimun Pita n bəb tə̀ wi nə̀, “Mûkəbii, wə dza i ndow ghee?”
Yeso n beeli ndow wi nə̀, “Luʼu key n ndownə tii, wə way dzə ni bə nya n baa mə. Wə i wɔ dzûmə bənu mə.”
37Pita n bəb tə̀ wi nə̀, “Mûkəbii, a loʼ kee wə dza nə̀ n way ni bə n baa wɔ nya ə? Mə n bəghəm ni kpu n baa wɔ.”
38Yeso n bəb tə̀ wi nə̀, “Wə dza bə nə̀ wə loʼnu ni kpu n tow kuŋ ə? N kùm dza bə tə wɔ nə̀, tə mwaʼ kə ni bəd tɔŋ, a i loʼ nə̀ wə n mə tuu maʼa tənəŋə tətəghə.”
Chwazi Kounye ya:
Jɔn 13: WEH
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2022 CABTAL